• Эрдэнэт үйлдвэрт ажилд орохын тулд мөнгө төлдөггүй

         Орхон аймгийн Цагдаагийн газарт он гарсаар нийт 645 гэмт хэрэг бүртгэгджээ. Энэ нь өнгөрсөн оны мөн үеэс 3.7 хувиар буурсан үзүүлэлт юм. Гэсэн хэдий ч бусдыг залилах гэмт хэрэг өмнөх онтой харьцуулахад 43.1 хувиар өссөн байна.     Цахим ертөнцөөр худалдан авалт хийснээс бусдад залилуулах, Эрдэнэт үйлдвэрт  ажилд оруулна, үйлдвэрийн фондын байранд оруулж өгнө, гэх зэрэг залилангийн хэрэг гарсаар байгааг Орхон аймгийн Цагдаагийн газрын Урьдчилан сэргийлэх ажил хариуцсан ахлах мэргэжилтэн, цагдаагийн хошууч Л.Содбилэг мэдээллээ.     Эрдэнэт үйлдвэрийн нэрийг ашиглан бусдыг залилсан хэрэг он гарсаар 15 бүртгэгдэн, мөрдөн байцаах тасагт шалгагдаж байна. Тухайлбал, Эрдэнэт үйлдвэрт ажилд оруулж өгнө гэсэн залилангийн найман хэрэгт иргэд 49.7 сая төгрөгөөр хохироод байгаа бол үйлдвэрийн фондын байранд оруулж өгнө гэсэн залилангийн долоон  хэрэгт 82.9 сая төгрөгийн хохирол бүртгэгджээ.     “Эрдэнэт үйлдвэр” ТӨҮГ нь ажилд орох хүсэлт гаргасан иргэн бүрд адил, тэгш боломж олгон, ажилтан сонгон шалгаруулах үйл ажиллагааг шударга, ил тод явуулдаг. Шаардлагатай ажлын байрыг албан ёсны цахим хуудас www.erdenetmc.mnсайтын Хүний нөөц - Нээлттэй ажлын байр хэсэгт байршуулан, олон нийтэд нээлттэй зарлаж, сонгон шалгаруулалтын эцсийн шийдвэрийг шалгаруулалтын ажлын хэсгийн бүрэлдэхүүн ямар нэгэн зуучлагч хувь хүний оролцоогүйгээр гаргадаг. Мөн, Эрдэнэт үйлдвэрийн Захиргаа, Үйлдвэрчний эвлэлийн холбооны хооронд байгуулсан Хамтын гэрээний дагуу, үйлдвэрт 20 ба түүнээс дээш жил ажиллаж байгаад өндөр насны тэтгэвэр тогтоолгох эрх нь үүссэн ажилтны хүсэлтийг үндэслэн мэргэжлийг залгамжлуулах зорилгоор төрсөн нэг хүүхдийг мэргэжил, эрүүл мэндээр тэнцсэн тохиолдолд хөдөлмөрийн гэрээ байгуулан ажиллуулдаг журамтай юм. А.Бямбамаа   Дэлгэрэнгүй...
  • Х.БАТСАЙХАН: Олон шинэ санаачилгыг Эрдэнэт үйлдвэрээс олж харлаа

          “Эрдэнэс-Тавантолгой” ХК-ийн 168 ажилтан энэ онд Эрдэнэт үйлдвэрийн туршлагатай танилцахаар хөтөлбөр гаргажээ. Тус компанийн Захиргаа, удирдлагын хэлтсийн дарга Х.Батсайханы сэтгэгдлийг хуваалцлаа.    -Санамж бичгийн хүрээнд хэрэгжиж байгаа туршлага судлах, танилцах уулзалтыг та хэрхэн үнэлж, дүгнэж байна вэ?    -Санамж бичиг байгуулснаас хойш хоёр үйлдвэрийн хамтын ажиллагаа сайжирч байна. 14 хоногийн өмнө Эрдэнэт үйлдвэрийн 16 хүний бүрэлдэхүүнтэй баг манай компанийн Өмнөговь аймаг дахь Цанхи хотхон, Тавантолгойн бүлэг орд уурхайтай танилцах аялал хийсэн. Бидний хувьд Улаанбаатар хот дахь төв оффисын 7 хэлтсийн 31 хүний бүрэлдэхүүнтэй баг Эрдэнэт үйлдвэрт хүрэлцэн ирээд байна. Энэ удаа нийгмийн харилцааны хэлтсийн гол цехүүдтэй танилцаж, ажилтан, албан хаагчдаа хөгжүүлэх, урлаг соёл, спортын олон төрлийн хийж хэрэгжүүлж байгаа ажлуудаас туршлага судаллаа. Манай компани 2020 онд дэргэдээ сувилал байгуулж, ажилчдынхаа нийгмийн халамжийг сайжруулах чиглэлээр олон ажил хийхээр төлөвлөсөн. Энэ бүхэнд Эрдэнэт үйлдвэрийн тэргүүн туршлага хэрэгтэй гэж үзсэний дагуу хоёр үйлдвэр хамтран ажиллаж байна. Аяллын туршид олон шинэ санаачилгыг Эрдэнэт үйлдвэрээс олж харлаа. Энэ арга хэмжээг зохион байгуулж байгаа Эрдэнэт үйлдвэрийн Нийгмийн харилцааны хэлтэст талархал илэрхийлье.     Б.ЭНХЗУЛ: Бодит туршлагуудыг өөрсдийн үйл ажиллагаанд нэвтрүүлнэ     -Аяллын туршид Эрдэнэт үйлдвэрийн хэд хэдэн бүтцийн нэгжтэй танилцлаа. Таны хувьд ямар ололттой санааг тусгаж авав?    -Миний бие байгууллагынхаа Хүний нөөц, сургалт судалгааны хэлтсийг төлөөлөн ирсэн. Бид Эрдэнэт үйлдвэрийн Захиргаа, хүний нөөцийн бодлогын газрын орлогч даргатай уулзаж, үйл ажиллагаатай нь танилцсан. Эрдэнэт үйлдвэрийн ажиллагсдын тоо манай компанитай харьцуулахад 6 дахин их. Энэ утгаараа ажилчдын нийгмийн асуудалд ихээхэн анхаарч, сургалт хөгжүүлэлтийг өндөр түвшинд хийж ирснийг олж харлаа. Бид Технологийн сургуулийн мэргэжлийн багш, удирдлагуудтай уулзсан. Мэргэжлийнх нь дагуу ажилчдаа хэрхэн сургаж хөгжүүлэх, хамтран ажиллах ямар боломж байгаа, ажилчдаа эчнээ сургалтанд хэрхэн хамруулах вэ гэдэгт тууштай, бодит ажлууд хэрэгжүүлэхээр ярьсан.     Мөн Эрдэнэт үйлдвэрийн ажилчдын өргөтгөсөн мэдээллийн санг зохион байгуулж, автоматжуулсан нь маш их таалагдлаа. Үүнийг зөвхөн IT инженерүүд гэлтгүй өөрсдөө хийж бүтээж болдгийг мэдэж авсан. Үйлдвэрийн үйл ажиллагааны гол баялаг болох хүний нөөцийг хэрхэн зөв хуваарилж, мэдээллийг нэгтгэх вэ гэдэг дээр Эрдэнэт үйлдвэртэй хөгжүүлэлт, автоматжуулалтын талаар хамтран ажиллах анхан шатны яриаг хийсэн нь танилцах уулзалтын үр өгөөжийг харуулах байх. Эрдэнэт үйлдвэрийн спорт, урлаг соёлын цогцолбор, оёдлын цехийн үйл ажиллагаатай танилцахдаа хүний нөөц талаас нь харж явлаа. Ажлын зохион байгуулалт, хуваарилалт хэдийнэ жигдэрч, тогтвортой ажлын байрыг бий болгож чаджээ. Туршлага судлах ажлын хүрээнд харилцан ажилчдаа сургах, сувилалд амраах, сургуульд нь сургах, оёдлын цехийн хувьд энэ төрлийн туслан гүйцэтгэгчийг дэргэдээ ажиллуулах боломжууд байдгийг харж байна. Эрдэнэт үйлдвэр ISO9001 чанарын удирдлагын тогтолцоог нэвтрүүлжээ. Бодит туршлагуудыг өөрсдийн үйл ажиллагаанд нэвтрүүлж, амжилттай хэрэгжүүлнэ гэсэн итгэлтэйгээр буцаж байна. И.Чинтогтох Фото: Б.Баттөгс Дэлгэрэнгүй...
  • “Эрдэнэс-Тавантолгой” ХК-ийн захиргаа, удирдлагын багийнхан Эрдэнэт үйлдвэрт ажиллалаа

         “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, “Эрдэнэс-Тавантолгой” ХК-ийн Гүйцэтгэх захирал Б.Ганхуяг нарын үзэглэсэн хамтран ажиллах санамж бичгийн хүрээнд туршлага солилцох уулзалтыг зохион байгуулсаар байна. “Эрдэнэс-Тавантолгой” ХК-иас энэ удаад 31 хүний бүрэлдэхүүнтэй Улаанбаатар хот дахь Захиргааны багийнхан хүрэлцэн ирж, захиргаа, хүний нөөц, маркетингийн чиглэлээр хийж хэрэгжүүлж буй Эрдэнэт үйлдвэрийн тэргүүн туршлагаас судаллаа. Мэдлэг мэдээллээ харилцан солилцож, шилдэг арга туршлагаасаа хуваалцаж байгаа эдгээр уулзалтын эцсийн зорилго нь Монголын уул уурхайн салбарын чадавхийг дээшлүүлэх, хариуцлагатай уул уурхайг төлөвшүүлэхэд чиглэж байгаа юм. Энэ ч утгаараа Эрдэнэт үйлдвэрээс мэргэжлийнхээ хүрээнд туршлага судлахаас гадна орон нутагт спорт, соёл урлаг, эрүүл мэнд, зөөлөн оёдлын салбарт хэрхэн хөрөнгө оруулалт хийж, нийгмийн цехүүдийг цогцоор нь авч яваа тэргүүн туршлагыг олж харах, үзэж танилцах нь цаашдын хэрэгжүүлэх ажлуудад үнэтэй санаа өгснийг зочид онцлон хэлж байлаа. И.Чинтогтох Фото: Б.Баттөгс Дэлгэрэнгүй...
  • Оросод сургууль төгсөгчдийн IV чуулган амжилттай зохиогдлоо

         Монгол, Оросын найрамдал, хамтын ажиллагааны 49 дэх жилийн хүрээнд зохиогдсон ОХУ (ЗХУ)-д их, дээд сургууль төгсөгчдийн IVчуулга уулзалт өнгөрсөн Ням гаригт Эрдэнэт хотноо амжилттай болж өндөрлөлөө. Чуулга уулзалтыг Оросын шинжлэх ухааны төв, ОХУ-ын Элчин сайдын яам, Монгол-Оросын найрамдлын нийгэмлэг, Найрамдлын нийгэмлэгүүдийн Монголын эвлэл зэрэг байгууллага хамтран зохион байгуулснаараа онцлогтой. “Эрдэнэт үйлдвэр” ТӨҮГ энэхүү үйл ажиллагааг дэмжин, ивээн тэтгэгчээроролцсон юм. Монгол-Оросын найрамдлын нийгэмлэгийн тэргүүн, БНМАУ, ЗХУ-ын баатар, сансрын нисгэгч Ж.Гүррагчаа чуулганд оролцогчдод хандан үг хэлснээр энэ өдрийн үйл ажиллагаа эхэллээ. Тэрээр төгсөгчдөд хандан “Монгол, Оросын найрамдалт харилцааны тулгуур болсон хүмүүс гэж та, биднийг нэрлэж болох байх. Та, бид ОХУ (ЗХУ)-д суралцаж эрдэм мэдлэг, боловсрол олж авахын зэрэгцээ оросын ард түмний зан заншил, ёс суртахуун, соёлыг түгээн дэлгэрүүлэх хүндтэй үүрэг хүлээсэн Монгол улсын иргэд юм. Найрамдал, хамтын ажиллагааны гол зүтгэх хүч нь хойд хөршид сургууль төгсөгчид, тэр дундаа Эрдэнэт хотод ажиллаж, амьдарч буй та бүхэн онцгой үүрэгтэй байсан гэж би бодож байна. Эрдэнэт хот бол найрамдлын хот, Эрдэнэт үйлдвэр бол найрамдлын үр шим. Энд орос, монгол хүмүүс мөр зэрэгцэн ажиллаж, хот сүндэрлүүлэн, эдийн засгийн томоохон тулгуур болох Эрдэнэт үйлдвэрийг ажиллуулж байна. Та бүхний сурсан мэргэжил Эрдэнэт үйлдвэрийг өдий зэрэгт хүргэж, Монгол Улсын эдийн засгийг өсөж тэлэхэд томоохон үүрэг гүйцэтгэсэн. Тэгэхээр биднийг холбогч гол хүчин зүйл нь Оросын холбооны улс яах аргагүй мөн. Та бүхэндээ сайн сайхан бүхнийг хүсэн ерөөе” хэмээн сэтгэлийн үгээ илэрхийллээ.      ОХУ (ЗХУ)-д их, дээд сургууль төгсөгчдийн хийж бүтээж байгааг олон түмэнд сурталчилах, сурсан мэргэжлийг нь улс орны, аймаг, бүс нутгийн хэмжээнд хэрхэн ашиглах талаар судлах, төгссөн сургуульд нь мэргэжил дээшлүүлэхэд “гүүр” болох чиглэлээр холбооны үйл ажиллагаа чиглэжээ. Орхон аймгийн хэмжээнд ОХУ-д сургууль төгсөгч 900 орчим хүн байгаагийн 90 орчим хувь нь Эрдэнэт үйлдвэрийн боловсон хүчин юм. Мөн Эрдэнэт хотын хэмжээнд Хөдөлмөрийн баатар, төрийн шагналт, гавьяат 64 хүн төрөн гарсны 30 гаруй хувь нь ОХУ-д сургууль төгсөгч, Эрдмийн зэрэг цолтой 62 хүний 30 гаруй хувь нь Эрдэнэт үйлдвэрт ажиллаж байгаа гэсэн судалгаа бий. Монгол-Оросын найрамдлын нийгэмлэг, ОХУ-ын Элчин сайдын яам, Оросын шинжлэх ухаан соёлын төвөөс хамтран явуулдаг “Найрамдлын сарын ажил” эдүгээ “Найрамдал, хамтын ажиллагааны өдрүүд” болон өргөжснийг илтгэл тавьсан эрхмүүд онцоллоо. Монгол Улсад “найрамдлын” тодотголтой олон нийгэмлэг үйл ажиллагаа явуулдаг ч Монгол-Оросын найрамдлын нийгэмлэг хамгийн бат суурьтай нь болохыг тэд хэлж байна. ОХУ-тай хамтын ажиллагааны хүрээнд суралцах оюутны тоог нэмэгдүүлж, ОХУ-ын Ерөнхийлөгчийн тэтгэлгээр жилд 500 хүүхдэд суралцах боломж нээгдсэнийг энэ үеэр танилцууллаа.     Мөн ахмад төгсөгч Л.Долгорсүрэн, Д.Дуламсүрэн, З.Сандуйжав, С.Гаажав, А.Алтанцаг, Ц.Туяа, Ю.Тэрбиш, Б.Мянганбаяр нарт “Эрдэнэт үйлдвэр” ТӨҮГ-ын дурсгалын зүйлсийг гардуулан, ОХУ (ЗХУ)-д их, дээд сургууль төгсөгчдийн Монголын холбооны Ерөнхийлөгч, УИХ-ын дарга Г.Занданшатарын гарын үсэг бүхий талархалын бичиг, дурсгалын зүйлсээр 20 хүнийг шагнаж урамшуулсан юм. Илтгэл, хэлэлцүүлэг өрнүүлж, санал бодлоо солилцсон төгсөгчид чуулга уулзалтаас уриалга гарган, баталлаа. Ингэхдээ мэргэжлийн чиглэлээр цуглуулсан ном, товхимлоо солилцож унших, хэрэгтэй нэгэнд нь гарын авлага болгох, ОХУ-ын Төв номын сангаас мэдээлэл авах эрх олгох боломжтой эсэх, Орхон аймгийн хэмжээнд идэвхитэй ажилладаг ОХУ-ын сургуулиудын холбоод хоорондын үйл ажиллагааг идэвхижүүлэх, хамтын ажиллагааг дэмжих чиглэлээр ажлууд хийх хэрэгтэйг сануулсан. Төгсөгчид оюутан ахуй цагаа дурссан хөгжилтэй яриа өрнүүлж, караоке дууны тэмцээн зохион байгуулснаар энэ үдшийн үйл ажиллагаа өндөрлөлөө. Орос хэлний баяр, орос дуу, шүлгийн уралдаан, бүсийн олимпиад гээд цогц үйл ажиллагааг зохион байгуулж, сургууль төгсөгчдийн уулзалтыг сэргээсэн нь чуулганд оролцогчдын хувьд хүлээлттэй байсныг тодхон илтгэж байв. Чуулганы үеэр зарим төлөөллийн сэтгэгдлийг хуваалцлаа.   Ж.РЭНЦЭН-АМГАЛАН: Бидний сурсан орос хэл, анагаах ухааны боловсрол улсынхаа хөгжилд хувь нэмэр оруулахад ихээхэн түшиц болсон Монголын эм зүйн байгууллагуудын “Эм” холбооны зөвлөх, Монгол Улсын Эрүүлийг хамгаалахын Гавьяат ажилтан, Эрхүүгийн Анагаах ухаан их сургууль төгсөгчдийн холбооны тэргүүн Ж.Рэнцэн-Амгалантай ярилцлаа.     -Чуулга уулзалтын талаар сэтгэгдлээ хуваалцахгүй юу?    -Эрхүүгийн Анагаах ухааны их сургуулийг төгссөн 20-иод хүн Эрдэнэт хотдоо ажиллаж, амьдарч байна. Монгол, Оросын найрамдлын тод илэрхийлэл болсон энэ хотдоо чуулга уулзалт зохион байгуулсанд талархал илэрхийлье. Сургуулийнхаа талаар товч мэдээлэл хүргэе гэж бодож байна. Эрхүүгийн Анагаах ухааны их сургууль 1919 онд байгуулагдаж, өнгөрсөн 10 дугаар сард 100 жилийн ойгоо ёслол төгөлдөр тэмдэглэсэн. Ойг тохиолдуулан бид Улаанбаатар хотноо төгсөгчдийн анхдугаар чуулган, үзэсгэлэнг зохион байгуулж, сургуулийнхаа ойд 100 төлөөлөгч оролцоод ирсэн. Монгол Улсын 400 гаруй иргэн энэ сургуулийг төгссөнөөс 350 гаруй нь их эмч, эмзүйчийн диплом гардсан байдаг. Бидний сурсан орос хэл, анагаах ухааны боловсрол улс эх орныхоо хөгжилд хувь нэмэр оруулахад ихээхэн түшиц болсныг энд хэлэх нь зөв байх. Бид цаашдаа анагаахын сургууль төгсөгчдийн бүлэг үүсгэж, холбоодтойгоо хамтран ажиллах хүсэлтэй байна.   Д.ДУЛАМСҮРЭН: Бид Монгол Улсын хүнс, хөнгөн аж үйлдвэрийн салбарын тэргүүн эгнээнд явсан     Дархан хотын Политехникумд Хөнгөн хүнсний салбарын эрхлэгчээр ажиллахдаа 600 гаруй хүүхдийг төгсгөж, аймгуудын хүнсний комбинатыг мэргэжлийн боловсон хүчнээр хангасан, Эрдэнэт хотын Эмэгтэйчүүдийн зөвлөлийн даргаар 30 гаруй жил ажилласан Д.Дуламсүрэн гуайтай ярилцаж, сэтгэгдлийг нь сонслоо.     -Монголд Москвагийн Хүнсний технологийн дээд сургууль төгссөн 210 хүн бий. Өнөөдөр хүнсий аюулгүй байдлын тухай ярихад, Москвагийн Хүнсний технологийн дээд сургууль болон бусад хүнсний технологийн сургууль төгссөн төгсөгчид 1970-1980 онд Монгол Улсын хүнс, хөнгөн аж үйлдвэрийн салбарын тэргүүн эгнээнд явсныг онцлон тэмдэглье. Бид хүнсийг аюулгүй байлгахын төлөө, түүхий эдийн чанарын тухайд анхаарч ажилладаг байлаа. Дархан, Дорнод, Эрдэнэт хотын хүнсний комбинатыг ашиглалтад оруулахад нойр хоолгүй 24 цагаар ажиллахдаа хүнсний сайн чанартай бүтээгдэхүүнээр ханган ажилласан. Өнөөдөр 21 аймгийн хэмжээнд маш олон хүнсний инженер бий. Москвагийн хүнсний сургууль төгсөгчдийн ассоциациас жил бүрийн 5 дугаар сарын 3 дугаар долоо хоногт нэгдсэн уулзалт зохион байгуулдаг уламжлалтай. Ирэх жил 8 дахь уулзалтаа Хөвсгөл аймгийн Тариалан суманд зохиохоор төлөвлөсөн. Мөн миний бие аймгийн Эмэгтэйчүүдийн зөвлөлийн даргаар ажиллах хугацаандаа Эрдэнэт хотоо соёлч хот болгох, соёлын довтолгоо өрнүүлэх ажлыг зохион байгуулсан. Энэ ажилд ЗХУ-аас Эрдэнэт хотод суугаа Консулын газрын дэргэдэх Эмэгтэйчүүдийн зөвлөл, уулын баяжуулах Эрдэнэт үйлдвэрийн Эмэгтэйчүүдийн зөвлөл ихээхэн үүрэгтэй хамтран оролцсонд өнөө хэр талархаж явдаг юм. Өнөөдрийн чуулга уулзалт ач холбогдол өндөртэй, сайхан үйл ажиллагаа боллоо, та бүхэндээ баярлалаа.   Д.БАЙГАЛ: Хүний нөөц, арга барилдаа түүхэн уламжлалыг эргүүлэх нь зөв юм гэсэн санал дэвшүүллээ Эрдэнэт үйлдвэрийн Нийгмийн асуудал эрхэлсэн орлогч захирал асан, Ахмадын нэгдсэн зөвлөлийн дарга Д.Байгалтай ярилцлаа.     -Та төгсөгчдөд зориулан орос хэл дээр илтгэл тавьлаа. Оросын боловсролын тухайд та юу хэлэх вэ?     -Эрдэнэт үйлдвэрийг барьж байгуулсан, төслийн хүчин чадалд хүргэсэн, өнөөдрийн түвшинд авчирсан бүхий л үйл ажиллагаа Зөвлөлт, Монголын найрамдлын үр шим, илрэл гэж ойлгодог. Ер нь Эрдэнэт хот тэр чигээрээ хоёр орны найрамдлын билэг тэмдэг болж явдаг. Миний өнөөдрийн ярьсан зүйлд, үндэсний мэргэжилтнүүдийг бид ямар аргаар бэлтгэв, үр дүн нь хэдий хүртэл явж байгаа, өнөөдөр ямар үр дүнд хүрэв гэдэг дээр мэдээлэл хийсэн. Улмаар хүний нөөц, арга барилдаа түүхэн уламжлалыг эргүүлэх нь зөв юм гэсэн санал дэвшүүллээ. Орос хэл, уламжлал, техник технологийн үндсэн ололтыг тээгчид гэдэг утгаараа ОХУ-д суралцаж төгссөн мэргэжилтнүүдэд гүйцэд өгч чадаагүй өгөгдлүүдийг нь өгөх ёстой. Үүний тулд төгсөгчдийн холбоо ч сайн ажиллаж, идэвхитэй байх ёстой гэж бодож байна. Чуулган дээр ахмадын ярьсан яриа, номын баялгаа солилцох санал нь холбоог нийгэмд илүү үр нөлөөтэй байхыг шаардаж байх шиг байна.    -Санал бодлоо хуваалцсан танд баярлалаа. Сайн сайхан бүхнийг хүсье.   И.Чинтогтох Фото: Б.Баттөгс Дэлгэрэнгүй...
  • Монгол-Оросын найрамдал, хамтын ажиллагааны өдрүүдийг Эрдэнэтчүүд ёслол төгөлдөр тэмдэглэлээ

       Хоёр орны хамтын ажиллагааг өргөжүүлж, Оросын түүх, соёлыг түгээн дэлгэрүүлэх, залуу үеийнхэнд сурталчилан таниулахад чиглэдэг Монгол-Оросын найрамдал, хамтын ажиллагааны өдрүүдийг Эрдэнэтчүүд өргөн хүрээнд тэмдэглэн өнгөрүүллээ. Өчигдөр буюу энэ сарын 18-ны өдөр зохион байгуулсан хамтын ажиллагааны өдрүүдийн хаалтын үйл ажиллагаанд ОХУ-ын Монгол дахь Элчин сайдын яамны нэгдүгээр нарийн бичгийн дарга, Оросын хамтын ажиллагааны агентлагийн Монгол улс дахь Төлөөлөгчийн газрын орлогч дарга, сурган хүмүүжүүлэх ухааны доктор Т.Ч.Будаева, “Эрдэнэт үйлдвэр” ТӨҮГ-ын Ерөнхий захирлын Хөгжлийн асуудал хариуцсан орлогч захирал П.Энхбат, “Эрдэнэт үйлдвэр” ТӨҮГ-ын Нийгмийн харилцааны хэлтсийн орлогч дарга Д.Эрдэнэбат, Орхон аймгийн Засаг даргын орлогч С.Батжаргал, Монгол-Оросын найрамдлын нийгэмлэгийн Орхон аймгийн салбарын тэргүүн Б.Мажинбуу нар хүрэлцэн ирснээс гадна үйлдвэрийн бүтцийн нэгжийн удирдлагууд, зочид төлөөлөгчид урилгаар оролцлоо. Энэ үеэр хоёр орны найрамдал, хамтын ажиллагааны хүрээнд зохиогддог олон талын үйл ажиллагаанд идэвх зүтгэлтэй оролцдог Орос 4, Монгол 8 хүнд “Найрамдлын одон”, “Халх голын ялалтын 70 жилийн ойн медаль” гардуулан, шагнаж урамшуулсан юм.     Ах, дүүгийн найрамдалт харилцааны билэгдэлт Эрдэнэт хотноо Орос 19-р сургуулийн 45 жилийн ой, Орос хэл соёлын баярыг тэмдэглэн өнгөрүүлж, 12 дугаар ангийн сурагчдын дунд орос хэлний олимпиад, орос дуу, шүлгийн уралдаан зохион байгуулан, ОХУ (ЗХУ)-д сургууль төгсөгчдийн IV чуулга уулзалтыг хийсэн нь сарын ажлын цар хүрээ, ач холбогдлыг нэмэгдүүллээ. Олимпиадад оролцсон шилдэг сурагчдад ОХУ-д үнэ төлбөргүй суралцах эрхийн бичиг гардуулсан нь энэ жилийн онцлох үйл явдлын нэг болсон юм. Монгол-Оросын найрамдлын нийгэмлэгийн Орхон аймгийн салбараас нийт оролцогчдод талархал илэрхийлэн, урлагийн тоглолтоор бэлэг барьснаар сарын аян амжилттай өндөрлөлөө.    И.Чинтогтох Фото: Б.Баттөгс         Дэлгэрэнгүй...
  • Орос хэлний олимпиадын аваргууд ОХУ-д тэтгэлгээр суралцах эрхээ гардлаа

       Монгол-Оросын найрамдал, хамтын ажиллагааны өдрүүдийн хүрээнд Орхон аймагт зохиогдсон Орос хэлний олимпиадад Булган, Сэлэнгэ, Дархан-Уул, Орхон аймгийн 12 дугаар ангийн 20 сурагч оролцож,  95 хувиас дээш амжилт үзүүлсэн байна. Тус олимпиадын аваргаар тодорсон эхний найман сурагч буюу Дархан-Уул аймгийн Б.Төгөлдөр, Э.Алтанцоож, Б.Балдандорж, Б.Амартүвшин, Б.Пүрэвчимэд,  Орхон аймгийн Ц.Марал-Эрдэнэ, Сэлэнгэ аймгийн Б.Баянсувд, Булган аймгийн Б.Цогдарь нар ОХУ-ын Засгийн газрын тэтгэлгээр суралцах эрхийн  бичгээр шагнуулав. ОХУ-д суралцах эрхийн бичгийг Орос хэл, соёлын баярын зочид гардууллаа.    Мөн Орос хэл, соёлын баярын нээлтийн үйл ажиллагааны үеэр Оросын соёл шинжлэх ухааны төвөөс Эрдэнэт үйлдвэрийн дэргэдэх Ш.Отгонбилэгийн нэрэмжит Технологийн сургуульд 1500 орчим долларын үнэ бүхий ном, сурах бичиг, үзүүлэн тараах материалыг бэлэглэлийн  гэрээгээр шилжүүлж, өгсөн байна. Түүнчлэн энэ өдөр болсон “Оны шилдэг Орос хэлний багш” шалгаруулах уралдаанд 10 багш оролцож,  Орхон, Булган, Дархан-Уул, Сэлэнгэ аймгийн  нийт 6 багш ОХУ-д нэг сараас нэг жил хүртэлх хугацаагаар мэргэжил дээшлүүлэх эрхийн бичгээр шагнуулав. Энэ үеэр Буриадын улсын Их сургуулийн  Г.В.Улазаева  нарын эрдэмтэн багш нар Орос хэлний багш нарт  мэргэжил дээшлүүлэх аргазүйн семинар өгч, дээрх дөрвөн  аймгийн 43 багш оролцжээ.    Сурагчдын дунд  Орос дуу, шүлгийн уралдааны дууны төрөлд  Булган аймгийн  Хутаг-Өндөр сумын сурагч А.Дөлгөөнзул, Орхон аймгийн  5-р сургуулийн “Звезда” хамтлаг,  сурагч  Д.Хулан нар эхний байрт шалгарч, Орхон аймгийн  18-р сургуулийн сурагч Н.Алаберген,  Дархан-Уул аймгийн “Союз” сургуулийн сурагч Б.Амартүвшин , А.Хулан, “5 star” хамтлаг, Булган аймгийн  “Эрдмийн өргөө” сургуулийн сурагч  Алексей Василий нар тусгай байрын шагнал хүртэв. Шүлгийн төрөлд Орхон аймгийн Орхон-Эмпати  сургуулийн сурагч С.Солонго түрүүлж, Орхон аймгийн  4-р сургуулийн сурагч П.Номин-Эрдэнэ, 1-р сургуулийн сурагч Б.Бишрэлт нар удаах байруудад шалгарсан байна.                           М.Балжинням ФОТО: Б.Баттөгс Дэлгэрэнгүй...
  • Орос хэл, соёлын баяр боллоо

         Жил бүрийн намар уламжлал болгон тэмдэглэдэг Монгол-Оросын найрамдал, хамтын ажиллагааны өдрүүдийн хүрээнд Орос хэл, соёлын баярын арга хэмжээ өнгөрсөн амралтын өдрүүдэд боллоо. Тэртээх 1978 онд Монгол-Зөвлөлт хоёр орны найрамдалт харилцааны үр шимээр Эрдэнэтийн овоо газрыг түшиглэн өнөөгийн Эрдэнэт хотыг барьж байгуулсан нь манай хоёр орны урт удаан хугацааны хамтын ажиллагааг бэхжүүлж ирсэн гэж үздэг. Тиймээс Эрдэнэтчүүд энэхүү найрамдал хамтын ажиллагааны өдрүүдэд өндөр ач холбогдол өгч, Найрамдлын сарын ажлыг Оросын соёл шинжлэх ухаанаас суралцах, хүндэтгэх өдрүүд болгон тэмдэглэдэг уламжлалтай. Энэ жилийн найрамдал хамтын ажиллагааны өдрүүдийн хүрээнд Монгол-Оросын найрамдлын Эрдэнэт нийгэмлэгээс Орос хэл соёлын баярыг “Эрдэнэт үйлдвэр” ТӨҮГ-ын дэргэдэх Технологийн сургууль дээр зохион байгуулав.    Тус баярын нээлтийн үйл ажиллагаанд Найрамдлын нийгэмлэгүүдийн Монголын эвлэлийн Ерөнхийлөгч, “Монгол-Орос” найрамдлын нийгэмлэгийн Ерөнхийлөгч, Монгол улсын баатар, ЗХУ-ын баатар, сансрын нисгэгч Ж.Гүррагчаа, ОХУ-ын Монгол дахь Элчин сайдын яамны нэгдүгээр нарийн бичгийн дарга, Оросын хамтын ажиллагааны агентлагийн Монгол улс дахь Төлөөлөгчийн газрын орлогч дарга, сурган хүмүүжүүлэх ухааны доктор Т.Ч.Будаева, Орхон аймгийн Засаг даргын орлогч А.Түвшинжаргал, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, Монгол-Оросын найрамдлын Эрдэнэт  нийгэмлэгийн тэргүүн Б.Мажинбуу нарын хүндэт зочид болон албаны бусад хүмүүс, оюутан сурагчид оролцлоо.  Энэ үеэр Монгол-Орос хоёр орны найрамдалт харилцааны үнэ цэнэ, цаашдын залгамж холбооны талаар хүндэт зочид хэлсэн үгэндээ онцолж, Орос хэл, соёлын баярын мэндчилгээг нийт оролцогчдод дэвшүүлэв.     Энэ жилийн найрамдлын өдрүүдийн хүрээнд уламжлалт арга хэмжээнээс гадна  Орос хэл соёлын баяр, төвийн бүсийн аймгуудын ЕБС-ийн 12 дугаар ангийн сурагчдын дунд орос хэлний олимпиадыг зохион байгуулсан нь онцлог байв. ОХУ-д тус орны Засгийн газрын тэтгэлгээр суралцагсдын тоог нэмэгдүүлэх, ахлах ангийн сурагчдад Орос орны түүх, соёл шинжлэх ухааны талаарх мэдлэг өгөх зорилготой тус олимпиад Эрдэнэтэд анх удаа болсон нь найрамдал хамтын ажиллагааны өдрүүдийн үйл ажиллагааныг цар хүрээг өргөжүүлсэн байна. Мөн энэ өдөр Эрдэнэт үйлдвэрийн харьяа Орос 19 дүгээр сургуулийн 45 жилийн ойг тэмдэглэж, Орос хэл, соёлын баярын хүндэт зочид тус сургуулийн үйл ажиллагаатай танилцлаа.                     М.Балжинням ФОТО: Б.Баттөгс Дэлгэрэнгүй...
  • Уулын “бурхад”-ын ажил урагштай...

         Эрдэнэт үйлдвэрийн эхлэл Ил уурхайн үйл ажиллагааг сурвалжлахаар уулыг зорилоо. Өвлийн улиралд хөлдүүс үүсэх аюултай учраас технологийн замыг усалж болохгүй тул тоосжилт ихтэй байна. Зам овоолгын хэсгийнхэн маргаашнаас давс цацаж, халтиргаа үүсэх, тоос босохоос сэргийлэх ажил эхлүүлэхээр агуулахаас давс зөөн нөөцөлж байхтай таарлаа. Энэ жил үйлдвэр Ил уурхайн гадаад, дотоод цахилгаан хангамжийг сайжруулахад анхаарал хандуулсан. Гадаад цахилгаан хангамжийг 35 кВт-ын дэд станцаар өргөтгөхөөр гадны компани ажиллаж байна. Шинэ он гарахаас өмнө бүх шонгуудаа босгоод, төмөр утсаа татаад авна гэнэ. Дэд станцын тоног төхөөрөмжүүд хуваарийн дагуу ирэх хавар нийлүүлэгдвэл зуны эхэн сард хүлээлгэн өгөх төлөвлөгөөтэй. Харин дотоод цахилгаан хангамжийн өргөтгөл үүнээс үүдэлтэй хүлээгдэж буй учир хамт дуусах аж. Эрдэнэтийн Овоо ордоо гүйцэд ашиглахын төлөө...     Дараагийн том ажил Тэсрэх бодисын үйлдвэр барих. Тендер хоёр удаа зарлагдаад буцсан энэ бүтээн байгуулалтад хамтрах саналаа таван компани ирүүлжээ. Удахгүй ажлын хэсэг зөвлөмж шийдвэрээ гаргаж, гэрээ байгуулснаар жил дамнан яригдсан ажил биеллээ олно.    Эрдэнэт үйлдвэрийн төдийгүй Монголын уул уурхайн хөгжилд томоохон түлхэц үзүүлэх, Ил уурхайд мөчлөгт урсгалт тээврийн технологи нэвтрүүлэх төслийн талаар Б.Отгондаваа даргаас сонирхлоо. Өнөөдөр Ил уурхайн гүн 150 м байна. Цаашид  уурхай гүнзгийрэхийн хэрээр хүдэр олборлолт, уулын цул тээвэрлэлтийн зардал жилээс жилд өснө. Энэ зардлыг бууруулах зорилгоор дэлхийн зэсийн болон алтны үндсэн ордын ил уурхайнуудад түгээмэл хэрэглэдэг, одоогийн техник технологийн түвшинд шалгарсан найдвартай арга болох авто-конвейерын хосолмол тээврийн систем нэвтрүүлэх шийдвэр хэдийнэ гарсан.  Үүнийг манай Ил уурхайд нэвтрүүлснээр авто тээврийн зай хоёр дахин, ажиллах автосамосвалын тоо 38-иас 18 хүртэл буурна. Мөн нэг тонн хүдэр олборлох өөрийн өртгийг дунджаар 20 хүртэл хувиар бууруулахаас гадна жилд 20 орчим сая ам.долларын ашиглалтын зардал хэмнэх боломж бүрдэх юм. Түлхүүр гардуулах нөхцөлтэй тендер зарлагдаж, 2021 онд ашиглалтад оруулахаар төлөвлөсөн түүхэн гэж хэлж болох бүтээн байгуулалтын Ажлын хэсгийг шинэчлэх тухай Төрийн өмчийн бодлого зохицуулалтын газарт яригджээ. Эхний ээлжинд 20 сая ам.долларын хөрөнгө оруулахаар төлөвлөсөн энэхүү ажлыг Төрийн өмчийн бодлого зохицуулалтын газар дэмжиж, 20 сая долларын нэмэлт санхүүжилт хийх зөвшөөрөл олгосон байна. Энэ хүрээнд ТЭЗҮ гаргах, барилга байгууламж барих бэлтгэл хангах ажлууд явагдах аж. Мөн нуруудан уусгах аргаар исэлдсэн хүдэр боловсруулах үйлдвэр барихаар Хятадын “Бэгрим” компанитай хэлэлцээр хийж, ажил ТЭЗҮ боловсруулах шатанд яваа талаар дуулгалаа.    Ил уурхайн хамт олон ордоо гүйцэд ашиглахын тулд санаачилгатай ажиллаж байна. Өмнө нь хөрс хэмээн хаягддаг байсан захын бага агуулгатай хүдрээ ялгаж, тусад нь овоолго үүсгэж буйг үзлээ. Болгар улсад 0,30 хувийн агуулгатай ядуу хүдрээс металл авалтыг 93 хувь хүртэл авдаг үйлдвэр байдаг тухай цехийн дарга ярив. Манайхаас хоёр дахин бага агуулгатай хүдрээс металл ийм сайн ялгаж авч байхад бид яагаад чадахгүй гэж гэсэн эрмэлзлэлээр ирээдүйд байгуулж болох үйлдвэр рүүгээ чиглэсэн ажил ундрааж байгаа нь энэ. Орон нутагт техникийн туслалцаа, дэмжлэг үзүүлсээр...     Бид Зам, овоолгын хэсгийг зорилоо. Уулын замчид энэ жил техник шинэчлэлийн хүрээнд авто грейдер, жижиг оврын экскаватор, гинжит болон дугуйт бульдозероор хүч сэлбэжээ. Одоо 30-аад техниктэйгээр овоолго байгуулах, зам засах ажил гүйцэтгэж байна. Захиалсан сэлбэг материал хараахан ирээгүй ч өмнөх оны нөөцөө ашиглаад хэвийн ажиллаж байгаа гэлээ.  Дугуйт техникийн гараашийг сэргээн засварлаж буй бололтой, металл хийц сарайн харагдана. Энд гаднын байгууллага 50 хувийн гүйцэтгэлтэй ажиллаж байна. Шинэ оны өмнө гараашийг хүлээлгэн өгөх гэнэ. Тус хэсгийнхэн Эрдэнэт үйлдвэр, Орхон, Булган аймгийн хамтын ажиллагааны хүрээнд зэргэлдээ сумдын зам, даваа засах ажил гүйцэтгэдэг. Энэ жил гэхэд Булганы Орхон, Бугат, Могод сум руу явдаг зам, давааг хусч зассан байна. Түүгээр ч зогсохгүй цас их орж, орон нутгийн болон улсын чанартай зам хаагдахад  нийгмийн хариуцлагын үүднээс санаачилгатай ажилладаг. Хоёр жилийн өмнө Сэлэнгийн Баруунбүрэн хүртэл автогрейдерээр цас хуссан удаатай. “Эрдэнэт үйлдвэр” ТӨҮГ болсноос хойш зам, даваа засуулах хүсэлт бүр их ирэх болжээ. Зам овоолгын хэсгийн дарга Н.Мөнхбаяр сүүлд ирсэн, 1,2 кубын шанагатай жижиг оврын экскаватороо тусгайлан “гайхуулав”. Энэ техникийн шид нь шанагыг цохилттой алхаар сольж, олон үүрэг хослон гүйцэтгэдэг давуу талтай. Уурхайд суваг шуудуу ухах, элс хайрга ачихад шанага хэрэглэдэг бол өвлийн улиралд тэсэлгээгээр үүссэн хөлдүүс, овор ихтэй чулууг бутлахдаа цохилттой алх  ашигладаг байна. Өвөл тэсэлгээгээр хөлдүүс гарч, Баяжуулах үйлдвэрийн бутлуур бөглөрөх эрсдэл үүсдэг. Үүнээс сэргийлж тэсэлгээний дараа газар дээр нь бутлалт хийх үүднээс уг техникийг захиалсан нь үр дүнгээ өгч эхэлжээ.  Хоёр асуудал байна      Дараагийн “өртөө” Өрөмдлөгийн хэсэг. Эрдэнэт үйлдвэрт 27 дахь жилдээ хөдөлмөрөө зориулж буй өрмийн машинч Д.Батзоригт энэ өдөр ууланд ажиллаж байлаа. Туслах машинч нь холгүй яваа гэнэ.  Гадаа цаг агаар жихүүн, салхины эрч ширүүн байсан ч тэр ажирсан шинжгүй, тоос татуулан өрмөө эргүүлнэ. Тэргүүний уурхайчин маань “Зуны аагим халуун, өвлийн тэсгэм хүйтэн ялгалгүй уулын мухарт ажилладаг уурхайчид бид амь сэтгэл нэгтэй хүмүүс. Дараагийн ээлжиндээ техникээ бүрэн бүтэн хүлээлгэн өгөхийн төлөө хичээн ажилладаг. Эвдрэлд дөхсөн, нэг эрэг боолт унасан ч тэрийг бие биедээ хэлж эрсдэлээс сэргийлдэг. Сүүлийн үеийн өрөм мэдрэмж өндөртэй, нарийн тохиргоотой, ухаалаг болсон. Тэр хэрээр ажилчнаас мэдлэг, ур чадвар шаардаж байна” гэж ярив. Ил уурхай оны төгсгөлд өрмийн нэг машин авах аж. Ирсэн даруй нь 21 хоногийн хугацаанд угсраад ажилд гаргах төлөвлөгөөтэй. Сүүлийн үед Ил уурхайн өрөмдлөг дээр хоёр асуудал үүсэх болж. Эхнийх нь өрмийн штангаа засварлаж чадахгүйд хүрсэн явдал. Учир нь штанг нөхөн засварладаг суурин тоног төхөөрөмжүүд болох токарийн машин, гагнуурын аппарат хэт хуучирч ашиглах аргагүй  болжээ. Үүнээс болоод өрмийн штангны зарцуулалт нэмэгдэж, зардал өсч буй. Дараагийнх нь өрмийн чанаргүй хошууны асуудал. Нэг хошуугаар 2600 м өрөмдөх учиртай. Гэтэл сүүлийн үед ирж байгаа хошуугаар 1000 хүрэхгүй метр өрөмдөөд элэгдэх болж. Эхнийх нь чанартай, дараагийнх нь чанаргүй болж ирээд байгаа тул шууд үйлдвэрлэгчтэй гэрээ байгуулах, үнэ буулгах асуудлыг Хангамжийн хэлтэстэй ярьж байгаа гэнэ. Хувийн норм нь хэтэрлээ ч үнийн дүнгээрээ үйлдвэрт үр ашигтай байвал цаашид ашиглах боломжтой.     Өрөмдлөг явагдаж буй газраас саахалтын зайтай тэсэлгээнийхэн ажиллаж харагдана. Улаан туг хатгаж заагласан тэсэлгээний талбайд сэтгүүлч байсан ч орох хориотой тул холоос ажиглалаа. Өрмийнхний бэлтгэсэн нүхийг тэсрэх бодисоор цэнэглэснээр тэсэлгээ явагддаг. Эднийх тэсрэх бодисын холин цэнэглэгч машин ондоо багтаж авах гэнэ.    Гэртээ байх цаг нэмэгдсэнд баяртай байна Энэ өдөр уурхайн мөргөцөгт есөн экскаватор ажиллаж байна. Тэд бүгд цахилгаанаар ажилладаг. Хамгийн сүүлд ажилд гарсан, шинэхэн ЭКГ-12 К холоос өнгөтэй, бараатай үзэгдэнэ. Ил уурхай хоёр экскаватор энэ жил авч ашиглалтад оруулсан. Ирэх онд дахин нэгийг авна. Сонирхол хөдлөөд ЭКГ-12 К экскаваторын бүхээг өөд авирч гараад яг л айлд зочилж буй мэт “Сайн байцгаана уу?” гээд орж явчихлаа. Бүхээг нь дотроо зайтай, ардаа амрах өрөөтэй, халуун, хүйтнээр үлээдэг төхөөрөмжтэй, тун тохитой юм. Туслах нь “хоёр дахь гэр”-ээ шүүрдсэн шигээ дулаахан сайхан угтав. Экскаваторын машинч Г.Ганбаяр, түүний туслах С.Одонбаатар нартай уулзаж цөөн хором ярилцлаа. Г.Ганбаяр “Би Эрдэнэт үйлдвэртээ 13 жил ажиллаж байна. Долоон жил нь туслах хийсэн. Энэ миний хоёр дахь экскаватор. Өмнөхөө бодвол тав тухтай, хүчин чадал илүү болж ирсэн. Бүх үйлдэл нь компьютержсэн. Өглөөнөөс хойш 20-иод рейс ачаад байна. Ээлжийн 12 цагийн хуваарьт шилжсэн нь маш их таалагдаж байгаа. Гэртээ байх цаг хугацаа нэмэгдсэнд баяртай байна” гэв. С.Одонбаатар: “Би өмнө нь Баяжуулах үйлдвэрт гагнуурчин байсан. Үйлдвэрт 14 дэх жилдээ ажиллаж байна. Гагнуурын тавдугаар зэрэгтэй. Хос мэргэжилтэй болох зорилго тавиад ажиллаж байна. Шаардлагатай үед өрөм дээр хүртэл дуудагддаг. Туслах машинч экскаватороо цэвэрлэнэ, тосолгоо үйлчилгээ хийнэ, машинистынхаа гарыг амрааж зарим үед жолоо барина. Энэ кабин дотроо л хоёулаа бүхий л бодол санаагаа хуваалцаж, жаргал, зовлон ярьж амьдарна шүү дээ. Миний хамт олон цагийг ягштал баримталдаг нь бахархалтай санагддаг” гэж ярьсан юм. Уулын “бурхад” маань үйлдвэрлэлийн төлөвлөгөөний бүх үзүүлэлтийг  100,3-107 хувиар биелүүлж явна. Уурхайчид гэдэг эгэл боргил, цаанаа л нэг даацтай сайхан хүмүүс санагддаг. Уулаа шүтэж, хаана ч явсан уулаа санаж, ууландаа л жаргах уурхайчдын ажил урагштай байна.     М.Одгэрэл ФОТО: Б.Баттөгс Дэлгэрэнгүй...
  • Д.АЛТАНТУЯА: Бид буурцагт ургамлаас гаргасан эко жүүсийг эх орондоо үйлдвэрлэнэ

        “Эрдэнэтээ дэмжье” булангийн ээлжит зочноор “Эрдэнэс”, “iEco” цэвэр усаар орон нутгийн хэрэглэгчдэд эчнээ танил болсон “Ранчо” ХХК-ийн захирал Д.Алтантуяаг урилаа. “Өдөр бүр шинэ” хэмээн ялгарах өнгө төрхөө тодотгосон тус компани Орхон аймагт 7 дахь жилдээ үйл ажиллагаа явуулж байна. Бизнесийн салбарыг хатан ухаанаар чимж яваа захирал Д.Алтантуяагийн “Нугарчихгүй, хугарчихгүй, буцчихгүй юмсан” гэсэн үзэл бодлын үр шим өнөөдөр олонд танигдсан брэнд бүтээгдэхүүн болсныг энд онцолъё. Усны бизнесийг өргөжүүлэх нэг томоохон алхам нь эрүүл мэндэд тустай эко жүүс гэдгийг тэрээр хэллээ. Орхон аймагт төдийгүй Монголдоо анх удаа буурцагт ургамлын жүүс үйлдвэрлэхээр зорьсон сонирхолтой ярилцлагыг бэлтгэн хүргэж байна.      -ЦЭВЭР УСНЫ БИЗНЕСТ АНХ ХЭРХЭН ОРСОН БЭ? ЗАХ ЗЭЭЛИЙН БАГТААМЖАА ХЭРХЭН ОЛЖ ХАРАВ?    -Би эдийн засагч мэргэжилтэй. 2005 онд компани байгуулж, орон нутагтаа ямар үйлдвэрлэл эрхлэх вэ гэж их бодсон. 2012 оны 5 дугаар сард цэвэр усны үйлдвэрлэлийн төслийг судалгааны шатанд эхлүүлж, нэг сарын турш Улаанбаатарт судалгаа хийж, урд хөршөөс тоног төхөөрөмжөө судалсан. Улмаар гүний худагтай болж, усны салбарт оръё гэж эргэлт буцалтгүй шийдэж билээ. Ингээд 12 дугаар сард сайн түншүүдтэй таарснаар тоног төхөөрөмжөө оруулж ирж угсран, үйлдвэрээ байгуулсан. Цэвэр усны зах зээлийн багтаамж нь Орхон аймгийн хувьд бага ч гэлээ ойролцоох аймгуудад нийлүүлэх боломжтой гэж анх харсан. Тухайн үед орон нутгийн зах зээлд Улаанбаатарын томоохон компаниудын цэвэр ус байсан бол өнөөдөр Орхон аймаг жижиг савлагаатай ус үйлдвэрлэдэг хоёр ч компанитай боллоо. Энэ бол бидний дэвшил гэж харж байна. “Эрдэнэс”, “iEco”усаа иргэд, олон нийтэд таниулахын тулд сүүлийн 3 жилийн турш хоёр томоохон бөөний цэгээр худалдаанд гаргаснаар борлуулалт сайжирч, Эрдэнэтийнхэн ч таньдаг, мэддэг боллоо. Нэг үеэ бодоход хүн бүр эрүүл байя гэж ярьдаг, ус ямар бүтэцтэй, хүнд ямар ашиг тустайг мэддэг болжээ.    -“ЭРДЭНЭС”, “IECO” ГЭСЭН ХОЁР НЭРЭЭР ЗАХ ЗЭЭЛД ГАРГАДАГ НЬ ЯМАР УЧИРТАЙ ВЭ? МАРКЕТИНГИЙН БОДЛОГО УУ?    -Анх хоёр нэр авчихсан учраас аль алийг нь ашиглаж байна. Удахгүй мэндлэх буудайн жүүсээ “iEco” нэрээр нэрлэж, цэвэр усаа “Эрдэнэс”-ээр гаргахаар төлөвлөсөн.  Цэвэр усны зах зээлийн судалгаагаа өөрөө хийж, компанийн маркетинг, менежментийг охиндоо даатган ажилласан. Бид үйлдвэрийнхээ өргөтгөлийг хийснээр сүүлийн 2 жилийн хугацаанд бүх төрлийн ус савлах хүчин чадалтай болж, бөөний төвүүдтэй хамтран Булган аймагт цэвэр ус нийлүүлж байна.       -ЭРДЭНЭТ ҮЙЛДВЭРТЭЙ ХЭДИЙ ХУГАЦААНД ХАМТРАН АЖИЛЛАВ?     -Цэвэр усны үйлдвэр маань бүрэн хүчин чадлаараа ажиллахад өдөрт 0.5, 1.5, 5 литрийн савлагаа бүхий 5 тонн ус үйлдвэрлэх боломжтой. Гэвч энэ хэмжээнд хүрэх болоогүй л байна. Өнөөдрийн байдлаар бид өдөрт дунджаар 1.5-3 тонн ус үйлдвэрлэж, хэрэглэгчдэд хүргэхийн зэрэгцээ Эрдэнэт үйлдвэрийн ажилчдыг Хөдөлмөрийн аюулгүй байдал эрүүл ахуйн хор саармагжуулах бүтээгдэхүүний цэвэр усаар ханган ажиллаж байна. Манай компани 2017-2019 онд Эрдэнэт үйлдвэртэй гэрээ байгуулан ажиллаж, хангалттай сайн үүргээ биелүүлсэн. Тэр ч утгаараа найдвартай харилцагч түнш болж, 2019 онд шинэ гэрээний дагуу өдөр бүр шинээр шүүж савласан 2000-3000 ширхэг цэвэр ус нийлүүлж байна. Уурхайчид сэтгэл хангалуун байгаад баярладаг.     -УСНЫ СТАНДАРТ ШААРДЛАГА, ШАЛГУУР ҮЗҮҮЛЭЛТИЙН ТУХАЙД ЮУ ХЭЛЭХ ВЭ?     -Үйлдвэр шат дамжлагатай байх ёстой. Крантны болон үйлдвэрийн ус нь харагдах байдлаараа ялгарахгүй ч амт нь өөр. Өөрөөр хэлбэл, үйлдвэрийн ус зөөлөн амттай байдаг. Манайх 60 метрийн гүний усыг нүүрс, чулуу, мембран, кварц, зэс хоолой гэсэн 5 дамжлагаар шүүж, эцсийн бүтээгдэхүүн болгон савлаж байна. Энэ бүх дамжлага нарийн хяналттай байдаг учраас гаднаас нөлөөлөх хүчин зүйлгүй, бүгд автомат ажиллагаатай. Усны стандарт гэж бий. Үүнд Мэргэжлийн хяналтын газраас тавьсан стандартыг мөрдөж ажилладаг. Орхон аймгийн МХГ-аас хийсэн өнгөрсөн хаврын шалгалтаар бүх үзүүлэлтээ хангахад, “Танайх жишиг компани болж байна шүү” гэсэн таатай мэдээг дуулгасан.     -ӨЧИГДРӨӨС ӨНӨӨДРИЙГ ХҮРТЭЛ ТУУЛСАН ЗАМАА ХАРАХАД БАХАРХАХ ЗҮЙЛ НЬ ЮУ БАЙДАГ ВЭ?     -Хамт олон, бүтээн байгуулалтаараа бахархдаг. Үйлдвэрийнхээ хашаанд орж ирээд харах хамгийн сайхан. Энэ бүхнийг босгоход надад шантрах зүйл олон байсан. Харин өнөөдөр сэтгэл тэнүүн сууж байгаа минь л аз жаргал юм даа.     -БОЛОВСОН ХҮЧНЭЭ ТОГТВОРТОЙ АЖИЛЛУУЛАХАД ХЭРХЭН АНХААРДАГ ВЭ?     -Манай компанид инженер техникийн ажилтнуудтай нийлсэн 18 хүн ажиллаж байна. 2012 оноос өнөөг хүртэл тогтвор суурьшилтай ажилласан 7 хүн бий. Эхнээсээ тэтгэвэртээ гарч байна. Тогтвортой ажиллана гэдэг нь нэг талаар тухайн компанийн үнэ цэнэ юм болов уу гэж би боддог. Хүнийг тогтвортой, бүтээмж өндөртэй, урт хугацаагаар нэг байгууллагад ажиллуулна гэдэг амаргүй. Тухайн ажилтны төдийгүй ар гэрийнх нь өмнө үүрэг хүлээсэн хүн гэж бодохоор нугарах, хугарах, буцах эрх надад байдаггүй.     -ҮЙЛДВЭРЛЭЛЭЭ ӨРГӨЖҮҮЛЭХ САНАА БИЙ ЮУ?     -“Эрдэнэс”, “iEco”усыг Эрдэнэтийнх гэдгээр нь мэддэг боллоо. Улаанбаатар хотод үзэсгэлэнд оролцож байхад “Ээжээ, энэ манай ус байна. Бид нар дандаа уудаг байсан. Үнэхээр гоё ус” гээд “Найрамдлын Эрдэнэс” зуслангийн амрагч хүүхдүүд ус авч байхыг хараад “Хүмүүс таньдаг болж дээ” гэж бодогдсон. Тэр хүүхдийн сэтгэлд үнэ цэнээ бий болгосон ус маань хэрэглэгчээ аль хэдийнэ бэлдээд эхэлжээ. Тэгэхээр цаашид юу хийх, Эрдэнэт үйлдвэрийн ажилчдын хор саармагжуулах бүтээгдэхүүнд юу байж болох вэ гэдэг дээр чамгүй хугацаанд судалгаа хийж ажиллалаа. Орон нутагтаа тэдгээр бүтээгдэхүүнийг хийж болно гэж харсан. Судалгааныхаа дүнд буурцагт ургамлаас жүүс гаргах технологийг амжилттай туршиж, үйлдвэрлэхэд бэлэн болоод байна. Яг өнөөдрийн байдлаар сав баглаа боодлоо тодорхой шийдээгүй боловч эцсийн бүтээгдэхүүн хэрэглэгчдийн гарт хүрэхэд ойрхон байгааг дуулгая. Буурцагт ургамлаас жүүс гаргах технологийг Турк, Болгарт өргөн ашигладаг юм билээ. Болгараас гаралтай бүтээгдэхүүн гэж үздэг. Жүүс нь хүний биед нэн сайн, элэг баярлуулах бүтээгдэхүүн гэдгийг судалгаагаар нотолчихсон. Мөн Эрдэнэтдээ цэвэр жимсний жүүс хийх санаа бий. Хөвсгөл, Булган аймгаас байгалийн жимс худалдан авч түүхий эдээ бэлтгэх өргөн боломж Эрдэнэтийнхэнд байна гэж хардаг. Үйлдвэрлэлийн байраа өргөтгөсний дараа энэ ажлаа шууд эхэлнэ. Шинэ бүтээгдэхүүн гаргах амаргүй ч бид амжилттай яваа.     -ҮЙЛДВЭРЛЭЛИЙГ ДАГАЖ АЖЛЫН БАЙР НЭМЭГДЭХ ҮҮ?     -Эко жүүсний үйлдвэр нээгдэхэд хамгийн багадаа 5-6 ажлын байр бий болно. Харин байгалийн цэвэр жимсээр жүүс хийгээд эхэлчихвэл 5-10 хүнийг дахин ажлын байртай болгохоор төлөвлөж байна. Жүүсний үйлдвэрийг алсын зорилго болгосон ч 2020 он гэхэд хийх том даалгаврыг өөртөө өгсөн. Хаанаас тоног төхөөрөмж оруулж ирэхээ судалж байна.     -ОРОН НУТГИЙН ҮЙЛДВЭРЛЭГЧ БАЙХЫН ЭЕРЭГ БА БЭРХШЭЭЛТЭЙ ТАЛ ЮУ ВЭ?     -Орон нутагт үйлдвэрлэгч байх нь сэтгэлд амар, стресс багатай. Хэрэв бид Улаанбаатарт ажиллаж байсан бол хүргэлтэндээ багагүй хугацаа зарцуулах байсан. Эрдэнэтдээ 1-3 цагийн дотор захиалгаа хүргэхийг эрмэлздэг. Бизнес эрхлэгчдэд тулгамддаг гол зүйлийг банкны зээл гэж харсан. Зовлон ярья гэвэл бизнес эрхэлж байгаа бүх хүн л ярина. Гэхдээ тэр бүгдийг үүрсээр өнөөдрийг хүрч, асуудлыг даван туулаад сурчихсан. тиймээс надад бэрхшээж, эндээс зугтъя гэсэн бодол төрж байсангүй.     -ХЭРЭГЛЭГЧ, ҮЙЛЧЛҮҮЛЭГЧИДДЭЭ ХАНДАН ТАНЫ ХЭЛЭХ ҮГ?     -Цэвэр усыг нэг талаас нь харахад бизнес боловч нөгөө талдаа хүний өдөр тутмын хэрэглээ байдаг. Тиймээс зөв бүтэцтэй, эрүүл, аюулгүй бүтээгдэхүүн хүргэхийн тулд манай хамт олон хичээн ажиллаж байна. Долоон жилийн турш бидэнтэй хамт байсан хэрэглэгчиддээ баярласнаа илэрхийлье. Баялаг бүтээгч уурхайчиддаа баярлалаа. Бид цаашдын алхамаа та бүхнийхээ оролцоотой хийж, Монголын зах зээлд шинэ бүтээгдэхүүн “нутагшуулахад” хамтран ажиллахдаа таатай байх болно. И.Чинтогтох Фото: Б.Баттөгс Дэлгэрэнгүй...
  • Дүгэрийн ОДОНЧИМЭГ

    Овог нэр: Дүгэрийн ОДОНЧИМЭГ Төгссөн сургууль: Хөгжим бүжгийн дунд сургууль, Дорнод Сибирийн Соёл урлагийн их сургууль Мэргэжил: Найруулагч Ажилласан туршлага: 1988-1991 онд “Варьете” чуулгад театр, студийн багшаар ажлын гараагаа эхэлж, 1991 оноос Эрдэнэт үйлдвэрийн соёл, урлагийн байгууллагад ажилласан. Эдүгээ Соёл, урлагийн цогцолборт уран сайхны удирдаач, найруулагчаар 29 дэх жилдээ ажиллаж байна. Мэргэжил дээшлүүлсэн байдал: 1999 онд Санкт-Петербург хотын Соёл урлагийн академи, 2005 онд Улаан-Үд хотын Соёл урлагийн академийг Соёл урлагийн менежерээр тус тус төгссөн. Чин хүсэл: Үндэсний өв соёлын нэг болох морин хуур хөгжмийг түгээн дэлгэрүүлэхэд “Эрдэнэт” дуу бүжгийн чуулгын уран бүтээлчид сэтгэл, зүтгэлээ зориулан яваа. Тэд 2014 онд “Хан хуур” төслийн хүрээнд морин хуурын хамтлаг байгуулж байсан бол энэ сарын 22-нд Эрдэнэтчүүддээ тайлан тоглолтоор бэлэг барихаар бэлтгэлээ хангаж байна. “Морин хуур авч ирээгүй хүнийг хаалгаар оруулахгүй” гээд зогсож байсан найруулагчийн мөрөөдөл өнөөдөр биелэлээ олсон. Тэрээр соёл урлагийн байгууллагын ажилтнуудаа “Өргөө гэртээ хуурын чавхдас татаж, үр хүүхдэдээ зааж сурган, хойч үеийнхэнд өв соёлоо түгээн дэлгэрүүлээсэй” хэмээн чин сэтгэлээсээ хүсэж явдаг нэгэн. Мөн Соёлын гавьяат зүтгэлтэн Д.Дашдондов, Соёлын тэргүүний ажилтан Д.Пүрэвсүрэн нарын бүтээл “Уурхайчин би” дууг 6500 уурхайчны сэтгэл зүрхний сүлд дуу нь байгаасай гэж хүсдэг. -Таны амьдралын сэргээш юу вэ? Амьдралын эрч хүчийг юунаас авдаг вэ? -Мөрөөдөл гэж хэлнэ. Хүсэл мөрөөдөл минь миний амьдралын сэргээш болдог. Мөрөөдөл бол өдөр бүрийг өнгөлөг, гэгээлгээр харахын нууц гэж хэлнэ. -Хийж байгаа ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаарч байна вэ? -Найруулах ажлыг сэтгэлийн хөдөлгөөн болоод жаахан уран сэтгэмжтэй хэн ч хийчихнэ. Гэхдээ найруулагч байна гэдэг маш хүнд философи гэж би хэлнэ. Миний хувьд хичээж л явна. Чадаж байна, чадчихлаа гэж өөртөө тавьсан үнэлгээ хүнийг мөхөлд хүргэдэг гэж би боддог. Харамсалтай нь, энэ баг хэдэн зуунаар дамжин батлагдсан гашуун үнэн. -Ажлын тань онцлог юу вэ? Эерэг сайн ба хэцүү бэрхшээлтэй талууд? -Урлагийн хүн байна гэдэг хэцүү. Монгол Улсын Соёлын гавьяат зүтгэлтэн Д.Дашдондов гуай, Алт мөнгө тоохгүй Авьяас билэг дөрөөлсөн Алдар нэр горилохгүй Алга ташилтанд хөөрсөн Ай даа энэ урлагийнхан гэдэг чинь Ассан цучил шиг улс аа... гэж шүлэглэсэн байдаг. Ийм л хүнд мэргэжил. Гэвч хамгийн хэцүү хүнд үед ч тэвчээр зааж, тэмцэж чадвал амьдралаас өгөөмөр хишгийг хүртдэг. Энэ хишгийг хүртэж яваа би, азтай эмэгтэй. -Эрдэнэт үйлдвэр таны сэтгэл зүрхэнд хэрхэн багтдаг вэ? -Эрдэнэт үйлдвэр минь “Бурхан бумын орон” шүү дээ. Бид энэ үйлдвэрээ шүтэж, биширч, чин сэтгэлээ чин үнэнчээр зориулах үүрэгтэй. -Та бусдаас суралцахыг илүүд үзсэн үү, өөрийгөө дайчлан суралцахыг чухалчилж ирсэн үү? -Авах гээхийн ухаанаар хандаж ирсэн. Бусдын туршлагыг сонсох дуртай. Урлагийн хүн учраас өдөр тутам суралцахыг чухалчилдаг. -Өнөөгийн залуусын талаарх таны бодол? Тэдэнд хандаж юу хэлэх вэ? -Монгол тал нутаг шигээ уужуу тайвуу сэтгэлтэй байхад Монгол эрхэм хүн байж чадна л гэж боддог. -Та энэ буланд хэнийг санал болгох вэ? -“Хөгжим гэдэг бол авьяасаар төдийгүй ухаанаар бүтдэг урлаг” гэж Хөдөлмөрийн баатар, Төрийн соёрхолт Ардын жүжигчин Н.Жанцанноров хэлсэн байдаг. Надтай хамгийн ойр ажиллаж, ухаанаараа нийгмийг хөглөж яваа хүн бол хөгжмийн зохиолч, МУСТА Б.Цэрэндондов. Энэ хүний дотор сэтгэлийг сонсоосой гэж бодож байна. Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Мэдээ

ХАБЭА-н хууль, дүрэм, журмыг урлагаар дамжуулан ажилчдад хүргэдэг “SAFETY FIRST” 17 дахь удаагийн тэмцээн амжилттай болж өндөрлөлөө. ХАБ-ын манлайлал, ажилтны оролцоо сэдвээр хоёр үе шаттай явагдсан уг тэмцээнд Эрдэнэт үйлдвэрийн бүтцийн нэгжүүдийн 20 баг мэдлэг, ур чадвараа сорин өрсөлдсөнөөс Авто тээврийн цех шилдгээр шалгарч, шилжин явах цом, өргөмжлөл, таван сая төгрөгөөр шагнуулав. Дэд байрт Дулааны цахилгаан станцын “галын бурхад” тодорч, өргөмжлөл, гурван сая төгрөг, гутгаар байрыг Цахилгаан цех эзэлж өргөмжлөл, 1,5 сая төгрөгийн шагнал хүртсэн юм. Харин тусгай байрт Холбоо, мэдээллийн технологи, автоматжуулалтын цех, Ил уурхайн багууд шалгарч өргөмжлөл, 800 мянган төгрөгийн урамшуулал хүртлээ.

   ХАБЭА-н хэлтэс, Соёл, урлагийн цогцолбор хамтран зохион байгуулсан “SAFETY FIRST-2019” тэмцээн нь залуу ажилчдад чиглэсэн, ХАБЭА-н дүрэм, журмын 2019 онд шинэчилсэн өөрчлөлтийг тусгасан, ХАБ-ыг монгол зан үйлтэй уялдуулснаараа онцлогтой гэж мэргэжилтнүүд үзэж байна. “Гала” тоглолтын үеэр шилдэг номинацийн эзэд тодорсон юм. “ХАБЭА-н шилдэг инженер”-ээр Барилга засварын цехийн С.Баярсайхан, “Шилдэг арга зүйч”-ээр Оёдлын цехийн А.Мөнхзаяа, “Шилдэг удирдлагын манлайлал” номинацийн эзнээр Цахилгаан цехийн дарга Д.Даваадорж нар шалгарч, шагнал гардлаа. Энэ удаагийн тэмцээнд 100 ажилтан оролцож, давхардсан тоогоор 5000 орчим үзэгчдэд ХАБЭА-н мэдлэг, мэдээлэл түгээсэн байна.         

  

  

  

  

  

  

  

  

  

М.Одгэрэл

Фото: Б.Баттөгс

   Монгол Улсын Ерөнхий сайдын ивээл дор Нийслэлд зохион байгуулагдах “Залуу инженерийн Үндэсний чуулган”-ы салбар хуралдаанболох “Уул уурхайн салбарын хөгжилд-залуу инженерүүдийн оролцоо” сэдэвт хэлэлцүүлэг өнөөдөр Орхон аймагт боллоо. Залуу инженерүүд уул уурхайн өнөөгийн чиг хандлага өндөр технологи, инноваци, дижитал хэлбэрт шилжин хөгжиж байгааг бодит жишээгээр онцлов. Уурхайн тэсэлгээ, тээвэр, кран, өрөмдлөг, агаарын гео маркшейдер хэмжилтүүдийг ч орчин үеийн тоног төхөөрөмж ашиглан алсын зайнаас хийдэг болсон талаар тэд ярьж байна. Энэхүү хөгжилтэй хөл нийлүүлэхийн тулд Дэлхийн жишиг, Монголын бахархал гэсэн алсын хараатай Эрдэнэт үйлдвэрийн баялаг бүтээгчид хариуцлагатай уул уурхай, байгальд ээлтэй, бүтээмж өндөр, аюулгүй үйл ажиллагааг эрхэлсэн, инновацид тулгуурласан хөгжлийн чиг хандлагыг үйлдвэрийн газрын үйл ажиллагааныхаа нэгэн чиглэл болгон ажиллаж байгаагаа илэрхийлсэн. “Эрдэнэт үйлдвэр” ТӨҮГ-ын нийт ажиллагчдын 20 орчим хувь нь залуус, тэдний 30 хувь нь инженерүүд байгаа нь хөгжил дэвшлийн боломж юм гэж Ерөнхий захирлын нэгдүгээр орлогч бөгөөд Ерөнхий инженер Т.Батмөнх цохон тэмдэглэв.

    Үндэсний чуулганы уул уурхайн салбар хэлэлцүүлгийг хамтран зохион байгуулсан “Энх Эрдэнэтийн хөгжил” ТББ-ын Тэргүүн Ц.Бат-Энх Орхон аймагт ажиллаж амьдарч буй залуу инженерүүдийн дунд нийгэмд тустай, түмэн олонд хэрэгтэй, инженерийн шийдэлтэй шинэ бүтээл оновчтой саналын уралдаан зарлалаа. Эрдэнэт хотын өдрөөр буюу 12-р сарын 11-нд уралдааны ялагчийг тодруулж, 10 сая төгрөгөөр шагнахаа мэдэгдэв. Харин Орхон аймгийн Засаг дарга Д.Батлут цаг үеэ олсон энэ уралдаанаас орон нутагт хэрэгцээтэй, үйлдвэрлэлд нэвтрэх боломжтой, Монголын зах зээлээс гадна дэлхийд өрсөлдөх түвшний санал гарвал Шинжлэх ухаан, технологийн паркийн бүтэн жилийн орлогоор санхүүжүүлнэ хэмээн амлаж хэлэлцүүлэгт түрлэг нэмэв.

М.Одгэрэл

ФОТО: Б.Баттөгс

   Эрдэнэт үйлдвэрийн хэмжээнд сар бүрийн эхний өдөр өнгөрөгч сарын үйлдвэрлэлийн төлөвлөгөөний бодит гүйцэтгэлийг хэлэлцэж, сар хаалтын хурал зохион байгуулдаг.
   Баялгийг бүтээгч Эрдэнэт үйлдвэрийн хамт олон оны эхний арван сарын байдлаар үйлдвэрлэлийн үндсэн  үзүүлэлтүүдийг давуулан биелүүлэн ажиллаж байна. Тодруулбал, уулын цул гаргалтын төлөвлөгөөг 103.7 хувиар, хөрс хуулалтыг 104.2 хувиар, хүдэр олборлолт 102.1 хувь, Баяжуулах үйлдвэрт хүдэр өгөлт 102.6 хувь, исэлдсэн хүдэр олборлолтыг 109.4 хувиар давуулан биелүүлээд байна. Тайлант хугацаанд 406660 тууш метр өрөмдлөгийн ажил хийж 103.6 хувиар төлөвлөгөөгөө биелүүллээ.
   2019 оны 10-р сарын үйлдвэрлэлийн үндсэн үзүүлэлтүүдээс дурдвал уулын цул гаргалт 101.8 хувь, хөрс хуулалт 101.3 хувиар, хүдэр олборлолтын төлөвлөгөөг 102.1 хувиар биелүүлээд байна. Баяжуулах үйлдвэрт хүдэр өгөлт 100.6 хувиар, исэлдсэн хүдэр олборлолт 114.7 хувь, хүдэр дэх металлын агуулга зэсээр 100.6 хувь, молибденоор 113.2 хувь, баяжмал дахь металлын агуулга зэсээр 100.4 хувь, молибденоор 116.9 хувиар тус тус биелүүлжээ.
   Ийнхүү, Эрдэнэт үйлдвэрийн бүтээлч хамт олон оны эхний арван  сарын байдлаар үйлдвэрлэлийн төлөвлөгөөт бүх үзүүлэлтүүдийг 100-108.5 хувиар биелүүлэн ажиллаж байна. Төлөвлөх зардлаа хэмнэж, оны эхний есөн сарын байдлаар Улс, орон нутгийн төсөвт 730 тэрбум төгрөг төвлөрүүлсэн амжилттайгаар ажиллаж байна. 
 
                                                                                           А.Бямбамаа
 

   Өнөөдөр Орхон аймгийн Байгаль орчин аялал жуулчлалын газар, Мэргэжлийн хяналтын газрын мэргэжилтнүүд Баян-Өндөр уулан дахь мод тариалалтын ажилтай танилцаж, Эрдэнэт үйлдвэрийн  байгаль орчныг хамгаалах менежментийн төлөвлөгөөний хэрэгжилтийн талаар мэдээлэл сонсов.   

   “Эрдэнэт үйлдвэр” ТӨҮГ байгаль орчныг дүйцүүлэн нөхөн сэргээх төлөвлөгөөний хүрээнд Баян-Өндөр уулын энгэрт энэ оноос эхлэн мод тарих ажлыг зохион байгуулсан.  Тус үйлдвэрийн 8 цехийн 100 гаруй ажилтан энэ хавар, намар 1200 мод шинээр тарьж, 5.2 га газарт нөхөн сэргээлтийн ажил хийжээ. Баян-өндөр уулын эргэн тойрныг ойжуулах, дүйцүүлэн нөхөн сэргээх бодлогын хүрээнд мод тарьж буй энэ газарт огтолсон мод, хожуул ихтэй байсныг Байгаль орчин, ногоон хөгжлийн хэлтэс, Ил уурхайн ажилтнууд  өөрсдийн хүчээр цэвэрлэж, бэлтгэсэн юм. Баян-Өндөр уулын энгэр орчмоос нийт 38 машин хожуул, огтолсон ачуулж, иргэдийн түлшний хэрэгцээнд нийлүүлсэн байна. Нөхөн сэргээлтийн ажлын талаарх мэргэжлийн байгууллагуудын үнэлэлт, дүгнэлт ирэх долоо хоногт гарах юм.

   “Эрдэнэт үйлдвэр” ТӨҮГ,  Баян-Өндөр ууланд 140 га газарт уул уурхайн дүйцүүлэн нөхөн сэргээлт хийхээр төлөвлөж байна.

 

М.Балжинням

   Орон нутагт анх удаа зохион байгуулж буй бүртгэл санхүүгийн ажилтнуудын “Мэргэжлийн тасралтгүй хөгжил-2019” сургалт, зөвлөгөөнд Орхон, Булган, Хөвсгөл, Дархан-Уул, Сэлэнгэ аймгийг төлөөлсөн 400 гаруй салбарын мэргэжилтэн оролцож байна. Орхон аймгийн Засаг даргын Тамгын газар, Сангийн яам, “Эрдэнэт үйлдвэр” ТӨҮГ, ММНБИ хамтран зохион байгуулсан хойд бүсийнхний зөвлөгөөн хоёр өдрийн турш үргэлжилнэ. Сургалт, зөвлөгөөнийг нээж Орхон аймгийн ИТХ-ын дарга П.Пүрэвлхагва хойд бүсийн ажилтнуудад мэндчилгээ дэвшүүллээ. Тэрээр “ММНБИ нь эдийн засаг санхүүгийн удирдлагыг салбар бүрд авч яваа нягтлан бодогчдынхоо мэргэжил боловсролыг дээшлүүлэх чиглэлээр маш олон ажил хийсээр ирснийг тэмдэглэн хэлэхэд таатай байна. Хойд бүсийн аймгуудын зөвлөгөөн Орхон аймагт зохиогдож байгаад Орхончууд бид талархалтай байна. Монголын нягтлан бодох бүртгэлийн сор болсон ахмад үеийнхэн, залуучууд маань туршлагаасаа солилцож, мэргэжил нэгтнүүдтэйгээ дотно танилцах нь чухал юм. Та бүхнээр дамжуулан хойд бүсийн аймгууд эрчимтэй хөгжиж, Монгол Улсын хөгжил цэцэглэлт дэвжин дээшлэхийн өлзийтэй ерөөлийг өргөн дэвшүүлье” гэв. 
   100 гаруй мянган хүн амтай, орон нутгийн төсвийн орлогоор өөрийгөө бүрэн санхүүжүүлж, улсдаа орлого төвлөрүүлэн, эдийн засагт томоохон хувь нэмэр оруулж яваа аймгуудын нэг бол Орхон аймаг. Оны эхний 10 сарын байдлаар орон нутгийн төсвийн орлогыг 113.8 хувиар биелүүлж, улсын төсөвт 12.4 тэрбум төгрөг төвлөрүүлэн, 13.8 тэрбум төгрөгийн хөрөнгө оруулалт, бүтээн байгуулалтын ажил гүйцэтгэж, төсвийн өмнө хүлээсэн үүргээ амжилттай биелүүлэхэд санхүүч, эдийн засагчдын нөр их хөдөлмөр, оюун ухаан, сэтгэл зүрх шингэсэн байдгийг Орхон аймгийн Засаг дарга Д.Батлут хэлсэн үгэндээ онцлон тэмдэглэлээ. Мэдээллийн технологи хурдацтай хөгжиж байгаа өнөө үед санхүүчид цаг ямагт өөрийгөө хөгжүүлж, олон талын мэдлэг чадвар эзэмшин, цаг үетэйгээ нийцэн ажиллах шаардлага улам бүр нэмэгдэж байгаа тул “Мэргэжлийн тасралтгүй хөгжил” нэрийн дор зохиогдож байгаа энэ удаагийн уулзалт, зөвлөгөөн дээрх хэрэгцээ шаардлагатай бүрэн нийцжээ.  
   Монголын мэргэшсэн нягтлан бодогчдын институт нь Улсын хэмжээнд 30 гаруй салбар, 2600 гаруй гишүүнтэй үйл ажиллагаа явуулдаг мэргэжлийн байгууллага бөгөөд шинэ эриний босгон дээр Монголын бүх санхүүчдийг цаг үетэйгээ хөл нийлүүлэн хөгжихөд сургалт, арга зүйгээр ханган ажилладаг. Тус институтийн Ерөнхийлөгч Б.Түвшин хойд бүсийн чуулга уулзалтыг анх удаа орон нутагт зохион байгуулсан нь өндөр ач холбогдолтойг дурдаад зохион байгуулах ажилд санаачилга гаргасан Орхон аймгийн Засаг даргын Тамгын газар, “Эрдэнэт үйлдвэр” ТӨҮГ, ММНБИ-ын Орхон салбарын хамт олонд талархал илэрхийллээ. ММНБИ-ын дэд Ерөнхийлөгч Д.Нацагдорж санхүүчдэд зориулан институтийн зүгээс 2019 онд хийж хэрэгжүүлж байгаа 14 төсөл хөтөлбөрийн талаар мэдээлэл хийсэн. 
   “Эрдэнэт үйлдвэр” ТӨҮГ санхүү, бүртгэлийн 200 гаруй албан хаагчтайгаас 40 орчим нь Мэргэшсэн нягтлан бодогч, 15 нь татварын мэргэшсэн зөвлөхийн хэмжээнд ур чадвараа өсгөн ажиллаж байна. Цаашдаа үйлдвэрийн хэмжээнд мэргэшсэн нягтлан бодогчдын тоог нэмэгдүүлэх, тэднийг чадавхжуулах ажлыг өргөжүүлэхийн зэрэгцээ бүс нутгийн болон улсын хэмжээнд мэргэшсэн нягтлан бодогч гэсэн нэр хүндийг өргөж явах санхүү, бүртгэлийн ажилтнуудыг чадавхжуулах асуудалд Эрдэнэт үйлдвэрийн зүгээс анхаарал хандуулж, мэргэжлийн хувьд дэмжлэг үзүүлэн, хамтран ажиллахаар зорьж байгаагийн нэг илрэл нь өнөөдрийн уулзалт, зөвлөгөөн болохыг “Эрдэнэт үйлдвэр” ТӨҮГ-ын Ерөнхий захирлын Санхүү, эдийн засаг хариуцсан орлогч Д.Үүрийнтуяа онцоллоо. Тэрээр “Мэргэшсэн нягтлан бодогч хэмээх эрхэм хүндтэй алдар цолыг овгоо болгосон мэргэжил нэгт эрхмүүд, энэ эрхэм нэрийн төлөө, энэ ачааг үүрэлцэхийн төлөө зүтгэж яваа санхүү, бүртгэлийн олон мянган ажилтны төлөөлөл болж хүрэлцэн ирсэн та бүхэндээ амжилт хүсье. Эрдэнэт үйлдвэр энэ удаагийн уулзалт, зөвлөгөөнийг хамтран зохион байгуулж, цаашид ММНБИ, түүний орон нутаг дахь салбар зөвлөлтэй хэрхэн хамтран ажиллах талаар төлөвлөгөө гарган, сургалт зөвлөгөөн тасралтгүй явуулах болно” гэдгээ хэллээ. 
   Уулзалт, зөвлөгөөний нэгдсэн хуралдаанд Эрдэнэт үйлдвэрийн санхүү, эдийн засгийн үзүүлэлт, гүйцэтгэж буй үүрэг хариуцлага, Төрөөс нягтлан бодох бүртгэлийн талаар баримталж буй бодлого, чиглэл, Санхүүч, нягтлан бодогч мэргэжлийн ирээдүйн чиг хандлага, Санхүүгийн зөвлөгөө өгөх үйлчилгээний хөгжил, Ёс зүйтэй мэргэжилтэн, Танин мэдэхүйн гажуудал, татварын багц хуулийн шинэчлэлт, Санхүүгийн ажилтнуудад шаардлагатай, амжилтад хүргэх ур чадварууд сэдвээр илтгэл тавигдлаа. Маргааш буюу энэ сарын 02-ны өдөр, мэргэшсэн нягтлан бодогчид болон бүртгэл, санхүүгийн ажилтнуудад зориулсан салбар хуралдаанууд үргэлжилж, Дотоод хяналтын тогтолцоо, Аудитын зах зээлийн орчин үеийн чиг хандлага, Олон улсын стандартын өөрчлөлт, Засгийн газрын нэгтгэсэн санхүүгийн тайлан бэлтгэхэд гарч буй нийтлэг алдаа дутагдал, түүнээс сэргийлэх нь, Монгол Улсын хүн ам зүй, хөдөлмөрийн зах зээл, Банк санхүүгийн системд тулгарч буй асуудал сэдвийг онцлон мэдээлэл хүргэнэ. 
   Санхүү бүртгэлийн ажилтнууд салбар хуралдаанд сонирхсон асуултдаа хариулт авахын зэрэгцээ хөтөлбөрийн дагуу Орхон аймагтай танилцах аялал хийж, “Эрдэнэт үйлдвэр” ТӨҮГ-ын ил уурхайг үзэж сонирхох юм. Монгол Улсын бүртгэл, санхүүгийн холбогдолтой шинэ тутам гарч байгаа мэдээ мэдээллийг хүлээн авч, хоорондын харилцаа, хамтын ажиллагаагаа өргөжүүлэн, арга туршлагаа хуваалцах энэхүү уулзалт зөвлөгөөнийг орон нутаг, Орхон аймагт анх удаа зохион байгуулснаар хамрах хүрээ өргөжин, энэ чиглэлээр ажилладаг 200 гаруй, бусад аймгийн мөн тооны ажилтан шинэ мэдлэг мэдээллээр оюунаа тэлж байна.  
 

 
 
   
 
   
 
 
 
 
 
 
 
 
 
 
И.Чинтогтох
Фото: Б.Баттөгс
 
 
   Шууд удирдах ажилтнаас ажилчид нь 70 хувиар нөлөөлөл авч байдаг гэсэн судалгаа байдаг. Удирдах ажилтан хамт олондоо хэрхэн үлгэр дуурайлал үзүүлж, Хөдөлмөрийн аюулгүй байдлын чиг үүргийг амжилттай хэрэгжүүлэх талаарх арга хэрэгслүүдийн талаар танхимын сургалт хийгдсэн. Энэ сургалтад Эрдэнэт үйлдвэрийн Нийгмийн цехүүдийн удирдах ажилтнууд хамрагджээ. 
   Хөдөлмөрийн аюулгүй байдал эрүүл ахуйн дөрөвдүгээр шатны иж бүрэн үзлэгээр Нийгмийн цехүүдийн хариуцлагагүй ажлын байр, удирдах ажилтнуудын ХАБЭА-д хандаж байгаа хандлага зохих түвшинд хүрээгүй зэрэг учир дутагдлууд гардаг. Иймээс Эрдэнэт үйлдвэрийн ХАБЭА-н хэлтсийн дарга Д.Цагаан-Эрдэнийн үүрэг даалгаврын дагуу Нийгмийн цехүүдийн удирдах шатны ажилтнуудад Хөдөлмөрийн аюулгүй байдлын манлайлал, Үйлдвэрлэлийн цех нэгжүүдийн үйл ажиллагаатай танилцуулах аяллыг ийнхүү зохион байгуулжээ.  
   Ил уурхай, Баяжуулах үйлдвэр, Авто тээврийн цехүүдийн Хөдөлмөрийн аюулгүй байдал эрүүл ахуйн чиглэлээр хийсэн төрөл бүрийн самбарууд, “Өглөөний ХАБ”, “Мэдээллийн хаалгач” зэргийг танилцуулж аюул эрсдэлээс ангид байхын тулд хэрхэн хариуцлагатай ажил зохион байгуулдгийг газар дээр нь танилцуулсан юм. Энэ үйл ажиллагаанд хамрагдсан Нийгмийн цехүүдийн удирдах шатны ажилтнууд  ийнхүү туршлага судлан, цаашид  өөрсдийн цех нэгжүүдийн үйл ажиллагаанд тусган ажиллах юм. 
   Энэ үйл ажиллагаанд Ерөнхий захиргааны удирдах шатны ажилчдаас үйлдвэрлэлийн аялалд хамрагдаагүй ажилтнууд ч оролцсон юм.  
 
А.Бямбамаа
 

   Хойд бүсийн аймгуудын бүртгэл, санхүүгийн ажилтнуудын “Мэргэжлийн тасралтгүй хөгжил” сэдэвт сургалт Эрдэнэт хотод болж байна. Үүнтэй холбогдуулан Эрдэнэт үйлдвэр ТӨҮГ-ын Ерөнхий захирлын Санхүү, эдийн засаг хариуцсан орлогч Д.Үүрийнтуяатай уулзаж, Зууны манлай үйлдвэрийн бүртгэл, санхүүгийн үйл ажиллагаанд гарч буй ахиц өөрчлөлтийн талаар болон бусад асуудлаар ярилцсан юм.  
 
 
   - Юуны өмнө сургалт, зөвлөгөөнд оролцогчдод мэндчилгээ дэвшүүлнэ үү? 
 - Хойд бүсийн аймгуудын бүртгэл, санхүүгийн ажилтнуудын “Мэргэжлийн тасралтгүй хөгжил” сэдэвт сургалтад хамрагдаж байгаа бүс, орон нутгийн нийт санхүүчдэдээ  ажлын өндөр амжилт, амьдралын хамгийн сайн сайхан бүхнийг хүсэн ерөөе. Санхүү, бүртгэлийн ажилтнуудын бүсчилсэн чуулга уулзалтын буухиа Эрдэнэсийн хотоос эхэлсэнд баяртай байна.

   - 6500 гаруй ажилтантай “Эрдэнэт” хэмээх их “айл”-ын санхүү, бүртгэлийн үйл ажиллагаа хэр цэгцтэй явж ирсэн бэ?
   - Санхүү, бүртгэлийн үйл ажиллагаа байгууллагын хөгжилтэй салшгүй холбоотой. Эрдэнэт үйлдвэр маань 41 дэх жилдээ ажиллаж байна. Үүнтэй зэрэгцээд бүртгэл, санхүүгийн үйл ажиллагаа хөгжлийн тодорхой үе шатыг дамжиж ирсэн. Эрдэнэт үйлдвэрийн хувьд хөрөнгө санхүүгийн бүртгэлдээ санхүүгийн тайлагналын олон улсын стандарт хэрэгжүүлэх, энэ хүрээнд тодорхой бодлого, дүрэм, журам, заавар боловсруулж мөрдөх ажлууд үлгэр жишээ явж ирсэн түүхтэй.

   - Монгол-Оросын хамтарсан үйлдвэр байсан “Эрдэнэт” саяхнаас 100 хувь үндэсний компани болж, сүүлд төрийн өмчит үйлдвэрийн газар боллоо. Үүнийг дагаж санхүү, бүртгэлийн үйл ажиллагаанд өөрчлөлт орж байна уу?
  - Статусын өөрчлөлт дагаж гэхээсээ илүү санхүүгийн тайлагналын олон улсын стандартууд шинэчлэгдэж байгаатай холбоотой нягтлан бодох бүртгэлийн болон санхүүгийн удирдлагын бодлогын баримт бичгүүдийг шинэчлэн боловсруулж дуусаад байна. Үүнийгээ хэрэгжүүлж ажиллах нь бидний хувьд чухал зорилт. Өнгөрсөн зургаан сарын хугацаанд бид өртгийн бүртгэлээ шинэчлэх ажилд тодорхой ахиц гаргасан. Нөгөө талаас нягтлан бодох бүртгэлийн үйл ажиллагаа программ хангамж, техник технологийн дэвшилттэй салшгүй холбоотой. Эрдэнэт үйлдвэрийн хувьд уул уурхайн үйлдвэрлэл эрхэлж буй дэлхийн томоохон аж ахуй нэгжийн хувьд санхүү, бүртгэлийн программ хангамжаа шинэчлэн сайжруулж, үйлдвэрлэл, санхүү эдийн засаг, худалдан авалт, хүний нөөц, албан хэрэг хөтлөлт, дотоод хяналт мониторинг гээд бизнесийн процессын иж бүрэн системийг нэвтрүүлж дижитал шилжилт хийх зайлшгүй шаардлага байгаа тул ERP, EAM систем нэвтрүүлэх ажлыг  2020 онд хийхээр төлөвлөж байна.

  - Эрдэнэт үйлдвэр санхүү, бүртгэлийн хэдэн ажилтантай вэ? Тэдний ур чадварын тухайд юу хэлэхсэн бол...?
  - Эрдэнэт үйлдвэрт санхүү, эдийн засгийн чиглэлээр 150 орчим хүн ажиллаж байна. Эдгээрээс Мэргэшсэн нягтлан бодогч 31, Татварын мэргэшсэн зөвлөх 11 бий. Цаашид бид санхүү, бүртгэлийн ажилтнуудаа мэргэшүүлэх, чадавхжуулах, мэргэжлийн ур чадварыг нь нэмэгдүүлэх чиглэлд анхаарч Монголын мэргэшсэн нягтлан бодогчдын институт, Татварын мэргэшсэн зөвлөлийн нийгэмлэг зэрэг мэргэжлийн байгууллагуудтай хамтран ажиллаж байна. Энэ хүрээнд ММНБИ-ээс санаачлан зохион байгуулж байгаа Хойд бүсийн аймгуудын бүртгэл, санхүүгийн ажилтнуудын сургалтыг Эрдэнэт үйлдвэр дэмжин хамтран ажиллаж байгаа юм.

   - Эрдэнэт үйлдвэрийн уурхайн уул геологийн нөхцөл хүндэрч, зардал өсч байгаа. Гэсэн ч улсад төлөх мөнгөний хэмжээ буурахгүй, харин ч нэмэгдэх хандлагатай. Үйлдвэрийн үр ашигт эерэгээр нөлөөлж буй бодлого, шийдвэр, түүний хэрэгжилтийн талаар яриач?
  - Гуравдугаар улирлын байдлаар үйлдвэрлэл, эдийн засгийн үндсэн үзүүлэлтүүд зорилтот түвшний хүрээнд бүрэн биелсэн. Үйлдвэрлэлийн төлөвлөгөөт үзүүлэлтүүд 100-107 хувиар биелсэн байна. Үүнийг дагаад санхүү, эдийн засгийн үзүүлэлтүүд эерэг дүнтэй яваа. Дэлхийн зах зээл дээр зэсийн үнэ буурч байна. Бид 2019 онд дэлхийн зах дээл дээрх цэвэр зэсийн үнийг улсын төсөвт тусгагдсаны дагуу 6272 ам.доллараар төлөвлөсөн хэдий ч дэлхийн томоохон гүрнүүдийн худалдааны маргаанаас шалтгаалж даруй 500 гаруй ам.доллараар бага байгаа. Түүнээс гадна 40 гаруй жил ажилласан Эрдэнэт үйлдвэрийн хувьд уул геологийн нөхцөл хүндэрч байна. Хүдрийн хатуулгийн хэмжээ нэмэгдэж, хүдэр дэх зэсийн агуулга буурч байна. Үүнийг дагаад металл авалт багасч байна. Ингээд хүндрэл бэрхшээл тоочвол асуудал нэлээд бий. Гэхдээ манай уурхайчид, хамт олон тодорхой төлөвлөгөөтэй, зорилготой, өртөг зардал бууруулах төлөвлөгөө гарган ажилласны үр дүнд нийт зардлыг төлөвлөсөн хэмжээнээс 4.6 хувиар бууруулсан. Орлогын төлөвлөгөөгөө 2.8 хувиар давуулан биелүүлсэн. Орлогын өсөлтийг хангаж, зардлыг бууруулж ажилласан нь Эрдэнэт үйлдвэрийн уурхайчдын хамтын хичээл зүтгэлийн үр дүн юм. 2019 оны эхний 9 сарын байдлаар улс, орон нутгийн төсөвт 730 тэрбум төгрөг төвлөрүүлсэн. Цаашид хүлээгдэж буй гүйцэтгэлээр оны эцэст 790 орчим тэрбум төгрөгийг төвлөрүүлнэ гэсэн төлөвлөгөөтэй ажиллаж байгаа. Эрдэнэт үйлдвэрийн уурхайчин хамт олон хөдөлмөрийн бүтээмжээ нэмэгдүүлж, улс, орон нутгийн төсвийн өмнө хүлээсэн үүргээ нэр төртэй биелүүлж явна.
 
   - Өмнө нь та, Эрдэнэт үйлдвэрийн санхүү, эдийн засгийн үйл ажиллагааг ажилтнуудынхаа нийгмийн асуудлыг шийдвэрлэх арга замыг тодорхойлох чиглэлтэй уялдуулна гэж ярьсан. Энэ талаар...?
   - Монгол Улсын Засгийн газар Эрдэнэт үйлдвэрийн талаар авч хэрэгжүүлэх арга хэмжээний тухай 224 дүгээр тогтоолыг өнгөрсөн зургаадугаар сард гаргасан. Энэ бол Монгол Улсын Засгийн газар сүүлийн 26 жилийн хугацаанд анх удаа Эрдэнэт үйлдвэрийн хөгжил дэвшилтэй холбоотой гаргасан томоохон шийдвэр юм. Энэхүү тогтоолоор “Эрдэнэт үйлдвэр” ТӨҮГ-ыг 2031 он хүртэл хөгжүүлэх үндсэн чиглэлийг дэмжиж Төрийн өмчийн бодлого, зохицуулалтын газар баталсан. Үндсэн чиглэлийнхээ хүрээнд манай хамт олон тогтвортой хөгжлийн цогц бодлогыг  техникийн, технологийн, санхүү эдийн засгийн, байгаль орчны, хүний нөөц нийгмийн хөгжлийн бодлогын хүрээнд хэрэгжүүлэн ажиллаж байна.  
   Санхүү, эдийн засгийн чиглэлээр баримталж буй бодлогын эцсийн үр дүн нь ажилчдын эрх ашгийг хамгаалахад, тэднийг баталгаатай орлогын эх үүсвэрээр хангахад чиглэгдэх учиртай гэж бид харж байгаа юм. Энэ хүрээнд бид санхүүгийн зах зээл дээр үйл ажиллагаа явуулж буй арилжааны банкуудын төлөөлөлтэй анх удаа нээлттэй уулзалт зохион байгуулсан. Уулзалтаар, нэг талаас арилжааны банкууд Эрдэнэт үйлдвэртэй хэрхэн хамтран ажиллах талаар, нөгөө талаас Эрдэнэт үйлдвэртэй санхүүгийн зах зээлд хамтран ажилласны үр дүнд уурхайчид, хамт олонд банкны бүтээгдэхүүн үйлчилгээний ямар боломж олгох талаар нээлттэй ярилцсан.

   - Арилжааны банкууд хоорондоо өрсөлддөг бизнесийн байгууллагууд шүү дээ...
   - Тийм ч учраас нийт дунд нь нээлттэй ярилцсан хэрэг. Хамгийн боломжит хувилбар санал болгосон арилжааны банктай бид цаашид хамтын ажиллагаагаа өргөжүүлэн ажиллана. Өмнө нь, Эрдэнэт үйлдвэр арилжааны таван банктай хамтран ажилладаг байсан. Өнөөдөр бид арилжааны 10 банктай хамтран ажиллаж байна. Өмнө нь манай ажилчид цалингийн зээлийг 1.4-2.5 хувийн хүүтэй авч байсан. Бид арилжааны банкуудтай хамтын ажиллагааны гэрээ хийснээр цалингийн зээлийн хүүг 1.0-1.5 хувь болгож бууруулсан.

   - Ипотекийн зээл авахад олон бичиг баримт бүрдүүлэхээс эхлээд чирэгдэл их учирдаг. Үүнийг хөнгөвчлөх боломж бий юу?
   - Бид ипотекийн зээлийн нөхцөлийн асуудлыг мөн хөндсөн. Өмнө нь банкууд зээлийн эргэн төлөлт дээр хатуу шаардлага тавьдаг байсан. Харин одоо бүх төлбөрөө тэнцүү төлөх үү, үндсэн төлбөрөө тэнцүү төлөх үү гэдэг нь хувь хүний сонголтын асуудал байхаар тохиролцож байна. Ээлжийн ажилчид банкны системээр үйлчлүүлэхэд чирэгдэл ихтэй байдаг. Энэ явдал чирэгдлийг багасгах үүднээс цахим банкны системийг манайд түлхүү хэрэглэх, цахимаар материалаа бүрдүүлээд цахимаар зээлээ авах боломжийг хангах санал тавьсан. Бүх банк цахим банкны үйлчилгээ санал болгож байгаа.

  - Төгсгөлд нь асуухад ямар ч мэргэжлийн хүнд тасралтгүй хөгжил их чухал. Тэгэхээр энэ зөвлөгөөний ач холбогдлыг та хэрхэн дүгнэж байна?
   - Хүн хэдий сайн ч хэлэхээс нааш ойлгодоггүй, цаас хэдий нимгэн ч чичихээс нааш цоордоггүй гэдэг дээ. Хэчнээн сайн мэргэжилтэн байлаа ч тасралтгүй боловсрол байхгүй бол хөгжихгүй. Техник, технологийн дэвшил, дэлхийн глобалчлалтай уялдаад бүх салбарын бодлого маш хурдтай өөрчлөгдөн шинэчлэгдэж байна. Санхүү, нягтлан бодох бүртгэлийн хувьд бүртгэлийн тогтолцоо шинэчлэгдэж, стандартууд илүү боловсронгуй болж байна. Энэ нөхцөлд тасралтгүй боловсрол чухал ач холбогдолтой. Ялангуяа хамт олны үйл ажиллагааны үр дүнг тоогоор илэрхийлдэг санхүү, бүртгэлийн ажилтнуудын мэдлэг, чадварыг дээшлүүлэх, тасралтгүй боловсролоор хангах асуудал байгууллагын бодлогод чухал байр суурь эзлэх ёстой. Энэ ч утгаараа бүсийн санхүү, эдийн засгийн ажилтнуудын чуулга уулзалт үр дүнгээ өгнө гэж найдаж байна.
   Ингээд бүсчилсэн сургалтын үйл ажиллагаанд амжилт хүсье.
 
М.Одгэрэл
Баасан, 01 11-р сар 2019 00:00

Банзарраднаагийн БУРМАА

 

Овог нэр:
Банзарраднаагийн  БУРМАА
 
Төгссөн сургууль:
Монгол Улсын Анагаах Ухааны Их Сургууль
 
Мэргэжил:
Эх барих эмэгтэйчүүдийн эмч, хэт авиан оношилгооны төрөлжсөн нарийн мэргэжлийн эмч
 
Ажилласан туршлага:
2000-2003 онд Булган аймгийн Эрүүл мэндийн газарт Өрхийн ахлах эмч, 2005 оноос “Эрдэнэт” сувиллын цогцолборын Тасгийн эрхлэгч -Эмэгтэйчүүдийн эмч
 
Мэргэжил дээшлүүлсэн байдал:
2003-2005 онд ЭМШУҮИС-ийн Мэргэжил дээшлүүлэх институтэд эх баригч эмэгтэйчүүдийн резидентур, 2011 онд эх барих эмэгтэйчүүдийн хэт авиан оношилгооны төрөлжсөн нарийн мэргэжлийн курс, 2015-2017 онд АШУҮИС-ийн Сайдер Их сургуулийн Анагаах ухааны магистрын зэрэг хамгаалсан.
 
Чин хүсэл:
Баг хамт олноороо гар сэтгэл нийлж, одоогийн тасгаа клиникийн хэмжээнд өргөжүүлэн хөгжүүлж, үйлдвэрийнхээ ажилчид, ахмадууд, Мэргэжлээс шалтгаалах өвчний улмаас тэтгэвэр тогтоолгосон иргэд, цаашлаад Орхон аймгийн иргэдийг эрүүл мэндийн даатгалын хөнгөлөлтөөр эрүүл мэндийн тусламж үйлчилгээнд хамрагдах нөхцөлийг бүрдүүлэх, мөн оношилгооны тоног төхөөрөмжүүдээ Ази болон Европын орнуудын эмнэлгүүдтэй холбон, алсын зайн оношилгоог бий болгон үйлчилгээний чанарын дэвшил, үйлчлүүлэгчдийн сэтгэл ханамжийг баталгаажуулахад өөрийн хувь нэмэр, сурсан мэдсэнээ бүрэн зориулах чин эрмэлзэлтэй явдаг. Дөчин жилийн түүх, туршлагатай “Эрдэнэт” сувиллын цогцолбороо ирээдүйд өнөөдрөөс илүү хүрээ, хаяагаа тэлсэн орчин цагийн боловсронгуй технологи бүхий оношилгоо, эмчилгээний төв болоосой гэж хүсдэг. 
 
 
Өдөр бүр хэвшил болсон чухал дадал бий юу ? 
Хүний хамгийн чухал зүйл бол эрүүл мэнд. Иймээс өглөө бүр 4 аяга буцалсан бүлээн ус ууж, өглөөг эхлүүлдэг.  Ус хүний биеэс хорыг гадагшлуулах үйлчилгээтэй. Үүнийг хүн бүр өглөөний дадал болгоосой гэж боддог. 
 
Өөртөө хэвшүүлэхээр зорьж буй шинэ зүйлсээсээ хуваалцаач ? 
Сүүлийн үед, охинтойгоо хамт оройн хоолны дараа дасгал хөдөлгөөн хийж байгаа. Хөдөлгөөн нь мөн л эрүүл явахын үндэс. Заримдаа амралтын өдрүүдээр өглөө гүйдэг. Энэ дасгал хөдөлгөөнөө  тогтмол хийж хэвшүүлэхээр зорьж байна. Мөн техник технологийн эрин үед оношилгоо, эмчилгээний шинэ дэвшилтэт технологийг байнга судалж суралцах, мэргэжил нэгт эмч нартайгаа туршлага солилцох зэргээр онлайнаар суралцдаг болоод байгаа. Онлайнаар суралцах өргөн боломж бидний өмнө нээгдэж буйг цаг ямагт ашиглахыг хичээж байна.
 
Та хэнээс, юунаас урам зориг, эрч хүч олж авдаг вэ? 
Төрсөн нутгийнхаа уул уснаас,  гэр бүлээсээ эрч хүчийг авдаг. Мөн ажлын хамт  олон, найз нөхөд гээд миний хамгийн ойр бүхэн надад урам, хүч өгдөг.  Хаа ч явсан ажлын амжилт, ололт дэвшилт нь нутгийн уул ус, гэр бүл, ажлын хамт олонтой салшгүй холбоотой.  Багаараа ажиллаж, хөгжил дэвшилд хүрэх зүг чиг болж, бие биедээ сэтгэлийн илч түгээж байдаг хамт олон минь нэг том бахархал юм. 
 
Хийж байгаа ажлын тань онцлог юу вэ ? 
Эмч хүн гэдэг үйлчлүүлэгчийнхээ зөвхөн өвчнийг эмчлэх биш ,  сэтгэлийг нь  хамт сонсох, ойлгох,  харилцах, эмчлэх нь өвчний  эдгэрэлт, цаашдын тавиланд нь ч их нөлөө үзүүлдэг. Тэр тусмаа миний ажил уурхайчин эмэгтэйчүүдийн эмч гэдгээрээ онцлог юм болов уу. Уурхайд эрчүүдтэй мөр зэрэгцэн ажиллаж, хүнд хүчир хөдөлмөр эрхэлж яваа уурхайчин бүсгүйчүүддээ эмэгтэй хүнийх нь хувьд хамгийн ойрын, дотнын зөвлөгч нь байж, жаргал зовлонг нь хуваалцаж байх нь нэг талаас миний ажлын үүрэг, нөгөө талаас хүсэл бодол минь юм даа. 
 
Таныг ажиллаагүй үед тань хаанаас олж болох вэ ? 
Завтай үедээ  хөдөө ээж дээрээ очих,  ажилд нь туслах, ярилцах  дуртай.  Хол боловч би тэнд л байж байна. 
 
Таны амьдралдаа авч байсан хамгийн сайн зөвлөгөө юу вэ? 
- Бүх зүйлсээс суралц, их унш 
- Сайн бод /тооцоол/, төлөвлө, зөв сайн хий  /зохион байгуул/  гэж  аавынхаа захисан энэ л  хоёр зөвлөгөөг  амьдралдаа мөрдлөг болгож  ажилладаг.  Энэ нь миний бараг ажлын үндсэн арга барил болсон.
 
Та энэ буланд хэнийг санал болгож, ажлын арга барилтай нь танилцмаар байна вэ ? 
Технологийн сургуулийн доктор, дэд профессор Д.Болор – Эрдэнэ багшийн ажлын арга барилтай танилцах хүсэлтэй байна. Оюунлаг, чадварлаг эмэгтэйчүүдийн үзэл бодол, хэв маяг, туршлагаас суралцахыг үргэлж эрхэмлэж явдаг. 
 
Баярлалаа

Мэдээний төрөл

Календарь

« 11-р сар 2019 »
Да Мя Лх Пү Ба Бя Ня
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

Зургийн цомог