О.Алтансүх: Хор саармагжуулах бодис, хүнсний бүтээгдэхүүний цахим танилцуулгад идэвхтэй оролцоорой

“Эрдэнэт үйлдвэр” ТӨҮГ-аас хор саармагжуулах бодис, хүнсний бүтээгдэхүүний үйлдвэрлэгч, нийлүүлэгчдийг ирэх баасан гарагт болох цахим танилцуулгад урьж байна. Энэ талаар ХАБЭА-н хэлтсийн Эрүүл ахуйн товчооны дарга О.Алтансүхээс тодрууллаа. 
-Энэхүү цахим танилцуулгын зорилгыг хэлнэ үү?
-Монгол Улсын ХАБЭА-н тухай хуулийн 28.1.9-д хөдөлмөрийн хортой, хэвийн бус нөхцөлд ажил үүрэг гүйцэтгэдэг ажилтныг хор саармагжуулах бодис, хүнсний бүтээгдэхүүнээр хангах үүрэгтэй. Иймээс Эрдэнэт үйлдвэрийн холбогдох ажилтнууд үйлдвэрлэгч, нийлүүлэгчдээс бүтээгдэхүүнийх нь мэдээллийг сонсож, цаашид үйлдвэрийн ажилчдад олгох боломжийг судалж, оновчтой тодорхойлох зорилгоор цахим танилцуулга зохион байгуулахаар төлөвлөсөн.  
-Эрдэнэт үйлдвэрээс ямар ажилтнууд оролцох вэ?
-Хөрөнгө оруулалт, худалдан авах ажиллагааны бодлогын газар, Бараа материал худалдан авах ажиллагааны хэлтэс, ХАБЭАХ, Маркетингийн хэлтэс, Хуулийн хэлтсийн ажилтнууд, Бүтцийн нэгжүүдийн ХАБЭА хариуцсан ажилтнууд, Хөдөлмөрийн эрүүл ахуйч, Үйлдвэрчний эвлэлийн холбоо, “Эрдэнэт” сувиллын цогцолборын цех хариуцсан эмч нар, бусад мэргэжилтний төлөөлөл оролцоно. 
-Цахим танилцуулгад хэн хамрагдах боломжтой вэ?
-Монгол Улсад үйл ажиллагаа явуулдаг хор саармагжуулах бодис, хүнсний бүтээгдэхүүн үйлдвэрлэгч, борлуулагч, гадаадаас нийлүүлэгч байгууллагууд, орон нутгийн жижиг дунд үйлдвэрлэл, үйлчилгээ эрхлэгч аж ахуйн нэгжүүд, эрдэм шинжилгээ судалгааны байгууллагууд оролцох боломжтой. 
Цахим танилцуулга энэ сарын 14-ний өдрийн 14 цагт болно. Доорх хаягаар нэвтэрч оролцоорой. Zoom ID: 858 5816 9054, Pass:888
-Материалыг хүлээн авах хаяг, утас?
-Танилцуулах илтгэлийг өдөр бүрийн 08.00-16.00 цагийн хооронд хүлээж авна. И-мэйл хаяг: s.altankhuyag@erdenetmc.mn, 757-71536, 99175946 утсаар холбоо барьж болно. 
-Танилцуулгын үйл явц хэрхэн өрнөх вэ? 
-Бүртгэл хийгдсэний дараа оролцох байгууллага санал болгож буй хүнсний бүтээгдэхүүнийхээ онцлог шинж чанар, ач холбогдлыг 7 минутад багтаан слайдаар танилцуулна. Танилцуулга бүрийн дараа 10 минутад багтааж, бүтээгдэхүүний талаарх асуултыг чатаар авах авах бөгөөд, хариулт тайлбарыг чатаар болон амаар өгч болно. Бүтээгдэхүүний нууцлалыг хангаж, тухайн байгууллагын танилцуулгын дараа, дараагийн байгууллагын танилцуулгыг сонсох дарааллаар явна. 
-Цахим танилцуулгад ямар шаардлага тавигдах вэ?
-Power point программ дээр 10-аас ихгүй слайд бэлтгэнэ. 
-Байгууллага болон бүтээгдэхүүний үйлдвэрлэл, технологи ажиллагаа, түүхий эдийн гарал үүслийн мэдээлэл,
-Хүний эрүүл мэндэд эерэг нөлөө үзүүлсэн тухай клиник, эмнэл зүйн туршилт, судалгааны үр дүн, судлагдсан байдлын мэдээлэл,
-Бүтээгдэхүүний савлагаа, хэмжээ, хэрэглэх заавар, түгээлтийн хэлбэр зэрэг мэдээллийг багтаасан байна. 
-Мөн савлахгүйгээр ажлын байранд нь олгох боломжтой, карт уншуулах, хэрэглээг хянах төхөөрөмжтэй бол давуу тал болно.