А.АНХБАЯР: Тэмцээнд оролцож байгаа нийт тамирчдын 30 орчим хувийг Орхон аймгийн тамирчид бүрдүүлж байна

     Байт харваан спортын XV дахь удаагийн Заалны Улсын аварга шалгаруулах тэмцээн Орхон аймагт зохиогдож, тамирчид энэ амралтын өдрүүдэд цэц мэргэнээ сорин өрсөлдөж байна. Тамирчин хүнээс сэтгэл зүй болоод бие бялдар, тэсвэр хатуужил шаардсан тус тэмцээнийг аймгийн Засаг даргын Тамгын газар ивээн тэтгэж, Улсын Баатар “Эрдэнэт үйлдвэр” ТӨҮГ-аас заал зохион байгуулалт, бусад үйлчилгээгээр ханган ажиллаж байна. Мөн Монголын Байт харваан холбоо, Орхон аймгийн Байт харваан холбоо уг тэмцээний Ерөнхий зохион байгуулагчаар ажиллаж байгаа юм. Үйл явдлын мэдээлэл хүргэхээр Орхон аймгийн Байт харваан холбооны тэргүүн А.Анхбаяртай уулзаж ярилцлаа. 

       -Юуны өмнө танд энэ өдрийн мэндийг хүргэе. Улсын аварга шалгаруулах тэмцээний энэ жилийн онцлогийн талаар мэдээлэл өгөхгүй юу?
     -Байт харваан заалны Улсын аварга шалгаруулах тэмцээнд түүхэндээ хамгийн олон буюу 307 тамирчин оролцож, Орхон аймагт анх удаа зохион байгуулж байна. Өмнөх тэмцээнүүдийг өсвөр үе, бага нас, насанд хүрэгчид гэж ангилдаг байсан бол энэ удаагийн тэмцээнийг рекувр болон компаунд төрлүүдээр, U14, U18, U21, насанд хүрэгчид гэсэн дөрвөн ангилалд зохион байгуулж байна. Ингэснээр тухайн насанд 50-60, дээд тал нь 80-90 тамирчин өрсөлдөж байгаа нь медалийн чанар чансааг илтгэж байгаа юм.  

       -Тэмцээний явцын талаар мэдээлэл өгөхгүй юу?
     -Энэ сарын 23-ны өдөр тэмцээний урьдчилсан харваа хийгдэж, тамирчид оноолтоор хасагдах шат руу шилжсэн. Улмаар 24-ний өдөр тэмцээний хасагдах шатны, медалийн төлөөх хүртэлх бүх харвалт явагдаж дууслаа. Өөрөөр хэлбэл, хагас шигшээ харваа буюу 4 тамирчин медалийн төлөө өрсөлдөхөөр үлдэж байна. Тэмцээний эхний өдөр 9 тамирчин 60 сумны нийлбэрээр 540-өөс дээш онож, спортын Дэд мастерын болзол хангасан.
Бямба гараг буюу 25-ны өдөр тамирчид маань 2 төрөлд, 4 насны ангиллаар багийн болон хувийн төрөлд өрсөлдөнө. Тус өдрийн үдээс хойш нийт тамирчдад спортын сэтгэлзүй, бие бялдар, спортын мөн чанар, тамирчин хүний ёс суртахууны сэдвээр лекц семинар явагдана. Харин 26-ны өдөр тамирчдын хувь болон багийн төрлөөр медалийн төлөөх харвалтууд 10:00-17:00 цагийн хооронд явагдахаар төлөвлөсөн. 
       -Орхон аймгийн Байт харваан холбооны үйл ажиллагааны талаар мэдээлэл өгөхгүй юу?
     -Тэмцээнд оролцож байгаа нийт тамирчдын 30 орчим хувийг Орхон аймаг, Эрдэнэт хотын тамирчид бүрдүүлж байна. Манай холбоо дэргэдээ “Хангарди” спорт клуб болон Орхон аймгийн Биеийн тамир спортын газрын дэргэдэх “Ирээдүйн одод” бүрэн дунд сургуулийн клубыг нэгтгэдэг. Энэ дашрамд “Хангарди” клубээс бүх насны ангилалд, бүх төрөлд 40-өөд тамирчдын бүрэлдэхүүнтэй оролцож байгааг онцолмоор байна. Аль аль клуб маань тэмцээнийг сайхан өнгөлж байна. Медалийн төлөөх тоглолтуудаас их зүйл гарах байх. 

       -Энэ спортыг орон нутагт хөгжүүлэхэд юунд анхаарч байна вэ?
      -Байт харваан спортын хөгжлийг ярихад юун түрүүнд дунд хугацааны буюу өнгөрсөн 10 жилийн хугацааг авч үзэх нь зүй болов уу. Энэ хугацаанд Эрдэнэт үйлдвэр бодитой, маш том үүрэг гүйцэтгэсэн. “Хангарди” спорт клуб 2012 оноос өөрийн клуб, өөрийн тамирчидтай болсноор тив, дэлхийд нэрээ дуурсгасан тамирчдын тоо жилээс жилд нэмэгдэж, чанаржиж, өнөөдрийг хүрсэн. 
       -Тэмцээнд оролцогчдоос гадна энэ спортоор хичээллэж байгаа нийт тамирчдын тоо хэд хүрсэн бэ?
       -Орхон аймгаас төрөн гарсан 200-аад тамирчин бий. Эдгээрээс Олон Улсын хэмжээний мастер 3, Спортын мастер 10 орчим, Дэд мастер 30 орчим төрөн гарч, амжилт дагуулсан үнэтэй түүхийг бичилцээд байна. 
      -Ярилцсан танд баярлалаа. Ажлын өндөр амжилт хүсье.