• О.ОТГОНБАЯР: Хүндрэлийг даван туулах нэгдсэн хөтөлбөрийн хэрэгжилт үр дүнтэй байна

      Эрдэнэт үйлдвэрийн Захиргаа, хүний нөөцийн бодлогын газрын дарга О.Отгонбаяраас шинэ коронавирусын тархалтаас урьдчилан сэргийлэх, үүсээд буй хүндрэлийг даван туулах зорилгоор байгуулагдсан Төв штабын ажлын хэрэгжилтийн талаар тодрууллаа.    -Эрдэнэт үйлдвэрийн хэмжээнд шинэ коронавирусын тархалттай холбоотойгоор үүсээд буй хүндрэлийг даван туулах, сөрөг үр дагавраас урьдчилан сэргийлэх, эрсдэлээс хамгаалах зохих арга хэмжээг шуурхай зохион байгуулах зорилгоор Төв штаб болон Чиглэл хариуцсан штабуудыг Ерөнхий захирлын А/139 тоот тушаалаар байгуулсан. “Эрдэнэт үйлдвэр” ТӨҮГ нь уурхайчдын ажлын байр, цалин хөлс, урамшууллыг тогтвортой хадгалж, уурхайчдынхаа  гэр бүлийг эрсдэлээс хамгаалах, улс, орон нутгийн  эдийн засагт оруулж буй хувь нэмрийг бууруулах-гүй байх гэсэн үндсэн зорилго-тойгоор ажиллаж байна. Энэ нь уурхайчдын хамтын хөдөлмөр юм. Мөн “Шинэ коронавирусын тархалтаас урьдчилан сэргийлэх, үүсээд буй хүндрэлийг даван туулах арга хэмжээний нэгдсэн хөтөлбөр”, үүний хавсралт “Хүндрэлийг даван туулах арга хэмжээний нэгдсэн төлөвлөгөө”, “Үнийн хэлбэлзлийг тооцсон үйлдвэрлэл, эдийн засгийн арга хэмжээний төлөвлөгөө”, “Хөдөлмөр зохион байгуулалт, цалин хөлсний чиглэлээр хэрэгжүүлэх арга хэмжээний төлөвлөгөө”-г баталсан.  “Үйлдвэрлэлийн тасралтгүй үйл ажиллагааг хангах”, “Санхүү, эдийн засгийн үйл ажиллагааг эрчимжүүлэх”, “Нийгмийн харилцаа хамтын ажиллагааны асуудлыг зохицуулах”, “Томоохон төсөл, хөтөлбөрийг хэрэгжүүлэх”-д чиглэл хариуцсан штабууд арга хэмжээний төлөвлөгөө боловсруулж, батлуулан, хэрэгжилтийг ханган ажиллаж байна. Ажлын төлөвлөгөөний биелэлт 46,4 хувьтай байна. Эдгээр штабууд долоо, 14 хоног тутам хуралдаж, Төв штабын хуралдаанаас шийдвэр гаргаж, ажлын явцтай танилцаж, үүрэг өгч ажиллаж байгаа. Үйл ажиллагааны нэгдсэн хөтөлбөр 42,5 хувийн биелэлттэй байна. Нийт 50 үүрэг даалгаврыг чиглэл хариуцсан штабуудад хүргүүлж, хэрэгжилтийг нь ханган ажиллаж байна. -Хөтөлбөр, төлөвлөгөөний дагуу ямар ажлууд хийгдээд байна вэ?  -Зэсийн баяжмалын үйлдвэрлэлийг 2,244.3 тн-оор, молибдены баяжмалын үйлдвэрлэлийг 152.4 тн-оор нэмэгдүүлж ажилласнаар зэс, молибдены баяжмал ачилтын төлөвлөгөөг 101-112,6 хувиар биелүүлж, 3,8 тэрбум төгрөгийн нэмэлт орлого олох боломж бүрдээд байна.   -Үйлдвэрийн газрын хэмжээнд өртөг, зардал бууруулах арга хэмжээг хэрэгжүүлж, зэсийн үнийн эрсдэлийн түвшинтэй уялдуулан, гүйцэтгэлд хяналт тавьж ажилласнаар батлагдсан төлөвлөгөөт нийт зардлыг эхний дөрвөн сарын байдлаар 23.8 тэрбум төгрөгөөр бууруулан ажиллалаа. -Үйлдвэрлэлийн үндсэн тоног төхөөрөмж, технологийн горимыг цахилгааны үнийн гурван тарифт системд тохируулан ажилласнаар 185.0 сая төгрөгийн цахилгаан эрчим хүчний зардал хэмнэсэн. -“Сархиа” байгалийн чийрэгжүүлэлтийн төвд агч, голт бор, хайлаас зэрэг 2650 мод, бут, Баяжуулах үйлдвэрийн Хаягдлын аж ахуйн 4М далангийн баруун урд талд 530 мод тарьж хүлээлгэн өглөө.  -“Уурхайчин-1” орон сууцны хорооллын барилгын угсралтын ажил, Соёл, спортын “Эрдэнэт цогцолбор“-ын барилгын ажил, “Сэлэнгэ” амралт, аялал жуулчлалын цогцолборын Ногоон хөгжлийн төвийн барилгын ажил хуваарийн дагуу явагдаж байна.  -Засвар механикийн заводын Цутгуурын цехэд хүйтнээр хатуурах холимгоор хэв бэлтгэх хагас автомат шугам суурилуулах шинэчлэлийн ажлын явц 98 хувийн гүйцэтгэлтэй, тоног төхөөрөмжийн туршилт хийгдэж байна. Төв штабын өмнөх хуралдаанаар Эрдэнэт үйлдвэрт хэрэгжиж буй таван бодлогыг авч хэлэлцсэн. Цаашид энэ ажлыг эрчимжүүлнэ.  -Үйлдвэрийн газрын гэмт хэрэг, зөрчлийг арилгах, хариуцлага тооцох системийг боловсронгуй болгох ажлын хүрээнд Ерөнхий захирлын “Гэмт хэрэг, зөрчлөөс урьдчилан сэргийлэх, сахилга бат, хариуцлага, дэг журмыг сайжруулах ажлыг эрчимжүүлэх тухай”  А/203 тоот тушаалын хэрэгжилтийг ханган ажиллаж байна.  -Баярлалаа. Т.Батчулуун Фото: Б.Баттөгс Дэлгэрэнгүй...
  • Бутлуурын удирдлага, хяналтын схемийг шинэчилж байна

      Баяжуулах үйлдвэрт хүдэр хүлээн авах анхан шатны бутлуурын удирдлагын шкабыг солих ажил ид үргэлжилж байна. Үйлдвэр байгуулагдах үед тавигдсан цахилгаан схемтэй удирдлагын шкаб нь сул зогсолт үүсгэх, гэмтэл их гарах болж ашиглалтын шаардлага хангахгүй хэмжээнд хүрчээ. Иймээс програмчлагдсан, мэдрэгч бүхий дэлгэцтэй Siemens фирмийн орчин үеийн удирдлага, хяналтын шкаб шинээр суурилуулж байна. Ингэснээр удирдлага хяналт оновчтой, шуурхай болохоос гадна мэдээллийн сан бүрдэх, түүнд тулгуурлан дүгнэлт хийх боломжтой болж, орчин үеийн программ хангамжийн ололтыг үйлдвэрлэлд нэвтрүүлж байгаагаар давуу юм. Энэ жил бутлуурын удирдлагын хуучин таван шкабыг S7-300, S7-400 загварын шинэ төрлийн удирдлага, хяналтын шкабаар солих бөгөөд эхний ажлын туршилтыг өнгөрсөн лхагва гарагт амжилттай хийлээ. Өнгөрсөн хоёрдугаар сараас эхэлсэн уг ажлыг “Анд энерги” компани үйлдвэрлэлийн үйл ажиллагааг тасалдуулахгүй гүйцэтгэж, “их зогсолт”-ын өмнө хүлээлгэн өгөхөөр шамдаж байна.   М.Одгэрэл Фото: Б.Баттөгс Дэлгэрэнгүй...
  • Өнөөдөр 05 дугаар сарын 25

    Мэдүүштэй... 1. Өнөөдөр жилийн 146 дахь өдөр. Он дуусахад 219 хоног үлдлээ. 2. Эрдэнэт хотод агаарын хэм өдөртөө +21 градус, шөнөдөө +6 градус дулаан, бага зэргийн бороотой, салхины хурд 5-7 м/сек байна. 3. Аргын тооллын 5 дугаар сарын 25. Сумьяа гараг. Билгийн тооллын шинийн 3. Балжиннямтай шар луу өдөр. Өдрийн наран 5 цаг 03 минутад мандан, 20 цаг 36 минутад жаргана. Энэ өдөр хулгана, бич, луу жилтнээ аливаа үйлийг хийхэд эерэг сайн. Харин нохой жилтнээ сөрөг муу тул элдэв үйлд хянамгай хандаж, биеэ энхрийлүүштэй.  Цог буяны өдөр тул аливаа үйлд маш сайн. Буяны үйл, үйлс эхлэн, хишиг даллага авах, гэр байшин барих, бэр буулгах, хуврага тойн болох, эд мал авах зэрэгт буян хишиг нэмэх нэн сайн. Өдрийн сайн цагнь луу (07:40-09:40), могой (09:40-11:40), бич (15:40-17:40), тахиа (17:40-19:40), гахай (21:40-23:40), бар (03:40-05:40) болой. Хол газар явагсад зүүн зүгт мөрөө гаргавал зохистой. Үс шинээр үргээлгэх буюу засуулахад эд, мал баялаг төгөлдөр баясгалан болох сайн. 4.Дэлхийн зах зээл дээр нэг тонн зэс 5242 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2801, евро 3072, БНХАУ-ын юань 394, ОХУ-ын рубль 39, Японы иен 25, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn)   Эрдэнэт үйлдвэрийн түүхэнд энэ сард... Асуулт: -Эрдэнэт үйлдвэрээс улс даяар дэлгэрсэн үүсгэл санаачилга, туршлага бий юу? Хариулт:-Уулын баяжуулах Эрдэнэт үйлдвэрийн интернационалч хамт олны үүсгэл санаачилгаар бий болж, улс даяар дэлгэрч, үр ашгаа өгсөн, одоо ч өгсөөр байгаа дараах тэргүүн туршлага бий. Үүнд: Халамжлан хүмүүжүүлэх хөдөлгөөний туршлага. Энэ туршлагыг дэлгэрүүлэх тухай 1981 оны 09 дүгээр сарын 05-ны өдөр МХЗЭ-ийн Төв хороо, БНМАУ-ын Хөдөлмөр, нийгэм хангамжийн улсын хороо тогтоол гаргасан. Хөдөлмөр хамгаалал, аюулгүй ажиллагааны нэгдсэн системийн туршлага. Энэ туршлагыг дэлгэрүүлэх тухай 1980 оны нэгдүгээр сарын 30-ны өдөр Аж үйлдвэр, барилгын ажилчдын ҮЭ-ийн төв хорооны тэргүүлэгчдийн тогтоол гаргасан. Боловсон хүчинтэй ажилладаг туршлага. Энэ туршлагыг дэлгэрүүлэх тухай Геологи уул уурхайн үйлдвэрийн яам албан даалгавар гаргасан. (Эх сурвалж: “Монгол, Зөвлөлтийн хамтарсан уул уурхайн баяжуулах “Эрдэнэт” үйлдвэр: 100 асуулт, хариулт” номноос...)   Дэлгэрэнгүй...
  • ДЦС-ын “Бүтээлч” бүлгийнхэн эргэх механизмын аюулыг мэдрүүлэх төхөөрөмж бүтээжээ

    Эрдэнэт үйлдвэрийн Дулааны цахилгаан станцынхан ХАБЭА-н хэлтсээс зарласан “Аюулыг аюулгүйгээр мэдрүүлэх” сургалт, дадлагын төхөөрөмж бүтээх уралдаанд ирүүлсэн аюул эрсдэлийг мэдрүүлэх төхөөрөмжөө танилцуулав. Тус станцын ажилтнууд үйлдвэрлэлийн ажлын байранд түгээмэл гарах эрсдэлтэй аюул буюу эргэлдэх механизмтай харьцаж буй үед тохиолддог осол аваарыг бодитойгоор мэдрүүлэх зориулалттай төхөөрөмж бүтээжээ. Эргэлдэх машин механизм дээр ажиллахдаа тухайн ажилтан ямар аюул эрсдэлтэй тулгарч болох, түүнээс сэргийлэхийн тулд хэрхэн сонор сэрэмжтэй ажиллах ёстойг уг төхөөрөмж дээр сургах юм байна. “Аюулыг аюулгүйгээр мэдрүүлэх” уралдаанд тус цехийнхэн өндөр ач холбогдол өгч, төхөөрөмж бүтээх ажилтнуудаа нэгтгэн “Бүтээлч” бүлэг байгуулан оролцож байгаа аж. Тэд уралдааны төхөөрөмж бүтээх ажлаа 3 дугаар сарын сүүлээр эхэлсэн бол одоо сүүлийн шатны тохируулгыг хийж буйгаа ХАБЭА-н инженер С.Бадрах ярив. “Бүтээлч” бүлгийнхний хийсэн “Эргэлдэх механизмын аюулыг мэдрүүлэх” төхөөрөмж нь автомат удирдлагатай төдийгүй олон үйлдлийг нэг зэрэг харуулах боломжтой. Гар утасны аппликейшн ашиглан, хамгийн бага 12 вольтын хүчдэлээр хөдөлгүүрүүд ажиллахаар зохион бүтээсэн нь инженерийн ур ухаан шингэсэн онцлогтой бүтээл болжээ. Мөн аккумляторт цэнэглэдэг тул хаана ч зөөвөрлөн ашиглаж болох зэрэг олон давуу талтай юм. М.Балжинням Фото: Б.Баттөгс   Дэлгэрэнгүй...
  • ТОП 100 аж ахуйн нэгжийн жагсаалтыг тэргүүлсэн Эрдэнэт үйлдвэрийн хамт олондоо баяр хүргэв

    Монгол Улсын Засгийн газар, Монголын Үндэсний Худалдаа Аж үйлдвэрийн танхимаас хамтран аж ахуйн нэгжүүдийн тухайн жилийн орлого, нийгмийн даатгал төлөлт, ашиг, хөрөнгийн хэмжээ болон ажилтнуудын тоо гэсэн үндсэн таван үзүүлэлтээр эрэмбэлдэг ТОП 100 шалгаруулалтын манлайлагчаар “Эрдэнэт үйлдвэр” ТӨҮГ тодорсон. Энэхүү амжилт, ололтод  гар сэтгэл нийлж,  хамтын хүчээр хүрсэн уурхайчин хамт олондоо тус үйлдвэрийн Ерөнхий захирлын нэгдүгээр орлогч бөгөөд Ерөнхий инженер Т.Батмөнх баяр хүргэв.  “Эрдэнэт үйлдвэр” ТӨҮГ, 2019 оны ТОП 100 жагсаалтын тэргүүнд бичигдсэнээрээ Монгол Улсын шилдэг аж ахуйн нэгжүүдийн шалгаруулалтыг 18 дахь удаагаа манлайлж буй. Улс, орон нутгийн төсөвт төвлөрүүлж буй татвар, цэвэр ашиг, борлуулалтын орлогын хэмжээгээр нь харьцуулан эрэмбэлдэг, “ТОП 100” шалгаруулалтын 2019 оны жагсаалтыг “Эрдэнэт үйлдвэр” ТӨҮГ, 961.7 тэрбум төгрөгийн татвар төвлөрүүлэлт, 561.8 тэрбум төгрөгийн ашиг, 2.2 их наяд төгрөгийн борлуулалтын орлого олсон зэрэг амжилтаараа тэргүүлжээ. Өнгөрсөн оны эдгээр үзүүлэлт нь тус үйлдвэрийн 42 жилийн түүхэн дэх хамгийн дээд амжилт болж, “шилдэг 100” жагсаалтын түрүү байрыг авчирсан байна.  Эрдэнэт үйлдвэрийн хамт олон 2020 оны эхний дөрвөн сарын үйлдвэрлэлийн төлөвлөгөөт бүх үзүүлэлтээ 100 хувиас дээш биелүүллээ. Дэлхий нийтээр ковид-19 цар тахлын улмаас эдийн засгийн нөхцөл байдал хүндэрч буй энэ үед тус үйлдвэрийнхэн гадаад дотоод ямар нэг өр төлбөргүй, өөрсдийн хүчээр мөнгөн хуримтлал бий болгож, үйлдвэрлэлийн зайлшгүй шаардлагатай материал, сэлбэг хэрэгслээ нөөцөлж авах зэрэг зорилт хэрэгжүүлж байна. Өөрөөр хэлбэл, хүндрэлийг эрсдэл багатай даван туулах арга хэмжээний төлөвлөгөө боловсруулан, Ерөнхий захирал, түүний чиглэл хариуцсан орлогч нараар  ахлуулсан төв штаб болон дэд штабын зохион байгуулалттай өндөржүүлсэн бэлэн байдлын горимд шилжсэн. Үүний хүрээнд бүтээгдэхүүн үйлдвэрлэлийг нэмэгдүүлж, нэмэлт бүтээгдэхүүн үйлдвэрлэх, нэмэлт орлого олох, өртөг зардал бууруулах чиглэлээр тухайлбал, төлөвлөгөөт хэмжээнээс гадна 300 мянган тонн хүдэр нэмж боловсруулах, зэсийн металл авалтыг 0.4 хувиар, молибдены металл авалтыг 3.5 хувиар өсгөх даалгавартай ажиллаж байна. Ингэж ажилласны  үр дүнд оны эцэст 25.8 тэрбум төгрөгийн нэмэлт бүтээгдэхүүн үйлдвэрлэж, 17 тэрбум төгрөгийн зардал хэмнэхээр зорилт дэвшүүлжээ. Энэ зорилт эхний 4 сарын байдлаар амжилттай хэрэгжиж, Эрдэнэт үйлдвэрийн уурхайчид 3 орчим тэрбум төгрөгийн нэмэлт бүтээгдэхүүн үйлдвэрлэж, 1.6 тэрбум төгрөгийн хэмнэлттэй ажилласан байна.  М.Балжинням Фото: Б.Баттөгс   Дэлгэрэнгүй...
  • Үйлдвэрлэлийн төлөвлөгөөний бүх үзүүлэлт 100-аас дээш хувиар биеллээ

    Эрдэнэт үйлдвэрийн уурхайчид 5 сарын эхний 20 хоногт үйлдвэрлэлийн төлөвлөгөөг бүх үзүүлэлтээр нь 100-аас дээш хувиар биелүүлсэн амжилттай байна.  Энэ хугацаанд уулын цул гаргалтын төлөвлөгөөг 103.7 хувиар, хөрс хуулалтын төлөвлөгөөг 104.2 хувиар тус тус биелүүлэв. Тодруулбал, 1427.4 мянган метр куб уулын цул гаргаж, 573.5 мянган метр куб хөрс хуулалтын ажил гүйцэтгэсэн байна. Ил уурхайнхан 2174.5 мянган тонн хүдэр олборлож, төлөвлөгөөг 103.2 хувиар биелүүлсэн бол баяжуулагчид 1820.5 мянган тонн хүдэр боловсруулж, төлөвлөгөөг 101.1 хувиар биелүүлжээ. Хүдэр дэх зэс болон молибдены агуулгын төлөвлөгөөний биелэлт 101.1-118.7 хувьтай байна. Харин зэсийн металл авалт 87.5 хувийн гүйцэтгэлтэй буюу төлөвлөгөө 100.2 хувиар, молибдены металл авалт 50.01 хувь буюу төлөвлөгөө 103.1 хувиар биелсэн дүн гарчээ. Баяжмал дахь зэсийн металл 7430 тонн, молибдены металл 167.5 тонны гүйцэтгэлтэй, төлөвлөгөөний биелэлт 110.7-133.7 хувьтай байгаа бол баяжмал дахь зэс молибдены агуулгын төлөвлөгөө 102.2-102.4 хувиар биелсэн үзүүлэлттэй байна. Энэ хугацаанд 33245 тонн зэсийн баяжмал ачигдаж, чанарын үзүүлэлт 102.2 хувиар, 281.1 тонн молибдены баяжмал ачигдаж, чанарын төлөвлөгөө 102.4 хувиар тус тус биелжээ. М.Балжинням Фото: Б.Баттөгс Дэлгэрэнгүй...
  • Сэтгэлийн хүч-Зүтгэлийн илч

      Та бидний сайн мэдэх газрын нэг бол Судалгаа шинжилгээний хүрээлэн. Цаг нартай уралдсан тэдний нарийн чимхлүүр ажлын үр дүнгээр баяжуулалтын технологи зөв голдрилоор явж, дэлхийд танигдсан бүтээгдэхүүний чанар сайн гардаг. Тэр ч утгаар нь Судалгаа шинжилгээнийхнийг Эрдэнэт үйлдвэрийн “судас баригч” гэж нэрлэх нь бий. Энд тодорхой ажилтай тунгалаг төрхтэй олон сайхан бүсгүй мэргэжил чадвараараа манлайлан ажилладаг. Тэдний нэг нь баяжуулагч Норзонгийн Лхамбаяр.  Ховд аймгийн Булган сумын харьяат энэ эмэгтэй багын л хичээл сургуульдаа мэрийлттэй, хичээнгүй сүрхий охин явжээ. Дунд сургуулиа төгсөөд Улаанбаатар хотын Худалдааны техникумд элсэн суралцаж, нягтлан бодогчийн мэргэжил эзэмшихэд аавынх нь нөлөө их байсан болов уу. Түүний аав Худалдаа бэлтгэлийн ангийн даргаар нутагтаа 40 шахам жил ажилласан, олны дунд нэр хүндтэй эрхэм байлаа. Аав нь арван хүүхдэдээ: “худал хэлж, хулгай хийж болохгүй, улсын ажлыг унагаж, хүний итгэл алдаж болохгүй” гэж захидаг байсан нь бяцхан охины ой тойнд тод сийлэгдэн үлдэж, хожим ажил, амьдралдаа мөрдөх гол “дүрэм” болжээ. Н.Лхамбаяр Ховд аймгийнхаа Худалдааны трестэд нягтлангаар ажиллаж байхдаа дадлагын оюутан залуутай танилцаж дотноссон нь тэдний гайхам сайхан хайрын эхлэл байв. Тэд гурван хүүхдийн эцэг, эх бололцон, хүнээс дутуугүй амьдарч байсан ч үрсийнхээ ирээдүйн сайн сайхны төлөө залуусыг соронз мэт татсан Эрдэнэсийн хотыг зорьсон. Гэсэн ч санаснаар болдоггүй хорвоо түүнд хатуурхаж, магнайн толионд нь зурвас тодроогүй, толгойн үсэнд нь мөнгөн хяруу унаагүй байхад хань нь тэнгэрийн орноо одож, ангаахай адил гурван хөөрхөн үртэйгээ л үлдсэн. Хадмууд нь хэдий ойр байвч хүний нутагт бүсгүй хүн ажилгүй, өөрийн талын ах дүүгүй, өдөр шөнийн эргэлтэд аавыгаа нэхэн уйлагнах гурван хүүхдээс өөр ханьгүй амьдарна гэдэг ёстой л амьдын там санагдаж байсан нь мэдээж. Н.Лхамбаяр нутаг буцахаар шийдсэнээ хадам ах Ж.Баатархүүдээ хэлбэл, “Чи залуу хүн дахин сурч, Эрдэнэт үйлдвэрт хэрэгтэй мэргэжил эзэмш. Олны дунд  ажиллаж, хамт олонтойгоо ханьсаж амьдрах хэрэгтэй. Хүүхдүүдийнхээ ирээдүйг бодсон ч төв газраа үлдсэн нь дээр” гэж зөвлөснөөр ачаа бараагаа буцааж задалсан гэдэг. Тухайн үед хэлсэн болгоныг нь ухаарч ойлгох сэхээ байгаагүй ч, “Ах нь ажилд ороход нь тус дэм болъё” гэсэн ганц өгүүлбэр Эрдэнэтэд амьдрах итгэл төрүүлж байлаа. Ингэж л тэр, зоргоор болдоггүй тавилан заяаг зоригоороо туулахаар сэтгэл шулуудсан юм.  Н.Лхамбаяр Эрдэнэт үйлдвэрийн дэргэдэх Технологийн сургууль дүүргэж, баяжуулагч мэргэжил эзэмшин одоогийн Судалгаа шинжилгээний хүрээлэнд 2003 онд баяжуулагчаар ажилд орсон. Эхний жилүүдэд ажилдаа тэнцэхгүй гологдох вий, алдаа гаргаж хүмүүст түвэг удах вий гэхээс эмээж, дахин дахин нягтлан шалгаж хичээдэг байжээ. Түүний анхны мэргэжил болох нягтлангийн мэдлэг чадвар нь судалгаа шинжилгээний ажилд ихэд хэрэг болно. Тооцоолол буруу хийвэл олон хүний оюун сэтгэлгээ, хүч хөдөлмөрөө зориулсан судалгааны ажил гажуудах аюултай тул маш няхуур, нямбай хандах хэрэгтэй гэх. Тэрээр Судалгаа шинжилгээний хүрээлэнд 17 жил ажиллах хугацаандаа үйлдвэрлэлийн болон хагас үйлдвэрлэл, лабораторийн туршилтын ажилд биечлэн оролцож, технологийн процесст нэвтрүүлж буй шинэ тоног төхөөрөмж, урвалжуудад туршилт, сорьцлолт, ширхэглэлийн шинжилгээ хийх ажлыг өндөр үр дүнтэй гүйцэтгэж ирснийг журмын нөхөд нь  бахархан ярьсан. Үйлдвэрлэлийн технологийн хүндрэл гарахад мэргэшсэн, шуурхай, найдвартай учраас түүнд түрүүлж үүрэг өгч, илүү ачаалал үүрүүлнэ. Гэсэн ч хамт олныхоо итгэлийг зүтгэл дүүрэн хариулаад сурчихсан Н.Лхамбаяр бүхнийг амжуулаад инээгээд зогсож байна. Амьдралын ончроо нугачаанд түшиг тулгуур болж ирсэн хамт олон минь надад юу юунаас эрхэм гэж тэр ярих. Хөвүүлэн баяжуулагч мэргэжлийн тавдугаар зэрэгтэй тэрээр жилд 155 удаагийн үйлдвэрлэлийн туршилтын сорьцлолт, 2078 сорьцлолтын дээжийн боловсруулалт, 548.7 дээжид ширхгийн шинжилгээ, 418 дээжид нунтаглалтын горим тогтоох ажил гүйцэтгэсэн байдаг. Энэ тоо зарим хүмүүсийн хувьд мөрөөдлийн үзүүлэлт байж мэдэх юм. Н.Лхамбаяр ирээдүйд ашиглах хүдрийн технологийн шинж чанарыг тодорхойлох, геометаллургийн загвар буюу ордын геологи ашиглалтыг боловсруулах лаборатори, хагас үйлдвэрлэл, үйлдвэрлэлийн туршилтад идэвх чармайлттай оролцон сорьцлолт, ширхэглэлийн шинжилгээ хийх ажлыг үр дүнтэй гүйцэтгэсээр байна. Ажилд орсон эхний жилүүдэд үйлдвэрээс дээжээ авчирч хатаагаад, аяганд хийж гараар нунтаглаад шинжилгээ сорьцлолтыг нүдэн баримжаагаар шахуу хийдэг байснаа тэр дурссан. “Одоо орчин үеийн дэвшилтэт олон багаж, тоног төхөөрөмжтэй, түүн дээр ажиллаж байгаа залуус нь дэлхийн хэмжээний мэдлэг боловсролтой, хэл устай, судалгаа шинжилгээний ажил нь Эрдэнэт үйлдвэртээ төдийгүй улсад үнэлэгдэх хэмжээнд хүрсэн нь сайхан шүү”, гээд сэтгэл дүүрэн инээмсэглэсэн. Тэрээр ажилдаа тун өөриймсөг ханддаг онцлогтой. Ажлын байрны хөдөлмөрийн нөхцөл, зохион байгуулалтад анхаарч, аюул, эрсдэлийг олж илрүүлэн арилгахад санаачилгатай ажилладаг. Тиймдээ ч “Аюулгүй ажиллагч”-аар гурван удаа шалгарсан, залуу ажилчдад үлгэр дуурайлал болсон тэргүүний ажилтан төдийгүй халамжлан хүмүүжүүлэгч юм.  Хамт олныхоо хайр хүндэтгэлийг хүлээсэн, Эрдэнэт үйлдвэрийн Хөдөлмөрийн аварга Н.Лхамбаярын гурван хүүхэд өнөөдөр ээжийгээ ачлах хэмжээнд хүрчээ. Том охин нь Баяжуулах үйлдвэрийн Өөрөө нунтаглах хэсэгт конвейерийн машинчаар ажиллаж байгаа бол дундах нь Японд ажиллаж, амьдардаг. Харин бага хүү нь саяхан, “Энержи ресурс” компанид ажилд оржээ. Дөрвөн ач, зээгийн эмээ болсон, гээд нүүр дүүрэн инээмсэглэх түүний яриа цаанаа л хат суусан, амьдрал таньсан, өөрийн жаргалаас илүү үр хүүхдүүдээ гэсэн чин сэтгэлт торгууд эмэгтэйн гайхамшигт түүхтэй. Амьдрал хэмээх их далайн шуурганд сэлүүрээ алдаж, бүр живсэн хүмүүс ч бий. Харин Н.Лхамбаяр итгэлийн хүчээр жигүүрлэн, зүтгэлийнхээ илчинд дулаацан жаргаж, хамт олондоо хүндлэгдэн, уурхайчдынхаа урд эгнээнд тэмүүлэл дүүрэн алхаж явна.  М.Одгэрэл Фото: Б.Баттөгс Дэлгэрэнгүй...
  • Өглөөний сэргээш цуврал контент #20: Дашцэрэнгийн ТӨГСБАЯР

    Төгссөн сургууль: 1998 онд ШУТИС-ийн МТС-д хими технологич мэргэжлээр бакалавр, 2002 онд МТС-д техникийн ухааны магистр, 2010 онд КТМС-д үйлдвэрлэлийн менежментээр магистрын зэрэг тус тус хамгаалсан. Мэргэжил: Химийн технологич Ажилласан туршлага: 1998 онд Эрдэнэт үйлдвэрийн Дулааны цахилгаан станцад ажилд орсноос хойш эдүгээ 22 дахь жилдээ ажиллаж байна. Мэргэжил дээшлүүлсэн байдал: 2009 онд ОХУ-ын Москва хотноо химийн лабораторийн тоног төхөөрөмжийн чиглэлээр, 2012 онд Сингапур улсад ISO чанарын стандартын чиглэлээр, 2019 онд Австрали улсад сэргээгдэх эрчим хүчний чиглэлээр мэргэжил дээшлүүлсэн. Чин хүсэл: Эрдэнэт үйлдвэрийн Чанарын хяналтын хэлтэс, Дулааны цахилгаан станцын химийн инженерээр ажиллаж байсан тэрээр сүүлийн нэг жилийн хугацаанд Лабораторийн эрхлэгчээр дэвшин ажиллаж байна. Өөрийгөө чадваржуулж, үйлдвэрлэлд үр өгөөжтэй ажил хийхийг зорьж яваа түүний томоохон оролцооны нэг нь Эрдэнэт үйлдвэрийн хэмжээнд энэ оны сүүлчээр хэрэгжих “Химийн бодис, урвалжийн менежментийг сайжруулах” төсөл юм. Чадварлаг инженерүүдээс бүрдсэн энэхүү төслийн баг тайлангаа тавих бэлтгэл ажилдаа оржээ. Химийн инженер мэргэжлийнхээ үнэ цэнийг хэрэгтэй газарт нь харуулж, бодит ажил болгох нь түүний чин хүсэл билээ. Тиймдээ ч Эрдэнэт үйлдвэрийн ДЦС-ын Уур усны лабораторийг MNS ISO/IEC17025:2018 стандартын түвшинд хүргэж, Монгол Улсын эрчим хүчний салбарын итгэмжлэгдсэн  лабораториудын  нэг болгохоор хичээн ажиллаж байна. -Таны амьдралын сэргээш юу вэ, хэнээс, юунаас урам зориг, эрч хүч авдаг вэ? -Хөгжим, кино бол миний амьдралын сэргээш. Мөн хамгийн ойр байдаг гэр бүл, хамт олноосоо урам зориг, эрч хүч авдаг даа. -Хийж байгаа ажлын тань онцлог юу вэ? -Аливааг шинжлэн судлахад чиглэсэн,  химийн шинжлэх ухаан нь дэлхий нийтэд хурдацтайгаар хөгжиж, шинэ шинэ технологиуд гарч байгаа нь,  мэргэжлийн биднээс өөрийгөө хөгжүүлэх, маш их уншихыг шаарддаг. Тиймээс ч уншихгүйгээр энэ ажлыг хийх боломжгүй юм. -Та ойрын хугацаанд ямар ажил амжуулахаар төлөвлөж байна вэ? -Эрдэнэт үйлдвэрийн Дулааны цахилгаан станцын Уур усны лабораторийг итгэмжлэлд оруулна. Бид энэ ажлынхаа хүрээнд Монгол Улсын Стандартчилал, хэмжилзүйн газраар итгэмжлэл хийлгэхээр ойрын хугацаанд бэлтгэл ажлаа хангаж байна. Мөн төслийн ажлаа хийж дуусгана даа. -Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаардаг вэ? -“Эрүүл биед саруул ухаан оршино” гэж их чухал үг санагддаг. Эрүүл гэдэг үгэнд хүний бие бялдрыг хамааруулахаас гадна, сэтгэл санаа эрүүл саруул байх нь чухал юм. Хүмүүс бие бялдрын эрүүл мэндэд ихээхэн анхаардаг ч сэтгэл санааны эрүүл мэнддээ хайхрамжгүй хандах нь бий. Сэтгэл санааг эрүүл саруул байлгах нэг гол хүчин зүйл нь сэтгэл судлал гэж боддог учраас сүүлийн жилүүдэд энэ чиглэлээр илүүтэй судалж, хувь хүнийхээ хөгжилд анхаарч байна. -Таны хамгийн том мөрөөдөл юу вэ? -Дэлхийн алдартай хөгжимчдийн тоглолт үзэхийг мөрөөддөг. -Таны амьдралдаа авч байсан хамгийн сайн зөвлөгөө? -Бусдад түвэг учруулахгүй ажиллаж, амьдрах л хэрэгтэй. -Одоо хийж буй ажил таны мөрөөдлийн ажил мөн үү? -Мэдээж, энэ бол миний мөрөөдлийн ажил. Би сурагч байхын л химийн хичээлд дуртай хүүхэд байсан. Их сонирхолтой шинжлэх ухаан шүү. Өнөөгийн залуусыг ажиглаад байхад ажилдаа дургүй, аливаад ял авсан юм шиг ханддаг. Хүн өөрийн ажлыг аль болох сонирхолтой байх талаас нь анхаарч, түүнийгээ хийж хэрэгжүүлснээр жинхэнэ утгаар нь ажилдаа дурладаг болов уу. Сэтгэлээсээ хийсэн ажил үр шимээ өгдгийг мартаж болохгүй. -Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ? -Эрдэнэт үйлдвэр ажилчдадаа олон талын боломжийг нээж өгдөг. Миний хувьд хамт олон, нийгэмд хувь хүн өөрийгөө хэрхэн, яаж авч явахыг Эрдэнэт үйлдвэрт ажиллах хугацаандаа л сурсан. Эхний 15 жил өөрөөсөө  ах хүмүүстэй ажиллаж байсан бол сүүлийн 6 жил дандаа залуучуудтай ажиллаж байна. Энэ хоёрын хооронд маш их ялгаа харагддаг. Аль ч насны хүнийг ойлгож ажиллана гэдэг л надаас их зүйлийг шаарддаг. Дэлгэрэнгүй...
  • Өнөөдөр 05 дугаар сарын 22

    Мэдүүштэй... 1. Өнөөдөр жилийн 143 дахь өдөр. Он дуусахад 222 хоног үлдлээ. 2. Эрдэнэт хотод агаарын хэм өдөртөө +13 градус, шөнөдөө +4 градус дулаан, бага зэргийн бороотой, салхины хурд 5-8 м/сек байна. 3. Аргын тооллын 5 дугаар сарын 22. Сугар гараг. Билгийн тооллын 30. Хөхөгчин үхэр өдөр. Өдрийн наран 5 цаг 05 минутад мандан, 20 цаг 32 минутад жаргана. Энэ өдөр тахиа, могой, үхэр, бич жилтнээ аливаа үйлийг хийхэд эерэг сайн. Харин хонь, бар, туулай жилтнээ сөрөг муутул элдэв үйлд хянамгай хандаж, биеэ энхрийлүүштэй. Үйл бүхнийг хоригловол тустай, аливаа үйл үйлдвэл үр нь муу. Өдрийн сайн цаг нь могой (09:40-11:40), бич (15:40-17:40), гахай (21:40-23:40), бар (03:40-05:40), туулай (05:40-07:40) болой. Хол замд явах хүн баруун зүгт мөрөө гаргавал зохистой.Үс шинээр үргээлгэх буюу засуулахад эрлэг лугаа учрах муу. 4.Дэлхийн зах зээл дээр нэг тонн зэс 5387 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2799, евро 3063, БНХАУ-ын юань 393, ОХУ-ын рубль 38, Японы иен 26, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn) Эрдэнэт үйлдвэрийн түүхэнд энэ сард... Асуулт: -Эрдэнэт үйлдвэрийн интернационалч хамт олон бүх ард түмний социалист уралдаанд хэрхэн оролцож байна вэ? Хариулт:-Эрдэнэт үйлдвэрийн интернационалч хамт олон бүх ард түмний социалист уралдаанд идэвхтэй оролцон, үйлдвэрийн жигд ажиллагааг хангах, улсын төлөвлөгөө, экспортын үүргийг жил дараалан давуулан биелүүлж, хөдөлмөрийн өндөр амжилт гаргаж ирсэн сайхан уламжлалтай. Бүх ард түмний социалист уралдаанд 1979, 1980, 1985 онуудад улсад, 1979, 1980 онд салбарын хэмжээнд тэргүүн байранд тус тус шалгарсан.  (Эх сурвалж: “Монгол, Зөвлөлтийн хамтарсан уул уурхайн баяжуулах “Эрдэнэт” үйлдвэр: 100 асуулт, хариулт” номоос...)   Дэлгэрэнгүй...
  • Бүрэнбүстийн энгэрт Монгол ахуй цогцолж байна

      Нар ээсэн сайхан өдөр Бүрэнбүст хайрхны энгэрийг зорилоо. Энд Эрдэнэт хотын гэр хорооллын иргэдийн ундны усны эх ундаргыг хамгаалах, нуур цөөрөм үүсгэх ажил ид үргэлжилж байна. Байгууллага, аж ахуйн нэгжүүд энд өөрийн төгөлийг үүсгэж нийт 14 төрлийн 23 мянган мод тарьжээ. Шинэс, хайлаас, улиас, агчаас эхлээд жимсний модод ч байна. Эрдэнэтчүүдийн хэрэглэж буй жимсний 90 орчим хувь нь импортоор орж ирдэг учир өөрийн хөрсөнд алим, чавга, интоор зэрэг зарим ховор төрлийн жимсний мод тарьж туршиж байгааг нүдээр үзлээ. “Эко Баян-Өндөр” төслийн хүрээнд хүнсний 146 төрлийн ногоог ил талбайд арчлан зун, өвлийн хүлэмжид тарьж, мөн туршиж байна. Энд хүүхдийн “Хөдөлмөр” зуслан ажиллуулах нөхцөл бүрдүүлж, элсний талбай хүртэл байгуулахаар төлөвлөжээ. Хөдөлгөөний хомсдол, агаарын дутагдалд орсон “орон сууцны” хүүхдүүдийг энд амраахын зэрэгцээ ажиллуулбал бие бялдар нь хөгжихөөс гадна цахим орчноос холдож тархи нь бүрэн сайхан амарна даа, гэх бодол эрхгүй төрсөн.      Монголын ёс заншлын цогцолборын хоймор хэсэгт 22-ийн диаметртэй, 380 м2 талбай бүхий гэр өргөө холоос бараатай үзэгдэнэ. Ойролцоо нь нүүдэлчин Монголчуудын ахуй соёлыг илтгэсэн, эсгий урлалын бүтээл дэлгэсэн, ястан үндэстний хувцас, эмээл хэрэглэл, авдар сэлт өрсөн 10-аад гэр байна. Мөн энд Эрдэнэт хот дахь нутгийн зөвлөлүүд өөрийн гэрээ барьж тохижуулан онцлогоо сурталчлах боломжтой. Эхний гэрийг Увсынхан барьжээ. Хоймрын жаазанд Маршал Ю.Цэдэнбалаасаа эхлээд алдар хүндтэй хүмүүсийнхээ зургийг залсан нь сонирхол татав. Уг цогцолборыг тойруулан цагаан идээ, арьс шир, малын цус, ноос, ноолуур боловсруулах, модон эдлэл, гар урлал, эсгий эдлэл, хар, цагаан замаск, арматур, хөнгөн блокны үйлдвэр гээд 50 орчим жижиг дунд үйлдвэр байгуулахаар зорьсны 30 гаруй нь үйл ажиллагаагаа эхлээд байна. Мөн энд 2000 тоннын багтаамжтай зоорь барьж байна. Хүнсний ногоо хатаах, хөлдөөх, даршлах, угаах дөрвөн үйлдвэр эхлэл шатанд явна. Түүнээс гадна жимс жимсгэнэ, артишокоор ундаа жүүс, цай хийх, усанд будаа тариалах, гоо сайхны бүтээгдэхүүн үйлдвэрлэх, малын дайвар бүтээгдэхүүнээр царцаамал, тос боловсруулах гээд өрхийн үйлдвэрлэлийг дэмжих замаар хийж хэрэгжүүлэхээр төлөвлөсөн ажил их гэж Баян-Өндөр сумын Засаг дарга С.Ганцогт ярьсан юм. 2017 оноос хойш Сум хөгжүүлэх сангийн зээлээр 34 үйлдвэр байгуулагдаж, 160 орчим байнгын ажлын байр нэмэгдсэн байна.     Энд нуур үүсэхээр жигүүртэн шувууд цуглаж, иргэд чөлөөт цагаа өнгөрүүлэх, Эрдэнэтээр зочилсон гийчид саатан морилж, нүүдэлчин Монголчуудын ахуй соёлтой танилцах, морин болон тэмээн хөсгөөр богинын аялал хийх боломж бүрдсэн, Эрдэнэт хотын төвлөрлийг сааруулсан аялал жуулчлалын цогцолбор бүс болох цаг ойрхон байна.                    М.Одгэрэл     Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Мэдээ

   Өнөөдөр зургаадугаар сарын 26-ны өдөр буюу “Хар тамхи, мансууралтай тэмцэх дэлхийн өдөр”. Хэдхэн жилийн өмнө хар тамхины тээвэрлэгч байсан Монгол Улс өнөөдөр хэрэглэгчийн тоонд шилжсэн нь энэ төрлийн гэмт хэрэгтэй бүхий л талаар тэмцэх шаардлагатайг харуулж байна. Тэмдэглэлт өдрийг тохиолдуулан Монгол Улсын Гэмт хэргээс урьдчилсан сэргийлэх салбар зөвлөл, Цагдаагийн Ерөнхий газрын Хар тамхитай тэмцэх газраас мэдээлэл түгээх сургалт зохион байгуулахаар Орхон аймагт хүрэлцэн иржээ.
   Хүн амын дийлэнх хувийг нь залуучууд эзэлдэг, төвлөрөл ихтэй манай аймгийг “Анхааралд өртөж болзошгүй бүс нутаг” хэмээн үзэж, холбогдох хууль сахиулах байгууллагын төлөөллүүд болон Эрдэнэт үйлдвэрийн цех, нэгжийн ажилчид, өсвөр үеийнхэн, төрийн албан хаагч нар сургалтад хамрагдаж байна. 2018 онд улсын хэмжээнд хар тамхины 199 гэмт хэрэгт 402 хүн холбогдон шалгагдсан бол 2019 оны эхний хагас жилд 96 гэмт хэрэгт 188 хүн холбогджээ. Энэ нь өмнөх оны мөн үеэс өссөн үзүүлэлт бөгөөд нийт гэмт хэргийн гаралтын 10 орчим хувийг Орхон аймаг эзэлж байгаа нь зорилтот бүлэг рүү хандах цаг болсныг илтгэв.
   Сэтгэцийн эрүүл мэндийн эмч нар тус сургалтаар, хар тамхи хэрэглэснээр хүний биед учирч болох хор уршиг, сэтгэцэд гарах өөрчлөлт, донтох эмгэгийн талаар ойлголт өгч байна. Мөн энэ төрлийн гэмт хэрэгт холбогдсон тохиолдолд эрүүгийн хуулийн ямар хариуцлага хүлээдэг болохыг Цагдаагийн байгууллагаас танилцуулж, урьдчилан сэргийлэх бичлэг үзүүллээ. Албаны хүмүүсийн хэлсэнчлэн, Улаанбаатар хотын Буянт-Ухаа, Сэлэнгэ аймгийн Алтанбулаг, Өмнөговь аймгийн Гашуунсухайт, Дорноговь аймгийн Замын–Үүд зэрэг шалган нэвтрүүлэх хилийн боомтууд дээр хар тамхины эсрэг сургалт нэгэн зэрэг зохиогдож байгааг онцоллоо.


И.Чинтогтох





 

   Нийгмийн хариуцлагатай  “Эрдэнэт үйлдвэр” ТӨҮГ, ажиллагсдынхаа орон сууцны асуудлыг шийдвэрлэх зорилгоор цогц бодлого хэрэгжүүлдэг. Үүний нэг хэсэг нь өнгөрсөн 5 дугаар сарын 1-нд шавыг нь тавьж эхлүүлсэн “Уурхайчин 1” буюу хуучин нэршлээр “Москва 300” орон сууцны хорооллын төсөл юм. Ирэх оны 5 дугаар сард эхний хоёр блокийг ашиглалтад оруулахаар төлөвлөж буй уг орон сууцны захиалгыг уурхайчдаас авч эхэллээ. Шинэ орон сууцанд орохыг хүссэн бүх ажилчид захиалга өгөх нь нээлттэй бөгөөд ипотекийн зээл болон Эрдэнэт үйлдвэрээс олгодог орон сууцны хөнгөлөлтийн 12 сая төгрөгийг авах зэрэг эрх  эдлэх боломжтой юм. Орон сууцны захиалга болон ажиллагсдын саналын судалгаа хийх ажлыг Нийгмийн харилцааны хэлтэс хариуцаж байгаа аж. Захиалга авах ажил 7 дугаар сарын 2 хүртэл үйлдвэрийн Ерөнхий захиргааны 1,2 дугаар байр болон цех нэгжүүд дээр үргэлжилнэ.
   “Уурхайчин1” орон сууцны захиалга авах өдөрлөгт уг хорооллын барилгын гүйцэтгэгч “Неман констракшн” ХХК оролцож, танилцуулга хийж байна. Өнөөдрийн байдлаар, орон сууцны барилгын суурийн ажил төлөвлөгөөний дагуу үргэлжилж буйг компанийн төлөөлөл онцлов. “Неман констракшн” ХХК нь 2012-2017 онд Эрдэнэт хотод “Эрдэнэт Элит”, “Элит Цамхаг”, “Баян-Өндөр”, “LUX Apartment” зэрэг 312 айлын орон сууцны хотхон барьж, ашиглалтад оруулсан туршлагатай компани аж.

М.Балжинням

   Эрдэнэт үйлдвэрийн Засвар механикийн заводын Цутгуурын цехэд хийгдэх өргөтгөлийн ажлын бэлтгэлээс шалтгаалан тус цехийн ачаалал нэмэгдэж буйг заводын дарга Б.Баасансүрэн онцоллоо. Өргөтгөлийн ажлын хүрээнд Цутгуурын цехийн үйл ажиллагааг түр зогсоож, шинэ тоног төхөөрөмж суурилуулж, угсрах тул түүнээс өмнө цехүүдийн сэлбэг хэрэгслийн нөөц бэлтгэх юм. Засвар механикийн заводынхан  оны эхний 10 сард 5050 орчим тонн сэлбэг хэрэгсэл үйлдвэрлэхээр төлөвлөж байсан бол өнөөдрийн байдлаар дахин 200 тонныг нэмж хийх шаардлагатай болжээ. Уг ажлыг ирэх 11 сард багтаан гүйцэтгэхээр Баяжуулах үйлдвэр болон бусад цехүүдтэй хамтран ажиллаж байна.
   Цутгуурын цехийн өргөтгөлийн ажил төлөвлөгөөний дагуу хэвийн үргэлжилж, бэлтгэл ажил 35 хувийн гүйцэтгэлтэй байна. Энэ бага үзүүлэлт биш аж. Ирэх 10 сарын дунд үеэс тоног төхөөрөмжөө татан авч, суурилуулалт, угсралтын ажил эхлэхээр төлөвлөжээ. Мөн хуучин тоног төхөөрөмжийг буулгах ажил хийгдэнэ. Саяхан бараа материалын агуулахад суурилуулах гүүрэн краны асуудал шийдэгдэж, хугацаанаас нь  өмнө нийлүүлэхээр болсон байна. Ингэснээр өргөтгөлийн ажил эрчимжих нэг алхам  болжээ. Өргөтгөлийн бэлтгэл хангах ажлын төв болон дэд хэсгүүд долоо хоног тутам хуралдаж, ажлын явцыг  дүгнэдэг аж.  
   Засвар механикийн заводын удирдлага Цутгуурын цехийн өргөтгөлийн ажлыг өөрсдийн хүчээр хийх бодлого барьж буйгаа хэлэв. Тиймээс цөөн тооны гадны байгууллагатай хамтран ажиллах гэрээ байгуулах юм байна.  Уг өргөтгөлийг ирэх оны 5 дугаар сарын 1-нд  ашиглалтад оруулахаар төлөвлөж байгаа ч хугацаанаасаа өмнө дуусгах  зорилт дэвшүүлжээ. Хэрэв ажлын зохион байгуулалтыг өндөр түвшинд хийж, хуваарийн дагуу гүйцэтгэж  чадвал энэ зорилт хэрэгжих боломжтой гэж тэд үзэж байна.   

М.Балжинням

   Засвар механикийн заводын Цутгуурын цехийн уран нарийн үйлийг урлагч Загварын хэсгийнхэн бүтээмж инновацийн “Уран гар” дугуйлан ажиллуулдаг. Эрдэнэт үйлдвэр төдийгүй гадны компаниудын захиалгат цутгамал бүтээгдэхүүний анхны дамжлагыг үйлдвэрлэдэг тус хамт олноос сайн саналын системийн манлайлагч тодорчээ. Тоон удирдлагатай зорогч суурь машины оператор Б.Бат-Эрдэнэтэй ярилцлаа.

   - Эрдэнэт үйлдвэрт хэд дэх жилдээ ажиллаж байна вэ?
  - Би график дизайнер мэргэжилтэй. Мэргэжилтэйгээ уялдуулан тоон удирдлагатай зорогч суурь машин дээр тав дахь жилдээ ажиллаж байна. Хэв загвараа машин дээр үйлдвэрлэдэг болсноор хүчин чадал маань ч эрс дээшилсэн. Манайхтай ижил төрлийн машиныг уул уурхайн техник, технологитой уялдуулан ашиглаж байгаа компани, аж ахуйн нэгж одоогоор Монгол Улсад байхгүй. Мэргэжил маань сайхан,  бас бахархалтай санагддаг.

   - Засвар механикийн заводын Загварын хэсэг ямар ажил гүйцэтгэдэг вэ?
   - Эрдэнэт үйлдвэрийн Засвар механикийн заводын Цутгуурын цех нь хэв болон хайлах, загварын гэсэн гурван хэсгээс бүрддэг. Загварын хэсгийнхний хувьд аливаа бүтээгдэхүүний хамгийн анхны загварыг мод, панер, хөөс, пластик материалаар хийж гүйцэтгэдэг онцлогтой. Бүтээгдэхүүний анхны загвар ямар гарна, эцсийнх нь тийм л байна. Манай хамт олон хамтын бүтээлээ чанартай, захиалгын дагуу хийхэд дор бүрнээ анхаарч, хариуцлагатай ажилладаг.

   - Үйлдвэрийн бүтээмж инновацийн талаар бодлоосоо хуваалцана уу?
   - Ажлын байран дээрээ “Энийг засчих юмсан” гэж харсан зүйлээ тэр дор нь хийчихнэ. Өөрөө засаж сайжруулна. Гэхдээ хийсэн ажлаа үнэлүүлдэггүй, сайн саналын системийг хэрхэн ашиглах талаар мэдээлэл хомс байлаа. Хоёр жилийн өмнөөс системийн талаар өргөн ойлголттой болж, шинэ санал нэвтрүүлэх ажилд идэвхтэй оролцож байна. Тухайлбал, ажлын найман цагийнхаа 10-20 минутыг бүтээмжийн ажилдаа зарцуулдаг болсон. Сүүлийн үед ажилчдаа бүрэн хамруулахын тулд ямар нэг шинэ саналыг тэдэнд үүрэг болгон өгч байгаа. Ингэхдээ тухайн ажлыг хэн хамгийн сайн хийж чадах вэ гэдгийг юун түрүүнд бодолцдог. Хамт олноо урамшуулж, тэднийг дэмжин ажилласнаар оролцоо эрс нэмэгдэж байгааг ажигласан. Баг хамт олноороо бүтээмжийн ажилд оролцож, гар нийлж ажиллах үнэхээр сайхан.

   - Таны хувьд сайн саналын системд хэдэн санал гаргав? Хэрэгжилт нь хэрхэн үнэлэгдсэн бэ?
   - Оны эхний зургаан сарын байдлаар сайн саналын системд 40 санал гаргаж, биелэлт нь 50 хувьтай гарсан. Эдгээр саналд хөдөлмөрийн аюулгүй байдал талаасаа тоног төхөөрөмжтэй холбоотой болон технологийн ажлууд дийлэнх хувийг эзэлж байгаа. Харин бусад цех, хэсэг, дугуйлан, бүтцийн нэгжийн удирдлагуудаас дэмжлэг авах ажлууд маань хүлээлттэй байна. Бичсэн төслийнхөө хамгаалалтыг хийж, ажил маань дэмжигдвэл үйлдвэрлэлд нэвтрэх боломжтой.

  - Бүтээмжийн ажил өрнүүлэх нь эдийн засгийн талаасаа үр өгөөжтэйг бид мэднэ. Харин хувь хүний хөгжилд хэрхэн нөлөөлдөг вэ?
   - Хүн аливаа ажлыг урсгалаар нь хийх бус, тодорхой ажил дээр өдөр бүр бүтээмжтэй ажиллах хэрэгтэй. Энэ нь тухайн хүнд ажиллах эрч хүч, урам зориг өгч, ажилдаа дур сонирхолтой болгодог. Сүүлийн жилүүдэд үйлдвэрийн техник технологи шинэчлэгдэж, ажиллах хүч залуужиж байна. Тэр хэрээр бид цаг үеэ мэдэрч, өөрсдийн ажлын байр, ажиллах орчноо сайжруулах ёстой. Дэлхийн хэмжээний уул уурхайн үйлдвэрт ажиллаж байгаагийн хувьд хүн бүр л аюулгүй ажиллагааг бүрэн хангасан, тав тухтай орчинд ажиллахыг хүсч байна. Ийм боломж бидэнд бий. Хүн бүр хичээх хэрэгтэй. Асуудлын болж бүтэхгүйг удирдлагаасаа шаардаад суух бус, гарц гаргалгааг эрэлхийлэх нь илүү үр дүнтэй, бас цаг хугацаа хэмнэнэ гэж бодож байна. Бүтээмжийг ажлын байранд нэвтрүүлснээр хамт олны уур амьсгал сайжирч, бүтээлч санаачилгатай, цагийн зөв зохион байгуулалттай болох олон давуу талтай.

   - Залуучууддаа хандан юу хэлэх вэ?
  - Залуучууд маань юун түрүүнд техник технологийн шинэчлэлийг даган хөгжих хэрэгтэй байх. Урагш харсан тэмүүлэлтэй, дор бүрнээ бүтээмжтэй байж, эргэн тойрны асуудлаа шийдэн, өөрийн тав тухыг хангаж ажиллаарай гэж хэлье.

И.Чинтогтох
Фото: Б.Баттөгс

   Засвар механикийн заводын хамт олон бүтээмж инновацийн үйл ажиллагааг сайжруулж, дээшлүүлэх чиглэлээр удирдлага ажилтнуудын хамтын ажиллагаа, идэвх оролцоог эрчимжүүлэн ажиллаж байна. Үүний үр дүнд оны эхний хагас жилд  сайн саналын системээр дамжуулан цехийн ажилтнууд  ажил сайжруулах 324 сайн санал гаргажээ. Нэг хүнд ноогдох саналын тоо 0,52 байгаа нь өмнөх оны мөн үетэй харьцуулахад хоёр дахин нэмэгдэж, ажилтнуудын идэвх, оролцоо 12,4% -иар өсчээ.  
   Тус цехэд бүтээлч оролцоог нэгтгэх зорилготой  31 бүтээмж чанарын дугуйлан ажилладаг бөгөөд оны эхний хагас жилд 18 төсөлт ажил, 20 жижиг сайжруулалтын ажил хэрэгжүүлж байна. Өөрөөр хэлбэл, цехийн ажилтнууд ажлын байрны эрсдэлийг бууруулах, аюулгүй орчин бүрдүүлэх, бүтээгдэхүүний чанарыг сайжруулах, ус, эрчим хүч хэмнэх, процессын сайжруулалт, ажил хөнгөвчлөх, ажлын арга барилыг сайжруулах, материал болон ажиллах хүчний хэмнэлтийг бий болгох зэрэг чиглэлээр санаачлага гаргаж, төсөл боловсруулжээ.
   Засвар Механикийн заводын Бүтээмжийн зөвлөл нь  “5 сайн үйлс”, “Сайн саналын систем”, “Бүтээмж, чанарын дугуйлан” гэсэн анхан шатны, ахисан төвшний “6 сигма” арга хэрэгслүүд нэвтрүүлэн, засвар үйлчилгээний дээд зэргийн стандартыг бий болгон хэвшүүлэхэд шаардлагатай багаар ажиллах чадварыг бий болгох, тасралтгүй сайжруулалтыг хийж, үр өгөөжийг  нь хүртэх, бүтээгдэхүүн үйлдвэрлэл, үйлчилгээний чанарыг сайжруулах, зардал бууруулах зорилттой ажилладаг. Цехийн хэмжээнд эдгээр чиглэлээр ахиц дэвшил гарч, ажилтнуудын идэвх чармайлт нэмэгдэж байгаа нь Бүтээмжийн зөвлөлийн ажлын нэг үр дүн гэж албаны хүн онцоллоо.

М.Балжинням


 

Даваа, 24 6-р сар 2019 00:00

Лабораторийн Өнөрөө

   Эрдэнэт үйлдвэрийн сайн саналын системийн манлайлагч З.Өнөртэй уулзаж, ажлын байрыг нь сурвалжлахаар Ус хангамжийн цехийн Цэвэрлэх байгууламжийн хэсгийг зорилоо. Усны лабораторийн эрхлэгч гэх хаалгыг татвал цагаан халад өмссөн  намбалаг эмэгтэй  инээмсэглэн угтсан нь энэ сурвалжилгын баатар З.Өнөр байв. Эрхлэгчийн багавтар  өрөөнд хоёр томхон шүүгээ байх бөгөөд түүний доторх  цэнхэр хавтаснуудаас бичиг баримтаа эрж хайхын  зовлон үгүй мэт. Ногоон тэмдэглэгээтэй бол Лабораторийн итгэмжлэлтэй холбоотой, улбар шар нь ХАБ-ын бичиг баримт гэх мэтээр ангилсан нь содон. Мөн хуучин бичиг баримтуудаа ангилан архивлан хадгалсан, лабораторт хэрэглэж буй арга аргачлал, стандарт заавруудыг нэгдсэн байдлаар эмхэлж, үйлдвэрлэл эрхэлсэн захирал, цехийн даргаар батлуулан гарын авлага болгосон нь ажил хөнгөвчилж, эмх цэгцтэй болсон тухай эрхлэгч  ярилаа.
   Орчин үеийн лабораторийн дэвшилтэт төхөөрөмж бүхий Химийн шинжилгээний цэлгэр саруул өрөөнд лаборант бүсгүйчүүд шинжилгээ хийж зогсоно. Ойрын хоёр жилд Усны лабораторийн ажиллах орчин хийгээд боловсон хүчний хувьд томоохон дэвшил гарчээ. Лабораторийн эрхлэгч, химич инженер гэсэн орон тоо нэмэгдэж, орчин үеийн дэвшилтэт төхөөрөмж суурилуулжээ. З.Өнөр болон бүтээмж чанарын “Шинжээч” дугуйлангийнхны санаачилга, хэсгийн удирдлагын дэмжлэгтэйгээр лабораторын ажлын байранд  тусгай хаалт хийж, өрөөний тоог  нэмэгдүүлэн шинжилгээний өрөөнүүдийг үйл ажиллагаагаар нь ангилжээ. Нян судлалын ариун орчин бүхий өрөөнд гидробиологийн шинжилгээ хийдэг байсан нь эргэж бохирдох нөхцөлтэй байж. Эдгээр өрөөг  тусгаарласан нь шинжилгээний чанарт ч сайнаар нөлөөлөхүйц ажил болсон нь илт. Түүнчлэн дотоод нөөц бололцоогоо ашиглан дээж бэлтгэл, хувцас солих тусгай өрөөтэй болсон нь шинжилгээний үр дүн үнэн бодитой гарах, ая тухтай ажиллах нөхцөлийг бүрдүүлжээ. Мөн өдөр тутам шинжилгээ хийдэг ууршимтгай, хамт хадгалахыг хориглосон бодисыг химийн бодист тэсвэртэй хавтангаар тусгаарлан ялгаж байршуулсан байна. Шинжилгээнд хэрэглэдэг химийн бодис, мөн шил саваа тусгай тавиурт хадгалан, бүрэн ангилан ялгаж, хаягжуулсан нь эмх цэгцтэйгээс гадна, аюул эрсдэлээс хамгаалсан сайн ажил болжээ. Лабораторит зайлшгүй байх шаардлагатай элсийг л гэхэд хүчлийн саванд хадгалж байгаа нь нэг талаар аюултай хог хаягдлыг хаа сайгүй  хаяхгүй байх, нөгөөтэйгүүр модоор элсний сав хийхгүйгээс байгаль орчинд ээлтэй зэрэг жижиг гэлтгүй З.Өнөр болон хамт олных нь санаачилсан ажил бүрээс нь сэтгэл, зүтгэл ханхийнэ. Дөрвөн ажилтантай энэ лабораторийн “Шинжээч” дугуйлангийнхан үйлдвэрийн 40 жилийн ой угтан цехээс зарласан “ХАБЭА ба таван сайн үйлсийг хэрэгжүүлэгч” ажлын байрны уралдаанд тэргүүн байр эзэлсэн бол, энэ онд үйлдвэрийн хэмжээнд “5С шилдэг ажлын байр” шалгаруулах төсөлт хөтөлбөрт шилдэг долоон ажлын байрын нэгээр  шалгарчээ. Энэ бүхэн З.Өнөрийн санаачилга, хамт олноо  чиглүүлэн удирдсаны  үр дүн.
    Тус лаборатори  MNS ISO17025*2007 стандарт нэвтрүүлж хоёр дахь удаагаа магадлан итгэмжлэгджээ. Энэ лабораторынхон дээрх стандарт, чанарын удирдлагын тогтолцоог нэвтрүүлэн, техникийн хүчин чадал, ажилтны ур чадварыг дээшлүүлэн,  Монгол Улсын болон орон нутгийн усны салбарын хяналтын  түшиц лаборатори болох хэтийн төлөвтэй ажиллаж байгаа гэсэн.
    “Манай цэвэрлэх байгууламж хотын болон үйлдвэрийн ахуйн бохир усыг 95 хувь хүртэл цэвэршүүлэн байгаль орчин /Хангалын гол/-д  нийлүүлдэг. Түүнчлэн сүүлийн жилүүдэд дулааны улиралд  Эрдэнэт үйлдвэрийн Хаягдлын аж ахуйн даланд хоногт 15-18 мян.м3 ус нийлүүлж байгаа. Ингэснээр  хиймэл нуурын усны алдагдлыг нөхөж, Баяжуулах үйлдвэрийн технологийн процесст ашигладаг эргэлтийн усны хэмжээг тогтвортой барихад нөлөөлдөг юм. Манай Цэвэрлэх байгууламж технологийн үйл ажиллагаагаараа, усны цэвэрлэгээний чанар үр дүнгээрээ Монгол Улсдаа номер нэг” гэж тэрбээр бахархан ярьсан юм.
    “Ус хангамжийн цех орон тооны Бүтээмж, инновацийн мэргэжилтэнтэй болсон нь бүтээмжийн ажил эрчимжихэд ихээхэн нөлөөтэй байгаа. Манай цех бүтээмжийн урамшууллыг мөнгөн чек хэлбэрээр хамт олны дунд гардуулан өгдөг нь бусад хүмүүст ч санал санаачилга гаргах өдөөлт болдог. Бид  жилийн эцсээр сайн саналын урамшуулалд 600 мянган төгрөг авсан. Үүнийгээ шинээр ажилд орсон химич инженерийнхээ ажлын ширээ сандал авахад зориулсан. Ер нь бид урамшууллаа хувааж авахыг урьтал болгодоггүй. Дараагийн сайжруулалтын санхүүжилт, бас зайлшгүй шаардлагатай зүйлд зарцуулдаг” гэж дугуйлангийнхан ярилаа.
    Танайхны ажил Цэвэрлэх байгууламжийн үйл ажиллагаанд хэрхэн нөлөөлдөг вэ гэсэн асуултад лабораторийн эрхлэгч: “Манайх хими, биологи, нян судлалын 23 төрлийн шинжилгээ хийдэг. Шинжилгээний үр дүнгээр технологийн процессыг, мөн байгаль орчинд нийлүүлж буй цэвэршүүлсэн ус стандартад нийцэж буй эсэхийг давхар хянадаг.  Хангалын голын урсац бага учраас  хангалттай сайн цэвэршүүлж  нийлүүлэх ёстой гэдгийг бид ухамсарладаг. Миний ажлын үр дүнгээс хамааран хэсгийн хамт олны ажил үйлс үнэлэгддэг. Иймээс би ажилдаа алдаа гаргах эрхгүй. Бидний ажил үнэн зөв, ил тод, шударга байх ёстой. Манай шинжилгээний үр дүнгээс Цэвэрлэх байгууламжийн технологийн хэвийн ажиллагаа, байгаль орчинд нийлүүлж буй усны чанар харагддаг” гэв.
    Усны салбарын түшиц лаборатори болохоор зорьж буй энэ хамт олны түүчээ болсон сайн саналын манлайлагч З.Өнөр лабораторийн эрхлэгч болонгуут ийнхүү ажлын байраа эмхэлж, цэгцлэх  далайцтай ажил санаачлан хийсэн. Ойрын үед итгэмжлэлт лаборатори, орчин үеийн тоног төхөөрөмж, боловсон хүчний чадвартаа дулдуйдан, үйлдвэр аж ахуйн газруудын ахуйн усны шинжилгээ хийж, цехийнхээ орлогыг нэмэгдүүлэх, лабораторийн чадамжаа дээшлүүлэхээр мэрийж явна. Тэрбээр  МУИС-ийг биохимич, биологийн багш мэргэжлээр төгсөж, Эрдэнэт үйлдвэрт эдүгээ 30 дахь жилдээ лаборантаас лабораторийн эрхлэгч хүртэл ажиллаж буй манай үйлдвэрийн чадварлаг мэргэжилтний нэг юм.

Я.Энхтуяа
Фото: Б.Баттөгс

   Эрдэнэт үйлдвэрийн Авто тээврийн цехэд шинээр хоёр Белаз  угсарч байна. Тус цехийн Засварын хэсгийнхэн Өөрөө буулгагч хүнд даацын автомашинуудын угсралтын ажлыг хийж байгаа аж. Одоогоор нийт 130 тонны даацтай 88 дахь Белаз авто машиныг угсарч  байгаа бөгөөд Белазууд КТА-50 хөдөлгүүртэй, 1600 морины хүчин чадалтай уулын тээврийн зориулалтай юм. “Белазууд каменз хөдөлгүүртэй тул засварын цаг багасаж ажлын бүтээмж нэмэгдэнэ.  Уулын тээврийн  нөхцөлд зохицсон стандарт бүхий хүнд даацын Белазыг угсрах хугацаа урт байсан. Гэвч үйлдвэрийн Авто тээврийн цехийн Засварын хэсгийн хамт олон хугацаанаас нь өмнө угсарч дуусгахаар ажиллаж  байна” хэмээн албаны хүн мэдээллээ.  

Т.ЧУЛУУН

Баасан, 21 6-р сар 2019 00:00

Сингапурт суралцангаа аялая

   Дэлхийн улс орнуудаар хүссэнээрээ аялаж, мэдлэг боловсролоо ахиулахад тань ямар бэрхшээл тулгарч байна вэ? Гадаад зах зээлд бизнесийн хүрээгээ өргөтгөн, орчин үеийн соёлоос суралцах хүсэл эрмэлзэл танд бий юу? Энэ асуултын хариуг хамтдаа эрэлхийлье.
   Монгол хүн Монголдоо хайртай. Эх орноороо гоёж, энэ нутгийнхаа эзэн байхыг тэд хүснэ. Гэвч даяарчлагдаж буй дэлхий ертөнцийн жишгийг даган, гадаад хэл сурах, түүгээр дамжуулан дэлхийн улс орнуудтай холбогдох хэрэгцээ шаардлага бий болсоор байна. Хэл сурах хэцүү. Бас амархан. “Хэцүү” гэдэг үгийг далд ухамсартаа хэдийнэ суулгасан бол энэ хэлийг сурахад амаргүй. Харин чин хүслээрээ суръя гэж зүтгэвэл сурах нь тийм ч хэцүү биш гэдгийг ухаарах болно.
   Хүсэл мөрөөдлийг тань биелүүлж, алс ирээдүйг тань хамтдаа зураглахаар “Саксэду” сургалтын төвийн хамт олон Эрдэнэт хотод зочилжээ. Тэд танд болон таны хүүхдийн гэрэлт ирээдүйг бүтээх англи хэлний сургалтаа танилцуулж байна.
   Энэ бол ховорхон боломж. Тус сургалтын төв нь англи хэлний түвшин ахиулах зургаан сарын хөтөлбөртэй. “Саксэду”-гаас IELTS-ийн оноо авч, бакалавр, магистр, докторын зэрэг хамгаалахаар Монгол Улсын Засгийн газрын тэтгэлэг авсан оюутан олон бий. Богино хугацаанд чанартай боловрол олгох зорилт тавьсан тус сургалтын төв 2002 оны наймдугаар сараас өнөөг хүртэл боловсролын салбарт тогтвортой үйл ажиллагаагаа явуулсаар байна. Дэлхийн шилдэг их, дээд сургуульд 300 гаруй оюутныг элсүүлсэн “Саксэду”-гийн үүсгэн байгуулагч Д.Мөнхсаруул, “Хэлний курст сурах нь чухал. Гэхдээ хэл сурах нь илүү чухал” хэмээсэн юм. Тэрээр хүн бүрт хэл сурах боломж байгааг онцлоод, зөв газраа, зөв цагтаа суралцахыг зөвлөсөн. 
   Их Британи, Ирланд, Шинэ Зеланд, Австрали, Канад, АНУ, Малта болон Сингапур улсын “Дэлхийн топ” хэмээн нэрлэгдсэн их, дээд сургуульд үнэ төлбөргүй зуучлан, боловсролын салбарт “гүүр” болдог “Сакседу”-г зорин очих хүн олон. Өнгөрсөн хугацаанд тамирчин, жүжигчин, дуучин гээд олны танил эрхмүүд тус төвөөр дамжуулан хэлний мэдлэгээ тэлжээ.
   Амжилт гэдэг амжихын нэр гэдэг. Үр хүүхдүүддээ чанартай боловсролоор оюуны том хөрөнгө оруулалт хийе гэсэн хэн бүхэн танилцуулах өдөрлөгийг зорин очоорой. Тэд танд Сингапурт суралцангаа аялах 21 хоногийн шинэхэн хөтөлбөрөө санал болгох болно. Каплан бол Сингапурын №1 сургууль. Тус сургуулийн зуны хөтөлбөрт хамрагдсан залуучууд хэл сурах ямар чухал болохыг, хэлтэй байснаар амьдралд ямар олон сонголт байдгийг мэднэ. Эрхэм таныг Ш.Отгонбилэгийн нэрэмжит Технологийн сургууль дээр “Саксэду”-гийн хамт олон хүлээж байна. 

И.Чинтогтох



 

   Эрдэнэт үйлдвэрийн баялаг бүтээгчдийн зургаадугаар сарын эхний 20 хоногийн үйлдвэрлэлийн төлөвлөгөөний үзүүлэлт 100-аас дээш хувиар биелсэн дүнтэй гарчээ.  Энэ хугацаанд 1390.35 мянган метр куб уулын цул гаргаж, төлөвлөгөө 104.5 хувь, 586.47 мянган метр куб хөрс хуулалтын ажил гүйцэтгэж, төлөвлөгөө 105.9 хувийн биелэлттэй гарсан байна. Хүдэр олборлолт 2049.91 мянган тонн буюу төлөвлөгөө 103.6 хувиар давж биелсэн бол хүдэр боловсруулалт 1797.51 мянган тонн хүрч, төлөвлөгөөт үзүүлэлт 105.6 хувиар биелжээ.
   Хүдэр дэх металлын агуулга зэсийнх 0.461 хувьтай, төлөвлөгөө 99.4 хувиар, молибденых 0.0165 хувьтай, төлөвлөгөө 108.6 хувийн үзүүлэлттэй байна. Металл авалтын гүйцэтгэл сарын эхний 20 хоногт зэсээр 88.44 хувь, молибденоор 50.58 хувьд хүрч, төлөвлөгөө 100.2-104.3 хувиар биелэв. Энэ хугацаанд баяжмал дахь зэсийн агуулга 22.38 хувь, төлөвлөгөө 100.2 хувиар, молибдены агуулга 50.14 хувь, төлөвлөгөө 104.5 хувиар тус тус биеллээ.  
   Зургаадугаар сарын эхний 20 хоногийн байдлаар уурхайчид 33648 тонн зэсийн баяжмал ачсан байна.

М.Балжинням

   Эрдэнэт үйлдвэрийн Засвар механикийн заводын дэргэдэх Инженерийн зөвлөл, цехийнхээ үйл ажиллагааны үр дүнг дээшлүүлэх, ажлын арга барилыг сайжруулах, харилцан туршлага солилцох зорилгоор “Мэдлэг хуваалцах өдөрлөг” үйл ажиллагааг санаачлан зохион байгуулж эхэлжээ. Сар бүр тогтмол хийх “Мэдлэг хуваалцах өдөрлөг”-өөр ЗМЗ-ын нийт инженер, техникийн ажилтнууд баг болон хуваагдаж, сурсан мэдсэнээ бусаддаа түгээдэг байна. Одоогийн байдлаар тус цехийнхэн гурван удаа мэдлэгээ хуваалцаад байгаа бөгөөд  “Аж үйлдвэржилтийн хувьсгалууд”,  “CNC  тоон удирдлагатай суурь машины ашиглалт, засвар үйлчилгээ, тусгай шаардлагууд”, “Эрдэнэт үйлдвэрийн хэмжээнд мөрдөгдөж буй оюуны өмч, инновацын дагалдах журмуудын тухай” зэрэг сэдвээр хэлэлцүүлэг хийж, харилцан мэдлэг, туршлага солилцжээ.  
   Дараагийн “Мэдлэг хуваалцах өдөрлөг”-ийг энэ сарын 26-ны өдөр “Резиний үйлдвэрлэлийн түүх, өнөөгийн байдал, техникийн шинэчлэл, технологийн дэвшил” сэдвийн хүрээнд зохион байгуулахаар төлөвлөж байна.  Өөрсдийн мэдлэгээ бусадтайгаа хуваалцаж, санаачилга зорилгоо нэгтгэн, баг болж ажиллах нь цаашдын үйл ажиллагаанд үр дүнтэй  гэж Инженерийн зөвлөлийнхөн өдөрлөгийн ач холбогдлыг онцолж байна.
   Тус зөвлөл 2019 онд үйлдвэрлэл, хөгжлийн бодлого, шинэ техник технологи, импорт орлох бүтээгдэхүүн үйлдвэрлэл, техникийн бичиг баримт, судалгаа шинжилгээ гэсэн чиглэлээр нийт 12  төрлийн ажил хийхээр төлөвлөсөн аж.

М.Балжинням

Мэдээний төрөл

Календарь

« 6-р сар 2019 »
Да Мя Лх Пү Ба Бя Ня
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Зургийн цомог