Эрдэнэт үйлдвэр нийгмийн хариуцлагынхаа хүрээнд жил бүр нийт ажилтан, ахмадууд, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон ажилтнууд зэрэг тус үйлдвэрээр овоглодог бүх хүмүүсийг эрүүл мэндийн урьдчилан сэргийлэх үзлэгт хамруулдаг. Энэ жилийн урьдчилан сэргийлэх үзлэгийн зохион байгуулалт, онцлог, эхлэх хугацаа зэрэг асуудлаар “Эрдэнэт” сувиллын цогцолборын Статистикч эмч Ж.Эрдэнэчимэгээс тодрууллаа.
-Юуны өмнө өнгөрсөн 2021 оны эрүүл мэндийн үзлэгийн явц, хамруулалтын талаар товч мэдээлэл өгнө үү?
-Эрдэнэт үйлдвэрийн ажилтнуудыг эрүүл мэндийн урьдчилан сэргийлэх 2021 оны үзлэгт хамруулах ажил тухайн оны 7 дугаар сард эхэлж, энэ оны 3 дугаар сарын 16-ны өдрийг хүртэл үргэлжилсэн. Одоогоор Медипас эмнэлгийн бүтэц, зохион байгуулалттай холбоотойгоор түр зогсоод байна. Өмнөх оны урьдчилан сэргийлэх үзлэгт 6399 ажилтан хамрагдах байснаас 5972 ажилтан буюу 93 хувь нь орсон. Үлдсэн ажилтнууд үзлэгт хамрагдаагүй шалтгаан нь голдуу нурууны MRI, зүрхний титэм судас шалгах зэрэг үзлэг шинжилгээ хийдэг тоног төхөөрөмжийн эвдрэл гэмтэл, ачаалал, хүлээлт зэргээс болж хойшилсон хүмүүс байгаа. Ахмадуудын тухайд нийт 2550 ахмад настан бүртгэгддэг ч жил бүрийн хамрагдсан байдлыг аваад үзэхэд дунджаар 1600-1700 нь үзлэгт ордог. Сүүлийн 2 жилийн хувьд “ковид”-ын хорио цээр болон өөр тийш явсан зэрэг шалтгаанаар хамрагдаагүй байна. Энэ он гараад 605 ахмад хамрагдсан. Үйлдвэрлэлийн осол, мэргэжлээс шалтгаалах өвчний оноштой 365 хүнээс 225 нь хамрагдаж, 60 гаруй нь ороогүй. Ийм заалттай хүмүүсийн хувьд жил бүр хөдөлмөрийн чадвар алдалтын хувь, хугацааг сунгадаг учраас заавал хамрагдах шаардлагатай. Ингээд өнгөрсөн онд хамрагдах байсан ажилтан, ахмадуудаас 1000 гаруй хүн одоогийн байдлаар хамрагдаагүй гэсэн статистик дүн гарсан. Бид үзлэгт зайлшгүй орох шаардлагатай хүмүүсийг ойрын хугацаанд хамруулж, дуусгах ажлыг зохион байгуулж байна.
-Энэ оны урьдчилан сэргийлэх үзлэгийг хэзээ эхлэхээр төлөвлөж байна вэ?
-2022 оны эрүүл мэндийн урьдчилан сэргийлэх үзлэгийг ирэх 6 дугаар сарын 15-нд эхлэхээр товлосон. Энэ жилийн урьдчилан сэргийлэх үзлэгийг нэлээд өргөн хүрээнд, багцын сонголт сайтай, ажилтнуудын дунд зонхилж буй өвчлөлийг оношилж, илрүүлэх, урьдчилан сэргийлэх зорилготой дараагийн арга хэмжээг төлөвлөхөд дөхөм болох багц оруулах зэргээр шинэчилж хийхээр зорьж байна. Одоо үзлэгийн багцаа тодорхой болгох, хуваарь гаргах зэргээр бэлтгэл хангаж байна.
-Хэчнээн хүн хамрагдах вэ? Өмнөх оны тоонд өөрчлөлт орох уу?
-Манай үйлдвэрийн ажилтнууд дээр гэрээт ажилтнуудын тоо нэмэгддэг тул нийтдээ 6900 хүн бүртгэгддэг. Тэдний 320 орчим нь гэрээт ажилтнууд гэсэн үг л дээ. Мөн шинээр орсон ажилтнууд эрүүл мэндийн иж бүрэн үзлэгт хамрагдаад, ажилд ордог учраас эхний жилдээ хамрагдахгүй байж болно. Ингээд жилд 6300 хүн эрүүл мэндийн үзлэгт хамрагдахаар бүртгэгддэг. Энэ жилийн тухайд ч ийм бүртгэл хийгдэж байгаа.
-Өнгөрсөн оны багцын тоо 16 байсан. Энэ онд нэмэгдэх үү, эсвэл доторх оношилгоо шинжилгээний төрөл өөрчлөгдөх үү?
-Ярианыхаа эхэнд хэлсэн. Энэ жил багцын сонголтыг сайжруулах зорилготой байгаа. Багцын тоо бол хангалттай. Бид тоог нэмэх гэхээсээ багц доторх төрөл, тухайлбал үе мөчний өвчний онош шинжилгээг багц бүрд оруулах чиглэлтэй байна. Сүүлийн үед манай ажилтнуудын дунд үе мөчний өвчлөл ихсэж байгаа нь өмнөх жилүүдийн үзлэгийн үр дүнд харагдсан. Тиймээс ажил мэргэжил, хөдөлмөрийн нөхцөл байдлаас шалтгаалсан байх магадлалтай өвчлөлийг илрүүлэх зорилготой багц үзлэг байх нь зүйтэй гэсэн дүгнэлтэд хүрсэн. Мөн өнгөрсөн оны давхардсан, ижил багцыг өөрчлөх, зонхилох төлөвтэй өвчлөлүүдийг илрүүлэх, онош тодруулах зэргээр нарийвчлан оруулж өгөхөөр бэлтгэж байгаа. Түүнчлэн, үзлэгийн өдрийн ачааллыг илүү боловсронгуй зохицуулна. Учир нь зарим тоног төхөөрөмжийн хувьд бүр тодруулбал MRI шинжилгээний аппарат нэг өдөрт хоёр хүн л оношлох хүчин чадалтай байдаг. Энэ аппаратад орох хүний тоо олон, хүлээлт үүсдэг. Үүнээс шалтгаалаад ажилтнууд бухимдах тохиолдол цөөнгүй. Тиймээс энэ асуудлыг боломжит байдлаар зохион байгуулж, багцын төрөл зүйлийг шинэчилж, оновчтой болгох замаар зохицуулалт хийхээр ажиллаж байна.
Нар минутад мандаж минутад жаргана.
Үс засуулвал: 
Суудал: 
