Цахим хуудас

Цахим хуудас


Notice: Undefined property: JObject::$description in C:\inetpub\wwwroot\erdenettoday\templates\ts_newsline\html\com_k2\templates\default\user.php on line 59
Цахим шуудан: This email address is being protected from spambots. You need JavaScript enabled to view it.

    Монгол Улсын Эрчим хүчний сайдын тушаалаар 2019 оныг “Ухаалаг эрчим хүч”-ний жил болгон зарласантай холбогдуулан “Эрчим хүч-математик загварчлал” сэдэвт бүтээлийн уралдааныг Эрдэнэт үйлдвэрийн нийт ажилтнуудын дунд зарлалаа. Уралдаанд ирсэн бүтээлүүдээр Соёл урлагийн цогцолборт үзэсгэлэн гаргах бөгөөд шалгарсан бүтээлүүдэд үйлдвэрлэлд нэвтрүүлэх эрхийн гэрчилгээ олгох юм. Түүнчлэн үйлдвэрлэлийн цех, нэгжүүдэд шинийг санаачлан нэвтрүүлж буй арга шийдэл, техник технологи, тоног төхөөрөмжийг нийтэд сурталчлах, ажилтнуудын техникийн болон шинжлэх ухааны боловсролыг хөгжүүлэх, туршлага судлуулах, бүтээлч шинийг эрэлхийлэгч ажилтныг урамшуулахад энэхүү уралдааны зорилго оршиж байна. Уралдаанд ирсэн бүтээлүүдийг 2020 оны нэгдүгээр сард шалгаруулах аж.

                                                                                                                          Т.ЧУЛУУН

    Хөнгөн атлетикийн ахмад мастеруудын Ази тивийн аварга шалгаруулах 21 дэх удаагийн тэмцээн Малайз улсын Саравак хотноо таван өдрийн турш явагдаж өндөрлөлөө. Энэхүү тэмцээний 4х100 метрийн зайд Эрдэнэт үйлдвэрийн Чанарын хяналтын хэлтсийн ажилтан, Хангарди спорт клубийн тамирчин ОУХМ Ч.Тэрбиш хүрэл медаль хүртлээ. Мөн спортын мастер А.Цогзолмаа мөнгө, хүрэл медалийн эзнээр тодорчээ. Тус тэмцээнд 29 орны 3000 гаруй тамирчин хурд, хүч, авхаалж самбаагаа сорин өрсөлдсөн бөгөөд  Монголын баг тамирчид найман алт, 15 мөнгө, 13 хүрэл медаль хүртсэн байна. Хоёр жилд нэг удаа явагддаг дараагийн тэмцээнийг 2021 онд Индонез улсын Жакарта хотод зохион байгуулахаар болжээ.

Т.Батчулуун

Орхон аймаг дахь Цагдаагийн газрын Гэр бүлийн хүчирхийлэл, хүүхдийн гэмт хэргээс урьдчилан сэргийлэх ахлах мэргэжилтэн, цагдаагийн ахлах дэслэгч Г.Эрдэнэбаяртай ярилцлаа.

     -Хүүхэд хамгааллын чиглэлээр болон хүүхдэд чиглэсэн, хүүхдийг гэмт хэрэг, зөрчлөөс урьдчилан сэргийлэх талаар ямар, ямар ажил арга хэмжээг зохион байгуулж байна вэ?

    -Орхон аймаг дахь Цагдаагийн газраас 2019 онд Засгийн газарт чиглэл өгөх, 2019-2020 оныг Хүүхдийн хөгжил, хамгааллын жил болгох тухай МУ-ын Ерөнхийлөгчийн 2019 оны 60 дугаар зарлиг, МУ-ын ЗГ-ын 2017 оны 270 дугаар тогтоолоор батлагдсан Хүүхэд хөгжил хамгааллын үндэсний хөтөлбөр, МУ-ын ЗГ-ын 2018 оны Хүүхдийн эрх аюулгүй байдлыг хангах тухай 01 албан даалгаврын хэрэгжилтийг хангах зорилгоор хариуцсан нутаг дэвсгэртээ хүүхэд хамгааллын бодлогыг хэрэгжүүлэн гэмт хэрэг зөрчлөөс урьдчилан сэргийлэх олон талт нөлөөллийн шат дараалсан арга хэмжээнүүд зохион байгуулсан.

     Тухайлбал: Цагдаагийн ерөнхий газрын Урьдчилан сэргийлэх хэлтсээс Монгол улс орон даяар зохион байгуулсан Хүүхдийг гэмт хэрэг зөрчлөөс урьдчилан сэргийлэх  “Зөв тусгал”, Хүүхдийг зам тээврийн осол, хэрэг зөрчлөөс урьдчилан сэргийлэх “Бяцхан зорчигч”, “Хичээлийн шинэ жил”, “Сурагчдын амралт” зэрэг арга хэмжээнүүдийг мөн адил Орхон аймгийнхаа хэмжээнд явуулсан. 

    -Аймгийн Цагдаагийн газраас хүүхдийг цахим халдлага, дэлгэцийн донтолтоос урьдчилан сэргийлэх зорилгоор ямар ажил зохион байгуулж байна?

   -“Цахим тоглоом”-1, 2, 3, 4 тусгай арга хэмжээг улирал бүр, “Анхаар хүүхэд”, “Хурдаа хас”, “Зуслан”, “Жаргалант сум-Хүүхэд”,  Гэр бүлдээ “Уурлаад яах вэ дээ” аянуудыг зохион байгууллаа. Сүүлийн үед аюулын харанга дэлдэж байгаа чимээгүй тахал болсон Хар тамхи, мансууруулах бодист хордох явдлаас урьдчилан сэргийлэх, хор хөнөөлийг ухуулан таниулах, өсвөр үе, залуучуудыг  тодорхой төрлийн гэмт хэрэг зөрчлөөс урьдчилан сэргийлэх талаар тусгай арга хэмжээнүүдийг орон нутгийн хэмжээнд явуулсан. Үүнийгээ хэвлэл мэдээллийн хэрэгсэл, телевиз радиогоор сурталчлан ажилласан.Улсын баяр наадам, томоохон уралдаан тэмцээнд олимпиад, хүүхдийг Монгол улсын хилээр тодорхой шалтгааны улмаас нэвтрүүлэх зэрэг тал дээр хүүхэд хамгааллын бодлогыг хэрэгжүүлэн онцгой анхаарч ажиллаж байна.

    -Хүүхдийг гэмт хэрэг зөрчлөөс урьдчилан сэргийлэх талаар төрийн болон Төрийн бус байгууллагуудтай хэрхэн хамтран ажилладаг вэ?

   -Улсын хэмжээнд сүүлийн 3 жилийн байдлаар 2833 хүүхэд гэмт хэрэг үйлдэж, 4922 хүүхэд гэмт хэрэгт өртөж, хохирсон байна. Тухайлбал: хүүхэд ихэвчлэн Хүний эрүүл мэндийн халдашгүй байдлын эсрэг гэмт хэрэг буюу зодолдох, танхайрах, Өмчлөх эрхийн эсрэг гэмт хэрэг болох хулгайлах, залилах, дээрэмдэх гэмт хэрэг үйлдэн шалгагдаж байгаагаас дийлэнх нь 16-18 насных байна. Мөн хүүхэд зодолдох, танхайрах, хүчиндэх, хулгайлах, залилах, дээрэмдэх гэмт хэргийн улмаас хохирч байгаа болно.

   Хөдөлмөр, нийгмийн хамгааллын яам, Цагдаагийн ерөнхий газартай хамтран энэ оны 05 дугаар сарын 01-ний өдрөөс улсын хэмжээнд хүүхэд гэмт хэрэг, зөрчилд өртөж болзошгүй эмзэг цэгүүдийг иргэд, олон нийтийн оролцоотой хяналтад авах зорилгоор “ХҮҮХЭД ХАМГААЛАГЧ” төслийг эхлүүлсэн. Энэ төслийг Орхон аймагт хэрэгжүүлэн Цагдаагийн байгууллагад ажиллаж байгаад цэргийн байнгын тэтгэвэр гарсан 2 эмэгтэй алба хаагчийг сонгон авч, хүүхэд хамгаалагч эргүүлээр ажиллуулж байна. Энэ 2 алба хаагч маань үнэмлэх, энгэрийн тэмдэг, гэрэл ойлгогч хантааз, гэмт хэрэг зөрчлийг мэдээлэх хуудас зэргийг хэрэглэж, доороо сайн дурын 10 эргүүлийг удирдан зохион байгуулж, хүүхэд сургуульд ирэх, буцах чиглэлд болон гэрэлтүүлэг муутай гудамж талбай нарийн зөрөг зэрэг газруудад эргүүлээр ажиллаж байна.

    -Ухуулга сурталчилгааг хэрхэн зохион байгуулав?

  -Монгол Улсын Засгийн газрын 2018 оны 07 сарын 09-ний өдрийн 01 албан даалгаварт “.....Төрийн байгууллагуудад эцэг эхийн зөвлөл байгуулж хүүхэд хамгааллын бодлогыг хэрэгжүүлэн ажиллуулах.....” гэж заасан байх бөгөөд төрийн байгууллагуудад эцэг, эхийн зөвлөл байгуулагдан ажиллаж байгаа эсэх, хүүхэд хамгааллын бодлогыг хэрхэн хэрэгжүүлж байгаа, тэр дундаа хүүхдийг зам, тээврийн хэрэг, осол, зөрчилд өртөж хохирох явдлаас урьдчилан сэргийлэх чиглэлээр хэрхэн ажиллаж байгаа тал дээр хяналт тавьж, дэлгэрэнгүй мэдээлэл, хийсэн ажлын тайланг 2019 оны 11 сарын 15-ны өдрийн байдлаар төрийн бүх байгууллагуудаас авч, ухуулга нөлөөллийн сургалт сурталчилгааг явуулсан.

   Орхон аймгийн Ерөнхий боловсролын бүх сургууль дээр сургуулийн Нийгмийн ажилтнаар ахлуулсан “Өсвөрийн сэргийлэгч сайн дурын бүлгэм” ажиллаж сургуулийн орчинд хүүхэд гэмт хэрэг зөрчилд өртөж хохирох явдлаас урьдчилан сэргийлэх үе тэнгийнхний зөв нөлөөллийн арга хэмжээнүүдийг зохион байгуулж байна.

   2019 оны 12 дугаар сарын байдлаар хүүхэд холбогдсон гэмт хэрэг 36 бүртгэгдэж өмнөх оны мөн үеэс 56,5%-иар өссөн үзүүлэлттэй байгаа хэдий ч хэргийг эрт илрүүлэх, хүүхэд дахин гэмт хэрэг үйлдэх, гэмт санаа бодлоо хэрэгжүүлэх байдлыг таслан зогсоосон гэж үзэж болох юм. Мөн гэмт хэрэгт холбогдсон хүүхдийг Цагдаагийн байгууллагын хяналтад авч, тэдэнд болон тэдний хүрээллийн найз нөхөд үе тэнгийнхэнд ухуулга нөлөөлөл, гэмт хэргийн хор хөнөөл, хор уршиг зэргийг ойлгуулах чиглэлээр нэлээдгүй ажил арга хэмжээ явуулж байгаа нь хүүхэд дахин гэмт хэрэг үйлдэх явдлаас урьдчилан сэргийлэх чухал ажил болж байна. 

    -Төрөл бүрийн аян, ухуулга сурталчилгааг зохион байгуулснаар үр дүнд хүрч чадаж байна уу?

   -Цагдаагийн байгууллагаас 2019 онд тодорхой төрлийн гэмт хэргээс урьдчилан сэргийлэх “Нэг хором”, “Яараад яах вэ дээ”, “Дураараа биш ээ, дүрмээрээ” зэрэг онцлог арга хэмжээнүүдийг зохион байгуулсан бөгөөд арга хэмжээ явагдаж байх цаг хугацаанд гэмт хэрэг, зөрчил хамгийн ихээр буюу 35,0-42,0 хүртэл хувиар буурч, иргэд олон нийтээс ихээхэн талархал хүлээж эерэг үр дүн гарсан бодит ажил болсон. 

   Яг үүнтэй адилхан аймаг орон нутагтаа зохион байгуулж байгаа гэмт хэрэг зөрчлөөс урьдчилан сэргийлэх тусгай арга хэмжээнүүдийг явуулж байх цаг хугацаанд хэрэг, зөрчил тодорхой хувиар буурсан үзүүлэлттэй байдаг. Үүнээс юу харагдаж байна вэ гэхээр Хүүхдийг зам тээврийн осол гэмтлээс урьдчилан сэргийлэх зорилгоор сүүлийн 2 сард “Анхаар хүүхэд” тусгай арга хэмжээг зохион байгуулж ухуулга нөлөөлөл, урьдчилан сэргийлэх чиглэлийн ажил арга хэмжээнүүд зохион байгуулагдаж байх цаг үеэр энэ төрлийн гэмт хэрэг бүртгэгдээгүй байна.

    -Эцэг эхчүүд хүүхдийн хүмүүжилд хэрхэн анхаарах, тэдний санаа бодлыг сонсох тал дээр ямар байдлаар хандах нь оновчтой вэ?

   -Монгол хүүхдүүд бусад улс орны хүүхдүүдийг бодвол харьцангуй хүмүүжил, хатуужил сайтай, оюуны цар хүрээ өндөр гэж дүгнэгдсэн байдаг. Миний бие ерөнхий боловсролын сургуулиудаар явж сургалт сурталчилгаа ухуулга нөлөөллийн арга хэмжээг тогтмол зохион байгуулдаг. Ажиглалт, асуулт хариулт зэргээс үзэхэд хүүхдүүд ер нь бол технологи талдаа сонирхолтой, хүсэл мөрөөдөл, тэмүүлэл, зорилго нь бидний хүүхэд байхад бодож байснаас тэс өөр байгаа юм.

   Эцэг эхчүүд хүүхэдтэйгээ харьцахдаа яг л түүний найз нөхөд шиг, хамгийн сайн сонсогч нь байх хэрэгтэй. Аав ээж нь хүүхдээ сонсдоггүй учраас хүүхэд найз нөхөд бусад хүмүүст өөрт тулгарсан асуудлаа ярьдаг. Тэр ч бүү хэл танихгүй хүнд хүртэл өөрт тохиолдсон асуудлаа ярьснаас болж гэмт хэрэгт өртөж хохирох олзлогдох тохиолдол гарч болзошгүй.

    Цагдаагийн байгууллагаас Хүүхдийг гэмт хэрэг зөрчлөөс урьдчилан сэргийлэх таны “Зөв тусгал” таны хүүхэд гэсэн уриан дор “Зөв тусгал” арга хэмжээг зохион байгуулсан. Та ямар хүн байна, таны тусгал, таны хүүхэд л байна. Хэн ч хүүхдээ муу хүн болгохыг хүсдэггүй, тэгсэн мөртөө хүүхдээ хаана хэнтэй юу хийж явааг мэддэггүй. Хамгийн наад зах нь гар утасныхаа дэлгэцийг хагалахаас айж, хайрладаг мөртөө хүүхдэд гар хүрч, хүүхдийн дэргэд тамхи татаж, архи уух, тэр ч бүү хэл  хүүхдийг дагуулан замын гарцгүй газраар гарах, хөдөө амралт зугаалгаар явахдаа гол ус гарахдаа хүртэл гарамгүй газраар гарах, хүүхдийг зориулалтын суудалд суулгахгүй байх тохиолдол таслан зогсоогдохгүй байна. Та хүүхдэдээ анхаарал тавихгүй бол өөр хэн нэгэн муу хүн хүүхдэд чинь анхаарал тавина шүү гэдгийг ойлгох хэрэгтэй. Энэ үгний цаана их олон зүйл байгаа.

    -Хүүхдийн сул тал, ар гэрийн анхаарал халамж муу, асуудалтай байгаа зүйл дээр эмзэг талыг нь харж гэмт этгээдүүд гэмт хэрэгт татан оролцуулах, уруу татах эрсдэлтэй байдаг. Энэ тал дээр хэрхэн анхаарч байна?

   -Хүүхэдтэй харьцахдаа урамшуулсан, түүнийг сэтгэл зүрх, зоригийг  бадраасан, итгэл өгсөн, ирээдүйн зорилго зорилтыг нь сонсож түүнийг нь дэмжсэн, хамгийн сайн сонсогч зөвлөгч нь байх хэрэгтэй. Тэрнээс ерөнхийд нь миний хүү, охин сайн байна, мундаг шүү гэх нь гол биш ээ. Яг тухайн мөчид буюу чи энэ ажлыг хийсэн, энэ тоог бодож чадаж байгаа чинь, тэр зүйлийг хийж чадаж байгаа чинь л мундаг байна гэж цаг тухай бүрд нь урамшуулж байх нь эрүүлээр хүүхдэдээ нөлөөлж байгаа хэлбэр юм. Мөн үг дааж сургах, сэтгэлийн хат, бие бялдрын хөгжил, Монгол ёс заншил, оньсон тоглоом, үлгэр туйл, хүнийг хүндэтгэх, мэндлэх ёс, биеэр хэрхэн авч явах, байгаль дэлхийгээ хайрлах, мал ахуйтай харьцах зэрэг уламжлалыг хүүхдүүддээ өвлүүлэн зааж сургах хэрэгтэй.

   Тэрнээс үг дааж сургаж байна гээд загнаад, урамшуулж байна гээд мөнгө өгөөд бай гэсэн ойлголт биш ээ. Монголчууд их хошин мэдрэмжтэй хүмүүс юмаа, ярилцдаггүй байж уурлаад яах вэ дээ, харих гээд яараад яах вэ дээ гэх мэт трейнд үг нь хүмүүст хүрсэн нь харагдаж байна.

    Хэдийн бид мэдээллийн эрэн зуун, 21-р зуун гэж ярьж байгаа боловч Монголын зүйр сэцэн үгс, баатарлаг түүх, өвөг дээдсийн сургааль зэргийг аав ээжүүд өөрсдөө хүүхдүүддээ ярьж таниулж, тэдэнтэй өнгөрөөх цаг хором бүхнийг үнэ цэнтэйд тооцож гарыг нь ганзаганд, хөлийг нь дөрөөнд хүргэх хэрэгтэй байна.

    Анчин нохойд юу ч мэдэхгүй гөлгийг дагуулан анд сургадаг, хурдан азарганы төл хурдан л байдаг, төгөлдөр хуурчийн хүүхэд урлагийн хүн болдог, хуульчийн хүүхэд хуульч болдог шүү дээ. Тэгэхээр та ямар үлгэр дуурайлал үзүүлнэ, таны хүүхэд таны “ЗӨВ ТУСГАЛ” байх болно.

   -Цаг зав гарган ярилцсан танд баярлалаа.

А.Бямбамаа

    “Эрдэнэт үйлдвэр” ТӨҮГ-ын Москва хот дахь Төлөөлөгчийн газар байгуулагдсаны 30 жилийн ойг тохиолдуулан ОХУ дахь Монголын Оюутны холбоотой хамтран Москва хотод суралцаж буй Монгол оюутнуудын дунд уламжлалт “Дэвжээ-2019” наадмыг Москвагийн Барилгын Улсын их сургуулийн Концертын танхимд саяхан амжилттай зохион байгууллаа. Наадмын үйл ажиллагааг Эрдэнэт үйлдвэрийн Москва дахь Төлөөлөгчийн газрын дарга С.Болдбаатар, Үндэсний судалгааны Москвагийн Барилгын Улсын их сургуулийн Олон улсын хамтын ажиллагаа, залуучууд, мэдээллийн бодлогын асуудал хариуцсан орлогч захирал Е.С.Гогина нар нээж үг хэлэв.

    Энэ жилийн Дэвжээ наадам хоёр үе шаттай зохион байгуулагдсан бөгөөд ОХУ-ын Гадаад хэргийн яамны Москвагийн Олон улсын харилцааны дээд сургуулийн “Гэрэгэ”, Оросын Улс түмний найрамдлын их сургуулийн “Made in RUDN”, Оросын Тээврийн их сургуулийн “Локомотив”, Үндэсний судалгааны Москвагийн Барилгын Улсын их сургуулийн “Каско”, Г.В.Плехановын нэрэмжит Оросын Эдийн засгийн их сургуулийн “Плехановцы” зэрэг багууд хүч тэнцүү өрсөлдсөн юм. Тэргүүн байрт “Локомотив” баг шалгарч, “Каско”, “Плехановцы” багууд удаах байруудыг эзлэв. Уг наадмын үзүүлбэрүүд өмнөх жилүүдийнхээс чанаржиж, агуулга, жүжиглэлт, ур чадвар өссөн талаар Дэвжээ-2019 наадмыг ивээн тэтгэн, зохион байгуулж ажилласан Эрдэнэт үйлдвэрийн Москва хот дахь төлөөлөгчийн газрын хамт олонд, Монголын ЭСЯ болон Монголын оюутны холбооны төлөөллүүд онцгойлон талархал илэрхийлэв. Мөн “Дэвжээ-2019” наадамд авьяас чадвар, авхаалж самбаагаа сорин өрсөлдсөн нийт оюутнуудад баяр хүргэж, сурлага хөдөлмөрийн өндөр амжилт хүсэн ерөөв.

                                                                                                                    Т.Батчулуун

   

    Эрдэнэт үйлдвэрийн Баяжуулах үйлдвэр ашиглалтанд орж, анхны баяжмалаа хүлээн авсан 12 дугаар сарын 14-ний түүхэн өдөрт зориулсан баярын хурал, урлагийн тоглолт Эрдэнэт үйлдвэрийн Соёл урлагийн цогцолборт боллоо. Баярын хуралд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, орлогч захирлууд, бүтцийн нэгжийн удирдлагууд, цех бүрийн төлөөлөл болсон ажилтан ажиллагсад, шилдэг тэргүүний залуучууд оролцсон юм. Баярын хурлыг нээж “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн үг хэлж, баялаг бүтээгч мянга мянган уурхайчиддаа мэндчилгээ дэвшүүллээ. 2019 оныг Эрдэнэт үйлдвэр “Хөрөнгө оруулалт, бүтээн байгуулалтын жил” болгон зарласантай холбогдуулан ажлын үр дүнгээ тайлагнаж, хөдөлмөрч бүтээлч хамт олныхоо хийсэн бүтээснийг олны сонорт хүргэлээ.

    Баярын энэ өдөр “Хөдөлмөрийн хүндэт медаль”-аар Б.Наранбаатар, С.Ганбаатар, Б.Баярсайхан, Ч.Отгон, “Тэргүүний уурхайчин” цол тэмдгээр Д.Баатар, П.Нямсүрэн, Л.Энхбаяр, Б.Чулуунбаатар, Д.Давааням, “Уул уурхай, хүнд үйлдвэрийн яамны жуух бичгээр Б.Батбилэг, Л.Болдоо, Б.Дэрэм, Х.Батмөнх, Б.Баттөгс, Д.Мөнхтөр, Г.Эрдэнэсүрэн, Ч.Мөнхбаатар нарыг шагнаж урамшууллаа. Мөн бүтээн байгуулалтын ажлыг төлөвлөгөөт хугацаанаас нь өмнө ашиглалтад хүлээн авахад хүч хөдөлмөрөө дайчлан ажилласан Л.Батбаяр, Мартынов В.В, Э.Хашбат, Э.Доржболд, З.Энхбаатар, Козорез А.В, Б.Анхбат, А.Кудербай, Белянкин В.П, Б.Бат-Эрдэнэ, Н.Мөнхчулуун, Х.Батзориг, Г.Мягмарцэрэн, Г.Ганчулуун, С.Ууганбаяр, Сапрыкин В.А, Д.Ёлкасүрэн, Д.Дандар нарыг мөнгөн шагналаар шагнав.

 

 

 

    Эрдэнэт үйлдвэрийн Ерөнхий захирал Х.Бадамсүрэн үйлдвэрийн 41 жилийн ойг тохиолдуулан Эрдэнэт үйлдвэрийн төлөө хийж бүтээсэн бүхэнд нь талархал илэрхийлж, хамт олноо манлайлсан Б.Тэгштуяа, Д.Цогтсайхан, Т.Ганболд, Г.Бат-Эрдэнэ, Н.Баяржаргал, Г.Болдхуяг, Э.Лхагважав, Б.Данаажав нарт амины орон сууцны түлхүүр гардуулсан юм. Баяр дээр баяр нэмсэн энэхүү түлхүүр гардуулах ёслолын үйл ажиллагаа олон хүний сэтгэлийг хөдөлгөлөө. Хамт олондоо үлгэр жишээ ажиллаж, хийж бүтээх хүсэл тэмүүллээр “жигүүрлэсэн” эдгээр найман залууд Орхон аймгийн Баян-Өндөр сумын Цагаанчулуут багийн нутаг дэвсгэрт байрлах Эко хороолол дахь хаус, таунхаусыг бэлэг болгон өгсөн. Орчин үеийн хэв загвартай амины орон сууц нь 64м.кв талбай бүхий 3 өрөө, дулаан гаражаас бүрдсэн бол хоёр давхар бүхий таунхаус барилга нь нийт 116м.кв талбайтай, хоёр ариун цэврийн болон унтлагын өрөө, гал тогоо, зочны өрөөнөөс бүрдсэн тохилог сууц юм. Залуу ажилчид, тэдгээрийн гэр бүлийг дэмжсэн энэхүү гэнэтийн бэлэг Эрдэнэт үйлдвэр 41 жилийн төрсөн өдрөөрөө ажилчиддаа барьсан сюрприз байв.   

 

 

 

Энэ үеэр шагнал гардсан уурхайчдын сэтгэгдлээс хүргэхээр бэлтгэлээ.

Баяжуулах үйлдвэрийн НБХ-ийн Тоног төхөөрөмжийн засварчин Г.БАТ-ЭРДЭНЭ

    Би эхнэр, 3 хүүхдийн хамт амьдардаг. Эрдэнэт үйлдвэрт 19 дэх жилдээ ажиллаж байна. Өнөөг хүртэлх хөдөлмөр зүтгэлийг минь үнэлж, итгэл хүлээлгэсэн үйлдвэрийнхээ удирдлагуудад талархал илэрхийлье. Миний бие 2010 онд Баяжуулах үйлдвэрийн “Хөдөлмөрийн аварга”, 2013 онд цехийн “Шилдэг засварчин”, 2014 онд Эрдэнэт үйлдвэрийн “Хөдөлмөрийн аварга”, 2016 онд Баяжуулах үйлдвэрийн “Шилдэг бригадын дарга”-аар шалгарч байсан. Цаашид хийхээр бодож санасан зүйл их бий. Урмаар тэтгэсэн итгэлийг тань алдахгүйн төлөө хичээх болно. Эрдэнэт үйлдвэртээ маш их баярлалаа.

Үйлчилгээ аж ахуйн цехийн ажилтан Б.ТЭГШТУЯА

    Үйлдвэрийнхээ удирдлагуудаас байрны түлхүүр гардаж авна гэдэг хүний амьдралд ховорхон тохиох аз завшааны нэг гэж бодож байна. Сэтгэл хөдөлж, баярын нулимс бөмбөрлөө. Үгээр хэлэхийн аргагүй сайхан байна. Хамт олондоо, Үйлчилгээ аж ахуйн цехийн дарга Б.Туяа болон Эрдэнэт үйлдвэрийн нийт удирдлагууддаа талархал илэрхийлье. Та нартаа маш их баярлалаа.

Баяжуулах үйлдвэрийн ӨНХ-ийн тээрмийн машинч Б.ЧУЛУУНБААТАР

    Өнөөдөр “Тэргүүний уурхайчин” цол тэмдгээр шагнагдлаа. Эрдэнэт үйлдвэрийн Баяжуулах үйлдвэрийн Өөрөө нунтаглах хэсэгт 13 жил тээрмийн машинчаар ажиллаж байна. Салбарынхаа хамгийн том шагналыг хүртлээ. Сэтгэл их догдолж байна. Би уурхайчин мэргэжилдээ хайртай. Баялаг бүтээгч нийт хамт олондоо баярлалаа. Та бүхэндээ ойн баярын мэнд дэвшүүлж, амьдралд нь аз жаргал, эрүүл энхийг хүсье.

И.Чинтогтох

Фото: Б.Баттөгс

 

     

    Өнөөдөр Монгол Улсын Хөдөлмөрийн баатар, Төр нийгмийн нэрт зүтгэлтэн, Монгол-Оросын хамтарсан Уулын баяжуулах Эрдэнэт үйлдвэрийн Ерөнхий захирал асан Ш.Отгонбилэгийн гэгээн дурсгалд зориулсан үзгэн хөшөөний нээлт боллоо. Хөшөөний нээлтийн ёслолын үйл ажиллагаанд ЗГХЭГ-ын дэд дарга У.Бямбасүрэн, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, “Монгол-21” сангийн тэргүүн Д.Туяа, “Сэцэн” ХХК-ийн захирал Б.Цэдэндорж болон үйлдвэрийн бүтцийн нэгжийн удирдлагууд, хэвлэл мэдээллийн төлөөлөл оролцов. Энэхүү хөшөөг цагаан гантиг суурин дээр Ш.Отгонбилэг агсны барьж байсан үзэгний дүрсийг, олон түмэнд Шо захирал хэмээн хүндлэгдэж явсныг нь бэлгэдэн куб буюу бүх тал нь тэгш шоо дүрсийн хамт урлан бүтээжээ. Уг хөшөөг түүний нэрэмжит гудамжных нь эхэнд байрлуулсан нь Эрдэнэт хотод өнгө үзэмж нэмсэн үйл явдал болов. Хөшөөний гүйцэтгэгчээр Б.Цэдэндорж захиралтай “Сэцэн” ХХК ажиллаж, үйлдвэрийн Инженерийн зураг төслийн төвийн тэргүүлэх зохион бүтээгч инженер А.Соджаргал хөшөөний дизайныг гаргажээ.

 
 
 
 
 
                                                                                                            Т.Батчулуун
Фото: Б.Баттөгс
 

    Зууны манлай Эрдэнэт үйлдвэрийнхэн 41 насны төрсөн өдөртөө  “тэвэр дүүрэн” бүтээн байгуулалт, ололт дэвшлээр бэлэг барьлаа. Тэртээ 1978 оны 12 дугаар сарын 14-ний өдөр уулын баяжуулах Эрдэнэт үйлдвэр ашиглалтад орж, анхны зэс молибдены баяжмалаа экспортод гаргаж байв. Тэгвэл 41 дэх жилийнхээ босгон дээр  манлай үйлдвэрийн уурхайчид их бүтээн байгуулалтын хоёр дахь үеийг эхлүүлж, техник технологийн өөрчлөлт шинэчлэлийн олон ажлыг амжилттай амжуулжээ. Өөрөөр хэлбэл, тус хамт олон үйлдвэрлэлийн тасралтгүй, найдвартай үйл ажиллагааг ханган ажиллахын зэрэгцээ хүчин чадлаа нэмэгдүүлэх, эдийн засгийн үр ашгийг дээшлүүлэх, ажлын байрны орчин нөхцөлийг сайжрулахад “эргэлт” хийсэн  нэгэн оныг хамтдаа бүтээлээ. Үр дүнтэй, оновчтой хөрөнгө оруулалтын хүрээнд Ил уурхай, Баяжуулах үйлдвэр, Засвар механикийн завод, Авто тээврийн цех зэрэг үндсэн болон бусад үйлдвэрлэлийн цех нэгжид техник технологийн шинэчлэл хийж, ашиглалтад хүлээн авав. Уулын тээврийн шинэ техникүүдийг  хүлээн авах үйл ажиллагаа Ил уурхайн 1280 дугаар түвшинд болсон бол технологийн шинэчлэлийн хүрээнд хийгдсэн томоохон бүтээн байгуулалтыг Баяжуулах үйлдвэрийн төв корпуст өлгийдлөө.

 

    Өнгөрсөн 5 дугаар сарын 1-ний өдрөөс эхэлсэн Хөрөнгө оруулалт, бүтээн байгуулалтын ажлыг уурхайчид өөрсдийн өндөр мэдлэг чадвар, арвин арга туршлага, нарийн зохион байгуулалтын давуу хүчээр бүтээж чадсаныг эл арга хэмжээг нээж хэлсэн үгэндээ “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн тэмдэглэсэн. Тэрээр “Улиран одох гэж буй 2019 он уурхайчид та бидний хувьд ажил хөдөлмөрийн том ул мөрөө үлдээсэн жил боллоо. Энэ онд бид техник технологио боловсронгуй болгох замаар уурхайчид, ажилчдынхаа ажиллах орчин нөхцөлийг сайжруулах, үйлдвэрлэлийн цар хүрээг нэмэгдүүлж, үр ашгийг дээшлүүлэхэд чиглэсэн олон чухал ажлыг төлөвлөж, гүйцэтгэлээ. Өнөөдөр бид энэ ажлаа дүгнэж, албан ёсоор хүлээн авч байна. Эрдэнэт үйлдвэрийн хамт олон бид энэ онд 420 орчим тэрбум төгрөгийн хөрөнгө оруулалтын шинэчлэл хийлээ. Үүний 20 сая орчим долларыг геологийн хайгуулын бүхий л цогц ажилд зориуллаа. Үр дүнд нь Эрдэнэтийн овоо, ойр орчим дох нөөцийг цаашид 60 жил ажиллах боломжтой гэдгийг тогтоосон. Мөн хоёр хоногийн өмнө манай  Геологи хайгуулын ангийг Геологи хайгуулын экспедиц болгон цар хүрээ, статусыг өргөжүүлэх шийдвэрийг Засгийн газраас гаргасан нь бидний энэ ажлын үр дүн гэдгийг нийт уурхайчдадаа баяртайгаар дуулгая. Бид техникийн болоод технологийн бодлоготой ажиллаж байгаа. Эдгээр шинэчлэл, бүтээн байгуулалтаа энэхүү бодлогын хүрээнд хийж буйг онцлоё. Ингээд бүтээн байгуулалтын ажилд баг болон гар сэтгэл нийлж, ур дүй,  ухаан чадал, хөдөлмөр зүтгэлээ зориулсан уурхайчид, инженер техникийн ажилтнууд, энд оролцсон бүх хүмүүст талархлаа илэрхийлье” хэмээн үргэлжлүүлэн хэллээ. Хөрөнгө оруулалт, бүтээн байгуулалтын жилд Эрдэнэт үйлдвэрийнхэн алсын хараатай,  ажлын байрны орчин нөхцөлийг илүү боловсронгуй түвшинд хүргэсэн шинэчлэл хийж чадсаныг мэргэжилтнүүд энэ үеэр үнэлэв.

   Эрдэнэтийн үйлдвэрийн баяжуулагчид Зэс молибдены баяжмалыг салгах, молибдены баяжуулалтын дамжлагыг шинэчилж, Бутлан тээвэрлэх хэсгийн 13 дугаарбутлуурыг МР-800 маркийн бутлуураар сольж, суурилуулжээ. Ингэснээр баяжуулалтын фронтыг  нэмэгдүүлж, молибдены металл авалтыг 1 хувиар өсгөн жилд 1.8 тэрбум төгрөгийн цэвэр ашиг олох боломж бүрдэж байна. Ашиглалтын зардал буурах, ажлын байрны нөхцөл сайжрах, хөдөлмөрийн аюулгүй, эрүүл ахуйн таатай орчин бий болгох зэрэг олон давуу тал молибдены нөөц шугамд шингэжээ.

    Харин МР-800 бутлуур нь Финляндулсын  METSO фирмийн нэрийн бүтээгдэхүүн.  Нэг цагт 650 тоннхүдэр бутлах хүчин чадалтай,  хасах 10мм-ийн ангийн агуулгыг 60 хувьд хүртэл бутлах техникийн өндөр үзүүлэлттэй.Эл бутлуурыг ашиглалтад хүлээн авснаар нэгдүгээр шатны хүдэр нунтаглалтын бөөрөнцөгт тээрмүүдийн цагийн ачааллыг нэмэгдүүлж, жилд 95.5 тэрбум төгрөгийн нэмэлт орлого олох боломж бүрджээ. Баяжуулах үйлдвэрт хийгдсэн дараагийн ажил нь хүдэр нунтаглалтын 7 дугаар тээрэм шинэчлэл. Украйн улсын НКМЗ үйлдвэрийн  МШЦ 5.5*6.5 маркийн шинэ тээрэм нь 140 метр.кубын багтаамжтай, цагт 280 тонн хүдэр нунтаглах хүчин чадалтай. Жилд 1.2 тэрбум төгрөгийн эдийн засгийн үр ашгийг үйлдвэрлэлд авчрах юм байна.

   Уулынхан харин 32.3 тэрбум төгрөгийн хөрөнгө оруулалттай техникийн шинэчлэл хийж, уулын хэсэгтээ ОХУ-д үйлдвэрлэсэн, сүүлийн үеийн ЭКГ-12К маркийн экскаватор хоёрширхэг, Зам овоолгын хэсэгт Катерпиллер 16М маркийн шинэ загварын автогрейдер, Комацу фирмийн Д-275А гинжит бульдозер, 1.2 кубын шанагатай ПС-220 жижиг оврын экскаватораар хүч сэлбээд байна. Ил уурхайнхны ур ухаан, хөдөлмөр зүтгэлээр уурхайн мөргөцөгт дүнхийх 12.5 метр кубын багтаамжтай шанага бүхийЭКГ-12 экскаватор нь цахилгаан зарцуулалтыг 30 хувиар хэмнэх аж.

     Хөрөнгө оруулалтын жилийн бүтээн байгуулалт Засвар механикийн заводад Усаар зүсэгч машин хүлээн авснаар үргэлжилжээ. Польш улсын КИМЛА фирмийн тоон удирдлагатай Waterjet-2161 маркийн суурь машиныг Монголд анх удаа ашиглаж буй бөгөөд нь  резин, мод, шил, чулуу, хуванцар, хар болон өнгөт металл зэрэг бүхий л төрлийн хуудсан материалыг ус болон абразив ширхэгтхолимгийн тусламжтайгаар  зүсэх зориулалттай  орчин үеийн ухаалаг суурь машин юм. Энэхүүсуурь машиныг ашигласнаар  гадаргуугийн боловсруулалтын цэвэршилт сайжирч, зарим технологийн ажилбар дамжихгүй,  хэрэглэгчдэд шууд хүрэх боломжтой. Цахилгаан эрчим хүчний өндөр хэмнэлттэй,  утаа униаргүй,  дуу чимээ багатай зэрэг үзүүлэлт нь  ажилчдын эрүүл мэнд, үйлдвэрлэлийн бүтээмжид эерэгээр нөлөөлнө.

    Энэ жилд Эрдэнэт үйлдвэрийнхэн Хаягдлын аж ахуйн хаягдлын санд 4М далан, холбох суваг шинээр барьсан ньЭрдэнэт үйлдвэрийнтүүхэнд анхны том хэмжээний холбох суваг  болсон гэж мэргэжилтнүүд онцоллоо.Баяжуулах үйлдвэрийн Хаягдлын аж ахуйн хаягдлын санд өвлийн хаялтын 4М далан, холбох сувгийн хамт  барьж байгуулах ажлыг  Баяжуулах үйлдвэр,Үйлдвэрлэлийн хэлтэс, Техникийн хэлтэс, Авто тээврийн цех, Ил уурхай, Геологи маркшейдерийн хэлтэс, Инженерийн зураг төслийн төв, Геологи хайгуулын анги, Барилга, байгууламж хяналт, төлөвлөлтийн хэлтэс зэрэг цех,нэгжээс  бүрдсэн ажлын хэсэг 140 хоногт гүйцэтгэж, ашиглалтад хүлээлгэн өгчээ.  Төслийн хүрээнд Хаягдлын сангийн өвлийн хаялтын хэсэгт 1 648 метр урт, 6 метр өндөр 4М даланг 129 500 метр.куб уулын цул, 107 500 метр.куб элсээр барьж байгуулсан бол холбох сувгийг барихад нийт 240 564 метр.куб уулын цул тээвэрлэх ажил гүйцэтгэсэн байна. Эргэлтийн усны холбох суваг нь 604 метрийн урт, 24 метрийн өндөртэй.4М далан, холбох сувгийн цогц бүтээн байгуулалт нь Хаягдлын сангийн насжилтыг 4-6 жилээр уртасган, үйлдвэрлэлийн найдвартай ажиллагааг хангахад ихээхэн ач холбогдолтой хөрөнгө оруулалт болжээ. 

    Түүнчлэн Баяжуулах үйлдвэрийн Өөрөө нунтаглах хэсэгт Telsmidthфирмийн SBSмаркийн цагт 130 тонн хүдэр бутлах хүчин чадалтай тоног төхөөрөмж суурилуулж,  Хам баяжуулалтын 1-р ээлжийн 205 дугаар хөвүүлэн баяжуулах машины эд ангийг шинэчилжээ. Шүүн хатаах хэсэгт молибдены даралтат шүүлтүүр  угсарч суурилуулсан нь  ажлын байрны орчин нөхцөлийг сайжруулж, үйлдвэрлэлийн тасралтгүй, найдвартай  ажиллагааг хангахад чухал үүрэг гүйцэтгэх юм. Авто тээврийн цехэд дизель түлш хадгалах, түгээх 50 метр кубын багтаамжтай, ухаалаг карт уншигч бүхий Шатахуун түгээх станц суурилуулж, хүнд даацын өөрөө буулгагч БелАЗ-75131 загварын 130 тоннын даацтай 2 авто машин шинээр хүлээн авлаа. Засвар механикийн заводын Механик цехэд металл боловсруулах СNС тоон удирдлагатай фрезерийн суурь машиныг ашиглалтад оруулав. Мөн Ган бөөрөнцөгийн цехэд индукцийн зуух бүхий хос цувих шугамын технологи нэвтрүүлж байна.  Энэхүү технологи нэвтэрснээр ган бөөрөнцөгийн чанар сайжирч, хувийн зарцуулалт багасахын зэрэгцээ ажлын байрны нөхцөл эрс дээшилж, үйлдвэрлэлийн найдвартай ажиллагааг хангах олон эерэг үзүүлэлтийг өгнө. Дулааны Цахилгаан Станцын 3 дугаар зуухны их засвар хийгдэж, 2.2 тэрбум төгрөгийн өртөг бүхий  ихзасварын ажлыг Улаанбаатар хотын “Мон Илч” компани 160 хоногт багтаан гүйцэтгэлээ.3 дугаар зууханд их засвар хийснээр үйлдвэрлэлийн тасралтгүй ажиллагааг хангах, өвөл зуны горимд ДЦС тогтвортой, найдвартай ажиллах боломжийг нэмэгдүүлжээ.

    Үйлдвэрлэлд хийгдсэн эдгээр бүтээн байгуулалтын ажлын үр өгөөжийг “Эрдэнэт үйлдвэр” ТӨҮГ-ын  Ерөнхий захирлын Нэгдүгээр орлогч бөгөөд Ерөнхий инженер Т.Батмөнх тодорхойлохдоо  “ Энэ бүх шинэчлэлийн ажлын үр дүнд үйлдвэрлэлийн бүтээмжээ өсгөнө. Хүдэр дэх металлын агуулга буурч буй энэ үед эцсийн бүтээгдэхүүнийхээ хэвийн хэмжээг хадгалж, борлуулалтын орлогоо бууруулахгүй барихын тулд боловсруулалтаа нэмэх нэг арга байгаа. Тэгэхээр шинэчлэлийн үр дүнд  боловсруулалт нэмэгдүүлэх  хүчин чадалтай болж байна гэсэн үг. Нөгөө талаар, техникийн болон технологийн үзүүлэлтүүд сайжирна. Хамгийн гол өгөөж гэвэл, тоног төхөөрөмжийн хувийн зардал багасч, нэг тонн хүдэр боловсруулах өөрийн өртөг буурна. Ингэснээр үйлдвэрлэлийн үр ашиг дээшилж,тэр хэрээр  ажиллагсдын бодит орлого нэмэгдэнэ. Техникийн шинэчлэлийн хүрээнд хийгдсэн бүтээн байгуулалтууд дээрх үр өгөөжөө тун удахгүй өгч эхэлнэ. Нэг тодорхой жишээ хэлэхэд, 4 дүгээр сард манай уурхайчид өөрсдийн хүчээр угсарч ашиглалтад оруулсан ЭКГ-12К экскаватор өнөөг хүртэл 7 сарын хугацаанд ажиллахдаа 755 сая төгрөгийн цахилгааны зарцуулалтын хэмнэлт өгсөн. Мөн бүтээмж 20 гаруй хувиар өссөн. Зөвхөн нэг техникийн үзүүлж буй үр ашгийг харахад ийм тооцоо гарч байгаа. Тэгэхээр бидний хөрөнгө оруулалт, бүтээн байгуулалтын хүрээнд хийгдсэн шинэчлэл, техник тоног төхөөрөмж бүхэн үр ашгаа өгнө гэдгийг баттай хэлье” гэж онцолсон.

    Бүтээн байгуулалт нүргэлж, хөдөлмөр оргилсон энэ өдрийг уурхайчидтай хамт Монгол Улсын Засгийн Газрын Хэрэг Эрхлэх газрын орлогч дарга У.Бямбасүрэн, Уул уурхай, хүнд үйлдвэрийн сайдын зөвлөх Г.Шархүү, хамтран ажиллагч “Flsmidth” ХХК-ийн Ази номхон далайн бүсийг хариуцсан Ерөнхийлөгч Денис Фринч, “ИЗ-Картекс”компанийн төлөөлөгч Г.М.Елякин нарын хүндэт зочид, үйлдвэрийн удирдлагын баг, албаны хүмүүс хамт угтлаа.

    Ийнхүү Эрдэнэт үйлдвэрийн хамт олон  “Хөрөнгө оруулалт-2019” жилийн хүрээнд хийсэн бүтээн байгуулалт, техник технологийн ажлаа албан ёсоор ашиглалтад хүлээн авч, үйлдвэрийн хөгжлийн нэгэн шинэ хуудсаа эргүүлэв. 

 

 

 

 

 

 

 

М.Балжинням

Фото: Б.Баттөгс

     “Эрдэнэт үйлдвэр” ТӨҮГ-ын түүхэн 41 жилийн ой, “Хөрөнгө оруулалт, бүтээн байгуулалт 2019” жилийн хүрээнд үйлдвэрийн газар, Монгол Улсын Шинжлэх ухааны академи хоорондын энэ оны хамтын ажиллагааг дүгнэх тайлангийн хурал амжилттай зохиогдлоо. Тайлангийн хуралд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, Хөгжлийн хэлтсийн холбогдох мэргэжилтнүүд, Шинжлэх ухааны академийн судлаач, эрдэмтэн, инженерүүд оролцсон юм. 2019 онд хоёр байгууллага 8 чиглэлд хамтран ажиллахдаа бодит үр дүнд хүрснийг онцлон, хурлын үеэр судлаачдын хийсэн судалгааны ажлын талаар танилцууллаа. Тухайлбал, Эрдэнэт үйлдвэрийн Ус хангамжийн цехийн Цэвэрлэх байгууламжийн хэсэг, Шинжлэх ухааны академийн хамтран хэрэгжүүлсэн цэвэрлэх байгууламжийн лагийг үнэргүйжүүлэх, боловсруулах, инновацийн түвшний томоохон ажлын туршилт судалгааны үр дүн ирэх хавар харагдах юм. Мөн Эрдэнэт хотын агаарын бохирдлыг бууруулах, цагаан тоосны дэгдэлтийг багасгах зэрэг байгаль орчны чиглэлээр хийгдэж байгаа туршилт судалгааны ажлуудыг онцоллоо. 

      Шинжлэх ухааны академи, Эрдэнэт үйлдвэрийн хамтын ажиллагааны хүрээнд 2019 онд үйлдвэрийн газрын цех, нэгжүүдийн бүтээмжийн менежер, инженер техникийн ажилтнуудад “Оюуны өмчийн менежмент”, “Химийн хорт болон аюултай бодисын менежментийг сайжруулах”, “Хаягдлын далангийн сейсмик мониторинг хийх” сэдвээр сургалт явуулсан нь ажилтнуудыг чадавхижуулах, тэдний мэргэжлийн ур чадварыг дээшлүүлэх, холбогдох хууль дүрмийг биелүүлэхэд үр дүнгээ өгч байна. Уул уурхайн үйлдвэрлэл нь ашигт малтмал, орд, уурхайн ашиглалтын технологи, үйлдвэрлэл, эрчим хүчний хангамж, дэд бүтэц, ложистик, эдийн засаг, менежмент, байгаль орчин, аюулгүй ажиллагаа гэсэн олон салбарыг хамарсан нарийн төлөвлөлт бүхий үйл ажиллагаатай. Эрдэнэт үйлдвэр 41 жилийн турш шинжлэх ухааны судалгаа шинжилгээний үндсэн дээр үйл ажиллагаагаа удирдан чиглүүлсээр ирсэн бөгөөд цаашид хамтын ажиллагаагаа өргөжүүлнэ гэдэгт хоёр тал итгэл төгс байгаагаа илэрхийллээ.

И.Чинтогтох

Фото: Б.Баттөгс 

 

Сэлэнгэ амралт, аялал жуулчлалын цогцолборын Сэлэнгэ амралтын баазын дарга Д.ЭРДЭНЭБАТ

Уулын үйлдвэртэй хувь заяагаа холбоод 12 дахь жилдээ ажиллаж байна. Энэ хугацаанд олон зүйл сурч, ажилдаа туршлага хуримтлуулсан. Хамт олонтойгоо үйлдвэрийнхээ ам бүлд ажиллах сайхан байна. Үйлдвэрийнхээ үе үеийн удирдлага, баялаг бүтээгч уурхайчид, Эрдэнэт хотынхоо ард иргэд та бүхэнд баярын мэнд хүргэж, сайн сайхан бүхнийг хүсье.

 

Маркетингийн хэлтсийн Олон нийттэй харилцах албаны нэвтрүүлэгч П.ЭНХТУЯА

Миний бие хэвлэл мэдээллийн салбарт 30 дахь жилдээ ажиллаж байна. Он цагийн хуудсыг нэхэн харахад энэ их айлын өндөр босгоор алхаж, Эрдэнэт үйлдвэрийн баялаг бүтээгчдийн амьдрал замнал, ололт амжилттай холбогдсоор 27 жилийг үджээ. Дурсамж дүүрэн, бүтээн байгуулалтын он жилүүдэд уурхайчин хамт олныхоо дунд мөр зэрэгцэн хөдөлмөрлөж, тэднийхээ ажил үйлсийг баяр бахдалтайгаар олон нийтэд хүргэсээр өнөөдөртэй золгож байна. Телевизийн урлагаар дамжуулан Эрдэнэтийн уурхайчдын хөдөлмөр бүтээлийг орон даяар хүргэхээр хичээн ажилласныг минь үнэлсэн хамт олондоо, баялаг бүтээгчиддээ баярлалаа. Эрдэнэт үйлдвэр миний амьдрал, миний бахархал.

 

Баяжуулах үйлдвэрийн ӨНХ-ийн ээлжийн мастер Д.ЭНХБОЛД

1981 оны 4 дүгээр сарын 13-нд энэ их айлын босгоор алхаж, Баяжуулах үйлдвэрээс ажлын гараагаа эхэлсэн. Тээрмийн машинист, плотатор, тээрмийн бригадын даргаар ажиллаж байгаад 1989 онд Өөрөө нунтаглах хэсэг рүү тээрмийн машинистаар шилжин ажилласнаас хойш ээлжийн мастер, ахлах мастер, хэсгийн даргын ажил үүрэг гүйцэтгэсэн. Энэ хэсэгтээ 30 дахь жилдээ ажиллаж байна. 6000 гаруй ажилтныхаа ар амьдралыг “нуруундаа үүрч”, уул уурхайн компаниудыг тэргүүлсэн Эрдэнэт үйлдвэрт ажиллаж байгаа минь зол завшаан юм. Ажил мэргэжлээрээ бахархсан Баяжуулах үйлдвэрийн баялаг бүтээгч хамт олондоо эрүүл энх, хамгийн сайн сайхныг хүсэн ерөөе.

 

Ил уурхайн Өрөмдлөг тэсэлгээний хэсгийн Тэсрэх материал зөөх уулын ажилтан Б.ЭРДЭНЭ-ОЧИР

Би удам дамжсан уурхайчин залуусын нэг. Ургах нартай уралдан босож, улс эх орныхоо төлөө үр бүтээлтэй ажиллаж байгаадаа баяртай байна. Эрдэнэт үйлдвэр миний амьдрал, миний гэр бүл, миний хойч ирээдүйд маш том бүтээн байгуулалтыг бий болгосон. Үе үеийн уурхайчиддаа эрүүл энх, энэ хорвоогийн хамгийн сайн сайхан бүхнийг хүсэн ерөөе. 41 жилийн төрсөн өдрөө тэмдэглэж байгаа Эрдэнэт үйлдвэртээ баярлалаа.

И.Чинтогтох

 

 

Төсөл хэрэгжүүлэх нэгжийн Зөвлөх Н.БЯМБАДОРЖ

Би 1980 оны 7 дугаар сарын 16-нд Эрдэнэт үйлдвэрийн ажилтан болсон. Яруу найрагч Ш.Гүрбазар Монголоороо гоёдог шиг, би Эрдэнэтээрээ гоёж яваа эгэл уурхайчин. Хаа ч явсан “Би Эрдэнэтийнх” гэж хэлэх дуртай. Үйлдвэрийнхээ лого бүхий бөгж, энгэрийн тэмдгийг байнга зүүдэг. Эрдэнэт бол миний гоёл, миний нэрийн хуудас. Үйлдвэртээ баяр талархалын үгсээ илэрхийлж байгаа эдгээр өдрүүдэд Эрдэнэт үйлдвэр байгуулагдсаны түүхэн 41 жилийн ой тохиож байна. Уурхайчиддаа, хамтран ажилладаг бүхий л байгууллага, хамт олонд үйлдвэрийнхээ төрсөн өдөр, шинэ оны баярын мэндийг хамтатган хүргэе. Та бүхэндээ баярлаж явдаг шүү.

 

Судалгааны төвийн Тээрмийн машинч Ж.ТҮМЭНЦОГТ

Үйлдвэрийнхээ 3 жилийн ойгоор ажилд орсон. Тэр цагаас өнөөг хүртэлх 34 жилийн хугацаанд миний бие бульдозерчин, бутлуурчин, тээрмийн машинч, жолоочоор ажиллалаа. Гавьяаны амралтандаа гарах тушаалаа гар дээрээ хүлээн аваад удаагүй байгаа ч үйл хэргийг минь үргэлжлүүлэх хүүгээ удам дамжсан уурхайчин болж байгаад сэтгэл тэнэгэр байна. Үйлдвэрийн газраас хэрэгжүүлдэг “Хамтын гэрээ” бодитой хэрэгжиж байгаагийн нэг илрэл нь энэ гэж боддог. Хөдөөгийн малчны хотноос илгээлт өвөртлөн ирсэн залуус Эрдэнэтийг цогцлоон бүтээж, өнөөдөрт хүргэсэн. Би л гэхэд Завхан аймгийн Их-Уул сумаас 10 дугаар анги төгссөн хүүхэд ирж байлаа. Хийсэн бүхнээ эргэн харж, дэлхийн 10 том үйлдвэрийн нэгд ажилласан өөрөөрөө бахархаж байна. Хамт олондоо халуун баярын мэнд хүргэе.

 

Инженерийн Зураг Төслийн Төвийн инженер зохион бүтээгч Ж.БАТЦЭЦЭГ

Оюутан байхдаа л залуусын хот Эрдэнэтэд очиж дэлхийд данстай Эрдэнэт үйлдвэрт ажиллахыг хүсдэг байлаа. Хүсэл маань биелж их сургуулиа төгсөөд Эрдэнэт үйлдвэрийн Баяжуулах фабрикийн Нунтаглан Баяжуулах Хэсэгт цахилгаанчинаар ажиллан ажил, амьдралын гараагаа эхэлж билээ. Харин одоо Эрдэнэт үйлдвэрийнхээ  Инженерийн Зураг Төслийн Төвд 25 дахь жилдээ ажиллаж байна. Эрдэнэт хот, Эрдэнэт үйлдвэрээр овоглож, нэгэн эд эс нь болж байгаадаа үргэлж бахархаж явдаг.Үйлдвэрийнхээ хөгжил дэвшил, техник технологийн шинэчлэл, бүтээн байгуулалтын зураг төсөл зохион бүтээх ажлуудыг цаг хугацаанд нь чанартай гүйцэтгэх нь миний болон хамт олны маань  гол зорилго гэж боддог. Эрдэнэт үйлдвэрийхээ үе үеийн уурхайчид та бүхэндээ чин сэтгэлээсээ баярлалаа. Та нартаа эрүүл энх, аз жаргалыг хүсэн ерөөе.

 

Баяжуулах үйлдвэрийн Хөвүүлэн баяжуулагч Р.БАЯР

Эрдэнэт үйлдвэр үйл ажиллагаагаа эхэлснээс хойш 41 жил болж байна. Энэ их айл, том үйлдвэрт амьдралынхаа тал хувийг буюу хоногийн 12 цагийг өнгөрүүлсэн болохоор сэтгэлд хамгийн дотно гэр минь болжээ. Би 1983 онд Баяжуулах үйлдвэрт насосны машинчаар ажил хөдөлмөрийн гараагаа эхэлсэн. Хамт олонтойгоо өнгөрүүлсэн олон сайхан дурсамж бий. 2017 онд үйлдвэрийнхээ өргөтгөлийн үйл ажиллагааг амжилттай хийсний учир Баяжуулах үйлдвэрийн дарга асан Г.Дэлгэрийн хамтаар Монгол Улсын Аж үйлдвэрийн гавьяат ажилтан цол хүртэж байлаа. Миний амьдралд тохиосон баярт үйл явдлын нэг байсныг хэлэхэд таатай байна. Үйлдвэрийнхээ нийт ажилчдад 41 жилийн ойн баярын мэндийг хүргэж, аз жаргал, сайн сайхан бүхнийг хүсэн ерөөе.

И.Чинтогтох

Фото: Б.Баттөгс

Мэдээний төрөл

Календарь

« 1-р сар 2020 »
Да Мя Лх Пү Ба Бя Ня
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Зургийн цомог