• Уурхайн төлөвлөлтийн цогц систем нэвтрүүлнэ

      Эрдэнэт үйлдвэрийн Геологи, маркшейдерийн хэлтэс, Ил уурхайн инженерүүд уурхайн оновчлол, төлөвлөлтийн үйл ажиллагаанд дэлхийн жишигт нийцсэн цогц систем нэвтрүүлэхээр ажиллаж байна. Өмнө нь, Эрдэнэт үйлдвэрийн уурхайн урт хугацааны төлөвлөлтийг Оросын мэргэжилтнүүд хийдэг байсан бол 2016 оноос Монгол инженерүүд уурхайн оновчлол, төлөвлөлт хийх болжээ. Тэд Австралийн “МАРТЕК” компанийн мэргэжилтнүүдтэй өдөр бүр онлайнаар холбогдож уг системийг эзэмших, уул уурхайн төлөвлөлтийн цогц программ хангамжийг үйлдвэрлэлд нэвтрүүлэхээр хамтран ажиллаж, мэдлэг туршлагаа солилцож байна. Энэхүү систем нь хоёр үндсэн хэсэгтэй бөгөөд нөөц, баялгийн үнэлгээ хийж уурхайн оновчлол, эцсийн дизайныг тооцоолох, олборлолтын урт хугацааны стратеги, дунд хугацааны тактик төлөвлөлтийн инженерийн зураг төслийг боловсруулах юм. Эдгээр системийг нэвтрүүлснээр ордын үр ашиг, өнөөгийн үнэ цэнэд суурилсан уурхайн оновчлол, хөрөнгө оруулалтыг тооцож  төлөвлөлтийг илүү өргөн хүрээнд, нарийвчлал сайтай хийхээс гадна дэлхийн зах зээлийн болон түүхий эдийн үнийн хэлбэлзэлд тохирсон бизнесийн үйл ажиллагааны стратеги боловсруулах, компанийн удирдлагыг хэрэгтэй мэдээллээр хангах юм. Шинэ систем нэвтрүүлэх ажлын хүрээнд зарим шаардлагатай багаж, тоног төхөөрөмжүүд, өндөр хүчин чадал бүхий дөрвөн компьютер ажиллагаанд оруулжээ. М.Одгэрэл Фото. Б.Баттөгс Дэлгэрэнгүй...
  • Өнөөдөр 04 дүгээр сарын 09

    Мэдүүштэй... 1.Өнөөдөр жилийн 99 дэх өдөр. Он дуусахад 266 хоног үлдлээ. 2.Эрдэнэт хотод агаарын хэм өдөртөө 0-11 градус дулаан, шөнөдөө 0-2 градус хүйтэн, багавтар үүлтэй, салхины хурд 1-5 м/сек байна. 3.Аргын тооллын 4 сарын 9. Бархасбадь гараг. Билгийн тооллын 16. Салхины эх одтой, хар морь өдөр. Өдрийн наран 6 цаг 14 минутад мандан, 19 цаг 33 минутад жаргана. Тухайн өдөр бар жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр найз нөхдийг түшиж элдэв үйлийг түргэн бүтээх, бүтээл туурвил эхлэх, бизнес эхлэх, цар ихтэй үйлийг эхлэх, бясалгал хийх, доодсыг асран өглөг, хандив өргөх, лусыг тахих, тангараг тавих, гэр байшингийн суурь тавихад сайн. Гэр бүрэх, хэрүүл тэмцэл хийх, сэтгэлд сэвтэй газар очиход муу. Өдрийн сайн цаг нь хулгана, үхэр, туулай, морь, бич, тахиа болой. Хол замд явах хүмүүс хойд зүгт мөрөө гаргавал зохистой. Үс шинээр үргээлгэх буюу засуулахад тохиромжгүй. 4.Дэлхийн зах зээл дээр нэг тонн зэс 4976 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2781, евро 3024, БНХАУ-ын юань 394, ОХУ-ын рубль 36, Японы иен 25 төгрөгтэй тэнцэж байна. Эрдэнэт үйлдвэрийн түүхэнд энэ сар... 1977 оны 4-р сар Эрдэнэт хотын орон сууцуудыг хэрэглээний халуун усаар төвлөрсөн шугамаас хангаж эхлэв. “Монгол-Зөвлөлтийн хамтарсан уул уурхайн баяжуулах “Эрдэнэт” үйлдвэрийн ашиглалтын үеийн бэлтгэлийг эрчимжүүлэх арга хэмжээний тухай” МАХН-ын Төв хорооны Улс төрийн товчооны 83 дугаар тогтоол гарчээ. 1978 оны 4-р сар Бүх Холбоотын Өнгөт төмөрлөгийн нэгдлийн дарга Л.А.Баулин тэргүүтэй төлөөлөгчид Эрдэнэт хотод зочилжээ.  1979 оны 4-р сар БНМАУ-ын уул уурхайн үйлдвэрүүдийн удирдах ажилтны зөвлөгөөн Эрдэнэт хотод болов. 1980 оны 4-р сар Эрдэнэт хотод “Экран-414” телевизийн дахин дамжуулах станц суурилагдаж, Зөвлөлтийн төв телевизийн “Орбита”-ын программыг шууд үзэх боломжтой болов. Улаанбаатар-Дашинчилэн, Булган-Эрдэнэтийн радио-релейн шугамыг Эрдэнэт хотод хүлээн авчээ. 1979 оны ажлаар “Эрдэнэт” үйлдвэрийн хамт олон бүх ард түмний социалист уралдаанд шалгарч, 4 байгууллагын шилжин явах туг, диплом, мөнгөн шагнал гардан авав. Дэлгэрэнгүй...
  • Баяжуулагчид албан өрөөндөө дасгал хийж хэвшив

    Хүн төрөлхтөнд тархаад буй шинэ төрлийн корона вирусын халдвараас урьдчилан сэргийлж дархлааг дэмжих, ажилтнуудынхаа бие бялдрыг чийрэгжүүлэх зорилгоор Баяжуулах үйлдвэрийн арга зүйчид, Эрүүл мэнд, чийрэгжүүлэлтийн төвийн зохион байгуулагчид цайны цагаар ажиллагчдаа дасгал хөдөлгөөнд хамруулж байсан. Харин сүүлд хоёроос дээш хүн цуглавал бөөгнөрөл гэж үзэж хориглох шийдвэр гарснаас хойш тэд үйлдвэрийн газрын Ерөнхий захиргааны нэгдүгээр байрны захиргааны ажилнуудын албан өрөөнд өртөөчлөн Тайсо дасгал хийлгэж хэвшжээ. Японы Тайсо нь хүний биеийн бүх хэсэгт үйлчлэн булчин ясыг бэхжүүлж, хөдөлгөөний хомсдолоос сэргийлэх, дархлаа сэргээх ач тустай энгийн дасгал юм. Эрүүл мэнд, чийрэгжүүлэлтийн төвийнхөн энэ үйл ажиллагаагаараа удирдлагын манлайллыг нэмэгдүүлнэ гэж үзэж байна. Өнгөрсөн жил Баяжуулах үйлвэрийн арга зүйчид хэсгүүдийн дунд Тайсо дасгалын уралдаан зарлаж, 140-өөд хүн оролцож өрсөлдсөн юм. М.Одгэрэл Дэлгэрэнгүй...
  • Цагаан тоос цаашилсаар...

    Цагаан тоосны дэгдэлтийн талбайгаас сурвалжиллаа. Эрдэнэт үйлдвэрийн Хаягдлын аж ахуйд үйлдвэрлэлийн хаягдал булингаас үүсдэг хуурай элс, салхинд дэгдсэнээс “цагаан тоос”-ны асуудал эхлэлтэй. Энд 2000 гаруй га талбайг Хаягдлын аж ахуй эзэлдэг. Үүний 1400 гаруй га нь хуурай талбай бол 900 орчим га талбайг цагаан тоосны идэвхтэй дэгдэлтийн бүс гэдэг. Хамаг сайхны эхлэл хавар цагтай зэрэгцэн айлчилдаг хавсарга салхины улирал “цагаан тоос”-ны жинхэнэ ташуур болох нь бий. Чухам энэ л цаг үед Эрдэнэт үйлдвэрийнхэн ч цагаан тоос дарах ажлаа эрчимжүүлж, Байгаль орчин, ногоон хөгжлийн хэлтэс, Цагаан тоос дарах ажлын алба, Авто тээврийн цех, Ган бөөрөнцгийн цехийн хамтарсан багийнхан ажлын цагаа уртасгаж, амралтын өдрүүдээ хугаслан ажилладаг юм. Өнөө жил ч цаг агаарын онцлогт уялдуулан цагаан тоос дарах ажлаа үргэлжлүүлж байна. Энэ удаа биднийг газарчилсан Байгаль орчин, ногоон хөгжлийн хэлтсийн Хяналт, мониторинг хариуцсан инженер Н.Наранчимэг ярихдаа “Өнөөдрийн байдлаар, Баяжуулах үйлдвэрийн Цагаан тоос дарах байнгын ажлын алба, Ган бөөрөнцгийн цехийн нийт 11 хүний бүрэлдэхүүн цагаан тоосны талбайд хүч нэмэгдүүлэн, өдөр бүр 20 цаг хүртэл ажиллаж байна. Цагаан тоос дарахдаа бид олон технологийн аргыг хослуулан ашигладаг. Хөрсөөр хучих, кальци хлоридын уусмалыг устай хольж зориулалтын техникээр шүрших, нөхөн сэргээлтийн ажилд ашиглаж байсан хуучин тороор хуурай талбайг хучих гэх зэрэг янз бүрийн хэлбэрээр дарж байна. Хаягдлын аж ахуйд Авто тээврийн цехийн 40 тонны даацтай гурван БелАЗ байнга ажилладаг. Эдгээр техникээр өдөрт 50 орчим удаа ус зөөвөрлөж, шүршигч төхөөрөмжөө цэнэглэн талбайг норгож байна. Бид өнгөрсөн хавраас поликулиант буюу холигч бодис ашиглан барьцалдуулах технологийн арга туршиж эхэлсэн нь үр дүнтэй болж, нийт талбайнхаа 80 хувийг нь дараад байгаа. Одоо үлдсэн 20 хувийг дарна. Энэ хэсэг нь талбайн булан тохой учраас хүнд даацын техникүүд элсэнд шигдэх, техникийн боломж хүрэлцэхгүй, технологийн онцлог зэргээс шалтгаалан  хүндрэлтэй байдал үүсгэдэг. Тиймээс энэ хэсгийн талбайд хүрч дарах ажлыг зохион байгуулж байна. Өмнө нь салхины хурд 4 метр секунд хүрэх төдийд л тоос дэгдэж эхэлдэг байсан бол одоо 12 метр секунд хүртэл хурдтай салхинд зөвхөн үлдсэн 20 хувийн талбайгаас цагаан тоос босож байгаа” гэсэн юм.    Цагаан тоос дарах ажилд Эрдэнэт үйлдвэр жил бүр 1 тэрбум орчим төгрөг төлөвлөж зарцуулдаг. Үүний ихэнх хэсэг нь техник, тоног төхөөрөмжийн зардал аж. Цагаан тоос дарахад зардал, мөнгөнөөс гадна байнгын ажиллагаа шаардлагатай. Учир шалтгаан нь үйлдвэрлэлийн тасралтгүй үйл ажиллагаа, хүдэр боловсруулалтын хэмжээ өссөнөөр булинга элсний хуримтлалын талбай тэлж байгаатай холбоотой. Тиймээс ч үйлдвэрийн удирдлага Хаягдлын аж ахуйн ирээдүй, онцолбол шинэ аж ахуй байгуулах тухайд ч санал бодлоо хэлэлцэж буй.  Нөгөөтээгүүр, цагаан тоосыг бүрэн дарж дуусгахад үйлдвэрлэлийн хаягдлын технологийг өөрчлөх учиртайг үйлдвэрийн мэргэжилтнүүд ярьдаг. Өөрөөр хэлбэл, хаягдал булингын шинж чанарт нөлөөлөх технологи буюу өтгөрүүлэх аргын судалгаа болон техник эдийн засгийн үндэслэлийг Хөгжлийн хэлтсийнхэн Канад улстай хамтран хийж байна. Оюутолгойн үйлдвэрлэлийн хаягдал булинга нь 70 хувийн хатуулагтай байдаг бол манай үйлдвэрийнх 20 хувь байдаг байна. Тиймээс дээрх судалгааг хийж нэвтрүүлснээр шингэн булингыг өтгөрүүлэх,  нарийн ширхэгтэй тоос болж дэгдэх эрсдэлийг багасгах боломжтой болох юм. Ингэж зөвхөн өнөөдрөөр бус маргаашийг хэрхэн төлөвлөх талаар инженерүүд  урьдчилан олон талаас нь судалж байгааг дурдах нь зүйтэй. Цагаан тоосны талбайд ажиллаж буй ажилчид тоос дарах аргын үр дүнг газар дээр нь харж буйгаа хэллээ. “Кальци хлоридын уусмал буюу давстай усаар шүрших арга үр дүнтэй. Барьцалдамтгай чанартай учир наранд удаан хатдаг юм байна. Шүрших зориулалттай машин 8 тонны даацтай, нэг удаа 200 метр орчим талбайг шүршиж хүрэлцдэг” гэж Ган бөөрөнцгийн цехийн Цувих шугамын оператор Л.Өлзий ярив. Харин хөрсөөр хучих аргаар дарж буй хаялтын цэгээс Цагаан тоос дарах ажлын албаны Байгаль орчны инженер Б.Моломжамц мэдээлэхдээ “Өдөрт хоёр белАЗ 45-50 удаагийн эргэлтээр шороо зөөж байна. Хөрсөөр хучсан талбайд дахин хаягдал булинга нэмэгдэхгүй тохиолдолд цагаан тоос дахин дэгдэхгүй. Тиймээс хөрсөөр хучих нь найдвартай аргын нэг” гэсэн юм.    Цагаан тоос хүний эрүүл мэндэд муугаар нөлөөлж байгаа гэх яриа мэр сэр гардаг. Мэдээж, үүнд тодорхой бөгөөд үнэн хариулт хэрэгтэй. Тиймээс Эрдэнэт үйлдвэр нийгмийн хариуцлагаа хэрэгжүүлэх, хүн болон байгаль орчинд үзүүлэх сөрөг нөлөөллийг багасгах,  урьдчилан сэргийлэх бодлогын хүрээнд 2006 оноос эхлэн эрүүл мэндийн үзлэг шинжилгээг үе шаттай зохион байгуулж ирсэн юм. Эрүүл мэндийн үзлэгт цагаан тоосны бүс гэж нэрлэдэг Орхон аймгийн Баянцагаан, Говил баг болон Жаргалант сумын зарим нутагт амьдардаг ард иргэдийг хамруулдаг. Уг үзлэгийг жил бүр Орхон аймгийн ЗДТГ, Эрүүл мэндийн газар, “Эрдэнэт” сувиллын цогцолбортой хамтран зохион байгуулж, нарийн мэргэжлийн эмч нарын баг болон бусад хөндлөнгийн хяналтын байгууллагуудыг оролцуулж байна. Өнгөрсөн онд л гэхэд цагаан тоосны бүс нутагт оршин суудаг 488 иргэнийг эрүүл мэндийн иж бүрэн үзлэг шинжилгээнд үнэ төлбөргүй хамруулж, нарийн мэргэжлийн эмч нар зөвлөмж зөвлөгөө өгсөн. Шинжилгээг аймгийн Эрүүл мэндийн газрын эмч мэргэжилтнүүд хийж, цагаан тоос хүний эрүүл мэндэд шууд сөрөг нөлөө үзүүлээгүй болохыг тогтоожээ. Иргэдийн эрүүл мэндэд сөрөг нөлөө үзүүлж буй эсэх талаар олон төрлийн судалгаа байдаг ч нарийн мэргэжлийн багийнхны үнэлгээ хийлгэхээр Эрүүл мэндийн яаманд хандаад буй. “Ковид-19” халдвараас шалтгаалан энэ ажил түр хугацаагаар хойшлоод байгааг Орхон аймгийн Эрүүл мэндийн газрын Орчны эрүүл мэнд, нөлөөллийн үнэлгээ хариуцсан мэргэжилтэн М.Болормаа ярилаа.     Эрдэнэт үйлдвэр цагаан тоосноос салах ажлыг эрчимжүүлж, уурхайчид онцгой анхаарч, ажлын албаныхан, байгаль орчныхон хүч, сэтгэлээ нэгтгэн  ажилласнаар цагаан тоос цаашилж байна. Гэхдээ нэг удаа дараад зогсох бус, уйгагүй тасралтгүй ажиллагаа, бас цаг хугацаа л “цагаан тоос”-нд хэрэгтэй.  М.Балжинням Фото Б.Баттөгс  Дэлгэрэнгүй...
  • Шилдэг шинийг санаачлагч

      Эрдэнэт үйлдвэрийн 2019 оны шилдэг шинийг санаачлагч, Автотээврийн цехийн Эрчим зүйн албаны тэргүүлэх эрчим зүйч А.Батдорж, түүний хамт олны ажил үйлсийн тухай өгүүлэх нь.   1990 онд Эрхүүгийн Политехникийн дээд сургуулийг Уулын цахилгааны инженер мэргэжлээр төгссөн тэрбээр  яамны томилолт өвөртлөн Эрдэнэтийг зорьжээ. Завхан нутгийн хүү, сургаар мэдэх болсон энэ хотод хөл тавьсан тэр нэгэн өдрөөс хойш өдгөө 30 хаврыг үджээ. Засвар механикийн заводын Цахилгаан тоног төхөөрөмжийн засварын хэсгээс хөдөлмөрийн гараагаа мастераар эхэлж, 1995 он хүртэл ажилласан. 1995 оноос өнөөг хүртэл Авто тээврийн цехэд энэ л албанд  зүтгэсээр. Одоо тэр Эрчим зүйн 62 хүнтэй хүчирхэг албыг тэргүүлэн ажиллаж буй. Энэ алба Авто тээврийн байгууллагыг уур, ус, дулаан, цахилгаанаар найдвартай хангах үндсэн үүрэгтэй. Тэдний харьяанд Шатахуун түгээх станц, Технологийн тээврийн, Төрөл бүрийн маркийн  автомашины, Тусгай зориулалтын автомашины засварын газруудын машин угаалга, гараажууд ч харьяалагдана. Машин угаах, шатахуун түгээх гээд л үйлдвэрийн хэмжээний  нэн чухал албыг тэд залгуулдаг. Эднийхэн 2019 онд ажил үйлс, ХАБЭА, бүтээмж инноваци, сахилга дэг журам гээд л бүхий л үзүүлэлтээрээ Авто тээврийн цехийн бүх хэсгээс тэргүүлсэн. А.Батдоржоор ахлуулсан энэ баг үндсэн үүргээ чанд биелүүлэхээр ажлаа хязгаарлахгүй.  “Ахлагч”-ийн толгойд  шинийг эрэлхийлэх, эрчим хүчний орчин үеийн дэвшилтэт технологи нэвтрүүлж, зардал  хэмнэх бодол байнга эргэлдэнэ. Үйлдвэрийн ажлын байранд лед гэрэл суурилуулах төслийг эднийх анх хэрэгжүүлсэн гэдэг. Цахилгаан эрчим хүч ихээхэн хэмнэсэн энэ туршлагыг Эрдэнэт үйлдвэр даяар нэвтрүүлсэн. Тэр, автомашиныг шингэрүүлсэн шатдаг хийгээр цэнэглэх станц байгуулах санаачилга гарган ашиглалтад оруулснаар суудлын 20 машины зөвхөн түлшний үнийн зөрүүгээс сард 5,1 сая төгрөг хэмнэжээ. Түүний санаачилсан “Автомат мэдрэгчтэй шүршүүр” төсөл үйлдвэрийн хэмжээнд шалгарч хэрэгжсэн. Түүнчлэн “Нарны толин гэрэлтүүлэг” зэрэг төсөл хэрэгжүүлснээр ус, цахилгаан эрчим хүчийг ихээхэн хэмнэжээ. Өнгөрсөн жил цехийн ажлын байрны дулааны системийн 30 хувийг нь шинэчилжээ. Тухайлбал, багахан гурван өрөө тус бүрийг 22 квт-ын хөдөлгүүртэй  вентилятороор халаадаг байсан бол 7,5 квт-ын орчин үеийн ганц вентилятороор  эдгээр өрөөг дулаанаар үлээх системд холбожээ. Энэ хэрээр зардал буурах юм. Мөн машиныг шлянкаар угаадгийг халж, тусгай зориулалтын компрессор ашигласнаар усны хэрэглээ үлэмж багасжээ. Эрчим хүч хэмнэж, эх дэлхийгээ аврах үйлсэд эдний хамт олон жинтэй хувь нэмэр оруулж буй нь тодорхой. А.Батдорж хамт олноо байн байн магтана. Манайхны ихэнх нь залуус. Ажилдаа өөриймсөг ханддаг, санаачилгатай, хөдөлмөрч нь дэндсэн л гэнэ. “Үндсэн ажлынхаа зэрэгцээ төсөл санаачлах, түүнийг хэрэгжүүлэхэд бүгд л эрвийх дэрвийхээрээ оролцдог. Ажлын орчноо тохь тухтай, цэвэр цэмцгэр байлгах нь манайханд хэвшсэн ажил” гэв.  Бид БелАЗ-ын гарааж дахь Эрчмийнхний ажлын байрыг сонирхлоо. Энд угаас гарааж бус “Аптек” гэмээр цэвэрхэн, урлаг, спортын танхим мэт цэлгэр. Хэзээ ч ороод очиход бүртийх төдий ч тоос шороо, тос маслыг эндээс олж харахгүй. Эднийхний санаачилж, байгуулсан Ус хөргөх зориулалттай усан сан цэмцийнэ. Том ёмкост ашиглан хийсэн энэ сангийн эргэн тойрны бүх зүйл эмх цэгцтэй, цайвар цэнхэр өнгөөр будсан бетонон шал шил толь мэт. Түүн дээр усны дусал ч алга.  Танай үйлчлэгч их ажилсаг, нямбай хүн бололтой гэхэд: “Манайд орон тооны үйлчлэгч үгүй. Ажлаа хийчхээд ажлын байрыг цэгцэлж, цэвэрлэх нь манайхны сурсан зан” гэв.  Багаж олгодог, бас чөлөөт цагаа өнгөрөөх багахан өрөөгөөр орлоо. Тэнд байх бүхий л зүйлийг тэд өөрсдөө бүтээжээ. Диван, сандал, ширээ, бас багажийн шкафыг хаягдал поошик ашиглан хийсэн байна. Багажийн шкаф дотроо эргэдэг тавиур өлгүүртэй. Энд багаж бүр өөрийн байртай, эмх цэгцтэй.  Хэн, хэзээ, хэдэн ширхэг ямар түлхүүр авсныг тэмдэглэх дэвтэр ч үүн дотор байх. Энэ шкаф их эрэлттэй, үзэсгэлэн худалдааны үеэр үүнийг захиалж авдаг хэрэглэгч олон гэнэ.          Энэ гараажид цахилгаан хуваарилах дэд станц байрладаг. Түүнд төмөр сараалжин хашаа хийж, тэмдэг, тэмдэглэгээ, зураг плакат байрлуулсан нь аюулгүй ажиллагааны шаардлагад нийцсэн, өнгөлөг гоёмсог болжээ. Цехийн хэмжээнд   таван дэд станц байдаг бөгөөд бүгдийг нь ийм болгосон гэсэн. Ажлын байраа танилцуулж явахдаа А.Батдорж ажил хуваарилах өрөөг хамт олныхоо хандиваар тохижуулж байгаагаа ярьсан. Тансаг сайхан өрөөтэй болно оо, бид. Тохижуулж дуусахаар нь ирж үзээрэй. Ажилчид маань наръядаа аваад ажилд гарахдаа сэтгэл тэнүүн сайхан байх болно. Энэ ч ажлын бүтээмжид сайнаар нөлөөлнө гэв.      Бүтээмжийн менежер Ж.ПҮРЭВСҮРЭН: “Манай тэргүүлэх эрчим зүйч А.Батдорж их санаачилгатай, бүтээлч хүн. Шинэ зүйл санаачлах үйлст хамт олноо үлгэрлэн дагуулж, залуусыг хөгжиж, шинээр сэтгэхэд сэдэлжүүлэн ажилладаг. Эдний ажлын байр үлгэр жишээ, санаачилсан бүхэн нь үр ашигтай байдаг. Ноднин хийн компрессорыг Ил уурхайтай ойролцоо суурилуулах санаачилга гаргаж хэрэгжүүлсэн нь зардал хэмнэсэн сайхан ажил болсон” гэсэн юм. Бид Ил уурхай дахь БелАЗ-ын зогсоол дээр байрлах компрессорыг үзлээ. БелАЗ-ын гарааж дээр өндөр хүчин чадалтай хийн компрессор суурилуулж, хуучныг нь энд байрлуулжээ. Ингэснээр БелАЗ-ын дугуй хийлэх зайг ойртуулж, хэмнэлт гаргах үндэс болсон байна.  БелАЗ-ын нэг дугуй дунджаар 64,9сая төгрөг байдаг. Түүний зургаан дугуйг жигд хийтэй ажиллуулснаар даац хэвийн, эд ангид эвдрэл бага байж, ажлын бүтээмж дээшилж, эдийн засагт хэмнэлт гардаг аж. Компрессорыг Ил уурхайд ойртуулснаар дугуйн хийг нэмэх, шалгах тоо жилийн хугацаанд 120-оор нэмэгджээ. Энэ нь жолооч нар дугуйндаа хяналт сайн тавьж байгааг харуулж буй аж. Дугуй хийлэхээр БелАЗ-ын гарааж руу очиход 4, км, харин эндээс 2 км.  Хүдэр тээвэрлэдэг 30 БелАЗ жилийн турш 8269 км сул явалт хэмнэсэн байна. Үүнийг мөнгөн дүнгээр авч үзвэл 102, сая төгрөгийн дизель түлш, тос тосолгооны материал, авто дугуйн элэгдлийн зардлын бодит хэмнэлт гарчээ. Энэ төсөл зардлаа хасаад 95,2сая төгрөгийн үр ашигтай болсон гэж эдийн засагчид тооцжээ. А.Батдорж энэ төслөө улам сайжруулан төгс болгох зорилттой байгаагаа ярьсан. Эдний албаныхан Ил уурхай дээр зөөврийн ШТС барьсан бөгөөд үүнийхээ дэргэд компрессор байрлуулах гэнэ. Ингэснээр жолооч шатахуунаа авах хооронд дугуйн хийгээ шалгах, нэмэх боломж бүрдсэнээр илүү ихийг хэмнэнэ гэж үзжээ.    Зэсийн үнэ дэлхийн зах зээл дээр унаж буй энэ үед та бүхэн ямар хэмнэлт гаргах вэ? гэсэн асуултад тэр: “Гадна температур дулаарч буйг ашиглан хүн ажилладаггүй хэсэг, тухайлбал, гараажуудынхаа дулааныг 4-р сарын нэгнээс хэсэгчлэн хааж эхэллээ. Ингэснээр дулааны зардлыг 30 орчим хувиар хэмнэх тооцоо гарч байгаа” гэв.  Эрдэнэт үйлдвэрийн Шилдэг шинийг санаачлагч А.Батдорж эрчим хүчний хэрэглээнд байнга хяналт тавьж, дүгнэлт хийж,  уур, ус, цахилгаан, дулааныг үр өгөөжтэй ашиглаж, хэмнэх боломжийг эрэлхийлэн, ажлын байрыг тав тухтай байлгахын  төлөө  оюунаа чилээж  явна.         Я.Энхтуяа Фото: Б.Баттөгс Дэлгэрэнгүй...
  • Өнөөдөр - 04 дүгээр сарын 08

    Мэдүүштэй... 1. Өнөөдөр жилийн 98 дахь өдөр. Он дуусахад 267 хоног үлдлээ. 2. Эрдэнэт хотод агаарын хэм өдөртөө 4-8 градус дулаан, шөнөдөө 0-2 градус хүйтэн, бага зэргийн хур тунадастай, салхины хурд 5-6 м/сек байна.     3. Аргын тооллын 4 сарын 8. Буд гариг. Билгийн тооллын 15. Тэргүүн дагуул одтой, цагаагчин могой өдөр. Өдрийн наран 6 цаг 16 минутад мандан, 19 цаг 32 минутад жаргана. Тухайн өдөр үхэр, тахиа жилтнээ аливаа үйлийг хийхэд эерэг сайн ба могой морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба сүм дуганыг сэргээх, газар лусын зан үйл хийх, өр барагдуулах, гэр бүрэхэд сайн. Ургаа мод таслах, газрын ам нээх, гөлөг тэжээхэд муу. Өдрийн сайн цаг нь үхэр, луу, морь, хонь, нохой, гахай болой. Хол замд явах хүмүүс баруун хойш мөрөө гаргавал зохистой. Үс шинээр үргээлгэх буюу засуулбал өлзийтэй сайн.     4. Дэлхийн зах зээл дээр нэг тонн зэс 5067 ам.долларын ханштай байна. (Эх сурвалж: www.lme.com) 5. Монгол банкны энэ өдрийн нэрлэсэн ханшаар АНУ-ын доллар 2781, евро 3024, БНХАУ-ын юань 394, ОХУ-ын рубль 36, Японы иен 25 төгрөгтэй тэнцэж байна. Эрдэнэт үйлдвэрийн түүхэнд энэ сар... 1975 оны 4-р сар Монгол-Зөвлөлтийн Засгийн газар хоорондын комиссын хуралдаанаар Эрдэнэтийн бүтээн байгуулалтад зориулан нэмэлт хөрөнгө гаргах тухай асуудлыг хэлэлцэж шийдвэрлэв. 1976 оны 4-р сар 22-нд: Эрдэнэт хотын АДХ-ын гүйцэтгэх захиргааны 08 дугаар тогтоолоор Эрдэнэт хотод хивсний үйлдвэр байгуулах талбайг 13 га-гаар тогтоож, үүнээс 12 га-г үйлдвэрлэлийн зориулалтаар, 1 га-г хаягдал шингэний хөөс агуулах талбайгаар ашиглуулахаар тогтжээ. 23-нд: Эрдэнэт үйлдвэрийн Тооцоолон бодох төв үйл ажиллагаагаа эхлэв. 26-нд: Эрдэнэт үйлдвэрийн төв корпусыг барих ажил эхлэв. 1978 оны 4-р сар Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтэс анх Хөдөлмөр хамгааллын хэлтэс нэртэйгээр зохион байгуулагдав. Дэлгэрэнгүй...
  • Цутгуурын цехийн өргөтгөл ирэх сарын нэгэн гэхэд бүрэн ашиглалтад орно

    Засвар механикийн заводын Цутгуурын цехийн өргөтгөлийг ирэх сарын нэгэн гэхэд бүрэн ашиглалтад оруулна гэжзаводын дарга Б.Баасансүрэн мэдээллээ. Одоогийн байдлаар механикийн чиглэлийн тоног төхөөрөмж суурилуулж дууссан. Байгууламжийн агаар, ус, хий дамжуулах төхөөрөмжийн угсралт 96 хувьтай байна. Германы мэргэжилтнүүд ирж үндсэн тохируулга хийх байсан ч, цаг үеийн нөхцөл байдлаас шалтгаалан амжаагүй. Ерөнхий захирлын 151-р тушаалаар томилогдсон ажлын хэсэг  ажиллаж, 3-р сарын 16-наас ХБНГУ-ын FAT компанитай онлайнаар холбогдон тоног төхөөрөмжүүдийг хэсэгчлэн  тохируулж байна. Мэргэжилтнүүд  энэ сарын27 гэхэд тоног төхөөрөмжийн тохируулгаа дуусаж, туршилт хийхээр төлөвлөн ажиллаж байна.Засвар механикийн завод, Баяжуулах үйлдвэр, Дулааны цахилгаан станц, Эрчим хүчний хэлтсийн мэргэжилтнүүдээс бүрдсэн ажлын хэсэг амжилттай ажиллаж байна. Ийнхүүцутгуурын үйлдвэрлэлийн хэвний технологид ХБНГУ-д үйлдвэрлэсэн “Хүйтнээр хатууруулах холимгоорхэв бэлтгэх” хагас автомат шугамын цогц систем нэвтрүүлэх техник технологийн шинэчлэл  дуусах шатандаа орлоо.                                                                                                                             Я.Энхтуяа Фото: Ш.Лхамсүрэн Дэлгэрэнгүй...
  • УЦУОШТ: Нарийн тоос маргааш сарних төлөвтэй байна

    Орхон, Булган, Дархан-Уул аймгийн нутаг дэвсгэрийг хамран агаарт дэгдсэн нарийн тоос агаарын урсгал хөдөлгөөнд орж, маргааш сарних төлөвтэй байгааг аймгийн Ус цаг уур, орчны шинжилгээний төвөөс мэдээлж байна. Манан мэт агаарт тогтсон нарийн тоос нь онц сонин үзэгдэл биш хэдий ч манай аймгийн хувьд анхны тохиолдол болжээ. Энэ сарын 5-наас эхлэн Сэлэнгэ, Төв, Дундговь аймгийн нутагт шороон шуурга шуурч, улмаар агаарт дэгдсэн шороо нь нарийн тоос болон хуралджээ. Ойрын өдрүүдэд салхины хүч бага байгаа нь нарийн тоосыг хөдөлгөөнгүй байдалд оруулсан бөгөөд маргааш салхины чиглэл нутгийн баруун хойноос байх төлөвтэй тул агаарт сарнина гэж тооцоолж байна. Нарийн тоос нь хүний биед ямар сөрөг нөлөө үзүүлэхийг эрүүл мэндийн байгууллага л тогтоох боломжтой тул иргэдийг амны хаалтаа зүүж, эрүүл мэнддээ анхаарахыг зөвлөлөө. Цаг агаарын урьдчилсан мэдээгээр энэ сарын 8-нд ялимгүй хур тунадастай, шөнөдөө 0-5 градус хүйтэн, өдөртөө 8-13 градус дулаан байна. Харин 12, 13-нд салхины хурд ихсэж, шороон шуурга шуурах төлөвтэй байгааг Ус, цаг уур, орчны шинжилгээний төвийн Цаг уур, орчны технологи, мэдээллийн үйлчилгээний хэлтсийн дарга Б.Цээнээ мэдээллээ.   И.Чинтогтох Фото: Б.Баттөгс Дэлгэрэнгүй...
  • Урьдчилан сэргийлэх ажил тогтмолжсон

    Дэлхийн 200 гаруй улс оронд тархаад буй “ковид-19” цар тахлаас урьдчилан сэргийлэх ажлын хүрээнд Эрдэнэт үйлдвэрт Шуурхай штаб байгуулагдаад 2 сар гаруй болж байна. Шуурхай штабынхан өглөө ажилдаа ирж буй ажилчдын биеийн халууныг хэмжих, хяналт тавих, хоолны цэгүүдийн эрүүл ахуй, ариутгал халдваргүйтгэлийн мэдээллийг цаг тухайд нь авч, нэгтгэн үйлдвэрийн Ерөнхий диспетчер болон Уул уурхайн яам, Улсын Онцгой комисст хүргэх чиг үүрэг хүлээдэг. Штабын бүрэлдэхүүнд Онцгой байдлын газар, “Эрдэнэт” сувиллын цогцолбор, ХАБЭА-н хэлтсийн ажилтан болон эмч нар ээлжийн горимоор ажиллаж байна. Өнгөрсөн хугацаанд Дэлхийн Эрүүл Мэндийн байгууллага, Улсын Онцгой комисс, Эрүүл мэндийн яамнаас өгч буй зөвлөмжийг хэвшүүлэхэд хяналт тавьснаар ажилчид амны хаалт зүүх, гар угаах ариутгах нь тогтмолжиж, хоолны цэгүүдийн үйлчилгээ, эмх цэгц сайжирсныг Шуурхайн штабынхан онцоллоо.         М.Балжинням   Дэлгэрэнгүй...
  • Д.ЭРДЭНЭБАТ: 1А хорооллын инженерийн шугам сүлжээ, дэд бүтцийн асуудлыг шийдсэн нь Эрдэнэтийн уурхайчдаас иргэддээ барьж буй бэлэг юм.

    “Эрдэнэт үйлдвэр” ТӨҮГ, нийгмийн хариуцлагыг хэрэгжүүлэгч жишиг үйлдвэрийн хувьд жилийн нийт зардлынхаа 7-8 хувийг ажилтнуудынхаа нийгмийн хөгжлийн бодлого8хөтөлбөрт зарцуулдаг. Энэ үзүүлэлт жилээс жилд ахиж, ажилтан руу чиглэсэн олон талын бодит ажил нэмэгдсээр байна. Сүүлийн үед нийгмийн чиглэлээр хэрэгжиж буй ажлуудын талаар Нийгмийн харилцааны хэлтсийн орлогч дарга Д.Эрдэнэбаттай ярилцлаа. -Цаг үеийн асуудлаас ярилцлагаа эхэлье. Манай үйлдвэрт Эрүүл мэндийн байнгын комисс байгуулагдсан. Та ажлын хэсгийн орлогчоор ажиллаж байгаа юм байна. Ямар зорилго, чиглэлтэй ажиллах вэ? -Үйлдвэрийн газрын  Эрүүл мэндийн байнгын ажлын хэсэг Ерөнхий захирлын нэгдүгээр орлогч бөгөөд Ерөнхий инженерийн шийдвэрээр шинэчлэн байгуулагдлаа. Зорилго нь ажилчдын эрүүл мэндийг хамгаалах, өвчин эмгэгээс урьдчилан сэргийлэх ажлыг эрчимжүүлэх, тэдгээрийн хэрэгжилтийг хангах үйл ажиллагааг зохион байгуулах, хяналт тавих  чиглэлээр байнгын үйл ажиллагаа явуулна. Эрүүл мэндийн чиглэлээр ажилладаг бүтцийн нэгжүүд бий. Тэдгээр нь өөрийн хариуцсан чиглэлээр үүргээ сайн гүйцэтгэдэг. Гэхдээ зарим нэг тохиолдолд тухайн ажил нь саатах, удаашрах тал гардаг учраас Эрүүл мэндийн байнгын комисс энэхүү асуудлыг шийдвэрлэхэд түлхэц өгөх, шийдвэрлүүлэх талаар анхаарч ажиллана. Комиссын бүрэлдэхүүн саяхан шинэчлэгдсэн. Эхний байдлаар ажлын хэсгийн журмын төслийг боловсрууллаа. Одоо бид Эрүүл мэндийг дэмжиххөтөлбөрөөхэлэлцэж бэлэн болгоно. Хөтөлбөр маань мөн л төслийн шатанд байгаа. Оны эхнээс бид комиссын ажлаа эхлэхээр төлөвлөж байсан ч “ковид-19” цар тахал  тархсаны улмаас цаг үеийн нөхцөл байдалтай уялдуулан ажиллаж байна. Ажлын хэсгийн журмын дагуу бүтцийн нэгжүүдийн холбогдох мэргэжилтнүүд уг бүрэлдэхүүнд ажиллана. Өөрөөр хэлбэл, эрүүл мэнд гэхээр зөвхөн эмч, эмнэлгийн ажилтнууд гэлтгүй нийгмийн, эрүүл ахуйн, хоол зүй, хөдөлмөр хамгаалал, хүний нөөцийн  чиглэлийн мэргэжилтнүүд багтаж байна. -Эрүүл мэндийн хөтөлбөрийг шинэчлэн батална гэлээ. Энэ хөтөлбөрийг ямар хугацаатай боловсруулж, хэрэгжүүлж байна вэ? 2020 оны Эрүүл мэндийн хөтөлбөр ямар онцлогтой байх вэ? -Хөтөлбөрийнхөө төслийг боловсруулаад байж байна. Миний хувьд, Эрдэнэт үйлдвэрт жирийн ажилчнаас эхлээд 29 дэх жилдээ ажиллаж байна. Ийм ч учраас  ажиллагсдын эрүүл мэнд, тэр тусмаа урьдчилан сэргийлэх чиглэлийн ажлууд илүү чухал гэж боддог. Тиймээс уурхайчдынхаа эрүүл мэндийг хамгаалах, урьдчилан сэргийлэх чиглэлээр хийх ажлууд түлхүү тусгагдана гэж харж байгаа. -Нийгмийн харилцааны хэлтсийн ойрын үед хийж буй томоохон ажлууд юу байна вэ? Нийгмийн цехүүдийг тойрсон асуудлыг хэрхэн шийдвэрлэж байна вэ? -Эрдэнэт үйлдвэр нь ТӨҮГ болж, бүтцийн өөрчлөлт хийсний хүрээнд Нийгмийн харилцааны хэлтэс шинээр байгуулагдсан. Өнөөдрийн байдлаар, манай хэлтсийн ажил олон чиглэлд үргэлжилж байна. Юуны өмнө бүтэц бүрэлдэхүүн, чиг үүргээ тодорхойлж, нийгмийн хариуцлагын чиглэлээр ажиллах хэлтсийн журмыг батлуулсан. Захиргаа, хүний нөөцийн бодлогын газартай зөвшилцсөний үндсэн дээр нийгмийн чиглэл болон Захиргаа, хүний нөөцийн бодлогын газрын чиг үүргийн журмыг салган, өөр өөрийн харьяалалд авч шинэчиллээ. Шинэчлэхдээ бид, Ерөнхий захирлын өгсөн чиглэлийн дагуу журмуудыг  нэгтгэж цэгцэлж байна. Тухайлбал, таван өөр журмаар зохицуулдаг байсан тусламж үйлчилгээг нэг журамтай болгох гэх мэт. Мөн цаг үетэйгээ холбогдож шинэ журам боловсруулах шаардлага гарч байна. Нөгөө нэг томоохон ажил гэвэл бид 2019 оны нийгмийн хариуцлагын тайланг бэлтгэж байна. Өнгөрсөн онд Эрдэнэт үйлдвэр нийгмийн хариуцлагын чиглэлд хэрхэн ажилласныг олон түмэнд таниулж, хүргэх цогц тайлан удахгүй гарна. Манай үйлдвэр орон нутагтай нягт хамтын ажиллагаатай. Саяхан, Орхон, Булган аймагтай хамтран ажиллах 2019 оны гэрээг дүгнэж, шинэ онд хэрэгжүүлэх төлөвлөгөөгөө баталж, гарын үсэг зурлаа. 2020 онд хамтын ажиллагааны хүрээнд манай үйлдвэр Орхон аймагт 2 тэрбум, Булган аймагт 700 сая гаруй төгрөгийн хөрөнгө оруулалт хийнэ. Энэ удаагийн гэрээнд Эрдэнэт үйлдвэр зөвхөн өгөх биш, орон нутаг харилцан ашигтай ажиллах тухай тусгаснаараа онцлог болсныг хэлэх нь зүйтэй байх. Сүүлийн 2 жилийн хугацаанд бидний өмнө тулгамдаж буй нэг асуудал бол Орос сургууль, цэцэрлэг, орос эмнэлгийн тусгай зөвшөөрлийн асуудал байсан. Энэ талаар манай хэлтэс байгуулагдсан цагаасаа хөөцөлдсөн. Монгол Улсын холбогдох хууль дүрмийн дагуу Орос сургууль,  орос цэцэрлэг ажиллах ямар ч үндэслэлгүй гэдгийг бүх мэргэжлийн байгууллагууд тогтоосон. Тиймээс орон нутагтай хамтраад уг сургуулийг Эрдэнэт үйлдвэрийн харьяа орос хэлний гүнзгийрүүлсэн сургалттай сургууль болгох нь зөв гэсэн шийдэлд хүрээд байна. Үүнийг хэрэгжүүлэх Орхон аймгийн ЗДТГ-тай хамтарсан ажлын хэсэг байгуулагдан ажиллаж байна. Мөн олон жил царцсан 1А хорооллын инженерийн шугам сүлжээ, дэд бүтцийг барьж байгуулах ажил байна. 1А хороолол маань баригдаж эхэлсэн боловч  инженерийн шугам сүлжээ, дэд бүтцийг барьж байгуулах хөрөнгө мөнгөгүйгээс, барилгын ажил зогсоод байсан юм. Монгол Улсын Ерөнхий сайд Орхон аймагт айлчлах үеэр Засаг дарга уг асуудлыг шийдүүлэхээр хандсан. Ерөнхий сайд Эрдэнэт үйлдвэр, Орхон аймгийг хамтран шийдэх үүрэг чиглэл өгсний дагуу Эрдэнэт үйлдвэрийн зүгээс төсөлд шаардлагатай байгаа 12.5 тэр бум төгрөгийн санхүүжилтийг шийдээд байна. Энэ бол Эрдэнэт үйлдвэрийн уурхайчдын зүгээс аймгийн иргэддээ барьж буй том бэлэг юм. Бурхан багшийн сэрэг дүрийн урд байрлах 1А хорооллын дэд бүтцийн ажлын хүрээнд цахилгааны под станцыг өргөтгөх, цэвэр бохир усны бүх шугам сүлжээнд холбох, үерийн усны далан барих, гол магистрал засмал зам тавих гээд иж бүрэн бүтээн байгуулалт хийгдэнэ. Зөвхөн ЦРП-2  дэд станцыг өргөтгөснөөр Эрдэнэт хотын цахилгаан хангамжийн чадал 2 дахин нэмэгдэнэ. Энэ асуудлыг Эрдэнэт үйлдвэр нийгмийн хариуцлагын хүрээнд бодлогоороо  шийдэж байна гэж ойлгож болно. -Нийгмийн чиглэлийн бүтээн байгуулалтын ажлын тухайд..? -Нийгмийн харилцааны хэлтсийн үндсэн хэсэг нь нийгмийн төсөл хөтөлбөрүүдийг хэрэгжүүлэхэд чиглэдэг. Эрдэнэт үйлдвэр нийгмийн чиглэлийн төсөл хөтөлбөрүүдэд 31.3 сая доллар зарцуулахаар төлөвлөсөн. Цаг үеийн байдлаас шалтгаалан зарим нэг ажлаа түр хугацаагаар зогсоож байна. Өөрөөр хэлбэл, коронавирусын тархалтын улмаас дэлхийн зах зээлд унаж буй зэсийн үнэ эргээд өссөн үед эдгээр ажлууд үргэлжлээд явна. Төлөвлөгөөнд тусгагдсан ажлуудаа бид эрэмбэлж, хамгийн чухлаас нь үргэлжлүүлэн хэрэгжүүлэхээр ажиллаж байна. Өнгөрсөн оны хөрөнгө оруулалт бүтээн байгуулалтын ажлын төлөвлөгөөнд тусгагдан, Баян-Өндөр уулын энгэрт баригдаж эхэлсэн, хуучнаар “Москва 300” буюу “Уурхайчин-1”орон сууцны хороолол 2020 оны 12 дугаар сард ашиглалтад орох ёстой. Одоогийн байдлаар уг хорооллын барилгын ажил хэвийн, хоёрдугаар давхрын цутгалт хийгдэж байна. Ирэх 6 дугаар сард цутгалтын ажил бүрэн хийгдэж, барилгын гадна тал дуусаж 12 сар гэхэд дотоод чимэглэл бэлэн болж ашиглалтад хүлээлгэн өгөхөөр  гүйцэтгэгч компани ажиллаж байна. Тус хорооллын гүйцэтгэгчээр “Хемон”, “Одкон” компаниуд ажиллаж байна. Мөн “Эрдэнэт” соёл, спортын цогцолбор энэ онд баригдана. Гүйцэтгэгчээр Эрдэнэт үйлдвэрийн Барилга засварын цех ажиллаж, 12 сард дуусгах төлөвлөгөөтэй. Дараагийн бүтээн байгуулалтын ажил нь “Сэлэнгэ” амралт, аялал жуулчлалын цогцолборын “Ногоон хөгжлийн төв”-ийн байгуулалт. “Уурхайчин-2” орон сууцны хорооллын барилгын ажил энэ онд эхлэх бол “Уурхайчин-3” хорооллыг барьж байгуулах гүйцэтгэгчийн асуудал удахгүй шийдэгдэнэ. -Ирэх 12 сард ашиглалтад орох “Уурхайчин-1” орон сууцны хороололд орох ажилтнуудын захиалга авсан. Өөрөөр хэлбэл, шинэ байрны захиалга дүүрсэн үү? -Үйлдвэрийн цех нэгжүүдээс санал авсан. “Уурхайчин-1” орон сууцны хороолол 300 айлынх. Тиймээс бид цехүүддээ квот тогтоож өгсөн. Бидний тавьж буй шалгуур бол тухайн ажилтан өмнө нь Эрдэнэт үйлдвэрээс байр болон байрны тусламж хөнгөлөлт аваагүй байх. Учир нь үйлдвэрээс олгодог 12 сая төгрөгийн байрны хөнгөлөлтийг урьдчилгаа төлбөрийн 30 хувьд нь оруулахаар зорьж байгаа. Өнөөдрийн байдлаар, 280 гаруй ажилтны материалыг авч, хамтран ажиллаж буй Богд банканд хүргүүлсэн. -Эцэст нь, орон сууцны хувьчлалын тухай тодруулъя. Төрийн өмчийн бодлого зохицуулалтын газраас чиглэл өгсөн байгаа. Энэ ажил хэзээ хэрэгжих вэ? -Монгол Улсын Төрийн өмчийн бодлого зохицуулалтын газраас “Эрдэнэт үйлдвэр” ТӨҮГ-ын орон сууцыг үе шаттайгаар хэсэгчлэн хувьчлах шийдвэр гаргасан. Энэ дагуу манай үйлдвэрт ажлын хэсэг байгуулагдан, үйлдвэрийн хэмжээнд байгаа нийт орон сууцны тоо, мэдээлэл, цех нэгжүүдийн санал зэрэг нэгдсэн судалгаа хийж байна. Орон сууц хувьчлалын ажлын хэсэгт үндсэн цехүүд болон санхүү эдийн засаг, аудит, хууль, нийгмийн харилцаа, Захиргаа, хүний нөөцийн бодлогын газар зэрэг бүхий л хэлтэс нэгжийн төлөөллүүд орсон. Мэдээж, Эрдэнэт үйлдвэрийн албаны зориулалтаар ашиглагдаж буй болон Орос мэргэжилтнүүдийн амьдардаг байрууд хувьчлалд хамрагдахгүй. М.Балжинням Фото: Б.Баттөгс Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Нэвтрүүлэг

COVID-19 буюу коронавирусын халдвараар голдуу ахмад настан, зүрх судас, чихрийн шижин, артерийн даралт ихдэлт, хавдар, бөөр, амьсгалын замын өвчтэй, дархлаа дарангуйлах эм хэрэглэдэг хүмүүс өртөж, хүндрэх эрсдэлтэйг Дэлхийн Эрүүл Мэндийн байгууллагаас анхааруулсан байна. Иймд, “Эрдэнэт” сувиллын цогцолборын Ахмадын эмч Э.Хандармаа ахмадуудад дараах зөвлөмжийг хүргэж байна.

-Эмчийн хяналтад тогтмол байх

-Эмийг эмчийн зааврын дагуу хэрэглэх

-Давс, чихэр, өөх тос багатай хоол, хүнс хэрэглэх

-Халуун, бүлээн шингэн зүйл ойр ойрхон уух

-Сайн унтаж амрах

-Тайван стрессгүй, ядрахгүй байх

-Дулаан хувцаслах, даарахгүй байх

-Хөнгөн дасгал хөдөлгөөн хийх

-Ханиаж найтааж байгаа хүнээс хол байх

-Олон нийтийн газраар явахгүй байх

-Амны хаалт зүүх

-Гараа сайтар савандаж тогтмол угааж хэвших.

-Холбоо барих хүний утасны дугаартай байх

Бие тавгүйрхсэн тохиолдолд Яаралтай тусламжийн төв – 103, СЭМҮТ – 1800-2000 утсаар зөвлөгөө авах, харьяа сум, өрхийн эрүүл мэндийн төвд хандаж, урьдчилан сэргийлэхийг зөвлөж байна.

М.Балжинням

Фото: Б.Баттөгс

 
Засвар механикийн заводод хийгдэж буй технологийн шинэчлэлийн талаар Заводын дарга Б.Баасансүрэнгээс тодруулснаа хүргэе.
 
-Цутгуурын цехэд хийгдэж буй техникийн шинэчлэлийн талаар ярихгүй юу?
-Эрдэнэт үйлдвэрийг 2017-2031 он хүртэл хөгжүүлэх үндсэн чиглэлийн хүрээнд Засвар механикийн заводод техник технологийн шинэчлэлийн ажил явагдаж байна. Үйлдвэрийн газрын хэмжээний техникийн бодлогын хүрээнд жил бүр шинэчлэл хийдэг. Үүний дагуу завод  тоног төхөөрөмжийнхөө шинэчлэлийг хийгээд явж байгаа. Өнөөдрийн хийж байгаа техник технологийн шинэчлэл арай онцлогтой. Учир нь техникийн шинэчлэлийг, технологийн хамт бүр иж бүрнээр нь өөрчилж байгаа явдал л даа. Өөрөөр хэлбэл бид Цутгуурын цехийн хэв барих технологийг бүхэлд нь техник, тоног төхөөрөмжийн болон технологийн тухайд 100 хувь шинэчилж байна. Ер нь Эрдэнэт үйлдвэрийн хөгжлийн концепци, техникийн бодлогын хүрээнд Заводын өргөтгөл шинэчлэлийн ажлыг үе шаттай хийж явах юм. Заводын үйлдвэрлэлийн үндсэн хоёр нэгж болох Цутгуурын болон Механик цехийн техник, технологийн шинэчлэлийг цаг алдалгүй хийж явах шаардлагатай байна. Орчин үеийн техникийн дэвшил, хөгжил тэгж шаардаж байна л даа. Техникийн хөгжил, дэвшил маш хурдацтай өөрчлөгдөж байна. Үүнээс хоцрохгүй явахыг амьдрал шаардаж байна. Өнөөдрийн байдлаар тоног төхөөрөмжийн угсралтын ажил 90 орчим хувьтай явна. Үлдсэн хувьд нь хийн дамжуулах, агаарын, ус дамжуулах, цахилгааны угсралт, электроник, программ хангамжийн чиглэлийн ажлууд хийгдэнэ. Бид 2020 оны тавдугаар сарын нэгний өдөр ашиглалтад авах төлөвлөгөөтэй ажиллаж байгаа. Аль болох наашлуулах зорилготой. Ажил гүйцэтгэж байгаа Зураг төслийн хүрээлэн,  Засвар угсралтын болон Барилга засварын цех маш сайн ажиллаж байна.
-Цаашид, техник технологийн шинэчлэл, өргөтгөлийг хэрхэн яаж явуулах зорилго, төсөөлөлтэй байна вэ?
 -Одоогоор, Цутгуурын цехийн хэвний технологийг 100 хувь шинэчилж байна. Энэ нь орчин үеийн дэлхийн жишигт нийцсэн хэвний технологийг үйлдвэрлэлд нэвтрүүлнэ гэсэн үг. Мөн техник технологийн шинэчлэлийн хүрээнд Солонгос, Тайвань улсад үйлдвэрлэсэн  орчин үеийн ажлын өндөр бүтээмжтэй суурь машинуудыг суурилуулан ажиллуулж байна. Ингэснээр үйлдвэрлэлийн цар хүрээ нэмэгдэх, бүтээгдэхүүний чанар сайжрах, нарийн хийцтэй эд анги хийх зорилт тавьсан. Эдгээр суурь машин дээр жижиг төрлийн нарийн эд анги хийгдээд явж байна. Өнөөдрийн байдлаар Ган бөөрөнцгийн цехэд ашиглах  цувих суурь машины бул хийх туршилтын ажил явагдаж байна. Манай инженер техникийн ажилтнууд нэлээн шаргуу ажиллаж байгаа. Энэ нь Ган бөөрөнцгийн цехийн үйлдвэрлэлийн жигд ажиллагааг хангах төдийгүй Эрдэнэт үйлдвэрт эдийн засгийн хувьд үр ашигтай ажил болж магадгүй. Бид яаж ийж байгаад энэ эд ангийг чанарын, стандартын, цаашлаад ашиглалтын шаардлага хангасан бүтээгдэхүүн болгочих юмсан гэж зорин ажиллаж байна. Бид компьютерийн удирдлагатай суурь машины операторыг бэлтгэх, давтан сургахад нэлээн анхаарал тавьж байна. Өнгөрсөн жилүүдэд энэ суурь машин дээр ажиллах боловсон хүчнийг  Солонгос, ОХУ болон дотоодын их, дээд сургуульд бэлтгээд ажиллуулж байна. 2020 оноос бас давтан сургалт, шинээр мэргэжил эзэмшүүлэх ажлууд хийгдэнэ.
-Захиалсан тоног төхөөрөмж хугацаандаа ирж байгаа юу?
-Цутгуурын цехийн хэвний технологийн шинэчлэлтэй холбоотой шинэ тоног төхөөрөмжүүд бүрэн ирсэн. Одоогийн байдлаар угсралт суурилуулалтын ажил 90 орчим хувийн гүйцэтгэлтэй явж байна. 2020 оны тавдугаар сарын нэгэн гэхэд Цутгуурын цехийг бүрэн ажиллуулах ёстой. Энэ хугацаанд төлөвлөгөөт ажлуудыг бүрэн хийх боломжтой. Одоо цахилгааны холболт монтажийн ажил эхэлсэн. 2020 оны гуравдугаар сарын 10-ны дотор Герман улсын FAT компанийн цахилгаан, электроник автоматикийн чиглэлийн мэргэжилтнүүд ирснээр тохируулгын ажил хийгдэнэ. 
 
 
-Засвар механикийн заводын цаашдын зорилт юу вэ?
-Эрдэнэт үйлдвэрийн хөгжлийн концепцийн хүрээнд болон үйлдвэрийн удирдлагын түвшинд Засвар механикийн заводыг Монгол Улсын машин үйлдвэрлэл металлургийн салбарын суурь бааз болгон хөгжүүлэх зорилт дэвшүүлж байгаа. Манай завод дотоодын зах зээлд тодорхой хувийн металл бүтээгдэхүүн, уул уурхайн тоног төхөөрөмжийн сэлбэг хэрэгсэл үйлдвэрлэх  зорилттой ажилладаг. Уг зорилтын хүрээнд уул уурхай, хүнд үйлдвэрийн тоног төхөөрөмжүүдийн засвар, сэлбэгийг үйлдвэрлэнэ. Энэ нь уул уурхайн машин үйлдвэрлэлийн салбар болон хөгжих чиглэлийн нэг юм. Өнгөрсөн онуудад бид Заводын өргөтгөл шинэчлэлийн урьдчилсан ТЭЗҮ боловсруулсан. 2020 онд нарийвчилсан ТЭЗҮ, зураг төслийн ажлыг гүйцэтгэх төлөвлөгөөтэй тендерийн үнэлгээний хороо байгуулагдсан. Энэ баримт бичиг боловсруулснаар манай заводын ойрын болоод дунд, урт хугацааны хөгжлийн чиг хандлага, хөрөнгө оруулалтын асуудал нэлээн тодорхой болно. Үйлдвэрийн газрын 2021 оны их барилгын чиглэлийн хөрөнгө оруулалтын захиалга хийгдэж эхэлсэн. Үүнтэй холбоотойгоор ойрын үед шийдэх томоохон хоёр ажлыг төлөвлөгөөнд тусгуулахаар санал өгсөн. Тухайлбал, элэгдсэн эд ангийг сэргээн засварлах орчин үеийн технологийг үйлдвэрлэлд нэвтрүүлэх, ТЭЗҮ боловсруулсан байгаа. Мөн заводын дэргэд бидний санаачилсан орон тооны бус Инженерийн зөвлөл ажилладаг. Эндээс ажилтнуудын идэвх санаачилгыг өрнүүлэх, инноваци, эрдэм шинжилгээ судалгаа, туршилт үйлдвэрлэлийн чиглэлээр ажиллуулах зорилт тавьж байгаа. Энэ ажлаа Ш.Отгонбилэгийн нэрэмжит “Эрдэнэт цогцолбор” дээд сургуультай хамтран хэрэгжүүлэхээр ярилцаад  байна. Тэгэхээр бидэнд лаборатори маш чухал хэрэгтэй. Иймээс орчин үеийн металл судлалын дижитал лаборатори шинээр байгуулах төсөл боловсруулаад дуусаж байна. Үүнийг 2021 оны хөрөнгө оруулалтын төлөвлөгөөнд тусгуулах санал өгсөн. Дэмжигдэнэ гэж найдаж байгаа.  Энэ мэтчилэн бидэнд хийх ажил их бий. Удахгүй инженер техникийн ажилтнуудтайгаа дахин ярилцаж зарим ажлыг тодотгон харьяа газар, хэлтэст танилцуулна. Ойрын үед шийдэх чухал асуудал бол өргөтгөл шинэчлэлийн техник эдийн засгийн нарийвчилсан үндэслэлийг боловсруулах ажил  байна даа.
-Баярлалаа.
Т.Батчулуун
Фото: Б.Баттөгс
 
Бүлэг Ярилцлага
 
Шинэ корона вирусын улмаас Эрдэнэт үйлдвэр гамшиг эрсдэлийн өндөржүүлсэн бэлэн байдалд хэсэгчлэн шилжин ажиллаж байна. Цаг үеийн энэ асуудлаар болон байгалийн гэнэтийн аюулт үзэгдлийн үед хэр бэлтгэлтэй байдаг талаар Эрдэнэт үйлдвэрийн Гамшгаас хамгаалах штабын Тэргүүлэх мэргэжилтэн Р.Энхболдтой  ярилцлаа. 
 
-Гамшгаас хамгаалах штаб өндөржүүлсэн бэлэн байдлын үед хэрхэн ажиллаж байна вэ?
Өндөржүүлсэн бэлэн байдалд хэсэгчлэн шилжих тухай Ерөнхий захирлын А/78 тоот тушаалд нэмэлт өөрчлөлт оруулан хугацааг  3-р сарын 30 хүртэл сунган ажиллаж байгаа. Өндөржүүлсэн бэлэн байдалд хязгаарлах зарим арга хэмжээ авсан. Хурал цуглаан, биеийн тамирын болон урлагийн  ажиллагаа, үйлдвэрийн харьяа сургууль цэцэрлэгүүд, “Эрдэнэт” сувиллын цогцолборын сувилах, Сэлэнгэ амралт, аялал жуулчлалын цогцолборын амралтын үйл ажиллагааг түр зогсоосон. “Эрдэнэт” сувилал цогцолбор, Гэрээт аврах, гал унтраах  58-р анги, Цагдаагийн хэлтэс, Дотоодын цэргийн салбар өндөржүүлсэн бэлэн байдалд ажиллаж байна. Энэ үеэр үйлдвэрийн ажилчдын автобус, хоолны газрууд, алба нэгжүүдэд халдваргүйжүүлэх, ариутгалын ажлыг эрчимжүүлэн хийж байна. Мөн ажилчдын халуун хэмжих  тандалтын ажил үргэлжилж байна. “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер, Гамшгаас хамгаалах штабын даргын баталсан Өндөржүүлсэн бэлэн байдлын үед ажиллах төлөвлөгөө гарган ажиллаж байна. Ерөнхий захирлын нэгдүгээр орлогчийн шийдвэрээр шуурхай штаб 24 цагаар ажиллаж байна. Орхон аймгийн Онцгой комисссын шуурхай жижүүр, Эрүүл мэндийн газар, Уул уурхай, хүнд үйлдвэрийн яаманд тогтмол мэдээлэл өгч байгаа.
-Аймгийн Онцгой комиссын шийдвэрийн дагуу “Эрдэнэт” сувиллын цогцолборт тусгаарлах  байр бэлдэх  болсон. Бэлтгэл хэр хангасан бэ?
-Сувиллын тусгаарлах байрны бэлтгэл ажил хийж байна. Эмч, эмнэлгийн ажилтныг тусгай өмсгөл, амны хаалтаар хангасан. Үйлдвэрийн газрын хэмжээнд Механикийн хэлтсээс санаачилга гарган, хандивын аян өрнүүлж байна. Хандивын мөнгийг  Аймгийн онцгой комисст  төвлөрүүлэх юм. 
-Үйлдвэрийн ажиллагчдад амны хаалт тарааж байгаа. Энэ ажиллагаа хэрхэн явагдаж байна? Мөн Онцгой нөхцөлд ажиллах хүмүүсийн хамгаалах хэрэгсэл хэр хангагдсан бэ?
-Манай үйлдвэр Гамшгаас хамгаалах тусгай нөөцтэй. Нөөцөөс 1-р сарын 27, 28-нд үйлдвэрийн ажиллагчид болон  гэрээгээр ажилладаг хүмүүст  зориулалтын  амны хаалт тараасан. Мөн   үйлдвэрийн удирдлагаас шийдвэр гарган,  Оёдлын цехэд урьдчилсан байдлаар амны хаалт 30 мянган ширхгийг  үйлдвэрлэх болсон. Одоогоор  12 мянгыг  цех, нэгжүүдэд тараалаа.  Мөн халдварын  голомтод ажиллах хүмүүст зориулан  тусгай өмсгөл 400-г авсан. Үүний 150-ийг Аймгийн Онцгой комисст шилжүүлсэн. “Эрдэнэт” сувиллын цогцолбор, Цагдаагийн хэлтэс, Дотоодын цэрэг, Гал унтраах ангийн бие бүрэлдэхүүнд хуваарилсан. Ерөнхийдөө нөхцөл байдал хүндэрвэл  халдварын голомтод үүрэг гүйцэтгэх томилгоот бүрэлдэхүүнийг  нэг бүрийн хамгаалах хэрэгслээр хангасан.
-Эмнэлгийн байгууллагын тандалтад байгаа хүмүүс бий юу?
-Өмнөд Солонгост  зорчиж ирсэн  Эрдэнэт үйлдвэрийн ажиллагчид, тэдний гэр бүлийнхэн, угтаж авсан гээд нийт 31 хүн  Шуурхай штабт бүртгэлтэй байгаа.  Одоогийн байдлаар хорио цээрийн хугацаа нь дууссан 10-аад хүн эмнэлгийн байгууллагын зөвшөөрлөөр ажилдаа орсон. 
-Өнгөрсөн мягмар гарагт Эрдэнэтэд газар хөдөлсөн. Манай үйлдвэрийн объект барилга байшин, шугам сүлжээ эрсдэлд өртөөгүй биз?
-Манай үйлдвэртэй харьцангуй ойрхон зайд  4,9 магнитудын газар хөдөлсөн. Үүний дараа цех нэгжийн объект хариуцсан ажилтнууд  нарийвчилсан  шалгалт хийсэн. Хаягдлын аж ахуйн далан, Уурхайн хана, үйлдвэрийн барилга, шугам хоолойд  ямар нэгэн өөрчлөлт, хохирол, үр дагавар гараагүй. 
-Байгалийн гэнэтийн аюулт үзэгдлийн  үед манай үйлдвэр хэр бэлтгэлтэй байдаг вэ?
-Эрдэнэт үйлдвэр хуулийн дагуу Гамшгаас хамгаалах төлөвлөгөөтэй. Энэ төлөвлөгөө нь  болзошгүй гамшиг осол, байгалийн аюулт үзэгдлийн үед  шат дараатай ажиллаж, хохирол багатай давахад чиглэдэг. Гамшгийн аюулын тухай зарлан мэдээлэл дамжуулах  журмын дагуу Улс орон даяар жил бүрийн 3-р сарын дөрөв  дэх долоо  хоногийн пүрэв  гаргийн 16 цагт Гамшгийн сургууль болдог. Эрдэнэт үйлдвэр сүүлийн жилүүдэд  газар хөдлөлтийн цагийн байдлаар дохио өгч сургуулилт явуулсан. Эрдэнэт үйлдвэрийн  хоёр  цэгт  зарлан мэдээллийн дуут дохиотой. Зарим  цех чанга яригчийн системтэй. Мөн ХМТАЦ-ийн холбооны ДАКС дохиоллын системээр цех нэгжүүдийн удирдлагад  нэгэн зэрэг дохио өгч бэлэн байдлыг хангах  юм. Түүнчлэн ажилчдын ХАБЭА-н сургалтаар  аюулт үзэгдэл ослын үед ажлын байранд өөрийгөө хэрхэн хамгаалах тухай хичээл ордог. 
-Газар хөдлөлтийн үед хүмүүс өөрийгөө хэрхэн хамгаалах  вэ?
-Сүүлийн үеийн газар хөдлөлтийн  судалгаагаас харахад нас барсан хүмүүсийн 80-аад хувь нь  байшин барилгаас гарч яваад хохирсон байдаг.  Зарим тохиолдолд хүчтэй газар хөдлөлтийн эхэнд бага хэмжээний чичирхийлэл мэдэгддэг. Үүнийг дохио газар хөдлөлт гэдэг. Энэ үед байшин барилгаас гарах ёстой.  Харин дохио хөдлөлтгүй  гэнэтийн хүчтэй газар хөдлөлтийн үед тухайн байрандаа  цонх, шил, тавилга, гэрлийн бүрхүүлээс зайдуу, ширээн доогуур /голд нь биш хөл дагуу/  барилгын бат бөх хийцтэй хана зэрэг байрлал сонгож хүлээнэ. Газар хөдлөлт намжсаны дараа аюулгүй зайд гарна.  
Я.Энхтуяа
Фото: Б.Баттөгс
Бүлэг Ярилцлага

Шинэ төрлийн коронавирусын тархалтаас урьдчилан сэргийлэх зорилгоор  Эрдэнэт үйлдвэр өндөржүүлсэн бэлэн байдалд ажиллаж, олон талын арга хэмжээг мэргэжлийн байгууллагуудтай хамтран зохион байгуулж байна. Үүний хүрээнд өнөөдөр “Эрдэнэт” сувиллын цогцолбор болон Онцгой байдлын газрын Гал унтраах, аврах 058 дугаар ангийн  удирдлага хуралдаж, цаг үеийн асуудлаар мэдээлэл солилцов. Энэ үеэр “Эрдэнэт” сувиллын цогцолборын дарг Б.Бат-Эрдэн “Эрдэнэт үйлдвэрийн бүх автобусанд ажилчдын биеийн халуун хэмжих үйл ажиллагаа явуулж байна. Уг ажлыг манай “Эрдэнэт” сувиллын цогцолбор, үйлдвэрийн Онцгой байдлын алба хамтран хийж эхэлсэн. Ажилчдыг өглөө, оройн ээлжинд нийт 30 автобус тээвэрлэдэг бөгөөд тэдгээр тус бүрд нэг эмч, онцгой байдлын нэг албан хаагч ажиллаж байна. Мөн өчигдрөөс эхлэн үйлдвэрийн Спорт цогцолбор, Соёл, урлагийн цогцолборын 11 ажилтныг хүч нэмэгдүүлэн ажиллуулж эхэллээ. Бүх ажилчдыг халуун хэмжих, урьдчилан сэргийлэх зөвлөмжид хамруулах тул үүнд хүн хүч шаардлагатай байсныг ингэж зохицуулсан” гэв.   

Мөн Орхон аймгийн Онцгой комисс болон Эрдэнэт үйлдвэрийн Онцгой штабын шийдвэрийн дагуу “Эрдэнэт” сувиллын цогцолборт ажиглах байр гарган, одоогоор 11 хүнийг байрлуулан ажиглалт хийж байгаа юм байна. Тус сувиллын ажиглах байранд 120 хүртэл хүн хүлээн авах боломжтой бөгөөд энд 30 эмч, ажилтан халдвар хамгаалалтын өндөр түвшинд ажиллаж байгаа аж.   

М.Балжинням

Фото: Б.Баттөгс

Энэ онд Баяжуулах үйлдвэрийн техник технологийн шинэчлэлийн хүрээнд ямар ажлууд хийгдэх талаар тус цехийн Механикийн албаны дарга Б.Болор-Эрдэнээс тодрууллаа.

-2020 оны эхний хагас жилд танай цехэд ямар томоохон ажлууд хийгдэх вэ?

-2020 оны тоног төхөөрөмжийн шинэчлэлийн ажлын хүрээнд Ерөнхий захирлын А/95 тоот тушаалын дагуу Нунтаглан баяжуулах хэсгийн (НБХ) МШЦ 5,5*6,5 тээрэм №4, Бутлан тээвэрлэх хэсгийн (БТХ) бутлуур КМД 3000Т2-ДП  №12-ийг Metso компанийн МР-800 бутлуураар, Урвалжийн хэсгийн МШР 1,5*2,1 №3 тээрэм солих ажлыг 4 дүгээр сарын 15-ны дотор ашиглалтад өгнө. Мөн II улирлын дундаас Өөрөө нунтаглах хэсгийн ММС 90*30 №1 тээрмийг солихоор төлөвлөж байна. Уг тээрмийн хяналтын угсаргаа дөрөвдүгээр сараас эхэлнэ.

-Ажиллагчдаас гаргасан шинэ санал санаачилга үйлдвэрлэлд хэрхэн нэвтэрч байна.Эдийн засгийн хувьд ямар үр ашигтай ажиллаж байна вэ?

Манай ажилтнууд Сайн саналын системээр дамжуулан шинэ санал санаачилга их гаргадаг. Өнгөрсөн онд нийт 1694 санал гаргасан байгаа. Үүнээс механикийн чиглэлээр 338 санал гарсны 197 нь үйлдвэрлэлд амжилттай хэрэгжээд байна. Мөн Бүтээмж чанарын дугуйлангаар дамжуулан тоног төхөөрөмжийн найдвартай ажиллагааг хангах, хуучин тоног төхөөрөмжийг сэлгэн засварлаж, ашиглалтын хугацааг уртасгах чиглэлээр олон ажил хийж 200 гаруй сая төгрөгийн эдийн засгийн үр ашигтай ажиллалаа.

-Эрдэнэт үйлдвэрийн хөгжлийн хөтөлбөрийн хүрээнд танай цехэд ямар төсөл хөтөлбөр хэрэгжих вэ? 

-Эрдэнэт үйлдвэрийг 2031 он хүртэл хөгжүүлэх үндсэн чиглэл өнгөрсөн онд батлагдсан. Энэхүү үндсэн чиглэлийн хүрээнд 2020-2021 онд ӨНХ-ийн өргөтгөл 6 сая тонн хүдэр боловсруулах хүчин чадалтай 4-р шугамыг байгуулах, НБХ-ийн хам баяжуулалтын 5-р секцийг 12 сая тонн хүчин чадалтай болгон шинэчлэх төслийн ажлуудыг хийхээр төлөвлөөд байна.

-Ер нь Баяжуулах үйлдвэрт техник технологийн шинэчлэл хэр явагдаж байна вэ?

-Сүүлийн 5 жилд Баяжуулах үйлдвэрт техник, технологийн шинэчлэл эрчимтэй хийгдэж байна. Тухайлбал, НБХ-ийн хам баяжуулалтын 1-р секцийн флот машин №205-ийг бүрэн шинэчилсэн. Тус хөвүүлэн баяжуулах машин 2000 оноос ажиллаж байсан. Мөн БТХ-ийн КМД №13 бутлуурыг Metso компанийн МP-800 бутлуураар шинэчлэн хүчин чадлыг нэмэгдүүлсэн. НБХ-т шинэ молибдены шугам суурилуулсан гэх мэт олон ажил хийгдээд байна. Эдгээр шинэчлэлийг хийснээр 10 хүртэл жил ажиллаж байгаа үндсэн тоног төхөөрөмж 2018 онд 39 хувь, 2019 онд 49 хувь болж өссөн байна.

-Ажлын хүндрэл бэрхшээл гарч байна уу?

-Одоогийн байдлаар гаднын хүчин зүйлээс хамаарсан бэрхшээлүүд бий. Сүүлийн үед өмнөд хөршид дэлгэрээд байгаа короно вирустай холбоотойгоор зарим шаардлагатай материалууд төлөвлөгөөт хугацаанаасаа хоцорч ирэх нь тодорхой болоод байна. Мөн зэсийн үнэ ханш тогтворгүй байгаатай холбогдуулан өртөг зардлыг бууруулах төлөвлөгөө боловсруулж,  зарим томоохон төлөвлөгөөт засварын ажлууддаа зохион байгуулалтын арга хэмжээ авах талаар төлөвлөгөө гарган ажиллаж байна.

-Ярилцсанд баярлалаа. 

Т.Батчулуун

Фото: Б.Баттөгс

 

Бүлэг Ярилцлага

Мэдээний төрөл

Календарь

« 3-р сар 2020 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Зургийн цомог