Цахим хуудас

Цахим хуудас


Notice: Undefined property: JObject::$description in C:\inetpub\wwwroot\erdenettoday\templates\ts_newsline\html\com_k2\templates\default\user.php on line 59
Цахим шуудан: This email address is being protected from spambots. You need JavaScript enabled to view it.

    Эрдэнэт үйлдвэр нийгмийн хариуцлагын бодлого хэрэгжүүлэхдээ ажиллагсдын нийгмийн асуудлыг цогцоор нь шийдэхийн зэрэгцээ тэдний хүүхэд, гэр бүлийн сайн сайхны төлөө анхаарал тавьж ажилладаг. Энэ хүрээнд шинэ оны босгон дээр ажилтнуудынхаа хүүхдүүдээс сурлага, урлаг спорт болон бусад амжилтаараа манлайлсан шилдэг хүүхдүүдийг шалгаруулж, тэдэнд урам зориг нэмдэг уламжлалтай. Улиран одож буй 2019 оны шилдэг хүүхдийн  шалгаруулалтыг ахлах, дунд, бага нас гэсэн 3 ангилалд  тус бүрийг таван номинациар тодруулжээ. Бага насны ангилалд 2019 оны “Шилдэг сурагч”- аар 13 дугаар сургуулийн 4а ангийн сурагч Нямдаваагийн Баянмөнх тодорсон бол “Оны шилдэг авьяастан”-аар 5 дугаар сургуулийн 3б ангийн сурагч Ганболдын Гангаамаа, “Оны шилдэг тамирчин”-аар 19 дүгээр сургуулийн 2в ангийн сурагч Гансүхийн Номун-Эрдэнэ, “Оны шилдэг шинийг санаачлагч”-аар Билигт өргөө сургуулийн 2а ангийн сурагч Эрдэнэсайханы Нандинлхам, “Оны шилдэг оюунлаг сурагч”-аар 8 дугаар сургуулийн 1а ангийн сурагч Ганцогтын Үйлсбадрах нар шалгарчээ.   

     Дунд насныхнаас “Оны шилдэг сурагч”-аар Орхон Эмпати сургуулийн 7 дугаар ангийн сурагч Төгсбаярын Номинжин, “Оны шилдэг авьяастан”-аар  4 дүгээр сургуулийн 7д ангийн сурагч Нармандахын Эгшиглэн, “Оны шилдэг тамирчин”-аар 4 дүгээр сургуулийн 9а ангийн сурагч Болдбаатарын Сүхбат, “Оны шилдэг шинийг санаачлагч”-аар 4 дүгээр  сургуулийн 10е ангийн сурагч Нармандахын Алтаншагай, “Оны шилдэг оюунлаг сурагч”-аар 4 дүгээр  сургуулийн 6д ангийн сурагч Эрдэнэбатын Нарантуяа нар тус тус шалгарлаа.

    Ахлах ангийн сурагчдаас Билигт өргөө сургуулийн 10а ангийн сурагч Эрхэмбаярын Билгүүн “Оны шилдэг сурагч”, Технологийн сургуулийн Лицей 11-р ангийн сурагч Батжаргалын Должинзуу “Оны шилдэг авьяастан”, 1-р сургуулийн 11б ангийн сурагч Бат-Оршихын Энхжин “Оны шилдэг тамирчин”, Орхон Эмпати сургуулийн сурагч Баярсайханы Төгөлдөр “Оны шилдэг шинийг санаачлагч”,  Орос 19 сургуулийн 9б ангийн сурагч Батзоригийн Эрдэнэсувд “Оны шилдэг оюунлаг сурагч” номинацийн эзэд боллоо.

М.Балжинням

   

     Монгол Улсын Засгийн газар, МҮХАҮТ-тай хамтран  жил бүр тухайн оны онцлох ТОП 100 аж ахуйн нэгжийг шалгаруулдаг. “Эрдэнэт үйлдвэр” ТӨҮГ энэхүү шалгаруулалтанд 17 дахь удаагаа шилдгээр, мөн "Энтрепренер 2019" шалгаруулалтын шилдгийн шилдэг “Гранпри” шагналын эзнээр хоёр дахь удаагаа шалгарч байна. Монгол Улсын нийгэм, эдийн засгийн хөгжилд бодитой хувь нэмэр оруулж байгаа “Эрдэнэт үйлдвэр” ТӨҮГ-ын  уурхайчин хамт олон улс, эх орны өмнө хүлээсэн үүргээ нэр төртэйгөөр биелүүлэн 2020 оныг амжилт дүүрэн угтаж байна.

    "Эрдэнэт үйлдвэр” ТӨҮГ 2019 онд бүтээн байгуулалт, техник технологийн шинэчлэлд түүхэндээ хамгийн өндөр хөрөнгө оруулалт хийлээ. 2019 он үйлдвэрийн хувьд ажил хөдөлмөрийн том ул мөрөө үлдээсэн жил байв. Техник технологио боловсронгуй болгоход нийт 410 гаруй тэрбум төгрөгийг зориулж уурхайчдынхаа ажиллах орчин нөхцөлийг сайжруулах, үйлдвэрлэлийн цар хүрээг нэмэгдүүлж, үр ашгийг дээшлүүлэхэд чиглэсэн олон чухал ажлыг хийж хэрэгжүүллээ.

    Энэ онд хүдэр боловсруулалтын хэмжээг хамгийн өндөрт хүргэж “Эрдэнэт үйлдвэр” ТӨҮГ 2019 оны хүлээгдэж буй гүйцэтгэлээр 37 сая.тн хүдэр олборлож, 32 сая.тн хүдэр боловсруулж байна. Энэ нь “Эрдэнэт” үйлдвэрийн түүхэн дэх үйлдвэрлэлийн хамгийн дээд үзүүлэлт болж байна.

    “Эрдэнэт үйлдвэр" төрийн өмчит үйлдвэрийн газар болсон анхны жилдээ эдийн засгийн өндөр үзүүлэлттэй ажиллаж, улс, орон нутгийн төсөвт анх удаа хамгийн өндөр буюу 930 гаруй тэрбум төгрөг төвлөрүүлэв. Энэ нь 900 хүүхдийн багтаамжтай 130 сургууль, 150 хүүхдийн багтаамжтай 30 цэцэрлэг байгуулахад хүрэлцэхүйц хэмжээний хөрөнгө юм.

    “Эрдэнэт үйлдвэр” ТӨҮГ-ын баялаг бүтээгч уурхайчин хамт олон 1 хоногт 5 тэрбум төгрөгийн бүтээгдэхүүн буюу 1608.5 тонн зэсийн баяжмал, 13.9 тонн молибдены баяжмал үйлдвэрлэж байна. Улс орон нутгийн төсөв нэг хоногт 2.6 тэрбум төгрөгийг төвлөрүүлж байна. 2019 оны эхний 11 дүгээр сарын байдлаар 1 их наяд 800 орчим тэрбум төгрөгийн бүтээгдэхүүн буюу 540 орчим тонн зэсийн баяжмал, 4758.8 тонн молибдены баяжмал үйлдвэрлэлээ.

    Ажилчдынхаа нийгмийн хөгжилд жилд нийт зардлын 7 орчим хувийг төлөвлөн зарцуулж байна. 2017 онд 59.3 тэрбум төгрөг, 2018 онд 98.4 тэрбум төгрөг зарцуулж байсан бол 2019 онд 104.9 тэрбум төгрөг зарцуулаад байна. 2019 онд ажилтнуудын цалинг 20 хувиар нэмлээ. Мөн анхан шатны удирдах ажилтны манлайллыг нэмэгдүүлэх, ур чадварыг хөгжүүлэх, урамшуулах зорилгоор “Манлайлагч мастерын нэмэгдэл цалинг” шинээр бий болгож 40 мастерт сар бүр  600 мянгаас 1 сая төгрөгийн нэмэлт цалин олгодог болов.  Тэргүүлэх зэрэгтэй мэргэшсэн ажилчны нэмэгдэл олгож эхэллээ. Ажилтан бүртээ орон сууц худалдан авахад олгодог байсан 8 сая төгрөгийг нэмж 12.0 сая төгрөг буюу 50 хувиар нэмэгдүүлж, ажилчдын халуун хоолоор үйлчлэх зардлыг 49.3 хувиар нэмэгдүүллээ.

Фото. Б.Баттөгс

    Эрдэнэт үйлдвэрийн Тээвэр ложистикийн төвд төмөр замын засвар үйлчилгээний зориулалттай ПРМ-5У маркийн машин хүлээн авлаа. ОХУ-д үйлдвэрлэсэн уг техник нь төмөр замын битон дэр солих, хотойсон замыг чигжиж нэг түвшинд хүргэх, муруйсан гүйлттэй замыг тэгшлэх зориулалттай аж. Энэхүү жижиг оврын машин цагт 35 ширхэг битон дэр солих хүчин чадалтай.  Өмнө нь тус төвийн Замын аж ахуйн хэсгийн ажилчид 280 кг жинтэй төмөр битон дэр солих зэрэг засвар үйлчилгээний ажлыг гараар хийдэг байсан. Ийм  техниктэй болсноор энэ ажлаас үүдсэн ажилчдын эрүүл мэндэд нөлөөлөх сөрөг нөлөө арилж, хөдөлмөр хөнгөвчлөх юм. 
                                                                                                                     Я.Энхтуяа
 

    "Эрдэнэт үйлдвэр" ТӨҮГ-ын техник технологийн шинэчлэлийн хүрээнд Ус хангамжийн цехийн Эргэлтийн усны насосны станц дахь ЦН-3000-197 маркийн насосыг Япон улсын ЕBARA корпарацийн насосоор солих юм. Баяжуулах үйлдвэр болон Эргэлтийн ус хангамжийн хэсгийн өгөгдөхүүнийг үндэслэн “600х 400 CJNM” насосыг захиалан хийлгэсэн аж.  Саяхан Ус хангамжийн цехийн  Ерөнхий инженер Б.Баянбат, Эргэлтийн ус хангамжийн хэсгийн дарга А.Амарсайхан, цахилгааны механикч Матвеев А.Н нар  Токио хотод томилолтоор ажиллан, насосны туршилтад оролцлоо. Насосыг 24 цагийн турш ажиллуулан даралтын янз бүрийн утганд  түрэлт, цахилгаан эрчим хүчний зарцуулалт, холхивчуудын температур, чичиргээ, дуу чимээний өөрчлөлт зэргийг туршжээ. Мэргэжилтнүүд туршилтын тестийг үндэслэн захиалагчаас тавигдсан бүх үзүүлэлтийг хангасан гэж үзжээ. Түүнчлэн тэд Toshiba Mitsubishi electric industrial systems корпарацид зочлон дээрх насост зориулан үйлдвэрлэсэн  асинхрон хөдөлгүүртэй танилцсан байна.

    ОХУ-д үйлдвэрлэсэн 1978 онд суурилагдсан хуучин насос  цагт 3000 м3 ус шахдаг, 2500 кВт цахилгаан эрчим хүч зарцуулдаг бол, “EBARA”-ийн  насос  цагт 4000 м3 ус шахах хүчин чадалтай, 120 м-ийн түрэлттэй, 1800 кВт цахилгаан эрчим хүч зарцуулдаг аж. Уг насосыг суурилуулснаар бүтээмж нэмэгдэж, цахилгаан эрчим хүч хэмнэх юм байна. Насос нааш ачигдсан бөгөөд энэ сард багтан Эрдэнэтэд ирэх юм.

                                                                                                           Я.Энхтуяа

    Энэ онд Эрдэнэт үйлдвэр ТӨҮГ бүтээн байгуулалтын ажилд 420 орчим тэрбум төгрөгийн хөрөнгө оруулж, техник, технологийн томоохон шинэчлэлүүд хийснээр үйлдвэрлэлийн хүчин чадал нэмэгдсэн. Баяжуулах үйлдвэрийн хамт олон хөрөнгө оруулалт, бүтээн байгуулалтын их ажлын үр дүнд энэ онд анх удаа 32.2 сая тонн хүдэр боловсруулж, түүхэн дээд амжилт тогтоохоор хичээн ажиллаж байна. Тус цехийн үйлдвэрлэлийн үндсэн хэсгүүд болох Бултан тээвэрлэхээс эхлээд Шүүн хатаах, Хаягдлын аж ахуй хүртэлх бүхий л дамжлага дээр өргөтгөл, шинэчлэлийн ажил өрнөж, бүтээн байгуулалтын төслүүд амжилттай хэрэгжиж ашиглалтад орсноор энэхүү боломж бүрджээ. Дашрамд Эрдэнэт үйлдвэрийн төлөвлөгөөт бүх үзүүлэлт давж биелсэн амжилттай явна.   

М.Одгэрэл

Фото: Б.Баттөгс

    Эрдэнэт үйлдвэрийн Авто тээврийн цехийн хамт олон 2019 оныхоо төлөвлөгөөт үзүүлэлтүүдийг шинэ он гарахаас 13 хоногийн өмнө бүрэн биелүүлж, 2020 оны ажилдаа шамдан ороод байна.  Эрдэнэсийн тээвэрчид цехийнхээ өртөг зардлыг 5.1 тэрбум төгрөгөөр хэмнэж, нэг тонн/км ачаа эргэлтийн өөрийн өртгийг 23 төгрөгөөр хямдруулсан амжилттай ажиллав. Түүнээс гадна үйлдвэрийн газрын зүгээс тус цехэд 17,6 тэрбум төгрөгийн хөрөнгө оруулж, техникийн шинэчлэл хийсэн нь төлөвлөгөөт үзүүлэлтүүд хугацаанаас өмнө биелэхэд чухал нөлөө үзүүлжээ. 
    Амжилт, бүтээл арвин яваа Авто тээврийн цехийн хамт олон өчигдөр улирч буй оны ажлаа дүгнэн, шилдэг ажилтнуудаа тодруулан шинэ жилийн баяраа сэтгэл тэнүүн сайхан тэмдэглэлээ. Тус цехийн “Шилдэг шинийг санаачлагч ажилтан”-аар белазын засварчин Э.Улаанхүү, “Шилдэг удирдах ажилтан”-аар бүтээмж, инновацын мэргэжилтэн Ж.Пүрэвсүрэн шалгарсан бол “Шилдэг ажилтан”-аар экскаваторын машинч Б.Баттулга, механик Б.Содгэрэл, автобусны жолооч Х.Сандагдорж, Д.Болдбаатар, ачигчийн жолооч Д.Бямбасүрэн, белазын засварчин Ц.Пүрэвбат, О.Тэмүүжин, У.Энхбаясгалан, жолооч М.Бат-Эрдэнэ, М.Амарзаяа, сантехникийн засварчин Г.Сугарсүрэн, өргөн тээвэрлэх тоног төхөөрөмжийн засварчин Б.Баттөр, манаач Ц.Цолмонтуяа нар тодров. Харин “Шилдэг хамт олон”-оор А.Батдорж даргатай Эрчим зүйн алба, “Шилдэг шинийг санаачлагч хамт олон”-оор Т.Баярбат даргатай Тусгай зориулалтын машин механизмын засварын хэсгийнхэн тодорч, шагналаа гардлаа. 
 
М.ОДГЭРЭЛ 
  • Төгссөн сургууль:

Ш.Отгонбилэгийн нэрэмжит Технологийн сургууль

Мэргэжил:

Уул уурхайн инженер

Ажилласан туршлага:

Инженер зураг төслийн төвийн инженер зохион бүтээгч, Залуучуудын холбооны тэргүүн

Мэргэжил дээшлүүлсэн байдал:

ОХУ-ын Братскийн их сургуульд магистрын зэрэг хамгаалсан

Чин хүсэл:

Дэлхий дахинд асар хурдацтай хөгжиж байгаа техник технологийн эрин үед бид амьдарч байна. Монгол залуусын оюуны чадвар дэлхийд гайхагдаж эхэлсэн энэ цаг үед Эрдэнэт үйлдвэрийн залуучууд ч техник, технологийн дэвшил дээр суурилсан өндөр мэдлэг, ур чадвартай мэргэжилтэн болох нь чухал юм. Тэрээр Монгол залуус, тэр дундаа Эрдэнэт үйлдвэрийн залуусын оюуны чадавхийг дэлхийд нээн харуулахыг зорьж яваа залуу инженер.

-Та өглөөг хэрхэн эхлүүлдэг вэ? Өдөр бүр хэвшил болсон дадал бий юу?

-Орой эрт унтаж, өглөө эрт босож, өглөө бүрийг сэргэг эхлүүлэхийг эрмэлздэг. Өглөө 5-6 цагийн хооронд босож интернет орчны тусламжтайгаар өдөр бүрийн  шинэ мэдээ мэдээлэлтэй танилцан, и-мэйл хаягаа шалгаж, тухайн өдрийн төлөвлөсөн ажилдаа ордог.

-Таны амьдралын сэргээш юу вэ, хэнээс, юунаас урам зориг, эрч хүч авдаг вэ?

-Эрч хүч, урам зориг, зорилготой амьдрахад эргэн тойрны хүрээлэл хамгийн их нөлөөлдөг гэж боддог. Миний хувьд гэр бүл, хамт олон, найз нөхөд болон зорилго нэгтэй залуучууд, эргэн тойрны эерэг хандлагатай хүмүүсээс эрч хүч авдаг. Тэдний урмын үг сэргээш болдог.

-Хийж байгаа ажлын тань онцлог юу вэ? Эерэг сайн ба хэцүү бэрхшээлтэй талууд?

-Компьютер графикийн аргаар зураг төслийн ажил гүйцэтгэх нь миний үндсэн ажил. Илүү ойлгомжтой тайлбарлавал, импортын бараа бүтээгдэхүүн орлох тоног төхөөрөмжийн өөрчлөлт шинэчлэл, эвдрэл гэмтлийг сайжруулах, металл эд анги болон тоног төхөөрөмж байршуулах, технологийн ба ажлын зураг төслийг хариуцан хийдэг гэсэн үг л дээ. Хийж байгаа ажлаа гүнзгий мэдэх шаардлагатай байдаг тул хувь хүнээс эрэл хайгуулч зан, шинийг санаачлах чадвар илүүтэй шаарддаг. Энэ нь нэг талаар бэрхшээлтэй мэт санагдавч цаг үеэ даган хөгжиж, мэргэжил нэгт нөхөдтэйгээ зэрэгцэн урагшилж, хамт олны хүчээр бэрхшээлийн ард гардаг нь сайхан санагддаг.  

-Яг одоо ямар ажил дээр төвлөрч байна вэ?

-Бусад инженерээс ялгаатай нь инженер зохион бүтээгчдийн хувьд тухайн ажилдаа төвлөрөх, бодох шаардлага их гардаг тул ихэвчлэн чимээгүй орчинд ажилладаг. Нэг жижиг алдаанаас хөдөлмөр, хүч, цаг зарцуулж хийсэн бүтээлээ нурааж мэдэх тул өнөөдрийн нөхцөлд тохируулан оновчтой шийдлээр алдаагүй ажиллахыг хичээсээр ирсэн. Одоогоор Ус хангамжийн цехийн насос суурилуулалтын зураг дээр ажиллаж байна.

-Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаарч байна вэ?

-Үндсэн ажлынхаа хажуугаар Эрдэнэт үйлдвэрийн Залуучуудын холбоонд идэвхтэн гишүүнээс эхлэн тэргүүний үүрэгт албыг хашиж байна. Энэ ажил маань хувь хүнээс ажлын зохион байгуулалт, цаг хугацаа, хичээл зүтгэл шаарддаг ч тэр хэрээр өөрийгөө хөгжүүлж, өдөр бүр сорилттой нүүр тулдгаараа онцлогтой. Үйлдвэрээ гэсэн сэтгэл, эерэг хандлагатай, шинийг эрэлхийлсэн уурхайчин залуустай хамтарч ажиллах нь бага хугацаанд маш шаргуу, өндөр бүтээмжтэй ажиллах, өөрийгөө дайчлах хувь хүний чухал чадварыг надад суулгасан. Энэ жил манай Залуучуудын холбоо 20 жилийн ойн баяраа тэмдэглэлээ. Эрдэнэт үйлдвэрийн төлөө ололт амжилттай бүхнийг санаачлан хэрэгжүүлэх гол хүч нь залуучууд гэж би хардаг. Залуучууд эрхэлсэн ажилдаа тууштай, илүү хөдөлмөрч байж чадвал бүтээн байгуулалтыг цогцлоож чаддагийг Эрдэнэт үйлдвэрийн тасралтгүй ажилласан 41 жилийн түүх тодхон харуулж байна. Бид хамтдаа мэргэжил, мэдлэгээ дээшлүүлж, хамтдаа суралцан, Эрдэнэт үйлдвэр хэмээх их айлын төлөө зүтгэх болно.

-Та бусдаас суралцахыг илүүд үзсэн үү, өөрийгөө дайчлан суралцахыг чухалчилж ирсэн үү?

-Хүн өдөр бүр тодорхой хэмжээгээр бусдаас суралцдаг гэж боддог. Би ч бас өдийг хүртэл олон хүнээс суралцсаар явна. Харин хувь хүн өөрийгөө дайчлан суралцах нь амжилтанд хүрэхэд илүү ойртуулдаг гэж ойлгодог. Мөн өөрийн хийж буй зүйлсээс илүү их туршлага олж авдаг.

-Өөртөө хэвшүүлэхээр зорьж буй шинэ зүйлсээсээ хуваалцаач?

-Өөртөө хийж байгаа хамгийн том хөрөнгө оруулалт бол эрүүл мэнд. Иймээс эрүүл зөв хооллолт, дасгал хөдөлгөөн хийхийг чухалчилж байгаа.

-Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ?

-Эрдэнэт үйлдвэр олон мянган баялаг бүтээгчдийн амьдрал,ирээдүйд маш том хөрөнгө оруулалт хийж чадсан Монголдоо төдийгүй дэлхийд данстай үйлдвэр. Би 2005 онд Эрдэнэт үйлдвэрийн ажилтан болсон. Сүүлийн жилүүдэд үйлдвэрийн залуучуудын тоо эрс нэмэгдэж байна. Манай үйлдвэрийн ирэх 60 жилийн дүр төрх залуучуудаас шалтгаалах учраас залуучууддаа хандаж хэлэхэд хүч чадал, эрдэм мэдлэгээ харамгүй зориулан ажил мэргэжилдээ чин сэтгэлээсээ хандаж ажиллахыг хүсмээр байна. Залуу хүнийг зорилго нь чимэх учиртай. Хөдөлмөрийн үнэ цэнийг хүн бүрт мэдрүүлж, үр шимийг нь ч харамгүй өгч чаддаг буянтай үйлдвэрт ажиллаж байгаадаа баяртай явдаг.

 

2019 оны 12 дугаар сарын 20

   Монгол Улсын Засгийн газрын 2019 оны 03 дугаар сарын 06-ны өдрийн 91 дүгээр тогтоолоор “Эрдэнэт үйлдвэр” ХХК-ийн үйл ажиллагааг Засгийн газар шууд хяналтад авч онцгой дэглэм тогтоосон. Засгийн газрын 2019 оны 03 дугаар сарын 21-ний өдрийн 102 дугаар тогтоолоор “Эрдэнэт үйлдвэр” ХХК-ийн статусыг өөрчлөн 100 хувь төрийн өмчит үйлдвэрийн газар болгосон билээ.

   Улсын Их Хурлын 2019 оны 09 дүгээр сарын 13-ны өдрийн 74 дүгээр тогтоолоор “Эрдэнэт үйлдвэр” ТӨҮГ-т тогтоосон онцгой дэглэмийн хугацааг 6 сараар сунгасан бөгөөд үүнтэй холбогдуулан үйлдвэрийн удирдлагын зүгээс шаардлагатай арга хэмжээг авч хэрэгжүүлэн үйлдвэрлэлийн тасралтгүй ажиллагааг ханган эдийн засгийн үндсэн үзүүлэлтүүдийг түүхэн өндөр хэмжээнд хүргээд байгааг энд онцлон тэмдэглэж байна.

   Өнөөдрийн байдлаар Эрдэнэт үйлдвэрийн үйл ажиллагаа хэвийн жигд явагдаж, 2019 оны үйлдвэрлэлийн төлөвлөгөө оны эхнээс 100-аас дээш хувиар биелэгдэж, хүлээгдэж буй гүйцэтгэлээр төлөвлөгөөт үзүүлэлтүүд 100.0-107.4 хувиар биелэхээр байна. Энэ онд 37 сая тн хүдэр олборлож, 32 сая тн хүдэр боловсруулна.Түүнчлэн улс, орон нутгийн төсөвт оны эцэс гэхэд 930 гаруй тэрбум төгрөг төвлөрүүлэхээр байгаа зэрэг нь Эрдэнэт үйлдвэрийн түүхэнд хамгийн өндөр үзүүлэлт болж төсвийн өмнө хүлээсэн үүргээ нэр төртэй биелүүлж байна. Энэхүү үзүүлэлтийг 2016 оны дүнтэй харьцуулахад 5 дахин өсчээ.

   “Эрдэнэт үйлдвэр” ТӨҮГ-ын 2020 оны эдийн засгийн үндсэн үзүүлэлт, зорилтот түвшин болон хөрөнгө оруулалтын төлөвлөгөөг энэ оны 12 дугаар сарын 10-ны өдөр Төрийн өмчийн бодлого, зохицуулалтын газраар батлуулсан нь  үйлдвэрийн газрын төсөв төлөвлөгөө сүүлийн  жилүүдэд хуулийн хугацаанд батлуулсан тохиолдол болсон нь байгууллагын хувьд засаглалын хямрал арилсны илэрхийлэл болж байна.

   Уул уурхайн салбарт олборлох, боловсруулах чиглэлээр үйл ажиллагаа явуулж, технологийн тасралтгүй ажиллагаатай горимоор ажиллаж, жилдээ 2 их наяд орчим төгрөгийн бүтээгдэхүүний борлуулалт хийдэг, дэлхийн хэмжээний үйлдвэрийн хувьд орчин үеийн дэвшилтэт найдвартай техник, тоног төхөөрөмж болон сэлбэг, материалын худалдан авалтыг холбогдох хууль, тогтоомжийн хүрээнд хэрэгжүүлж байна.

  Сүүлийн үед нийгмийн цахим сүлжээ, мэдээллийн зарим нэгэн цахим хуудсаар  “Эрдэнэт үйлдвэр” ТӨҮГ, түүний удирдлагуудтай холбосон гүтгэлгийн шинжтэй, баримт нотолгоогүй, ор үндэслэлгүй мэдээлэл нийтлэгдэж, Эрдэнэт үйлдвэрийн бүтээлч хамт олны амжилтыг харлуулж, урам зоригийг мохоох, олон нийтийн санаа бодлыг төөрөгдүүлэх оролдлого хийж байгаад харамсаж байна.

  Монгол Улсын Засгийн Газраас Эрдэнэт үйлдвэрт онцгой дэглэм тогтоосон энэ цаг үед олон нийтийн цахим сүлжээг ашиглан баялаг бүтээгч Уурхайчин хамт олны нэр хүндэд санаатайгаар халдсан, худал мэдээлэл түгээж байгаа нь улс орны нийгэм, эдийн засгийн гол түших баганы нэг Эрдэнэт үйлдвэрийн тогтвортой үйл ажиллагааг доголдуулах, удирдлагын түвшинд зорьж хэрэгжүүлж байгаа үйл ажиллагаа, үр дүнг харлуулах зорилгоор зохион байгуулалттай хийж байгаа үйлдэл гэж үзэж байна.

  Мэдээллийн үнэн зөв, бодитой байдлыг хангаагүй, эх сурвалж нь тодорхойгүй мэдээллийг гүтгэлэг, таамаг хэлбэрээр олон нийтэд түгээж буй нь Монгол Улсын Эрүүгийн хуулийн 14.3 дугаар зүйлийн 1 дэх хэсэг, Зөрчлийн тухай хуулийн 6.21-р зүйлийн 1 дэх хэсэг, Хэвлэл мэдээллийн эрх чөлөөний тухай хуулийн 3 дугаар зүйлийн 3.1 дэх заалтыг тус тус зөрсөн гэж үзэж байна. Тиймээс ор үндэслэлгүй гүтгэлэг, худал мэдээлэл нийтэлж, түгээхгүй байхыг анхааруулъя.

  Баримт нотолгоогүй, худал мэдээ, мэдээллийг захиалгаар түгээн, нийтэлж буй зарим цахим хуудас, энэхүү бусармаг үйл ажиллагаагаа зогсоож, залруулга хийгээгүй тохиолдолд “Эрдэнэт үйлдвэр” ТӨҮГ-ын зүгээс  хууль, хяналтын байгууллагад хандах болно гэдгийг албан ёсоор мэдэгдэж байна.

  Эрдэнэт үйлдвэрийн талаарх үнэн бодит мэдээллийг албан ёсны эх сурвалжаас авч түгээхийг нийт ЁС ЗҮЙТЭЙ Хэвлэл мэдээллийн байгууллага, сэтгүүлчдэд уриалж байна.   

 

“ЭРДЭНЭТ ҮЙЛДВЭР” ТӨҮГ-ЫН

МАРКЕТИНГИЙН ХЭЛТЭС, ХУУЛИЙН ХЭЛТЭС

    “Эрдэнэтээ сүү, сүүн бүтээгдэхүүнээр хангана” хэмээн зоримог шийдэж, 10-аад жилийн өмнө бизнест хөл тавьсан уурхайчин залууг “Эрдэнэтээ дэмжье” булангийн ээлжит зочноор урьлаа. Тэрээр сүүн бүтээгдэхүүний зах зээлд өнөөг хүртэл хүч сорихдоо өндөр чанартай сүүгээр хэрэглэгчдийг хангахын тулд малынхаа үүлдэр угсааг сайтар судлах хэрэгтэйг олйгож, алатау, талын улаан, хар тарлан, симентал зэрэг шилмэл үүлдрийн үнээг фирмдээ нутагшуулжээ. Аливааг эхлүүлэх амаргүй хэдий ч нэгэнт хөл тавьсан талбар дээр гурвантаа өөрчлөлт шинэчлэл хийж, үйлдвэрээ өнөөдрийн хэмжээнд өргөжүүлснийг харахад бахархалтай. “Баяжуулагч ододХХК-ийн Ивээлтсүүний үйлдвэрийн захирал Б.Баттөртэй нэг сэдвээр ярилцлаа.

     -ҮНЭЭНИЙ ФИРМЭЭ ӨРГӨЖҮҮЛЖ, ҮЙЛДВЭР БАЙГУУЛАХ САНАА ХЭДИЙД ТӨРӨВ?

    -Анх ямар ч мэдлэггүй, Улаанбаатараас үнээ авчирсан. Үнээний фирмийн үйл ажиллагаа жигдрээд ирэх үед сүүгээ зах зээлд борлуулахад асуудалтай болж, сүүний илүүдэл гарах болсон. Зарах гэж ажил болж байхаар нэмүү өртөг шингэсэн бүтээгдэхүүн гаргая, Эрдэнэт сүүний үйлдвэрлэл муутай учраас үйлдвэр байгуулъя гэж зориглон, 2012 онд Ингээд хойд хөршөөс технологи, тоног төхөөрөмжөө худалдан авчирсан. Өнөөдрийг хүртэл энэ салбартаа үнэнчээр явлаа. Судалгааны ажлыг нэг жилийн хугацаанд хийхдээ оро стехнологи сонгон оруулж ирсэн. Орон орны технологи буюу хаанахын ямар хөрөнгөөр, ямар үед хийсэн зэргээр өөр байх жишээтэй. Манай үйлдвэринй хувьд хуурай сүү, химийн нэмэлтгүй бүтээгдэхүүн үйлдвэрлэж, энэ төрлийн зах зээлд өрсөлдөж, өөрийн гэсэн хэрэглэгчтэй болоод байна. 

    -ТА ЯМАР МЭРГЭЖИЛТЭЙ ВЭ? БИЗНЕСИЙН САЛБАРТ БАЙНГЫН ӨСӨЛТТЭЙ БАЙЖ, ШИНИЙГ ЭРЭЛХИЙЛЭХЭД ӨӨРИЙГӨӨ ХЭРХЭН ХӨГЖҮҮЛДЭГ ВЭ?

  -Би уул уурхайн баяжуулагч мэргэжилтэй. Эрдэнэт үйлдвэрт кранчнаар 9 жил ажиллаад, дараа нь Монголын алт компани /МАК/-д тээрмийн машинчаас үйлдвэрийн дарга хүртэл 10-аад жилийн хүч хөдөлмөрөө зориулсан. Том компанид ажиллахдаа бизнес гэж юу болохыг харж, “Хийе гэж хүсвэл хүн юуг ч бүтээж болдог юм байна” гэсэн урам зоригийг авч байлаа. Хувиараа ажиллаж үзье гэж шийддээд энэ салбарт хөл тавьсан. 34 насандаа гаргасан энэ шийдвэр зоригтой алхам байсан шүү. Тухайн үед компаниа уурхайн төслүүд бичих, уул уурхайн тоног төхөөрөмжийн засвар, үйлчилгээ, үнээний фирм чиглэлээр байгуулсан. Анх судалгаа хийгээд явахад хэлний чадвар муу, сүүний үйлдвэрийн талаар ямар ч мэдлэг, ойлголтгүй байлаа. Өнөөдрийг хүртэл алдаж онож явсаар тал бүрээр өөрийгөө хөгжүүлсэн. Малын эмч, зоотехник, автомашины засварчин, туслах ажилтан, нягтлан гээд бүхий л ажлаа өөрийн биеэр хийж байсан. Одоо төсөл бичих зав муутай болоод ч тэр үү олон зүйлд хүч тарамдаж байхаар нэг ажлаа сайн бөгөөд чанартай хийхийг эрмэлздэг болсон.

     -ОРОН НУТАГТ СҮҮНИЙ ҮЙЛДВЭР БАЙХ НЬ ЯМАР АЧ ХОЛБОГДОЛТОЙ ГЭЖ ХАРЖ БАЙНА ВЭ?

    -Сүүнд сүүний хүчил буюу бактер гэж бий. Энэ бактер маш эмзэг тул хадгалалтын горим, нарийн температур шаарддаг. Харин сүүний шинж чанар нь үнэр, амтыг хурдан шингээж, хурдан гашилдгаараа онцлогтой. Тиймээс орон нутагт сүү, сүүн бүтээгдэхүүний үйлдвэр байх нь туханй орон нутгийн хэрэглэгчид өдөр бүр шинэ бүтээгдэхүүн авах боломжоор хангаж байгаа юм. Холоос тээвэрлэлт хийхэд хадгалалтын горим алдагдах магадлал өндөр тул хэрэглэгчдээ хамгийн ойр гэдэг нь бидний давуу тал болж байна. Манай үйлдвэр сүүгээ удаан хадгалахад зориулсан хүнсний нэмэлт хийж үзээгүй. Эко бүтээгдэхүүнийг дэргэдээсээ авах боломжтой байна гэдэг Эрдэнэтчүүдийн хувьд том дэвшил гэж хардаг.

     -САНААГАА АЖИЛ ХЭРЭГ БОЛГОХЫН ТУЛД САНХҮҮГИЙН АСУУДЛАА ХЭРХЭН ШИЙДВЭРЛЭСЭН БЭ?

   -Үйлдвэрлэл эрхлэх нь худалдаа наймаа хийхээс эрс ялгаатай ойлголт гэж би боддог. Түүхий эдээ хаанаас хэрхэн бэлтгэх, хаана нийлүүлэх, ямар технологиор боловсруулах, эргээд зах зээлд хэрхэн таниулж, олонд түгээх вэ гэсэн цогц үйл ажиллагааг эрхэлдэг онцлогтой. Манай компани сүүнээс гадна тараг, аарц, шар тос, сүү, ааруул зэрэг 8 нэрийн бүтээгдэхүүнээ 18 төрлийн савлагаатай гаргаж байна. 2012 оноос хойш өнөөдрийг хүртэл хугацаанд үйлдвэрээ 3 үе шаттай өргөжүүлсэн. Монголд зээлгүй бизнес эрхлэгч гэж байхгүй байх. Манай компани ч тэр л жимээр явж ирсэн. Ер нь хүнсний салбар анхны хөрөнгө оруулалтаа урт хугацаанд нөхдөг тул ашиг алдагдлын балансаа бариад л явж байна.  

    Сүүний аж ахуйг Орхон аймагтаа жишиг болохуйц хэмжээнд хөгжүүлж, “Улсын аварга фирм”-ээр шалгарч байсан. Бид 20 км зайд байгаа өөрийн фирмээс үйлдвэрлэлийнхээ 40-өөд хувийг, эрчимжсэн мал аж ахуйн бүс болох Говил багаас 10-аад, Ингэтийн сангийн аж ахуйгаас 2-3, Хангал сумаас 2 фирм нийлүүлэлт хийж байна. Эрчимжсэн мал ахуйн фирмийг түшиглэдэг нь ч бас учиртай. Нэгд, өвлийн улиралд сүүгээр тасалдахгүй, хоёрт, эрүүл мэндийн шаардлага хангасан байдаг. Жилийн дөрвөн улиралд зогсолтгүй ажиллах бидний хувьд нийлүүлэгчдээ алдахгүй байх л хамгийн чухал.

    -ЭРДЭНЭТ ҮЙЛДВЭРТЭЙ ХАМТЫН АЖИЛЛАГААНЫ ХҮРЭЭНД АЖИЛЛАГСДЫН ХОР СААРМАГЖУУЛАХ БҮТЭЭГДЭХҮҮН НИЙЛҮҮЛЖ БАЙСАН САНАГДАНА?

   -Манай компани 2014-2016 оны хооронд Эрдэнэт үйлдвэрийн 10-аад цехийн ажиллагсдад хор саармагжуулах бүтээгдэхүүн нийлүүлж байсан. Өнгөрсөн оны тухайд тендерт оролцсон ч тарагны савлагаа хэмжээ бага шалтгаанаар тавьсан шаардлагад нь нийцээгүй. Энэ жил мөн өрсөлдөж байна. Томоохон хэрэглэгч өдөр бүр 450 ширхэг бүтээгдэхүүн худалдан авах нь жижиг цехүүдэд томоохон дэмжлэг болдгийг хэлэх нь зөв байх. Тэр хэрээр бүтээгдэхүүнээ олонд таниулж, хэрэглэгчээ бий болгох эерэг тал бас бий. Уурхайчдын зүгээс “Танай бүтээгдэхүүн хаачив” гэж их асуудаг. Хэрэв бид тендерт шалгарвал үндсэн үйлчлүүлэгчдээс гадна тендерийн ханган нийлүүлэлтээ аль алийг нь амжуулах боломж, нөөц хангалттай байна. Одоогоор Эрдэнэтийн эргэн тойронд 7-8 фирмийн нөөц бий. Монгол Улсын төр засгаас сүүний урамшууллын талаар ярьж байна. Энэ асуудал шийдэгдвэл хөгжил илүү хурдацтай явна байх.

      -ЭНЭ ОНЫ ОЛОЛТ АМЖИЛТААСАА ОНЦЛОХГҮЙ ЮУ?

     -Хатаасан сүүний тоног төхөөрөмжийг туршиж, горимоо тогтоосон нь бидний хувьд том амжилт боллоо. Мөн 10-аад жил энэ салбарт ажиллахдаа өөрийн нэрийн цөцгийг компанийнхаа нүүр царай болгох гэж хичээн ажилласан. Энэ хичээл зүтгэл маань ч талаар болсонгүй, үр шимийг нь бид амсаж, “Орон нутгийн брэнд бүтээгдэхүүн”-ээр шалгарлаа. Бид Эрдэнэтийн брэнд бүтээгдэхүүний лого эзэмших эрхийг гардсандаа баяртай байна. Төслөө анх бичих үед ОХУ-аас оруулж ирж байгаа цөцгийний зах зээлийг 100 хувь, аарцны 20 хувь, сүү, тарагны хэрэгцээний 40-өөд хувийг хангана гэж зорьсон. Өнөөдрийн байдлаар Орхон аймгийн хэрэглэгчдийг цөцгийгөөр 100 хувь хангаж, аарцаа тодорхой зорилтод хүргэсэн. Цөцгийн тос бидний санасан хэмжээнд хүрээгүй ч зах зээлийн 20-25 хувийг сүү, сүүн бүтээгдэхүүнээр хангаж байна. Бүтээгдэхүүнээ зах зээлд хэдийнэ таниулж, байнгын хэрэглэгчтэй болсон. Энэ бол бидний хувьд том амжилт.

     -СҮҮНИЙ НИЙЛҮҮЛЭЛТ УЛИРЛЫН ШИНЖ ЧАНАРТАЙ БАЙХ НЬ ҮЙЛДВЭРЛЭЛД НӨЛӨӨЛӨХ ҮҮ?

    -Тавдугаар сарын сүүлээс есдүгээр сарын эхэн хүртэл малчдын сүүнд түрэгддэг тул боловсруулсан сүүний борлуулалт эрс багасдаг талтай. Сүүний фирмүүдээ тогтвортой нийлүүлэгч болгох үүднээс нэг жилийн хугацаатай гэрээ байгуулан, зуны улиралд зах зээлийн ханшаас 100-150 төгрөгөөр өндөр үнээр сүүгээ худалдаж авч байна. Зуны улиралд  сүүний гарц нэмэгдчихээр илүүдэл сүүгээ яах вэ гэдэг асуудалтай тулгарсан. Энэ асуудлыг эерэгээр, ашигтай байдлаар шийдвэрлэх нэг зам нь хадгалалтын хугацаа даах чадвартай бүтээгдэхүүн буюу аарц, ааруул, шар тос, цөцгий, цөцгийн тос гэж үзсэн. Сүүлийн жилүүдэд энэ маягаар түүхий эдээ боловсруулж, жилийн хэрэгцээгээ зундаа нөөцөлж байна. Савласан сүүгээ ундны сүүний стандартын дагуу боловсруулж, шууд уух хэрэгцээнд гаргаж байна. Иргэд 3.2 хувийн тослогтой сүүгээр цайгаа сүлчихээд түүнийгээ шингэн байна гэж голох нь бий. Уг нь үйлдвэрийн аргаар боловсруулж, ариутгасан сүүг түүхий сүүтэй харьцуулах аргагүйг ойлгох хэрэгтэй юм.

     -БОРЛУУЛАЛТЫН СУВГАА ХЭРХЭН ОЛЖ БАЙНА ВЭ?

   -Цөцгий, аарцаа Есөн эрдэнэ худалдааны төв, бусад бүтээгдэхүүнээ гэрээт байгууллага юмуу захиалгаар гаргадаг. Манай цагаан идээ амьд бүтээгдэхүүн. Тэр утгаараа дэлгүүрийн лангуун дээр удаан хугацаанд хадгалах боломжгүй. Хөргүүрийн температур, хадглалатын горимоос гадна байнгын нийлүүлэлт жижиглэн худалдаанд маш чухал юм билээ. Өнөөдрийн байдлаар бид Орхон аймагт үйл ажиллагаа явуулдаг 27 улсын цэцэрлэг, УБТЗ-ын Дархан-Уул аймаг хүртлэх 9 цэцэрлэгийг цагаан идээгээр хангаж байна. Онцгой шаардлагаар “Медипас” эмнэлэг, “Бэрэн металл” ХХК, Дулааны цахилгаан станцын ажилтнуудад хор саармагжуулах бүтээгдэхүүн нийлүүлж, захиалгын дагуу байнгын үйлчлүүлэгчиддээ хүргэлт хийж байна.

    -ХЭДЭН ХҮНИЙГ АЖЛЫН БАЙРААР ХАНГАСАН БЭ?

    -Компанийн хэмжээнд 18 хүнийг ажлын байраар хангасан. Эдгэрээс сүүний үйлдвэрт 13 ажилтан бий.

    -ЦААШДЫН ХӨГЖЛӨӨ ХЭРХЭН ТОДОРХОЙЛОВ? ИРЭХ ОНЫ ЗОРИЛГООСОО ХУВААЛЦВАЛ?

    -Тодорхой хугацаанд бизнес хийж, амтанд нь орсон хүн бололцоо л гарвал бага багаар өргөтгөхийг хүсдэг. Миний хувьд ч төлөвлөгөө гаргаж, шинэ зургаа бэлтгэсэн. Мэдээж цаашдаа үйлдвэрлэлээ өргөжүүлж, тэлэх бодол бий. Алсын зорилтоо “Дэлхийд танигдсан орон нутгийн брэндийг бий болгох”-ыг зорьж байна. Манай компани энэ онд сүү хатаах шинэ технологи нэвтрүүлэхээр тоног төхөөрөмжөө оруулж ирсэн. Туршилтаа ч амжилттай хэрэгжүүллээ. Хатаах технологи нь сүүний тослогийг тодорхой хэмжээнд ялган авч хатаах, улмаар сэргээн хэрэглэхэд сүүний чанарын 80 хувийг барьж байх онцлогтой юм. Энэхүү шинэ төрлийн бүтээгдэхүүнийг хуурай сүүтэй харьцуулахад будагч бодис, химийн нэмэлт агуулаагүй тул малаас гаралтай шимт бүтээгдэхүүн болно гэдэгт бид итгэлтэй байна. ОХУ-д төдийгүй дэлхийд танигдсан технологийг Монголдоо нэвтрүүлсэн шинэ алхамаар ирэх оныг эхлүүлж байгаадаа баяртай байна.

    -ШИНЭ ОНЫ БОСГОН ДЭЭР ТА ХЭНД ЗОРИУЛАН МЭНДЧИЛГЭЭ ДЭВШҮҮЛЭХ ВЭ?

   -Эрдэнэтчүүддээ, хэрэглэгчиддээ 2020 онд эрүүл энх, сайн сайхан байхыг хүсье. Бидэндтэй хамт байдаг та бүхэндээ баярлалаа.

И.Чинтогтох

Фото: Б.Баттөгс

Мэдээний төрөл

Календарь

« 1-р сар 2020 »
Да Мя Лх Пү Ба Бя Ня
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Зургийн цомог