“Эрдэнэт үйлдвэр” ТӨҮГ-ын үйлдвэрлэлийн төлөвлөгөөний гүйцэтгэлийг хэлэлцдэг Сар хаалтын хурал өчигдөр боллоо. Дөрөвдүгээр сард үйлдвэрлэлийн үзүүлэлт хэрхэн биелсэн талаар болон энэ зун хийгдэх онцлох ажлын талаар Үйлдвэрлэлийн хэлтсийн дарга Т.Түмэн-Өлзийтэй ярилцлаа.
-Дөрөвдүгээр сарын үйлдвэрлэлийн төлөвлөгөө хэрхэн биелсэн талаар мэдээлэл өгнө үү?
-Тавдугаар сарын нэгний өдөр уламжлал ёсоор маркшейдер хэмжилт хийж, үйлдвэрлэлийн төлөвлөгөөний гүйцэтгэлийг бодож гаргалаа. Төлөвлөгөөнөөс 50 мянган м3 уулын цул илүү гаргаж, биелэлт 102,1 хувьтай, 8300 м3 хөрс илүү хуулж, биелэлт 100,8 хувьтай, нийт хүдэр олборлолт 108 мянган тонноор давсан, биелэлт 103,3 хувьтай гарсан. Хүдэр өгөлт +95 мянган тонн, биелэлт 103,1 хувьтай, 270 мянган тонн исэлдсэн хүдэр олборлосон нь төлөвлөгөөнөөс 13 мянган тонноор давсан. Өрөмдлөгийн хэмжээ 430 тууш метрээр давж, биелэлт 100,9 хувьтай гарлаа. Ачаа эргэлтийн хувьд 23 сая 400 мянган тонн/км гүйцэтгэлтэй. Баяжуулах үйлдвэрт 3 сая 51 мянган тонн хүдэр боловсруулсан нь 100 хувийн биелэлттэй байна. Сарын хугацаанд хүдэр дэх зэсийн агуулга, металлын агуулга өндөр байлаа. Үүнийгээ дагаад баяжмал гаргалт, металл авалт ч харьцангуй өндөр гарсан. Ер нь дөрөвдүгээр сард Баяжуулах үйлдвэрт нийлүүлсэн хүдрийн баяжигдах шинж чанар сайн байсан. Иймээс экспортод төлөвлөгөөнөөс илүү баяжмал ачлаа.
-Тухайлбал..?
-Дөрөвдүгээр сард хуурай жингээр 50 мянга 957 тонн зэсийн баяжмал, 499,2 тонн молибдены баяжмал үйлдвэрлэсэн. Энэ нь төлөвлөгөөнөөс 1777 тонн зэсийн баяжмал, 115 тонн молибдены баяжмал тус тус илүү үйлдвэрлэсэн үзүүлэлттэй байна. Сарын хугацаанд 852 вагон ачсан нь төлөвлөгөөнөөс 39 вагоноор давсан. Мөн 28 багц молибдены баяжмал гадаад худалдаанд ачихаас 32 багцыг ачсан. Ингээд хуурай жингээр төлөвлөгөөнөөс илүү 2304 тонн зэсийн баяжмал, 176 тонн молибдены баяжмал экспортод ачууллаа. Ингээд дөрөвдүгээр сарын үйлдвэрлэлийн төлөвлөгөөт бүх үзүүлэлтийг 100, түүнээс дээш хувиар давуулан биелүүлсэн хамт олондоо баяр хүргэж, ажлын амжилт хүсье!
-Үйлдвэрлэлийн төлөвлөгөөт үзүүлэлтийг бүрэн биелүүлэхэд тулгамдаж буй асуудал бий юу?
-Уулын цул тээвэрлэлтийн хүнд даацын өөрөө буулгагч авто машины хүрэлцээ тааруу байгаа. Бид 2022 оны худалдан авалтын тодотголд дөрвөн нэгж өөрөө буулгагч автомашин худалдан авахаар төлөвлөсөн. Энэ оны төлөвлөгөөнд мөн зургаан нэгж авто машин шинээр худалдан авахаар тусгасан. Гэвч худалдан авалтын үйл ажиллагаа удаашралтай, тендерт оролцож байгаа компаниуд гомдол санал гаргаснаас улбаалаад 2022 оны захиалгын авто машинуудаа худалдан авч чадахгүй байна. Энэ нөхцөл байдлыг урьдчилан тооцоод нэгдүгээр улиралд хамгийн бага уулын цулын хэмжээ төлөвлөсөн байсан. Амжилттай давсан. Хоёрдугаар улирлын эхний дөрөвдүгээр сарын төлөвлөгөөг техник зохион байгуулалтын боломжит бүхий л арга хэмжээг авч хэрэгжүүлсний үндсэн дээр тасалдалгүй биелүүлж чадлаа.
-Техник зохион байгуулалтын ямар арга хэмжээ авч ажилласан бэ?
-Наад захын дөрвөн жишээ дурдахад, бид уулын цул тээвэрлэлтийн дундаж зайг ойртуулж явж байна. Аж ахуй, үйлчилгээнд явдаг 40 тонны даацтай таван белазыг хоёрдугаар сарын нэгнээс уулын цул тээвэрлэлтэд тогтмол ашиглаж байна. Мөн 130 тонны белаз авто машиныхаа оношилгоо, үйлчилгээ, засварыг уурхайд явуулж байна. Түүнээс гадна саяхнаас бид тэсэлгээний хуваарьт өөрчлөлт оруулсан. Урд нь зөвхөн баасан гарагт тэсэлгээ хийдэг байсан бол белазын сул зогсолтыг багасгах зорилгоор долоо хоногт хоёр удаа буюу лхагва, баасан гарагт тэсэлгээ явуулж байгаа. Иймэрхүү техник, зохион байгуулалтын арга хэмжээ авч хэрэгжүүлснээр бид уулын ажлын төлөвлөгөөг биелүүлж явна.
-Хавар, зуны бэлтгэл хангах хүрээнд онцлох ямар ажлууд хийгдэх вэ?
-301 ажил, арга хэмжээ бүхий төлөвлөгөө бий. Одоогоор 19 хувийн гүйцэтгэлтэй явна. Хаягдлын аж ахуй дээр онцлох нэлээд ажил хийгдэнэ. Хамгийн том ажил нь шинээр 16-р далан барих. Энэ ажлын хүрээнд уулын цулаа бэлтгэж байна. Геологи, хайгуулын экспедицээс хоёр блок дээр өрөмдлөг хийж, нэг блок дээр тэсэлгээ хийсэн. Энэ сард дахин тэсэлгээ хийнэ. Мөн Хаягдлын аж ахуйн 1-р насосыг сольж байна. Дахин 18000 м3-ын хүчин чадалтай насос шинээр суурилуулна. Шүүн хатаах хэсэг дээр зэсийн даралтат шүүлтүүр шинээр солих ажил үргэлжилж байна. Дөрөвдүгээр сард төв корпусын 1А тээрмийг сольж хугацаанаас нь өмнө ашиглалтад оруулсан. 72 цагийн туршилт тохируулгын ажил амжилттай явагдаж, төлөвлөгөөт цагийн ачааллаа аваад хэвийн ажиллаж байна.
-“Их зогсолт”-ыг хэзээ төлөвлөсөн бэ? Бэлтгэл хэр хангагдаж байна?
-Бид “их зогсолт”-ыг 6-р сарын 30-ны өдрийн 20:00 цагаас долдугаар сарын 01-ний 20:00 цагийн хооронд 48 цагийн хугацаатай зохион байгуулахаар төлөвлөн бэлтгэл хангаж байна. Бэлтгэл ажил он гараад эхэлсэн. “Их зогсолт”-оор нийт зургаан цехийн 616 нэр төрлийн бараа материал захиалагдсан. 78 тендер зохион байгуулах ёстой. Үүнээс 28 гэрээ байгуулагдсан байна. Нэмэлтээр 18 тендер яаралтай зохион байгуулах шаардлага үүсэж байгаа. Ерөнхий механикаар ахлуулсан Ажлын хэсэг штабын зохион байгуулалтад ороод ажиллаж байна.
-Баярлалаа.
Нар 08:22 минутад мандаж 17:01 минутад жаргана.
Үс засуулвал: Өвчин ирнэ
Суудал: Огторгуй
