Үйлдвэрлэл

Монгол-Оросын найрамдлын өдрүүдийн хаалтын үйл ажиллагаа боллоо. Найрамдлын өдрүүд  10-р сарын 5-аас эхлэн сарын хугацаанд үргэлжлэв.  Монгол-Оросын найрамдлын нийгэмлэгийн Орхон аймаг дахь салбар зөвлөлөөс  58 дахь жилийн  найрамдлын өдрүүдийн хүрээнд ЕБС-ын сурагчид болон цэцэрлэгийн багачуудын дунд олон талт үйл ажиллагааг  зохион байгуулсан юм.

Мөн тус нийгэмлэгээс Найрамдлын өдрүүдийн хүрээнд ОХУ-ын кино өдөрлөгийг Уурхайчин соёлын ордонд зохион байгууллаа. Өдөрлөгийг Монгол-Оросын найрамдлын нийгэмлэгийн Орхон аймаг дахь салбар зөвлөлийн тэргүүн Б. Мажинбуу нээж, мэндчилгээ дэвшүүлж, Дархан-Уул аймаг дахь ОХУ-ын дэд консул Кузнецов Дмитрий Николаевич нарын зочид ОХУ-ын мэргэжилтнүүд, уран бүтээлчдэд хүндэтгэл үзүүлсэн юм.

Өдөрлөгийн үеэр  ОХУ-ын  “Российскийн рененссанс” кино наадамд оролцсон ОХУ-ын  уран бүтээлчдийн тоглолт, “Дурлалын бооцоо”  инээдмийн  шинэ киног үзэгчдийн хүртээл болгов. Мөн “Кавказад болсон явдал”  киноны гол дүрийн жүжигчин  Н.В.Варлей  хүрэлцэн ирж үзэгч, шүтэн бишрэгчидтэйгээ уулзсан юм. Тус үйл ажиллагаанд Эрдэнэт үйлдвэрийн удирдлагууд, Эрдэнэт хотод ажиллаж амьдарч байгаа 200 гаруй гадаадын мэргэжилтнүүд оролцож, Оросын уран бүтээлчдийн шилдэг тоглолтыг үзэж сонирхов.

Нийгмийн хариуцлагын жишиг загварыг бүтээгч Эрдэнэт үйлдвэр ХХК,  орон нутгийн хөгжил дэвшилд хувь нэмрээ оруулах бодлогын хүрээнд Орхон аймгийн аж ахуйн нэгж,  үйлдвэрлэгчдийг дэмжих зорилт  хэрэгжүүлдэг.  Өөрөөр хэлбэл, тус үйлдвэр бүхий л хэлбэрээр орон нутгийн үйл ажиллагаанд дэмжлэг өгч  байгаагийн томоохон хэсэг нь жижиг дунд үйлдвэрлэгчид рүү хандсан  худалдан авалтын бодлого юм. Орхон аймгийн үйлдвэрлэгчидтэй  хамтын ажиллагааны хүрээгээ  тэлэх, тэднээс бараа бүтээгдэхүүн худалдан авах хэмжээг нэмэгдүүлэх чиглэл баримталж буй нь бизнес эрхлэгчдэд таатай нөлөө үзүүлж байна. Тухайлбал, 2016 онд Эрдэнэт үйлдвэр орон нутгийн  11 үйлдвэрлэгчтэй хамтын ажиллагааны гэрээ байгуулан 7,7 тэрбум төгрөгийн, 2017 онд 13 аж ахуйн нэгжээс 11,5 тэрбум төгрөгийн бараа бүтээгдэхүүн худалдан авчээ. Тэгвэл  2018 оны 9 сарын байдлаар уг үзүүлэлт 1,5 хувиар өссөн дүнтэй байна. Орон нутгийн үйлдвэрлэгчидтэй энэхүү хамтын ажиллагааны үйл явц,  гарч  буй ахиц дэвшил болон хүндрэл бэрхшээлийн  талаар санал бодлоо солилцох зорилготой уулзалтыг Эрдэнэт  үйлдвэрийн зүгээс санаачлан зохион байгуулдаг. Харин хоёр дахь удаагийн уулзалт өнөөдөр болов.

Үндэсний үйлдвэрлэлийг хөгжүүлэхийн тулд үйлдвэрлэгчдээ дэмжих ёстой

Орхон аймгийн  үйлдвэрлэгчидтэй хийх  уулзалтын эхэнд Эрдэнэт үйлдвэр ХХК-ийн Хууль эрх зүйн газрын дарга Д.Цэрэнбадам хамтын ажиллагааны талаар мэдээлэл хийв. Бид энэ оны 2 дугаар сарын 2-ны өдөр үйлдвэрлэгчдээ хүлээн авч уулзсан. Тэр  үеэр бид та бүхэнтэй хамтран  ажиллах  гэрээ байгуулахад ямар асуудал байгаа эсэх, Эрдэнэт үйлдвэрээс энэ чиглэлээр ямар дүрэм журмыг  баримтлан ажиллаж буй талаар мэдээлж байсан бол энэ удаа өмнөх уулзалтын шийдвэр, үр дүнг  нээлттэй хэлэлцэх, энэ хугацааны үйл ажиллагааны тайланг мэдээлэх болно хэмээн тэрээр хоёр дахь уулзалтын зорилгыг тодотгов.  Мөн 2018 онд Эрдэнэт үйлдвэр ХХК-ийн 40 жилийн ой тохиож буй. Ойн хүрээнд олон ажил,үйл ажиллагааг зохион байгуулж байна. Үүний дотор Хууль эрх зүйн газар болон Хангамжийн хэлтсээс үндэсний үйлдвэрлэлээ дэмжих, орон нутгийн компаниудтай байгуулах хамтын ажиллагааны гэрээг ойлгомжтой, ил тод болгох зорилтыг хэрэгжүүлж ирлээ. Анхны уулзалтанд Орхон аймгийн 16 аж ахуйн нэгжийн төлөөлөл оролцож байв. Эдгээрийн 15 нь үйлдвэрлэгч компани. Бид хамтын ажиллагааны мэдээллээ хэвлэл мэдээлэл болон өөрийн цахим хуудсаар дамжуулан бүхий л хэлбэрээр нээлттэй хүргэхийг зорьж байна. Тиймээс өнөөдрийн уулзалтаар оны эхний 9 сарын тайлан мэдээллийг та бүхэнд хүргэнэ. Энэ бол бидний хамтын ажиллагаа цаасан дээр бус хөрсөн дээр бууж буйг бодитоор харуулах нэг хэлбэр юм. 2019 он бол та бидний хувьд том дэвшлийн жил байх болно.  Өөрөөр хэлбэл,  хамтын ажиллагаатай компаниудын тоо болон худалдан авалтын үнийн дүнг нэмэгдүүлнэ гэсэн үг. 2016 онд Эрдэнэт үйлдвэр үндэсний аж ахуйн нэгж болсон. Ингэснээр Монгол улсын хууль тогтоомжийг мөрдөх, түүний хүрээнд үйл ажиллагаагаа явуулах үүрэг хүлээж байгаа. Ер нь Монгол Улсын Их хурал, Засгийн газраас баримталж буй бодлогод үндэсний үйлдвэрлэлийг дэмжин, хөгжүүлнэ гэсэн том зорилт бий. Энэхүү зорилтыг бид бодит ажил хэрэг болгох ёстой. Тиймээс худалдан авалтын бодлого, дүрэм журмыг үүнд чиглүүлж, ил тод нээлттэй, үр өгөөжтэй байх арга хэлбэрийг нэвтрүүлнэ. Үйлдвэрлэгчид та бидний хамтын ажиллагаа харилцан ашигтай, үр дүнтэй байж гэмээнэ үндэсний үйлдвэрлэл хөгжин дэвжих таатай хөрс суурь бэхжинэ. Ирэх он энэхүү зорилтын хэрэгжилтийн жил байна” хэмээн мэдээлэлдээ дурьдсан юм.  

Үйлдвэрлэгчид өсч, нийлүүлэгчдийн тоо буурчээ

Эрдэнэт үйлдвэр ХХК, Орхон аймгийн Үйлдвэрлэгч аж ахуйн нэгжийн хамтын ажиллагааны тайлан, илтгэлийг Хангамжийн хэлтсээс танилцуулав. Эрдэнэт үйлдвэр худалдан авалтын үйл ажиллагаандаа тухайн бараа бүтээгдэхүүн нь тус үйлдвэрийн хэрэгцээнд нийцсэн байх, чанар стандартын шаардлага хангасан байх, зах зээлийн үнэтэй дүйцэхүйц байх, заасан хугацаанд нийлүүлдэг байх гэсэн дөрвөн үндсэн зарчмыг баримталдаг.

2018 оны эхний 9 сарын байдлаар Эрдэнэт үйлдвэр дотоод болон гадаадын аж ахуйн нэгжүүдтэй нийт 488 худалдан авалтын гэрээ байгуулсны 29 хувь буюу 28,9 тэрбум төгрөгийн 143 худалдан авалтын гэрээг Орхон аймгийн аж ахуйн нэгжүүдтэй байгуулжээ. Энэ нь өнгөрсөн оны мөн үетэй харьцуулахад 149 хувиар өссөн байна.  Дотоодын компаниудаас энэ хугацаанд нийт 102 тэрбум төгрөгийн бараа бүтээгдэхүүн худалдан авчээ.  Энэ нь өмнөх онуудаас харьцангуй өндөр үзүүлэлт аж. Тухайлбал, 2015 онд 51,3 тэрбум, 2016 онд 62 тэрбум, 2017 онд 102 тэрбум, харин энэ оны эхний 9 сарын байдлаар дотоодын үйлдвэрлэгчдээс авсан  худалдан авалтын үнийн дүн 102 тэрбумд хүрээд байна. Сүүлийн 4 жилд тус үйлдвэр Орхон аймгийн аж ахуйн нэгжүүдээс нийт 150 тэрбум төгрөгийн худалдан авалт хийсэн бөгөөд үүний 31,9 тэрбум төгрөгийн худалдан авалтыг үйлдвэрлэгч компаниудаас авчээ. Эндээс харахад Орхон аймгийн нийлүүлэгч компаниудаас авах худалдан авалтын хэмжээ  буурч,  үйлдвэрлэгч компаниудаас авсан худалдан авалт өссөн байна. Одоогийн байдлаар орон нутгийн үйлдвэрлэгч аж ахуйн нэгжүүдтэй хийсэн гэрээний 81 хувь нь 100 хувийн гүйцэтгэлтэй байгаа нь цаашид хамтран ажиллах үйлдвэрлэгчдийн тоог нэмэгдүүлэх чиглэлд эерэг нөлөө үзүүлж байгаа аж.  

Орон нутгийн үйлдвэрлэгчдээ хүлээн авч уулзаж буйд талархав

Эрдэнэт үйлдвэрээс хоёр дахь удаа зохион байгуулж буй хамтын ажиллагааны тайлан уулзалтад оролцсон компанийн төлөөллүүд дээрх үгийг онцолж байлаа. Энэ удаагийн уулзалтад Орхон аймагт үйлдвэрлэл эрхэлдэг 19 компанийн төлөөлөл оролцож, санал бодлоо илэрхийлсэн. Орон нутгийн үйлдвэрлэгчдээ дэмжин, хамтын ажиллагааны харилцан ашигтай уян хатан бодлогыг хэрэгжүүлж буй нь бизнесийн нэн таатай орчныг бүрдүүлж байна гэж үйлдвэрлэгчид талархаж байв. Цаашид хамтын ажиллагааны хүрээг тэлэх, үйлдвэрлэгчдийн тоог нэмэгдүүлэх, худалдан авалтын гэрээний хугацааг уртасгахад хоёр талын үүрэг хариуцлага, зөв хандлага  юунаас ч илүү чухал гэдгийг онцолсон. Мөн уг уулзалтад “Эрдэнэтийн үйлдвэрлэгчдийг дэмжих холбоо” Төрийн бус байгууллагын Гүйцэтгэх захирал У.Энхбаяр оролцож, баялаг бүтээгч үйлдвэрлэгчдээ дэмжиж, Эрдэнэт хотын хөгжилд хамтран хувь нэмрээ оруулахыг уриаллаа. Энэхүү санаачилгыг  Эрдэнэт үйлдвэр уриалгахан хүлээн авч, бүх талаар дэмжин ажиллах болно гэдгийг уулзалтын үеэр Хууль эрх зүйн газрын дарга Д.Цэрэнбадам хэлэв.

М.Балжинням

 

Эрдэнэт үйлдвэрийн Энэрэл төвийн хүүхдүүд төрсөн өдрөө Монгол бахархлын өдөр тэмдэглэдэг. Тэд өнөөдөр хөгжлийн бэрхшээлтэй хүүхдүүдийн "Найдвар" төвөөр зочилж баяраа хуваалцав. Монголын үрс маш олон болтугай.

Орхон аймгийн 100 гаруй мянган иргэний хүнсний ногооны хэрэгцээний 80 хувийг дангаараа хангадаг Жаргалант сумынхан өнөөдөр "Алтан намар" хэлэлцүүлэг зохион байгууллаа.Тус үйл ажиллагаанд "Эрдэнэт" үйлдвэрийн Хөдөлмөрийн аюулгүй байдал, эрүүл ахуй, байгаль орчныг хамгаалах хэлтэс, Худалдааны хэлтэс, Хөгжлийн хэлтсийн ажилтнууд болон аймгийн төр, захиргааны байгууллагын удирдлагууд оролцов.

Ж.Бат-Өлзий Орхон аймгийн ХХААГазрын дарга

"Эрдэнэт"-ийн байгаль орчныхон цагаан тоосыг дарахад хэрэгжүүлж байгаа үйл ажиллагааны талаар иргэдэд нээлттэй мэдээлэл хийлээ.
Тус компани 2007 оноос буюу Засгийн газрын "Цагаан тоос" хөтөлбөр хэрэгжиж эхэлснээс өнөөг хүртэл уул уурхайн хаягдлын нөлөөллийг бууруулахад олон туршилт хийсэн.

Тухайлбал, Япон улсад үйлдвэрлэсэн бороожуулагч ашиглах, бор хөрсөөр дарах, органик полимер, нано технологиор бүтээсэн тоос дарагч ашиглах зэрэг туршилт хийсэн.
2018 оны дөрөвдүгээр сараас Баяжуулах үйлдвэр, Лаборатори судалгааны төв хамтран шинэ туршилт хийсэн нь өндөр үр дүнтэй нь батлагдаад байна.
Энэ нь үйлдвэрлэлийн хаягдлыг барьцалдуулагч бодистой нийлэгжүүлж тусгай хатуу гадаргуу үүсгэх юм.Үүнээс цагаан тоос босоогүй.
Хавар, намрын хуурайшилтын үед энэ туршилтыг Хаягдлын аж ахуйн талбайд үргэлжлүүлэх компанийн Ерөнхий захирлын тушаал гарч, тоног төхөөрөмж,
нийлэг бодис худалдан авах хөрөнгө оруулалт хийгдээд байгаа юм.Энэ ажил өндөр үр дүн авчирна гэдгийг мэргэжлийнхэн иргэдэд мэдээллээ.

Мөн Жаргалант сумын ургацын баярын үеэр яамны болон Засаг дарга, ИТХ-ын шагнал эзэддээ очив.

У.Цэрэнбат

 

Ил уурхайн Засварын хэсэг, Цахилгааны хэсгийн ажилчид ЭКГ-10 маркын экскаваторыг өнөөдөр ажилд нь гаргалаа. Тус техник нь ОХУ-д үйлдвэрлэгдсэн бөгөөд 1997 оноос ашиглагдаж байгаа юм. "Эрдэнэтийн овоо"-ны баялагийг олзворлоход Ил уурхайд ОХУ, Герман улсад үйлдвэрлэгдсэн, 10, 15 м.кубын багтаамжтай 11 экскаватор зогсолтгүй ажиллаж байдаг. Эрдэнэт үйлдвэр ХХК-ийн хөгжлийн цогц бодлогын хүрээнд техник, технологийн шинэчлэл тасралтгүй хийгдэж байна. Үр дүнд нь үр ашиг нэмэгдэж, орлого өсдөг.

 

У.Цэрэнбат

Эрдэнэт хотын унаган хүүхдүүд санаачлан Эрдэнэтийн үйлдвэрлэгчдийг дэмжих холбоо нийгэмд үйлчлэх Төрийн бус байгууллагыг байгуулжээ. Залуусын бүтээлч санаачлага, үйлдвэрлэгчдийг дэмжих замаар Эрдэнэт хотын хөгжил дэвшилд хувь нэмэр оруулах зорилготой уг  байгууллагын  Гүйцэтгэх захирал У.Энхбаяр болон тэргүүлэгчид  өөрсдийн үйл ажиллагаа, чиглэлийг сэтгүүлчдэд танилцуулав.  Манай улсын гурав дахь том хот хэмээдэг Эрдэнэтийн унаган хүүхдүүд хэдийнэ эрийн цээнд хүрч, төрөлх хотоо хөгжүүлэх үйлсэд манлайлан гар бие оролцох цаг үе ирсэн нь энэхүү зорилгын үндэс болсон байна. Тиймээс “Эрдэнэтийн үйлдвэрлэгчдийг дэмжих холбоо” Төрийн бус байгууллагад зөвхөн тус хотод төрж, өссөн залуучууд нэгдсэн нь онцлог юм.

Өнөөдрийн байдлаар, Орхон аймгийн хэмжээнд 135 аж ахуйн нэгж үйлдвэрлэл, үйлчилгээ эрхэлдэг гэсэн статистик тоо бий.  Зуу гаруй мянган хүн амтай хотын хувьд энэ хангалттай биш. Тиймээс үйлдвэрлэгч, баялаг бүтээгчдийг дэмжсэнээр энэ тоон үзүүлэлтийг нэмэгдүүлж, үйлдвэрлэлийн хот болгоно гэж тэд ярьж байна. Энд уул уурхайн салбарын тэргүүлэгч компани Эрдэнэт үйлдвэрийг түшиглэх нь хамгийн давуу талтай. Орон нутгийн үйлдвэрлэгчидтэй хамтран ажиллах, тэдний бараа бүтээгдэхүүнийг худалдан авах “урт настай” гэрээг нэмэгдүүлэхэд санаачилгатай ажиллахаа уг байгууллагын залуус онцоллоо. 2016 онд Эрдэнэт үйлдвэр орон нутгийн 11, 2017 онд 13 аж ахуйн нэгжтэй хамтран ажиллаж, 7,7 тэрбум төгрөгийн худалдан авалт хийсэн нь аймгийн хэмжээнд буй нийт аж ахуйн дөнгөж арван хувь нь юм. Энэ чиглэлээр Эрдэнэт үйлдвэр ХХК-тай хамтын ажиллагааны санамж бичиг байгуулан, худалдан авалтын үйл ажиллагаанд Эрдэнэтийн үйлдвэрлэгчдийн эзлэх орон зайг нэмэгдүүлэх юм байна. Ингэхдээ үйлдвэрлэгчдийнхээ өрсөлдөх чадвар, бараа бүтээгдэхүүний чанар, найдвартай тогтвортой байдлыг хангахад анхаарч, баялаг бүтээгч болон худалдан авагчдын найрсаг, өгөөжтэй харилцааг шинэ шатанд гаргахаа илэрхийлэв.

“Эрдэнэтийн үйлдвэрлэгчдийг дэмжих холбоо” Төрийн бус байгууллагынхны үйл ажиллагааны нэг гол хэсэг  нь залуучуудын бүтээлч, шинэлэг санал,  Старт ап төсөл хөтөлбөрийг дэмжихэд чиглэнэ. Хэдийчинээ үйлдвэрлэгчид нэмэгдэнэ, төдий хэмжээгээр Эрдэнэт хот аж үйлдвэржилтийн том төв болох зам нээгдэнэ гэж тодорхойлов.  Энэхүү үйлсийг бодит ажил болгоход Эрдэнэтийн залуус бид аль нэг нам, улс төр,  ашиг сонирхлоос ангид байж, дуу хоолойгоо нэгтгэнэ гэдгээ тус байгууллагынхан мэдээллээ. Одоогоор тус байгууллагад Орхон аймагт тогтмол үйл ажиллагаа явуулж, хэрэглэгчдийн танил болсон 10 гаруй аж ахуйн нэгж нэгдэх саналаа ирүүлжээ. Тус байгууллагынхан ойрын үед Орхон аймгийн ИТХ-ын удирдлагатай хамтын ажиллагааны санамж бичиг байгуулах аж.   

 

М.Балжинням

Пүрэв, 01 11-р сар 2018 00:00

Инженерийн энтэй засварчин

“Үйлдвэрлэлийн цех, том оврын хүнд машин механизмын засварын газар гэхээр л заавал тос масло ханхалж, шороо тоос бужигнасан байх ёстой гэж үү. Ажлын байр цэвэр цэмцгэр, ажиллах нөхцөл тав тухтай байвал хэн ч урам зориг, эрч хүчтэй ажиллана. Тиймээс манайхан  засварын газрынхаа шалыг өдөр бүр савандаж угаадаг болсон, та нар хар даа, шил толь шиг гялалзаж байгаа биз дээ” гэж Эрдэнэт үйлдвэрийн Авто тээврийн байгууллагын Засварын газрын дарга асан, Аж үйлдвэрийн гавьяат ажилтан З.Шарав нэгэнтээ өгүүлсэн. Үнэхээр түүний хэлсэнчлэн аварга том техник, авто машин  засварладаг газар гэхээргүй цэмцгэр, саруулхан гэрэлтэй зогсоолыг хараад гайхширч билээ. Ажлын өндөр шаардлагатай ч, хайр нь дотроо явдаг З.Шарав даргын тухай ийн дурсах нь түүний гар дээр өсөж бойжиж, заасан эрдмийг нь нэр төртэй залгамжлан яваа  эдүгээ тус засварын газрын “бурхан” засварчдын нэг болон тодорсон эрхмийн хөрөг найрууллыг тэрлэхийн учир оршино.

Авто тээврийн байгууллагын Технологийн тээврийн авто засварын газрын дугуй засварын хэсгийн дугуй засварчин Төмөрбаатарын Ганболд бид хоёрын яриа ажил хэрэгч байдлаар эхлэв. Өөрийн тухай гэхээс ажлынхаа онцлогийн талаар хэлэхийг хүссэн тэрээр ийн хүүрнэсэн. Уулын цул тээвэрлэдэг хүнд даацын өөрөө буулгагч авто машины болон үйлдвэрийн хэмжээнд ашиглаж буй резинэн дугуйтай бүх  техникүүдийн дугуйн бэлэн байдал,  хүнд даацын машин механизмын техникийн бүрэн бүтэн байдлыг хангах, дугуй засварын бүхий л ажлыг тэр хариуцан ажилладаг. Эднийх ашиглалтад орсон эхний үедээ жилд 180 хүртэл дугуй засварлаж байсан тохиолдол бий. Одоо үйл ажиллагаа нь жигдэрч, жилд 80-110 ширхэг 130 тоннын даацтай белазын дугуй, 40 тоннын даацтай 210035,210033 маркийн белаз машины дугуй, Ил уурхайн автогрейдер ,краз зэрэг машин механизм болон тусгай тоноглолын автомашин, автобус, жип зэрэг бүх төрлийн резинэн дугуйтай машины дугуйг засварлаж байна. Тухайн техникийн дугуй хэзээ хаана хагарч, гэмтэл  гарсан байна, түүнийг цаг алдалгүй олж, шаардлага хангасан дугуйгаар засах үүрэг эднийхэнд оногддог. Ингээд бодохоор үйлдвэрлэлийн тасралтгүй, жигд үйл ажиллагааны нэгэн чухал хэсгийг дугуйн засварчин маань  “нуруундаа үүрч” явна. Т.Ганболдыг нөхөд нь “Тип топын Болдоо” гэж дууддаг. Энэ нэр олон  хачир чимэггүйгээр түүнийг ажилдаа эзэн  болж, арван хуруу шигээ эзэмшсэнийг нь илэрхийлнэ. Тип топ бол дэлхийн дугуй үйлдвэрлэх технологиос хамгийн шилдэг нь. Эрдэнэт үйлдвэр энэ технологийг анх 1995 оноос нэвтрүүлж, Тип топ-оор дугуй засварлах санаачилгыг  З.Шарав дарга гаргаж, судалгаа хийж байжээ. Түүний судалгааны үр дүн амжилттай болж, манай үйлдвэр Тип топ дугуй засварын технологийг “нутагшуулсан” гэдэг. Үүнээс өмнө  манайх дугуй засварладаггүй, хагарч гэмтсэн дугуйг шинэ дугуйгаар сольдог байж. Энэ бол технологийн шинэчлэлийн хүрээн дэх хамгийн үр ашигтай, дэвшилттэй бас нэгэн эргэлт болсныг одоо ч ахмад уурхайчид олзуурхан ярьдаг юм билээ. Шинэ технологи нэвтрүүлэхийн тулд түүнийг эзэмших ажилтнаа бэлтгэж сургах шаардлага эн түрүүнд тавигдсан нь лавтай.  Тип топын анхны засварчин Б.Доржболд, Д.Пүрэвдорж нарыг  Герман улсад сургаж, тэд 1996 оноос резинэн дугуйг нөхөж засварлаж эхэлжээ. Харин дараагийн ээлжийн Тип топын “бүтээгдэхүүн”-ий нэг нь Т.Ганболд байв.  Д.Болдбаатар, Ц.Эрдэнэбилэг нарын үе тэнгийн залуустайгаа Тип топ-ын эрдэмд хамт суралцаж, гар сэтгэл нийлэн дагнан ажилласаар 21 жилийг үджээ.  Энэ хугацаанд  тэр зөвхөн хүнд даацын авто машины 110-130 тоннын дугуй гэхэд л  1600 орчмыг  засварласан байдаг. 40 тоннын резинэн дугуйг тоолж үзвэл  бас ийм багцааны тоо гарна. Тип топ бол биднийг технологийн нарийн мэдлэг, тоног төхөөрөмж дээр ажиллах ур чадварыг эзэмшихэд гол нөлөө үзүүлсэн. Одоо энэ ажлыг засварчин Д.Нэргүйн хамтаар гүйцэтгэж байна. Тулхтай, манай цехийн шилдэг ажилтны нэг гэж хамтрагчаа тэр магтаж билээ.

Эрдэнэт үйлдвэртэй холбогдсон миний түүх бол олон сайн хүмүүсийн сайхан сэтгэл, тус дэмээс эхэлсэн гэж тэр хэлэв. Тэртээх 1986 оны намар цаг. Аравдугаар ангийн боловсролтой, мэргэжлийн үнэмлэх, дипломгүй хүү  туслах ажилтнаар орж, тусгай тоноглолын авто машины хэсгийн зогсоолыг цэвэрлэх, халаалтын шугамны бүрэн бүтэн байдлыг хангах ажил дээр хуваарилагдаж байв. Эндээс л засварчны гараа нь эхэлж, тэр үеийн Сургалтын төв, эдүгээгийн Технологийн сургуулийн мэргэжлийн дамжааг  дүүргэн, засварчны мэргэжлийн үнэмлэх “өвөртөлсөн” гэдэг.

“Хүүхэд байхаасаа цанын спортыг сонирхон хичээллэж байсан минь Эрдэнэт үйлдвэрт ажиллах жим рүү хөтөлж, надад тусласан сайхан хүмүүстэй танилцуулж өгсөн. Тэр үед манай үйлдвэр Оросууд олонтой. Хоорондоо дотно нөхөрлөдөг, тэмцээн уралдаанд хамт оролцдог ёстой л “Найрамдлаар амьсгалсан” хот байв. Цана, бөмбөг “хөөж” яваад тэр үеийн Оросын консулын  Үйлдвэрчний хорооны дарга Глобаков гэж хүнтэй танилцсан. Цанын спортоор хичээллэдэг, дэлхийн 2-р дайнд оролцож явсан амьдралын маш сонин үүх түүхтэй, настай хүн байв. Цанын спортын талаар надад зөвлөгөө өгдөг, дэмждэг, нэг үгээр хэлбэл бид хоёр өвөө хүү бололцон дотно нөхөрлөсөн юм. Амьдрал ахуй, цаашлаад ирээдүйн хүсэл мөрөөдлийг минь хүртэл хуваалцана.  Нэг удаа тэр костюм өмсчихсөн, том даргын буурьтай таарав. Уламжлал ёсоор амьдрал ямар байгаа тухай ярилцаж  байснаа ажил хийх үү гэж асуусан. Тэгж л Эрдэнэт үйлдвэрт ажиллах  анхны яриа хөөрөө болж байв. Яг тэр үетэй давхцаад цанаар хамт гулгадаг манай багийнхан З.Шарав багшид маань бас намайг ажилд аваач гэж хувиараа хэлсэн байсан л даа. Тэгээд тун удалгүй нэг өдөр нөгөө “найз” орос дарга маань консулын өрөөндөө дууддаг юм байна. Үүдний жижүүрээр нь хөтлүүлээд өрөөнд нь орж байсан маань санаанаас гардаггүй. Надаас тэр үед ямар мэргэжил эзэмшиж, ямар ажил хийх вэ гэж асуухад нь тэр тухай төдийлөн сайн мэдэхгүй учраас сонсож байснаараа “Белазын жолооч болъё” гэсэн юм даг. Ингэж тэр сайхан сэтгэлтэй орос дарга миний амьдралын зам мөрийг зурж, хожим гавьяат цол хүртсэн З.Шарав дарга минь дэлхийд данстай үйлдвэрт ажиллах их харгуйд хөтөлсөн юм. Тэр л олон сайхан хүмүүсийн урам дэм, сэтгэл итгэлийн гэрлээр өдий дайтай явж байгаадаа үргэлж талархаж явна даа. Тэр цагаас хойш 32 жил улиран оджээ” хэмээн хөргийн эзэн маань дурсамжаа үргэлжлүүлэв.

Т.Ганболдын бас нэг дурсах дуртай бахархал нь аавтайгаа мөр зэрэгцэн  ажиллаж байсан он жилүүд. Түүний аав Төмөрбаатар гэж Эрдэнэт үйлдвэрийн анхдагч,  үйлдвэрийн барилга байгууламжийн бүхий л цахилгааны монтажийг хийлцсэн гавьяатай хүн байв. Харин засварчны анхны багш нь Жавхлантөгс гэж ямар ч ажлыг хурдтай,чанартай хийдгээрээ алдаршсан, гайхалтай ажилсаг эрхэм байсан гэж тэр бахархсан. “Багш шавийн бат бөх барилдлага, халамжлан хүмүүжүүлэх залгамж холбоо бол Эрдэнэт үйлдвэрийн нэрийн хуудас.  Эхний гараа, багшийн арга ямар байна, шавь тийм л барилыг эзэмшдэг гэж боддог. Багшийнхаа үнэт сургаал, үйл хөдлөл бүрийг  сурч ажилласан минь намайг энэ зэрэгт хүргэсэн. Үе үеийн олон сайхан удирдлага, ахмадуудаасаа үлгэр дууриал авч, тэр шилдэг хүмүүсийн арга барилыг төгс эзэмшихийг зорьж ирлээ. Намайг гэсэн бүхий л сайхан хүмүүсийн ач тусыг үргэлж хүндэтгэж  явна” гэж нухацтайгаар нэмж өгүүлсэн нь тэр өчигдөргүйгээр өнөөдөр гэж байдаггүйг санаж явааг нь гэрчилнэ. Түүний хамгийн жаргалтай үеийн нэг нь  хамт олонтойгоо  өнгөрүүлдэг цаг  мөч аж. Нэг нэгнээсээ суралцаж, бас бие биенээ “нөхөж”, сэтгэлийн дэмээр хамтдаа нэгэн зорилго өөд тэмүүлэх юутай сайхан.   Мэдээж, ажил хөдөлмөрийн амтыг мэдэрч, тэр л үр шимээр нь хайртай гэр бүлээ авч явж, хүүхдүүдээ гарыг нь ганзаганд  хүргэхийн төлөө тэмцэж зүтгэх нь ч хамгийн сайхан жаргал, утга учир  билээ.  Амжилт дагуулж, ажил үйлс нь тэгш яваа эр хүний ард хүчтэй, ухаантай эмэгтэй хүн байдаг. Түүний ард ч ааш ялдам, ажилч  хичээнгүй бүсгүй бий. Эр нөхрийнхөө ургах нартай уралдан очдог тэр л их ажлынх нь замыг засаж, Эрдэнэт уулынхаа хишиг буянд сүслэн яваа эгэл гэргий нь түүний амжилтын нэгэн жигүүр юм.

Ажил хөдөлмөрөө үнэлүүлж, алдар хүндээр мялаалгаж яваа түүний олон шагнал урамшууллын отгон нь одоогоор Эрдэнэт үйлдвэрээс шилдэг ажилтнууддаа хүртээдэг А.Ф.Тюряковын нэрэмжит шагнал болж буй.  “Ганц мод гал болохгүй гэдэгчлэн хамт олон минь, хамтын хичээл зүтгэл байгаагүй бол алдар хүнд ирэхгүй. Намайг тоож, энэ сайхан хамт олны нэгэн эд эсээр тооцож, хамтран зүтгэж ирсэн үе үеийн ажилтнууд, багш нар, ахмадууд болон найз нөхөддөө талархаж явдаг” гэж  А.Ф. Тюряковын нэрэмжит шагнал хүртэх торгон мөчийн сэтгэгдлээ хуваалцсан.

Том үйлдвэрийн ажилчин хүнд байх хамгийн чухал чанар бол ямар ч ажлыг голохгүй хийж, ахмадаа хүндэтгэдэг, ахиж дэвшихийн төлөө тэднээсээ цаг үргэлж суралцаж, өөрийгөө дайчилж хөгжихийн төлөөх эрмэлзэл гэж тэр бас хэлсэн. Тиймээ, энэ бол ажилдаа дуртай, амьдралд хайртай эгэл жирийн уурхайчны сэтгэлийн үг буй за. Сурагчийн ширээнээс хөдөлмөрийн талбар луу ажил хийж, аав ээждээ нэмэр болох хүслээс өөр зүйлгүй ирж байсан жаахан хүү эдүгээ хагас жарны турш хуримтлуулсан ажлын арвин туршлага, ямар ч нарийн мэргэжлийн инженерээс дутахгүй техник сэтгэлгээ, өндөр мэдлэг дадлагыг эзэмшжээ. Хөдөлмөрийн хүнийг жинхэнэ утгаар нь төлөвшүүлдэг цуутай уурхайн суу алдрын эзэн, инженерийн  энтэй засварчин тэр билээ.

М.Балжинням

Page 2 of 2

Мэдээний төрөл

Календарь

« 11-р сар 2018 »
Да Мя Лх Пү Ба Бя Ня
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Зургийн цомог