Цахим хуудас

Цахим хуудас


Notice: Undefined property: JObject::$description in C:\inetpub\wwwroot\erdenettoday\templates\ts_newsline\html\com_k2\templates\default\user.php on line 59
Цахим шуудан: This email address is being protected from spambots. You need JavaScript enabled to view it.
 
Эрдэнэт үйлдвэрийн Автотээврийн цехийн дарга Я.Дамдиндоржтой уулзаж ярилцлаа.
-Танай цехийн технологийн тээврийн болон төрөл бүрийн автомашины хэсгийн үйл ажиллагааны үндсэн үзүүлэлт ямар түвшинд явж байна вэ?
-Автотээврийн цех нь Технологийн тээвэр, төрөл бүрийн маркийн автомашины, тусгай зориулалтын машин механизмын гэсэн үндсэн гурван хэсэгтэй. Эдгээр хэсгүүд автомашинд үйлчлэх засварын гурван хэсэгтэй, нийт 850 гаруй ажилтантай, хүний хөгжлийг эрхэмлэн, хөдөлгөөний аюулгүй байдлыг ханган ажилладаг. Өөрөөр хэлбэл оновчтой автотээврийн системээр үйлдвэрлэлийн тасралтгүй үйл ажиллагааг дэмжин, 130 тоннын  БелАЗ-75131 маркийн хүнд даацын өөрөө буулгагчаас эхлээд орчин үеийн суудлын автомашин хүртэл төрөл бүрийн маркийн 300 гаруй хөдлөх бүрэлдэхүүнтэйгээр уулын цул тээвэрлэх, үйлдвэрийн ажилтнуудыг зөөвөрлөх, зам талбай засварлах, цэвэрлэх, хаягдлын аж ахуйн далан барих, үйлдвэрийн газрын бүтцийн нэгжүүдэд захиалгын дагуу шаардлагатай ачаа, бараа материал тээвэрлэх ажил гүйцэтгэж байна.  Манай хамт олон  үйлдвэр анх ашиглалтад ороход 624 мянган шоо метр уулын цул, үүнээс 386 мянган тонн хүдрийг Баяжуулах үйлдвэрт тээвэрлэж 3 сая 292 мянган т/км-ын ачаа эргэлтийн ажил хийж, үйлдвэрлэлийн төлөвлөгөөт даалгаврыг жил бүр тогтмол давуулан биелүүлж ирсэн түүхтэй. Өнгөрсөн онд 25 сая 380 мянган шоо метр уулын цул тээвэрлэж, 219 сая 400 мянган т/км-ын ачаа эргэлтийн ажил хийж төлөвлөгөөг 100 гаруй хувиар тус тус давуулан биелүүлсэн. Төрөл бүрийн маркийн тээврийн хэрэгсэл болон тусгай зориулалтын механизмын хэсгүүд 474 мянган машин цагийн ажил гүйцэтгээд байна.
-Сүүлийн жилүүдэд Өөрөө буулгагч автомашины түлш, тослох материал, сэлбэгийн зарцуулалтад хэмнэлт гарч байгаа юу? Засварын газарт шинэлэг ямар ажлууд хийгдэж байна вэ?
-Авто тээврийн цехийн агуулахад гурваас дээш жил хадгалсан сэлбэг хэрэгсэл, бараа материалын тоо хэмжээг нарийвчлан гаргаж, сэлбэгийн эдийн дугаарын зөрүүг арилгаж  шаардлагатай газруудад хэрэгцээтэй материалыг нь цех хоорондын тооцоогоор шилжүүлснээр 18,8 хувьтай байсан үлдэгдлийг 13 хувь болгон бууруулсан. Уулын технологийн тээврийн хэсгийн жолооч нарын ээлж солилцох хугацааг богиносгох зохион байгуулалтын арга хэмжээ авч ажиллалаа. Энэ хугацаанд 32703.9 км-ын ачаагүй гүйлт хэмнэж, БелАЗ-ын ачилтад орох хугацааг ээлж болгонд жолооч тус бүр 10-15 минутаар богиносгон,  гүйлт ашиглалтын итгэлцүүрийг нэмэгдүүлэн автомашины түлшний зарцуулалт буурч, ээлж солилцох үеийн хүдэр тээвэрлэлтийн хэмжээ 448.5 тонноор нэмэгдсэн.  Мөн тооцоо судалгааны үндсэн дээр уулын технологийн тээвэрлэлтийн процессын алдагдлыг бууруулахаар нарийвчлан судалж түлш цэнэглэлт, цайны цагийн үеийн ачаагүй сул гүйлтийг багасгах арга хэмжээ авч ажиллаж байна. Түүнчлэн бага оврын автобуснуудыг дуудлагын үйлчилгээнд шилжүүлснээр хөдөлмөрийн бүтээмж дээшилж, автомашины сул зогсолт буурч, үйлдвэрийн газрын бүтцийн нэгжүүдийн ажлыг хөнгөвчлөн, хурдан шуурхай үйлчилж байгаа. Автотээврийн цехийн автомашин, механизмыг ашиглах, засварлах хяналт тавих ажиллагааг зохион байгуулах тухай журмыг шинэчлэн боловсруулж батлуулах ажил хийгдэж байна.
-Танай цех хүнд даацын автомашинуудад тавигдах техникийн шаардлагын дагуу засвар үйлчилгээг чанартай хийж ирсэн. Энэ утгаараа засвар үйлчилгээ, хяналтын шинэ техник технологийг хэрхэн үйлдвэрлэлд нэвтрүүлж байна вэ?
-Эрдэнэт үйлдвэрийн тасралтгүй үйл ажиллагааг хангахад хүнд даацын Өөрөө буулгагч автомашинууд нь уулын цул тээвэрлэх гол ажлыг гүйцэтгэдэг тул техникийн бэлэн байдлыг ханган ажиллах нь маш чухал юм. Манай цех үйлдвэрийн үйл ажиллагааг удирдан зохион байгуулахдаа компьютерийн системийг өргөн нэвтрүүлж, хэсэг бүрийг нэгдсэн сүлжээнд холбон, ажлын үзүүлэлт, шатах тослох материалын зарцуулалт, техникийн үйлчилгээ засварын үечлэл, сэлбэг материалын зарцуулалт, ажлын цагийн тооцоо зэргийг хянах, судлах программ, тоног төхөөрөмжийг үйлдвэрлэлд нэвтрүүлэн ажиллаж байна. Тухайлбал, “Cummins” маркийн хөдөлгүүр турших, хэвшүүлэх стенд, тэжээлийн системийн эд ангиудыг шалгах, тохируулах, засварлах тоног төхөөрөмж, Герман улсын “Тип-Топ” компанийн дугуй засварын технологи, Итали, Бельги улсын тоног төхөөрөмжөөр тоноглогдсон суудлын автомашины “Авто сервис”, төрөл бүрийн маркийн автомашины бүрэн автомат угаалга, сансрын хиймэл дагуул ашиглан алсаас хянах, Австрали улсын Макромайнинг компанийн диспетчерын удирдлагын хяналтын “Питрам” систем, үүрэн холбооны сүлжээ ашиглан хянах “Автотрекер” систем, 50м3 багтаамжтай ухаалаг шатахуун түгээх станцыг суурилуулсан зэрэг шинэ техник технологи нэвтрүүлээд байна. Цаашид байгалийн хий, түлш хосолсон хөдөлгүүр бүхий авто самосвалыг үйлдвэрлэлд нэвтрүүлэх талаар ОХУ-ын компани бидэнд танилцуулсан. Энэ талаар судална. Ил уурхай дахь хөдөлгөөний аюулгүй байдал, жолоочийн нойрмоглох байдлыг илрүүлэх АНУ-ын Катерпиллер брэндийн шинэ технологийг үйлдвэрлэлд нэвтрүүлэх зорилт тавин ажиллаж байна. 
-Цаг гарган ярилцсанд баярлалаа. Танд ажлын өндөр амжилт хүсье.  
Т.Батчулуун
Фото: Б.Баттөгс

Мэдүүштэй...

1. Өнөөдөр жилийн 112 дэх өдөр. Он дуусахад 253 хоног үлдлээ.

2. Эрдэнэт хотод агаарын хэм өдөртөө +5 градус дулаан, шөнөдөө -5 градус хүйтэн, багавтар үүлтэй, салхины хурд 2-6 м/сек байна.

3. Аргын тооллын 4 дүгээр сарын 21. Ангараг гараг. Билгийн тооллын 29. Хөх морь өдөр. Өдрийн наран 5 цаг 51 минутад мандан, 19 цаг 51 минутад жаргана. Энэ өдөр бар, нохой, морь жилтнээ аливаа үйлийг хийхэд эерэг сайн. Харин хулгана, бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Дайсныг номхотгох, ад зэтгэр, муу үйлийг дарах, цэргийн ба догшин үйл хэрэг, балгас эвдэх, шинэ ноён тавих, захиран тушаах, нууц зөвлөгөөн хийх, бурханд залбирах, нөхрийг эрэх, хаад ноёд, ихэс дээдэст тангараг, амлалт гаргах, мал адгуус муулах үйлд сайн. Байр сууц тохижуулах, гэр барих, засах, морь худалдах, уралдуулах, улаан идээ авах, эм найруулах, замд гарах, бэрийн үйл, үхэгсдийн үйл, мал худалдах, арилжаа хийхэд муу. Эр хүн хэрэг чирэгдэлд холбогдохоос болгоомжил. Өдрийн сайн цаг нь морь (11:40-13:40), бич (15:40-17:40), хулгана (23:40-01:40), үхэр (01:40-03:40) болой. Хол замд явах хүмүүс баруун урд зүгтмөрөө гаргавал зохистой.Үс шинээр үргээлгэх буюу засуулахад сүнс тэнэж одох муу.

4.Дэлхийн зах зээл дээр нэг тонн зэс 5169 ам.долларын ханштай байна. (Эх сурвалж: www.lme.com)

5.Монгол банкны энэ өдрийн нэрлэсэн ханшаар АНУ-ын доллар 2783, евро 3014, БНХАУ-ын юань 393, ОХУ-ын рубль 37.6, Японы иен 25.8 төгрөгтэй тэнцэж байна.

 

Эрдэнэт үйлдвэрийн түүхэнд энэ сар...

Асуулт: -Эрдэнэт үйлдвэрийг барьж байгуулахад Орос, Монголын тал хэчнээн хөрөнгө оруулсан бэ?

Хариулт: -“Эрдэнэтийн-Овоо”-ны орд газрыг түшиглэн байгуулах уул уурхайн баяжуулах үйлдвэрийн иж бүрэн цогцолбор, нийгэм, соёлын дэд бүтцийг барьж байгуулахад 595 гаруй сая шилжих рублийн хөрөнгө оруулалтыг Зөвлөлтийн хүч хөрөнгөөр хийжээ. Энэ хөрөнгө оруулалтаас 370 гаруй сая шилжих рубль буюу 2 тэрбум орчим төгрөгийг Эрдэнэт үйлдвэр, түүний нийгэм соёлын барилга, байгууламжийг барихад зарцуулсан юм. Эрдэнэт үйлдвэрийг байгуулах тухай Монгол, Зөвлөлтийн Засгийн газар хоорондын 1973 оны хэлэлцээрийн дагуу энэ хөрөнгийн тал хувийг Зөвлөлтийн талаас оруулсан бөгөөд үлдэх хувийг нь Зөвлөлтөөс авсан зээлээр Монголын тал төлжээ. Эрдэнэт үйлдвэр 1989 он хүртэлх хугацаанд 600 орчим сая рублийн валютын цэвэр орлого оруулсан нь анхны хөрөнгө оруулалт зээлийг төлөхөд хүрэлцээтэй байв. Эрдэнэтийн цогцолборт багтаж байгаа 1,1 гаруй тэрбум төгрөгийн барилга байгууламжуудыг Монгол, Зөвлөлтийн зохих байгууллагуудад шилжүүлэн өгсөн.

(Эх сурвалж: “Монгол, Зөвлөлтийн хамтарсан уул уурхайн баяжуулах “Эрдэнэт” үйлдвэр: 100 асуулт, хариулт” номоос...)

 

Эрдэнэт үйлдвэрийн ХАБЭА-н хэлтсийн гол чиг үүргийн нэг нь хүнтэй ажиллах буюу ажилтан бүрийг аюулгүй ажиллахад сургах зорилготой. Тиймээс, долоо хоногийн ажлын тайлан мэдээлэлдээ “Хүнтэй ажиллах” гэсэн үзүүлэлтийг тусгайлан оруулж, дүгнэдэг боллоо. Ажлын байраар, ажилтнуудтай хэрхэн зөв зохистой харьцах, аюулгүй ажиллах нөхцөлийг хэрхэн бүрдүүлж байгаа болон зөвлөгөө өгөх, зөрчилтэй тохиолдолд хариуцлага тооцох зэргийг энэ үзүүлэлтээр дүгнэнэ гэж тус хэлтсийн дарга Д.Мөнхболд онцолсон. Тэгвэл, өнгөрсөн долоо хоногт ХАБЭА-н хэлтсийн мэргэжилтнүүд 13 бүтцийн нэгжийн 982 ажилтанд аюулгүй ажиллах талаар ажлын байранд нь зөвлөмж өгч ажиллажээ. Энэ үеэр аюулгүй ажиллагааны зөрчил гаргасан Баяжуулах үйлдвэрийн 5, Барилга засварын цехийн нэг ажилтанд хариуцлага тооцож, анхаарал болгоомжтой ажил үүргээ гүйцэтгэхийг сануулсан байна.

Эрдэнэт үйлдвэр, “Ковид-19” халдвараас урьдчилан сэргийлэх ажлын хүрээнд өндөржүүлсэн бэлэн байдалд хэсэгчлэн шилжсэн тул ХАБЭА-н сургалтыг танхимаар бус цахим хэлбэрээр зохион байгуулж эхэллээ. Менежментийн тогтолцооны сэдэвт цахим сургалтын эхний хичээлийг даваа гаригт Эрдэнэт телевизээр зааж буй аж.

Өнгөрсөн долоо хоногт Баяжуулах үйлдвэр, Ил уурхай зэрэг таван цех нэгжид өндөр эрсдэлтэй 60 ажлын шалгалт хийхээр төлөвлөснөөс бүрэн хэрэгжиж, галын хоёр ажилд хяналт тавин ажилласан байна. ХАБЭА-н 4 дүгээр шатны үзлэгээр Авто тээврийн цех “хангалттай” үнэлгээ авсан бол зорилтот болон ээлжит бус шалгалтад Баяжуулах үйлдвэр, Засвар механикийн завод хамрагджээ. Төлөвлөгөөт ажлуудаас сайжруулалтын чиглэлээр аюулыг мэдрүүлэх сургалтын төхөөрөмж бүтээх 18 ажил, ХАБ-ын зааврыг ажлын байранд ил тод байрлуулах 28 ажил тус тус хийгдсэн байна.

М.Балжинням

Фото: Б.Баттөгс

“Эрдэнэт” 100 хувь үндэсний үйлдвэр болж, улмаар ТӨҮГ-ын статусаар ажиллах болсноор үйлдвэрийн газрын харьяа орос эмнэлэг, цэцэрлэг, сургуульд Монгол Улсын хуулийн дагуу, батлагдсан хөтөлбөр, сургалтын программ мөрдөх шаардлага тавигдаж буй нь зүйн хэрэг. Харин Нийгмийн харилцааны хэлтэс үйлчлүүлэгчид, суралцагчид, багш ажилчдын эрх ашгийг хохироохгүй байх ямар зохицуулалт, зохион байгуулалт төлөвлөсөн талаар болон үйлдвэрийн тренд соёл, ажилчдын ёс зүйн хэм хэмжээний тухай хөндөж, тус хэлтсийн дарга Д.Өнөбаттай ярилцлаа.   
 
      
 
-Эрдэнэт үйлдвэрт Нийгмийн харилцааны хэлтэс байгуулагдсаны нэг жилийн ойн босгон дээр бид уулзаж байна. Энэ хугацаанд ямар ажлууд амжуулав? 
-Эрдэнэт үйлдвэр   ашиглалтад орсон цагаасаа нийгмийн хариуцлага үүрч Монгол улсад жишиг тогтоосон. “Эрдэнэт” маань өмчлөлийн хувьд 100 хувь үндэсний үйлдвэр болж, анх удаа ТӨҮГ болоод ажиллахдаа одоогийн удирдлагын санаачилгаар шинэ бүтэц бий болгосон нь манай хэлтэс юм. Бид нэг жилийн хугацаанд Эрдэнэт үйлдвэрийн нийгмийн хариуцлагыг дээшлүүлэх,  ажиллагсдад тулгамдаж буй асуудлуудыг судалгааны үндсэн дээр тодорхойлох, дэмжлэг, тусламж, хөнгөлөлтүүдийг зах зээлийн нөхцөлд уялдуулах, Эрдэнэт үйлдвэрийн нийгмийн хариуцлагыг улс, бүс нутаг, аймаг, орон нутаг, ажиллагсад, тэдгээрийн гэр бүл, үр хүүхдэд үзүүлэх эрх зүйн баримт бичгүүдээ шинэчлэн, төсөл, хөтөлбөрүүд боловсруулан хэрэгжүүлж эхлээд байна. 
-Өмнө нь та өөр чиглэлийн ажил хариуцдаг байсан. Сүүлийн жил нийгмийн харилцааны цогц асуудалтай тулж ажиллахад юунд илүү анхаарал хандуулах шаардлагатай санагдсан бэ? 
-Нийгмийн харилцаа гэдэг нийгмийг бүрдүүлж буй хүн хоорондын л харилцаа юм. Аж ахуйн нэгж доторх харилцаа бол хүн хоорондын албан харилцаанаас гадна соёл, ёс зүй, хэм хэмжээ, итгэлцэл дээр суурилдаг. Хүн гэдэг бие, сэтгэлийн цогц юм болохоор бүх харилцаа сэтгэлээс гарах учиртай. Харилцааг дүрэмлэж, журамлахаас илүү хүний ёс зүй,  хүмүүжил, хэм хэмжээ барих хандлага чухал юм. Эрдэнэт үйлдвэр 1978 онд байгуулагдахад Монгол улс социалист тогтолцоотой, төвлөрсөн төлөвлөгөөт эдийн засагтай байсан. 1990 оноос ардчилсан нийгэм рүү шилжин, зах зээлийн харилцаа өөрчлөлтүүдийн дунд  өнөөдрийг хүрэхдээ ажиллагсдын бүх нийтээр хүлээн зөвшөөрч хүндэтгэж ирсэн байгууллагын соёлыг бий болгосон. 
Тухайн үеийн ЗХУ-ын өнцөг булан бүрээс тэргүүний мэргэжилтнүүд ирж, монголын шилдэг сэхээтнүүдтэй хамт ажилласан, уурхайчид эх орны дөрвөн зүг, найман зовхисоос илгээлт өвөрлөн ирсэн олон соёлын уулзвар дээр манай үйлдвэрийн соёл, үнэт зүйлс бүрэлдэн тогтсон онцлогтой. Зүгээр л Горняк буюу уурхайчин гэж хэлэхэд хүний сэтгэлд гүндүүгүй, шулуун шударга, халуунд халж, хүйтэнд хөрж ажиллаж чаддаг, үг даадаг, хариуцлагатай дүр төрх буудаг. Жинхэнэ уурхайчны шинж нь тренд болтлоо хөгжсөн газар бол Эрдэнэт хот, Эрдэнэт үйлдвэр. 
-Гэтэл одоо ямар асуудал байна?
-Ихэнхдээ зоосны нүхээр хардаг, ашиг хонжоо тооцдог болсон зах зээлийн нийгэмд шилжихэд сайн, муу тал бий болсон. Байгууллагын соёл, ажилчдын  ёс зүй урьд өмнөхөөсөө өөрчлөгдөж, одоогийн залуусын хандлага тэр үеийнхээс өөр болж байгаа нь ажиглагдаж байна. Хүний жудаг, ёс зүй, мөн чанар алдагдаж байгаа нь бэрхшээлийг бий болгож байгаа юм. Бид хүлээн зөвшөөрөгдсөн байгууллагын соёл, үнэт зүйлээ ажилчдын харьцаагаар дараа дараагийн үедээ дамжуулан нийгмийн харилцаанд оруулж хадгалж үлдэх ёстой. Энэ хамгийн чухал. Эрдэнэт үйлдвэрийн 6700 гаруй ажилтан нэг баг. Бие биеэ ойлгож, байгууллагын үнэт зүйл соёлыг хадгалан, хөгжүүлж, зөв тогтолцоо, хөдөлмөрийн зөв хамт олон бүрдэхэд үйлдвэрлэлийн болоод эдийн засгийн зорилгууд бүрэн биелэхэд чухал нөлөөтэй. Мэргэжил, боловсролоос дутахааргүй үнэ цэнэ бол хүнлэг чанар, ёс суртахуун, харилцаа хандлага, хариуцлагад л оршдог. Энэ чиглэлд бид анхаарах цаг болсныг өнгөрсөн хугацаанд мэдэрч, өдөр бүр бэрхшээлтэй тулж ажиллалаа. Ер нь Эрдэнэт үйлдвэрийн ажилчдын соёл, ёс зүй хүмүүжил, энэ хотын ёс зүй, соёлыг бүрдүүлдэг юм шүү дээ.  
-Тэгвэл нэн түрүүнд ажилчдын сэтгэлгээ, хандлагыг өөрчлөх чиглэлд ахицтай ажиллах хэрэгтэй юм байна... 
-Бид бүх асуудлыг ойлгомжтой, энгийн, шударга зарчмаар явуулах эрх зүйн болоод дотоод баримт бичгүүдээ боловсруулаад мөрдөн ажиллаж байна. Одоо ажиллагсад маань ёс зүйтэй, хариуцлагатай шударга, хүнлэг байвал асуудал үүсэхгүй. Эрдэнэт үйлдвэртэй гэрээ байгуулж ажилтан болсон бол уламжлалт нэр хүнд, трендийг хадгалж явах хариуцлагыг үүрэх нь ажилтны үүрэг. Эрдэнэт үйлдвэр ажиллагсдадаа чиглэсэн бодлого өргөн хүрээнд явуулдаг. Энэ бол хариуцлага. Жишээ нь ажилтны хүүхэд төрж, эцэг болсон тохиолдолд тав хоногийн цалинтай чөлөө олгож байна. Эмэгтэйчүүдэд гурван жил тэтгэмж өгч байгаа. Эндээс эхлээд тэр хүүхэд уурхайчны гэр бүлд төрснөөрөө ихэнх зардлаа даалгаад цэцэрлэгт хамрагдаж, сургуульд явж байна, төгсөөд их, дээд сургуульд элсэн суралцахад нь тусламж дэмжлэг үзүүлж байна. Сургуулиа төгсөж ирээд аав, ээжийнхээ оронд Эрдэнэт үйлдвэрт ажилд орох давуу эрх олгож байна. Эрдэнэт үйлдвэрт ажиллах хугацаандаа бүхий л тусламж, дэмжлэгийг хүртдэг. Нас нь болоод гавьяаны амралтад гарахад нь улсын хэмжээнд олгодог тэтгэвэр дээр нэмэлт Эрдэнэт үйлдвэрийн тэтгэвэр тогтоож өгдөг. Ирсэн болгон буцдаг хорвоогийн жамаар явахад нь уй гашууг нь хуваалцаж буцалтгүй тусламж олгодог. Ингээд төрөхөөс үхэх хүртэлх бүх асуудалд Эрдэнэт үйлдвэр дэмжлэг үзүүлдэг. Тиймээс Эрдэнэт үйлдвэр ажилчдаасаа энэ хэрийн хариуцлага нэхэх эрхтэй. Ажилчид ч тэр хэмжээний хариуцлага үүрч, үйлдвэрийнхээ нэр хүндийг өргөж явах учиртай. Бид ямар нэгэн тусламж, дэмжлэгийг ажилчдад дүрэм журмын дагуу үзүүлдэг. Гэтэл зарим тохиолдолд санаатайгаар худал өргөдөл өгөх, буруу мэдээлэл гаргах, боломжгүй зүйл хүсэх, бодсон санасан нь биелэхгүй бол ташаа мэдээлэл цацах, тусламж дэмжлэг үзүүлдэг ажилтнуудын нэр хүндэд халдах, хэн нэгэнтэй барьцах зэргээр зарим үед ажилд хүндрэл учруулдаг. Батлагдсан хязгаарлагдмал нөөц бололцоогоор тусламж, дэмжлэг үзүүлдэг гэдгийг уурхайчид маань ойлгох хэрэгтэй. Хамт олон шинэ ажилтныг хүмүүжүүлж, Эрдэнэт үйлдвэрийн соёл, ёс зүйн хариуцлагын  хэмнэлд оруулж авч явах ёстой юм. Энэ чиглэлд нийт хамт олон Үйлдвэрчний эвлэлээр хамтарч ажилладаг билээ.
-Ярианы сэдвээ өөрчлөөд асуухад Эрдэнэт үйлдвэр ТӨҮГ болсноор орос эмнэлэг, цэцэрлэг, сургуулийн үйл ажиллагаанд өөрчлөлт орж байна уу? 
-Хамтарсан үйлдвэр байх үед орос эмнэлэгт олгогдсон зөвшөөрөл зогссон. Орос цэцэрлэг, орос сургуулийн хувьд зайлшгүй Монгол Улсын хуулийн дагуу батлагдсан хөтөлбөр, сургалтын программаар үйл ажиллагаа явуулах шаардлага тавигдсан. Бидний зүгээс Орхон аймгийн анхны сургуулийнхаа 45 жил тогтсон үйл ажиллагааг ямар нэгэн өөрчлөлтгүй үргэлжлүүлэхийг эрмэлзэж, холбогдох бүх шатанд нь явж хөөцөлдсөн. Эцэст нь Монгол Улсын хуулийг мөрдөж, ажиллах ёстой гэдэг хариулт авсан. Энэ нь харин ч бидэнд илүү давуу боломж нээгдэх юм байна гэж харсан. Аж ахуйн нэгжийн хувьд ч, суралцагчид болон багш, ажилчдын хувьд ч тэр.  
 
 
-Орос Эмнэлэг, цэцэрлэг, сургууль бүгд “монгол” болно гэсэн үг үү? 
-Шууд тэгж ойлгож болохгүй. Эмнэлгийн хувьд орос мэргэжилтнүүдэд үйлчилгээ үзүүлэх тасаг хэлбэрээр сувиллын бүрэлдэхүүнд байж болох нэг хувилбар бий. Эсвэл сувилал маань нэгдсэн эмнэлэг болоод хэвтэн эмчлүүлэх тасаг нь болж явах боломжтой. Энэ хоёр хувилбар дээр ярилцаж байна. Бид бол хэвтэн эмчлүүлэх эмнэлэг хэлбэрээр ашиглах саналтай. Тавигдах шалгуур үзүүлэлтүүдийг нь ханган ажиллах боломжтой гэвэл энэ статусыг өгнө гэсэн аймгийн Засаг даргын захирамж гарсан. Бид Орхон аймагтай хамтарч ажиллах 2020 оны төлөвлөгөөндөө энэ ажлыг тусгасан байгаа. Цэцэрлэгийн хувьд, монгол цэцэрлэгийн сургалтын хөтөлбөр байдаг. Хоёр настай хүүхдүүд аваад зургаан нас хүртэл сургаад сургуульд үддэг. Энэ хөтөлбөрөөр ажиллахад манайх татгалзах зүйлгүй. Гэхдээ орос хэлний гүнзгийрүүлсэн сургалттай цэцэрлэг хэвээр байна. 
 
 
-Орос сургуулийн хувьд...? 
-Орос сургуулийн бүх хичээл орос дээр явагддаг, нууцгүй хэлэхэд орос сургууль төгссөн хүүхдүүд монгол хэл, өөрийн улс орны түүх, соёлоо мэдэхгүй, монголын боловсролын гэрчилгээ авдаггүй, зарим тохиолдолд эцэг эхчүүд хүүхдээ төгсөх ангид нь монгол сургууль руу шилжүүлж монгол гэрчилгээ авдаг байсан. Төгслөө гэхэд хүүхдүүд Хиагтад очиж шалгалт өгч орос гэрчилгээ авдаг. Тэр гэрчилгээгээр монголын их, дээд сургуульд элсэхэд оросууд 5 баллын системээр дүгнэдэг, манайх 100 баллын системээр дүгнэдэг учраас харьцуулж тооцоход хүүхдүүд хохирдог. Өөрөөр хэлбэл 5 баллыг нь 100-аар биш 90-ээр тооцдог юм. Түүнээс гадна Орхон аймагт байгаа орос хэлний сургалттай ганц сургууль болохоор бусад сургуультай хамтран ажиллах, суралцагчид нь бусад сургуулийн хүүхдүүдтэй нээлттэй харилцах боломж хязгаарлагдмал байсан. Одоо орос сургууль гэдэг нэр нь өөрчлөгдөж байгаа ч орос багш нар нь хэвээрээ, анги хамт олон нь хуучнаараа үлдэнэ. Монголын боловсролын хуулийн дагуу монголын түүх, уран зохиол, хэл бичгээ үзээд, орос хэл дээр бүх хичээлээ гүнзгийрүүлж сураад төгсөнө. Ерөнхий боловсролын монгол гэрчилгээ авна. Мөн оросын гэрчилгээ авах эрх нь нээлттэй.  
 
 
-Орос сургуулийн байгалийн ухааны хичээлүүдийн сургалт сулхан гэсэн шүүмжлэл байдаг. Одоо тэгвэл аль ч талаа алдагдуулахгүй “хос морьтой” сурч хөгжих боломж бүрдсэн гэсэн үг үү? 
-Зөв хэллээ. Өмнө нь орос сургуулийн математик, хими, тэгээд байгалийн ухааны хичээлүүдийн сургалтын чанар монгол сургуулиудын түвшинд хүрэхгүй байна гэсэн гомдол ирж байсан. Сургалтын программд өөрчлөлт орсны дараа илүү чадварлаг, мэргэжлийн багш нарыг ОХУ-аас урьж ажиллуулахад анхаарна. Монгол багш нараар нэмэлт давтлага өгүүлж, сургалтын амжилтыг бататгах, таны хэлдгээр хүүхдүүдээ монгол, орос сургалтын системээр “хос морьтой” хөгжүүлэх сонирхол бидэнд байна. 
-Орос сургуульд суралцахын бас нэгэн давуу тал нь В.Путины тэтгэлэгт хамрагдах, ОХУ-ын дээд сургуулиудад элсэх боломж байдаг. Энэ яах бол...?
-Хадгалагдаж үлдэнэ. Бүх орос багш нар нь хэвээр ажиллана. Бүтэц бүрэлдэхүүнд өөрчлөлт орохгүй. Монгол Улсын хуулийн дагуу зөвхөн сургалтын хөтөлбөрт өөрчлөлт орно. Бага ангийн хүүхдүүдийн “Үдийн цай” хөтөлбөрийн зардлыг Эрдэнэт үйлдвэр санхүүжүүлдэг байсан бол одоо улсын төсвөөс өгнө. Цэцэрлэгийн хувьд ч ялгаагүй. Дашрамд хэлэхэд энэ жил 11-р ангийн хүүхдүүд сургуулиа асуудалгүй төгсөнө. Дараа жилээс дүйцүүлэх сургалт явуулж зарим хичээлийг нөхнө. 
-Орос сургууль, цэцэрлэгийн төлбөр өөрчлөгдөх үү? 
-Төлбөр нэмэх талаар төлөвлөөгүй. Сургууль дээр 1, 2-р ангийн төлбөртэй өдөр өнжүүлэх бүлэг ажиллаж байсан. Өдөр өнжүүлэх бүлгийг дөрөвдүгээр анги хүртэл ажиллуулах, өдрийн заасан хичээлийг нь бататгаад, тэнд нь хоол, бусад зүйлсээр хангаж, сургалтыг илүү үр дүнтэй явуулах үүргийг орос сургуулийн захиргаанд өгсөн. ОХУ-аас нэмж багш урьж авчирвал ямар вэ гэсэн бодол бий. Цэцэрлэгийн хувьд нэмж шинэ цэцэрлэг барих ажил төлөвлөгөөнд суулгасан. Гэхдээ зэсийн үнийн уналт, корона вирусын халдварын үеийн нөхцөл байдлаас шалтгаалаад тэр төсөл түр царцсан байдалтай байгаа. Энэ жил үгүй юмаа гэхэд ирэх жил шинэ цэцэрлэг ашиглалтад орно. 
-Цаг зав гаргаж ярилцсан танд баярлалаа.   
М.Одгэрэл
Фото: Б.Баттөгс
 
“Комбинат”, “Эрдэнэт” өртөөг холбодог гол гармын авто замтай огтлолцсон хэсэгт зам төмөр тасарсныг өнгөрсөн долоо хоногт Тээвэр ложистикийн төвийнхөн  заслаа. Уг гэмтлийг Зам засварын Ө.Буянхишиг мастертай 12 замчин уртасгасан цагаар ажиллаж засварлав. Энэ хүрээнд 25 м-ийн урттай хоёр зам төмөр, 50 дэр модыг сольжээ. Түүнчлэн энэ орчны үерийн усны суваг шуудуу сэргээх, авто замд   хурд сааруулагч хийх ажлыг Барилга засварын цехийн ажилчид гүйцэтгэлээ. Энэ үеэр гарам хааж, хөдөлгөөнийг 24 цаг зогсоосон бөгөөд Эрдэнэт үйлдвэрийн төмөр замын тээврийг хэвийн явуулахын тулд тус төвийн хоёр илчит тэрэг “Комбинат”, “Эрдэнэт” өртөөн дээр ажиллаж, салбар замууд руу ачаа тээвэрлэсэн байна. Авто замыг 72 цаг хааж, ирэх мягмар гарагийн 08 цагт нээхээр болжээ. Энэ ажилд замчдаас гадна Барилга засварын цех, Автотээврийн цехийн хүн хүч, техник ажиллалаа.  40 гаруй жил ашиглахдаа гармын энэ хэсгийг  засаж  байгаагүй бөгөөд 2021 онд засварлахаар хөрөнгө оруулалтын төлөвлөгөөнд тусгасан байжээ. Ийнхүү авто замтай огтлолцсон төмөр замын гарамд гарсан томоохон гэмтлийг тус төвийнхөн богино хугацаанд өөрсдийн хүчээр засаж, ажилд оруулснаар багагүй хөрөнгө, мөнгө хэмнэв. 
Я.Энхтуяа
Фото: Б.Баттөгс

Мэдүүштэй...

1. Өнөөдөр жилийн 111 дэх өдөр. Он дуусахад 254 хоног үлдлээ.

2. Эрдэнэт хотод агаарын хэм өдөртөө + градус дулаан, шөнөдөө - градус хүйтэн, үүлшинэ, салхины хурд 1-6 м/сек байна.

 

3. Аргын тооллын 4 дүгээр сарын 20. Сумъяа гараг. Билгийн тооллын 28. Харагчин могой өдөр. Өдрийн наран 5 цаг 53 минутад мандан, 19 цаг 49 минутад жаргана. Энэ өдөр үхэр, тахиа, могой, нохой жилтнээ аливаа үйлийг хийхэд эерэг сайн. Харин гахай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Хишиг даллага авах, сан тавих, лус ба тэнгэр тахих, тахилга хийх, сүм хийд босгох, хөрөнгө исгэх, архи нэрэх, хурим хийх, тариа тарих, гэр байшин барих, хот байгуулах, мал гадагш гарах, нүүдэл хийх, цэрэг хөдөлгөх, зээл авах, насны хүчийг арвижуулах, усан засалд сайн. Мод таслах, газар малтах, ус хааж бөглөх, эм найруулах, бэрийн үйл, худалдаа хийх, заргалдах, морь худалдах, эхэлж ном сонсох, замд гарах, шинэ хувцас өмсөх, эд юм өгөхөд муу. Өдрийн сайн цаг нь гахай (21:40-23:40), үхэр (01:40-03:40), луу (07:40-09:40), морь (11:40-13:40), хонь (13:40-15:40), нохой (19:40-21:40) болой.Хол замд явах хүмүүс урд зүгтмөрөө гаргавал зохистой.Үс шинээр үргээлгэх буюу засуулахад хэрүүл, тэмцэл ирнэ.

4.Дэлхийн зах зээл дээр нэг тонн зэс 5098.50 ам.долларын ханштай байна. (Эх сурвалж: www.lme.com)

5.Монгол банкны энэ өдрийн нэрлэсэн ханшаар АНУ-ын доллар 2781, евро 3039, БНХАУ-ын юань 393, ОХУ-ын рубль 37.6, Японы иен 25.8 төгрөгтэй тэнцэж байна.

Эрдэнэт үйлдвэрийн түүхэнд энэ сар...

2015 оны 4-р сар

  • Монгол Улсын Засгийн газар, Монголын Үндэсний Худалдаа, аж үйлдвэрийн танхим жил бүр уламжлал болгон зохион байгуулдаг “ТОП-100” аж ахуйн нэгжийг Эрдэнэт үйлдвэр 13 дахь жилдээ тэргүүлэв.

2017 оны 4-р сар

  • Шинэ Зеландын Оклэнд хотноо болсон Дэлхийн мастеруудын спортын наадамд 105 орны 28 мянган тамирчин спортын 28 төрлөөр өрсөлдсөнөөс Эрдэнэт үйлдвэрийн “Хангарьд” спорт клубын тамирчин, ОУХМ Ч.Тэрбиш, спортын мастер Л.Наран, Ц.Оюунцэцэг нар 4х400 м-ийн гүйлтийн төрлийн 50-54 насны ангилалд мөнгөн медаль хүртэв.
  • МҮХАҮТ-аас шалгаруулдаг “ТОП-100” аж ахуйн нэгжийг “Эрдэнэт үйлдвэр” ХХК 15 дахь жилдээ тэргүүллээ.

“Ковид-19” халдвараас урьдчилан сэргийлж, үйлдвэрийн газрыг гамшгаас хамгаалах өндөржүүлсэн бэлэн байдлын зэрэгт шилжүүлсэнтэй холбогдуулан хөдөлмөрийн аюулгүй байдал, эрүүл ахуйн сургалтыг цахим хэлбэрээр зохион байгуулах тухай тушаал гарсан. Үүний дагуу үйлдвэрийн газрын ажилтнуудад зориулсан ХАБЭА-н сургалтыг цахим хэлбэрт шилжүүлэх бэлтгэл хангагдаж буйг “Эрдэнэт цогцолбор” дээд сургуулийн сургалтын мэргэжилтэн О.Баярбат ярилаа.

Цахим хичээлийг хөдөлмөрийн аюулгүй байдал, эрүүл ахуйн сургагч багш нар болон үйлдвэрийн Олон нийттэй харилцах албаны “Эрдэнэт” телевиз хамтран зохион байгуулна. Ирэх даваа гаригт эхлэх ХАБЭА-н ISO 45000-1 2018 стандарт, Менежментийн тогтолцооны хичээлийн хөтөлбөр цахим хэлбэрт шилжиж, бэлэн болсон байна. ХАБЭА-н сургалтад хамрагдах ажилтнуудыг үйлдвэрийн Ерөнхий захирлын нэгдүгээр орлогч бөгөөд Ерөнхий инженерийн баталсан сургалтын нэгдсэн хуваарийн дагуу ажлаас нь чөлөөлж, цахим хичээлд оролцох нөхцөл боломжоор хангахыг холбогдох цех нэгжийн удирдлагуудад үүрэг болгожээ. 

М.Балжинням

Фото: Б.Баттөгс

“Эрдэнэт цогцолбор” дээд сургуулийн Эрчим хүч, мэдээллийн технологийн тэнхимийн дэд профессор Б.Хээрийнбаатар тэргүүтэй цахилгааны лабораторийн багш, оюутнууд аюулыг мэдрүүлэх 12 төрлийн төхөөрөмж хийж, туршилтаар суурилуулаад байна. Энэ нь өнгөрсөн 1 дүгээр сард ХАБЭА-н хэлтсээс хагас жилийн хугацаатай зарласан аюулыг мэдрүүлэх тоног төхөөрөмж хийх уралдааны хүрээнд хийгдсэн ажил юм. Уралдааны зорилго, үр дүнгийн талаар ХАБЭА-н хэлтсийн сайжруулалтын мэргэжилтэн Л.Батгэрэл ярихдаа “Өөрсдийн  үлгэр дуурайллыг нэмэгдүүлэх, нөгөө талаас аюул эрсдэлийг арилгахад бодитой ажил хийх зорилгоор үйлдвэрийн удирдах болон инженер техникийн ажилтнуудын дунд хөдөлмөрийн аюулгүй байдлын амлалт авах үйл ажиллагааг зохион байгуулсан. Үүний хүрээнд, аюулыг мэдрүүлэх тоног төхөөрөмж хийх болзолт уралдаан зарлаж, эхний улирлын байдлаар ажлын явцтай танилцлаа. Өнөөдрийн байдлаар цехүүдийн хэмжээнд 18 тоног төхөөрөмж 50-100 хувийн биелэлттэй суурилагдсан байна. Эдгээрээс хамгийн өндөр түвшинд хэрэгжиж, үр дүнгээ өгч байгаа нь “Эрдэнэт цогцолбор” дээд сургуулийн багийнхны ажил боллоо” гэж дүгнэв. 

Цахилгааны аюулыг мэдрүүлэх төхөөрөмжийг бодитоор хийнэ гэвэл үзүүлэн нь өөрөө аюултай болох талтай. Тиймээс бид бага хүчдэлээр, лед гэрэл ашиглан орлуулах аргаар хийсэн. Цаашид үргэлжлүүлэн туршиж, аюулыг мэдрүүлэх төхөөрөмжийн гарын авлага гаргана гэж дэд профессор Б.Хээрийнбаатар онцоллоо.

М.Балжинням

Фото: Б.Ялалт

 
 

Төгссөн сургууль:

Монгол Улсын Боловсролын их сургуулийн харьяа БТДС-ийг 2000 онд төгссөн.

Мэргэжил:

Биеийн тамирын багш

Ажилласан туршлага:

2000-2001 онд “Мон-Алтиус” БТДС-д багш, 2001-2003 онд Хүндийн өргөлтийн тамирчин, 2004 оноос Орхон аймгийн 10 жилийн 7-р сургуульд багш, 2007 оноос “Эрдэнэт үйлдвэр” ТӨҮГ-ын Спорт цогцолборт хүчний дасгалжуулагч, 2009 оноос арга зүйчээр ажиллаж байна.

Мэргэжил дээшлүүлсэн байдал:

2006 онд МҮОХ-ны сургалтад хамрагдаж Хүндийн өргөлтийн дасгалжуулагч, 2012 онд “Бээжин” БТДС-д Спортын дасгалжуулагч, 2015 онд “УБ-Мандала” иог, эрүүл амьдрах төвд иогийн багшаар, 2017 онд “УБ-Самадхи” иогийн сургуульд Эмчилгээний иогоор анхан, гүнзгийрүүлсэн шат, 2019 онд “УБ-Самадхи” иогийн сургуульд Иога нидра, жирэмсний иогийн багшаар тус тус суралцсан. 

Чин хүсэл:

Олон олон хүмүүсийн амьдралын хэв маягийг өөрчлөн эрүүл аж төрөх, зөв дадал хэвшүүлж, эрүүл чийрэг болгох туйлын хүсэлтэй.

-Та өглөөг хэрхэн эхлүүлдэг вэ?

-Сайхан бүхний эхлэл шинэ өглөөг сайнаар үргэлжлүүлэх нь эрхэм хүмүүн бид өөрсдөө билээ. Тиймээс эрүүл мэнддээ анхаарч бүлээн усаа ууж, өглөөний цайгаа ямар ч үед уухыг эрхэм болгодог. Өглөө ажилдаа ирээд чийрэгжүүлэх ажил маань эхэлдэг. Өглөө эртлэн намайг зорин ирж өөрсдийн эрүүл мэндээ даатган, надад итгэн бүх л зовлон жаргалаа тоочин суугаа эрхэм шавь нараараа хүрээлүүлэн, тэднээсээ урмын сайхан үг сонсож, эрүүлжин, өдрөөс өдөрт өөрчлөгдөж байгааг нь харан баясаж, бахархаж, талархан явдаг даа.

Таны амьдралын сэргээш юу вэ?

-Эрхэм сайхан хүмүүс болох ээж, гэр бүл үр хүүхдүүдээсээ, намайг зорин ирдэг эрхэм хүндэт шавь нараасаа, ажлын хамт олноосоо эрч хүчийг мэдрэн, байгалийн үзэсгэлэнт зураг харж, сайхан аялгуу сонсож бясалгал хийж сэргэдэг.

Хийж байгаа ажлын тань онцлог юу вэ?

-Олон сайхан хүмүүсээр хүрээлүүлж, тэднийгээ өдрөөс өдөрт эрч хүчтэй, урам зоригтой байгааг харан, өөрийн мэдэх, чадах бүхнээ харамгүй зааж зөвлөн, ээж шиг нь, эгч шиг нь, дүү шиг нь, найз шиг нь, заримдаа бүр эмч шиг байлгадаг тэднээрээ бахархан, эрч хүч авдаг. Магадгүй, энэ бүхэн миний ажлын онцлог юм болов уу.

-Та ойрын хугацаанд ямар ажил амжуулахаар төлөвлөж байна вэ?

-“Эрдэнэт үйлдвэр” ТӨҮГ-ын баялаг бүтээгч уурхайчдын арын албанд ажилладаг оффист олон цагаар, суугаа ажил эрхэлдэг ажилтнууддаа зориулан “Суугаа ажил нь ажилтны эрүүл мэндэд нөлөөлөх уршиг, хамгаалах арга зам”-ын талаар зөвлөмж гарган тараахаар бэлдэж байна. Тэднийг ажлын байрандаа 5 минут ч болов өөртөө цаг гарган дасгал хийж, цаашлаад 7 хоногт 2 удаа ч болсон идэвхтэй дасгал хөдөлгөөн хийж, спортоор хичээллэн бие махбодоо эрсдэлээс хамгаалан, амьдралын хэв маягаа өөрчлөн өөрсдийгөө болон гэр бүлдээ анхаарлаа хандуулаасай гэж хүсэж байна. Эрүүл чийрэг байхаас гадна амьдралын зөв дадал хэвшилтэй болсноор ажлын бүтээмж өндөр, эрч хүчтэй байна шүү дээ.

-Ажлаа илүү сайн хийхийн тулд та өөртөө ямар зорилго тавьж хувь хүнийхээ хөгжилд анхаардаг вэ?

-Цаг үетэйгээ хөл нийлүүлэн алхаж, мэргэжилтэй минь холбоотой шинэ сургалт, сурталчилгаа хаана байна, тэр бүхэнд хамрагдаж өөрийгөө хөгжүүлэн, ажил амьдралдаа хэрэгжүүлэхийг хүсэн эрмэлздэг. Тиймдээ ч өнөөдөр энэ ажлыг хийж байна. Заримдаа өөрийгөө гайхдаг. Гэнэт л иог сонирхож, иогийн багш болсондоо хэдий мэргэжил минь багш ч гэсэн...  Ойр тойрны хүмүүс бас гайхдаг төмөр өргөж явсан бүдүүн хадуун байсан хүн нэг л өдөр Иогийн багш болж уян налархай болохыг хичээж яваад. Гэхдээ одоо энэ өндөрлөгөөс харахад би өөртөө маш их баярладаг, яагаад гэвэл Иогийн багш болсноороо олон хүний амьдралд, эрүүл мэндэд, зан чанарт , харах өнцөгт нь нөлөөлж чадсан даа. Анх, иогийн багш болоход минь бэрхшээл тулгарч байсан, гэхдээ шантралгүйгээр хамтын гэрээний дагуу цалинтай чөлөө, цалингийн зээл аваад сурч байсан. Тэрнээс хойш тасралтгүй иогийн ямар сургалт байна, тэр бүхэнд л сурч боловсрохыг хичээдэг.

-Өөртөө хэвшүүлэхээр зорьж буй шинэ зүйлээсээ хуваалцаач, Таны хобби сонирхол юу вэ?

-Чөлөө зав гарвал хэрээсэн оёдлоор хатгамал оёх, шигтээ наадаг байсан. Охиноо төрүүлснээс хойш охиндоо өөрийн гараар хөөрхөн хувцас оёж өмсүүлэх гээд оёдлын сургалтад сууж, оёдлын машин авч өөрийнхөө хэмжээнд оёдолчин болохыг хичээж явна. Хөгжим сонсох, агаарт алхах, онч үгс унших.

-Таны амьдралдаа авч байсан хамгийн сайн зөвлөгөө?

-Зөвлөгөө гэхээсээ илүү би ээжийнхээ ажил амьдралдаа тууштай, тэвчээртэй, хөдөлмөрч, цаг баримталдаг, өрөөлд тус дэмтэй байхыг хичээдэг сайхан зан чанарыг үргэлжлүүлэн амьдрахыг хичээдэг. Сэтгэлтэй хүн дээр гэрэл илүү тусдаг, зүтгэлтэй хүнийг амжилт үргэлж дагадаг гээд л зүтгэдэг.

-Залуу үеийнхэнд хандан юу хэлэх вэ?

-Зөв хандлага, зөв сэтгэлтэй, амьдралын зөв дадал хэвшилтэй байж, цаг ямагт өөрийгөө хөгжүүлэн, эрүүл чийрэг амьдарцгаая.

Мэдүүштэй...

1. Өнөөдөр жилийн 108 дэх өдөр. Он дуусахад 257 хоног үлдлээ.

2. Эрдэнэт хотод агаарын хэм өдөртөө +15 градус дулаан, шөнөдөө -1 градус хүйтэн, үүлшинэ, салхины хурд 1-6 м/сек байна.

3. Аргын тооллын 4 сарын 17. Сугар гараг. Билгийн тооллын 25. Цагаан бар өдөр. Өдрийн наран 5 цаг 59 минутад мандан, 19 цаг 45 минутад жаргана. Энэ өдөр Морь, нохой, тахиа, хонь жилтнээ аливаа үйлийг хийхэд эерэг сайн. Харин бич, туулай, бар жилтнээ сөрөг муунөлөөтэй тул элдэв үйлд хянамгай хандаж, биеэ энхрийлүүштэй. Замд гарах, тариалан тарих, үхэгсдийн үйл, худалдаа хийх, лам болох, хурим хийх, эрдэм сурах, бэрийн үйл, хот тосгоны суурь тавих, бурхан шүтээн, орон гэрийг равнайлах, тооцоо хийх, мэргэ төлгө тавих, цэрэг хөдөлгөх, сайн үйлс үүсгэх, баясгалангийн хурим, газар хагалж тариа тарих, шинээр хувцас эсгэх, өмсөх, чимэг зүүх, бүжиг наадам үйлдэхэд сайн. Цацал өргөх, эм найруулах, худаг малтах, эд хөрөнгө зээлдүүлэх, нэхэх, нүүдэл хийх, боол шүтүүлэхэд муу.Өдрийн сайн цаг нь нохой (19:40-21:40), хулгана (23:40-01:40), үхэр (01:40-03:40), луу (07:40-09:40), хонь (13:40-15:40) болой.Хол замд явах хүмүүс урд зүгтмөрөө гаргавал зохистой.Үс шинээр үргээлгэх буюу засуулахад нүд бүрэлзэн улцайна хэмээжээ.

4.Дэлхийн зах зээл дээр нэг тонн зэс 5098.50 ам.долларын ханштай байна. (Эх сурвалж: www.lme.com)

5.Монгол банкны энэ өдрийн нэрлэсэн ханшаар АНУ-ын доллар 2781, евро 3039, БНХАУ-ын юань 393, ОХУ-ын рубль 37.6, Японы иен 25.8 төгрөгтэй тэнцэж байна.

Эрдэнэт үйлдвэрийн түүхэнд энэ сард...

2005 оны 4-р сар

  • Х.Наранхүү “Эрдэнэт үйлдвэр” ХХК-ийн Ерөнхий захирлаар улиран томилогдов.

2010 оны 4-р сар

  • “Эрдэнэт үйлдвэр” ХХК-ийн Баяжуулах фабрикийн үндсэн баяжуулалтын III секцийг шинэчлэх ажлын хүрээнд зэс, молибдены хүдэр баяжуулах дэвшилтэт техник технологид нийцсэн шинэ тоног төхөөрөмжийг суурилуулан ашиглалтад оруулжээ.
  • Эрдэнэт үйлдвэрийн Зөвлөлийн XXXXIII хуралдаанаар “Эрдэнэт үйлдвэр” ХХК-ийг 2015 он хүртэлх хугацаанд хөгжүүлэх стратегийн үзэл баримтлалд нэмэлт өөрчлөлт оруулж, Эрдэнэт үйлдвэрийг 2020 он хүртэлх хугацаанд хөгжүүлэх концепцийг хэлэлцэн баталжээ.
  • УИХ “Зэсийн баяжмал хайлуулах, боловсруулах үйлдвэр байгуулах тухай” тогтоол гаргав.

Мэдээний төрөл

Календарь

« 5-р сар 2020 »
Да Мя Лх Пү Ба Бя Ня
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Зургийн цомог