Цахим хуудас

Цахим хуудас


Notice: Undefined property: JObject::$description in C:\inetpub\wwwroot\erdenettoday\templates\ts_newsline\html\com_k2\templates\default\user.php on line 59
Цахим шуудан: This email address is being protected from spambots. You need JavaScript enabled to view it.

   Баялаг бүтээгч Эрдэнэт үйлдвэрийн бүтээлч хамт олон оны эхнээс өнөөдрийг хүртэлх хугацаанд үйлдвэрлэлийн төлөвлөгөөт үзүүлэлтүүдийг биелүүлэн амжилттай ажиллаж байна. Энэ сарын 10-нд маркшейдер хэмжилт хийж наймдугаар сарын эхний арав хоногийн үйлдвэрлэлийн төлөвлөгөөний бодит гүйцэтгэлийг хэлэлцлээ.
   Тайлант хугацаанд уулын цул гаргалт 111.1 хувь, хөрс хуулалт 122.3 хувь, хүдэр олборлолт 104.5 хувь, хүдэр боловсруулалт 102.3 хувиар тус тус биелжээ. Металл авалт зэсээр 100.0 хувь, молибденоор 82.9 хувь, баяжмал дахь металлын агуулга зэсээр 101.0 хувь, молибденоор 104.1 хувь биелжээ.
   Харин ачигдсан зэсийн баяжмалын чанар 101.0 хувь бол ачигдсан зэсийн баяжмал дахь металл 105.3 хувьтай байна. Ийнхүү наймдугаар сарын эхний арав хоногийн байдлаар үйлдвэрлэлийн үндсэн үзүүлэлтийн гүйцэтгэл 100-122.3 хувийн биелэлтэй байна.

                                        А.Бямбамаа

   Эрдэнэт үйлдвэрийн бүтцийн нэгж бүрд аюул ослыг илрүүлэх, мэдээлэх, эрсдэлийг бууруулж, арилгах чиглэлээр хэн яаж оролцож байгааг мэдээлэх үүрэг бүхий сайн дурын 153 мэдээллийн хаалгач ажилладаг. ХАБЭА-н хэлтсээс мэдээллийн хаалгач нарыг дэмжин урамшуулах, тэдний мэдлэгийг тэлэх, сургалтын таатай орчинд багаар ажиллах арга техник эзэмшүүлэх зорилгоор 20 залууг сонгон, ӨМӨЗО-ны Манжуур хотноо аялангаа суралцах хөтөлбөрт хамруулаад иржээ.
   “Ажлын байранд мэдээ мэдээллийг түгээх арга” сэдэвт тус сургалтаар ХАБЭА-н холбогдолтой мэдээ мэдээллийг хэрхэн хялбарчилж, утгыг алдагдуулалгүйгээр үнэн зөв хүргэх, дүрэм журмыг хурдан ойлгох арга техникт суралцсан байна. Аялангаа суралцах нь оролцогчдыг идэвхжүүлж, илүү санаачилгатай, урам зоригтой болгосон талаар хөтөлбөрийн ахлагч, ХАБЭА-н хэлтсийн Сайжруулалтын мэргэжилтэн Л.Батгэрэл хэлж байсан. Арга техник эзэмшүүлэх нь нэг удаагийн сургалтаар хийгдэх ажил биш тул он дуустал системтэй мэдлэг олгохоор төлөвлөжээ. Мэдээллийн хаалгач нар сурсан мэдсэнээ үйлдвэрийн 16 нэгжид туршин, хэрэгжүүлнэ.  

И.Чинтогтох
Фото: Б.Баттөгс

   Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтсээс зохион байгуулсан “ХАБ ба үйлдвэрлэлийн гоо зүй” сэдэвт аян гурван сарын турш үргэлжилж, шилдгүүдээ тодрууллаа. Оролцогч 21 цех, нэгжийн ажлыг зургаан үзүүлэлтээр дүгнэхэд Баяжуулах үйлдвэр манлайлж, Засвар механикийн завод, Үйлчилгээ, аж ахуйн цех тус тус удаалж, тусгай байрт Засвар угсралтын цех, Тээвэр ложистикийн төв шалгарсан байна.
   Аяны хүрээнд Баяжуулах үйлдвэрийн хамт олон ажлын байран дахь аюул ослыг бууруулахад онцгой анхаарч, нөлөөт толь суурилуулан, бутлан тээвэрлэх хэсэгт зүг чиг заагч тэмдэг байрлуулах зэрэг хэд хэдэн ажил хэрэгжүүлснээр тэргүүн байр эзэлжээ. Харин Засвар механикийн завод ажлын байр болон автобусны зогсоолоо шинэчлэн сайжруулж, бага эмчийн өрөөг орчин үеийн эмнэлгийн стандартад нийцүүлэн тохижуулжээ. Гоо зүйн аяны хүрээнд нурууны массажны аппараттай болсон нь ихээхэн үр дүнтэй ажил болсныг заводынхон онцолж байна. ХАБЭА-н хэлтсээс улирал тутам аян хэрэгжүүлэхээр төлөвлөн, хоёр дахь аяны хаалтаа хийж байгаа нь энэ юм.
   Мөн өнөөдөр ХАБЭА-н хэлтэс сарын зөвлөгөөнөө зохион байгуулж, цех, нэгжүүдийн хэмжээнд хийж хэрэгжүүлэх ажлууд болон тулгамдсан асуудлууд дээр санал солилцлоо. Сар бүрийн эхний долоо хоногт болдог тус зөвлөгөөний үр дүнг шийдвэрлэх түвшинд танилцуулан, уламжилдаг. ХАБЭА-н хэлтсийнхэн наймдугаар сарыг “Зохион байгуулсан ажлуудаа дүгнэх сар” хэмээн тодотголоо. 

  

  

  

  

 

  

И.Чинтогтох
Фото: Б.Баттөгс

   Төрийн болон орон нутгийн өмчийн тухай хууль, Эрдэнэт үйлдвэрийн эрсдэлийн удирдлагын эдийн засгийн үнэлгээний тухай журам, Хөдөлмөрийн аюулгүй байдал эрүүл ахуйн урьдчилан сэргийлэх үнэлгээний комиссын шийдвэр болон бүтцийн нэгжүүдийн 2019 оны хоёрдугаар улирлын Хөдөлмөрийн аюулгүй байдал эрүүл ахуйн урьдчилан сэргийлэх ажлын үр дүнгээр хэсэг тус бүрээс Баяжуулах үйлдвэр, Дулааны цахилгаан станц, Чанарын хяналтын хэлтэс, “Эрдэнэт” сувиллын цогцолборууд бусад цех нэгжүүдээ манлайллаа.
   Энэ тухай мэдээллийг өнөөдөр болсон ХАБЭА-н сарын зөвлөгөөний үеэр танилцуулсан юм. Зөвлөгөөний үеэр Хөдөлмөрийн аюулгүй байдал эрүүл ахуйн урьдчилан сэргийлэх ажилд идэвхтэй оролцож, аюул эрсдэлийг илрүүлэн мэдээлсэн, үр ашигтай санал дэвшүүлсэн ажилчдыг “Аюулгүй ажиллагч”-аар шалгарууллаа.
   2019 оны  хоёрдугаар улиралд  “Аюулгүй ажиллагч”-ийн жагсаалтад 27 ажилчин анх удаа бүртгэгдэн, дурсгалын зүйлээр шагнаж урамшууллаа. Харин “Аюулгүй ажиллагч”-аар хоёр дахь удаагаа бүртгэгдсэн 14 ажилтан үйлдвэрийн газрын удирдах бүрэлдэхүүнтэй хүлээн авалт, ярилцлагад оролцож санал бодлоо солилцох бол “Аюулгүй ажиллагч”-аар гурав дахь удаа бүртгэгдсэн 14 ажилтныг журмын дагуу мөнгөн шагналаар шагналаа. Аюулгүй ЗӨВ ажиллацгаая.   

   А.Бямбамаа
Фото: Б.Баттөгс

   Эрдэнэт үйлдвэрийн хэмжээнд Хөдөлмөрийн аюулгүй байдал эрүүл ахуйн бодлогын дагуу нэн түрүүнд хөдөлмөрийн аюулгүй байдлыг хангах, ажил үүргээ гүйцэтгэж байгаа ажилтны эрүүл мэнд, аюулгүй байдлыг ханган ажиллаж байна. Ингэхдээ 2014 онд таван жилээр батлагдсан Хөдөлмөрийн аюулгүй байдлын тухай 17 журмыг хэрэгжүүлэн, мөрдлөг болгон үйл ажиллагаандаа тусгаж ажилладаг.  
   Эрдэнэт үйлдвэрийн Хөдөлмөрийн аюулгүй байдал эрүүл ахуйн хэлтсээс долоо хоног бүрийн лхагва гарагт Манлайллын хурлыг зохион байгуулдаг уламжлалтай. Өнөөдөр болсон хурлаар шинэчлэгдэн, батлагдсан журмуудыг ХАБ-ын ажилтнуудад танилцуулсан юм.
   Таван жилээр батлагдсан “Хөдөлмөрийн аюулгүй байдлын журам”-ын мөрдөх хугацаа дууссан тул Ерөнхий захирлын тушаалын дагуу ажлын хэсэг байгуулан журам шинэчлэх ажил хийгдэж байна. Өнөөдрийн байдлаар зургаан журам шинэчлэгдэн батлагджээ. Өмнөх журмуудаас давуу тал, онцлог байдлын талаар нийт ажилчдад таниулж сурталчлахын тулд бүтцийн нэгжүүдийн Хөдөлмөрийн аюулгүй байдлын инженерүүдэд ийнхүү шинэчлэгдэн, батлагдсан журмуудыг танилцууллаа. ХАБ-ын инженерүүдээр дамжуулан үйлдвэрийн нийт ажилчдад мэдээлэл өгөх юм.
   Эрдэнэт үйлдвэрийн Хөдөлмөрийн аюулгүй байдал эрүүл ахуйн хэлтсийн орлогч дарга Б.Баттайван: “Эрдэнэт үйлдвэрийн нийт ажилчдад хөдөлмөрийн аюулгүй байдлын соёл, хөдөлмөрийн аюулгүй байдал эрүүл ахуйтай холбоотой мэдээ, мэдээллийг цаг тухайд нь хүргэж, хөдөлмөрийн аюулгүй байдлын дүрэм, журмыг сурталчлан олон нийтэд түгээх үйлсэд  үнэтэй хувь нэмэр оруулдаг Эрдэнэт үйлдвэрийн Олон нийттэй харилцах албаны хамт олонд амжилт хүсье” гэлээ.   

А.Бямбамаа

   Эрдэнэт үйлдвэрийн Цахилгааны цехийн хамт олон энэ онд хөрөнгө оруулалтын чиглэлээр дөрвөн ажил хийхээр төлөвлөжээ. Үүний нэг нь Цахилгааны цехийн хүнд даацын автомашинд зориулагдсан зам засварын ажил юм. Зам засварын ажлын гүйцэтгэгчээр “Төгс цаст” ХХК ажиллаж 80 хоногийн хугацаанд хийж дуусгахаар төлөвлөжээ. Тус компанийн хамт олон зам засварын ажлыг хугацаанд нь чанартай хийж гүйцэтгэхээр ажиллаж байна. Замын гэрэлтүүлгийн агаарын шугамын шинэчлэлтийн ажил, трансформаторын маслоны аж ахуйн дулаацуулгын системийг солих зэрэг бусад хөрөнгө оруулалтаар хийгдэх ажлууд нь материал, ханган нийлүүлэлт хүлээгдэж, хараахан эхлээгүй байна гэж Цахилгааны цехийн Үйлдвэр техникийн албаны дарга мэдээллээ.

А.Бямбамаа

   “Эрдэнэт үйлдвэр” ТӨҮГ нийгмийн хариуцлагын хүрээнд уурхайчдынхаа нийгмийн асуудал, эрүүл мэндэд онцгой анхаарал тавин, шат дараатай арга хэмжээ авдаг. Эдгээрийн нэг нь ажилчдын халуун хоолны асуудал юм. Сүүлийн үед зарим уурхайчид, ажилчдын зүгээс хоолны амт  чанар, хоол үйлдвэрлэгч компаниудын үйлчилгээ, түгээлттэй холбоотой санал гомдол нийгмийн цахим сүлжээгээр хөндөх болсон.  Иймд  халуун хоолны амт чанарт анхаарч,  зөөврийн хоолны түгээлт бодит байдалд ямархуу нөхцөл байдалтай байгаа, зарим ажилчдын зүгээс тавьж буй гомдол хир үндэслэлтэй болохыг судалж нягтлан, ирэх 7 хоногийн Даваа гаригийн өргөтгөсөн шуурхай хуралдаанд дэлгэрэнгүй танилцуулга хийх үүргийг Ерөнхий захирал Х.Бадамсүрэн холбогдох удирдлагуудад өглөө.
    Хүнд нөхцөлд ажиллаж буй уурхайчид, ажилчид эрүүл, чанартай хоол хүнс идэх учиртай. Үйлдвэрийн удирдлагын зүгээс энэ шаардлагыг халуун хоолны үйлчилгээ үзүүлж буй компаниудад хатуу тавина. Үнэхээр зөрчил дутагдалтай ажилладаг, чанаргүй хоол хүнсээр үйлчилж буй бол тендер шалгаруулалтыг эргэн харах, цуцлах хүртэл арга хэмжээ авна. Ялангуяа энэ асуудлыг хариуцан ажилладаг удирдлагууд, ХАБЭАХэлтэс онцгой анхаарлаа хандуулж ажиллах учиртайг Ерөнхий захирал санууллаа.
   Өнөөдрийн байдлаар Эрдэнэт үйлдвэрт 6700 орчим ажилтан, ажилчид ажиллаж байгаагаас хүнд нөхцөлд буюу үйлдвэрлэлийн бүсэд ажиллаж буй 5000 гаруй уурхайчид үнэ төлбөргүй халуун хоол иддэг. Тэдэнд халуун хоолны үйлчилгээ үзүүлэх тендерт шалгарсан Хаан хүнс, Таятан фүүдс компаниуд 1, 2 дугаар хоол, зууш, халуун цай, ундаар  үйлчилж байна. Мөн энэ сарын 1-нээс Эрдэнэт үйлдвэр Сэлэнгэ амралт аялал жуулчлалын цогцолборын нийтийн хоолны хэсгийнхээ катерингаар 1000 гаруй уурхайчдад 6 нэр төрлийн сонголт бүхий халуун хоолоор үйлчилгээ үзүүлж эхэлсэн юм.

   Соёл урлагийн цогцолборын дууны инженер Түмэнжаргалын Цолмонтой уулзаж ярилцахаар утас цохиход, ажил тараад гэж тохирсон ч удалгүй: Уучлаарай 18 цагаас хандивын тоглолт дээр ажиллах боллоо гэв. Цаг наргүй ажиллах түүнтэй  маргааш нь үдийн цайны завcарлагаар хөөрөлдөв.

  - Хоёулаа ярилцлагаа таны бага насны амьдралаас эхлэх үү? Ямар хүсэл мөрөөдөлтэй хүүхэд байв?
  - Би Улаанбаатар хотод төрсөн. Ээж минь Эрдэнэт үйлдвэрийн дугуйн замыг тавилцахаар томилолт өвөрлөн 1994 онд ирж, энэ үйлдвэрийн ажилтан болсон. Тэр намар би 5-р сургуулийн англи хэлний гүнзгийрүүлсэн сургалттай 4-р ангид орсон. Техникт сонирхолтой, тоглоомоо задалж, цаана нь байгаа зүйлийн учрыг олох гэж оролддог, хичээлээ байнга  давтдаг хичээнгүй хүү байсан гэж ээж минь хэлдэг юм. Ахлах ангид ороход компьютер миний сонирхлыг ихэд татсан. Ер нь л инженер болох мөрөөдөлтэй л явлаа.

  - Инженер сэтгэлгээтэй хүү ямар мэргэжил эзэмшив?
 
- Би Технологийн сургуулийг цахилгаан системийн автоматжуулалтын инженер, Маргад дээд сургуулийг компьютерийн инженерээр төгссөн юм. Оюутан байхдаа цэнгээнт бүжгээр хичээллэдэг, Эрдэнэт үйлдвэрийн нэр дээр бүжиглэдэг байлаа. Мөн зуны амралтаараа зусланд, өвөл нь бааранд дижи хийдэг байв. Дууны техник миний жинхэнэ хобби болсон байсан. Их сургуулиа төгсөөд мэргэжлийн дагуу Хивсний үйлдвэрт цахилгаанчнаар орлоо. Сар ажиллаад л  миний хийх ажил биш гэдгийг ойлгосон.

   - За, тэгээд яасан?
 
- Ажлаасаа гарсан. Удаа ч үгүй Соёлын ордонд бүжигчин шалгаруулж авах тухай сонсогдлоо. Ордонд очтол дууны техникч Баярсайхан ах: “Манайх дууны инженер авах гэж байгаа, чи даргатай уулз” гэлээ. Бүжгийн хамтлагийн Д.Ганчулуун багш намайг дагуулаад орж, танилцуулахад Д.Дашдондов дарга сонсож байснаа үдээс хойш бичиг баримтаа аваад Хүний нөөцийн менежертэй уулзаарай гэлээ. Ингээд л  маргааш нь ажилдаа орж, Эрдэнэт үйлдвэртэй хувь заяагаа холбосон доо.

   - Дууны инженерээр шууд ажиллаж эхэлсэн үү?
 
- Тиймээ. Ажилд орсныхоо дараа “Дуу, гэрлийн инженер” мэргэжлээр Бээжин хотноо Хятадын Холбоо, хэвлэл мэдээллийн их сургуульд хоёр жил үйлдвэрийн зардлаар суралцсан. Хятад хэл дээр хөгжмийн техникийн нарийн зүйлсийг суралцахын тулд маш их мэрийсэн. Багш нараасаа их  зүйл сурсан. Монгол хүний сэтгэх чадвар бусдаас илүү гэдгийг ч тэнд мэдэрсэн.

  - Таны ажил мэргэжлийн онцлог, бас сайхан нь юунд байдаг вэ?
 
- Манайхан тоглолтын арын албыг хариуцдаг.  Дуучид, хөгжимчид, бүжигчдийг  уран бүтээлээ  бүрэн гаргах хэмжээнд дууны тохиргоо хийнэ. Уран бүтээлчдийн хувцас, хэрэгсэлтэй зохицуулж тайзанд гэрэл өгнө. Ингэснээр уран бүтээлчдэд сэтгэл ханамжтайгаар уран бүтээлээ толилуулах, үзэгчдэд урлагийн гоо сайхныг мэдрүүлэхэд нь хувь нэмрээ оруулдаг юм. Манайх дууны дөрөв,  гэрлийн хоёр техникчтэй. 

  - Өнгөрсөн жил соёлын ордон орчин үеийн техникээр өвч тоноглогдсон. Ажиллахад урамтай биз?
 
- Орчин цагийн техникээс гадна  лед дэлгэцтэй болсон. Манайд тавигдсан дууны пульт л гэхэд  улсын хэмжээний театр, чуулга, соёлын орднуудад байгаа хамгийн том нь. Би техник, дэлгэцээ сонгосон. Энэхүү сонголтын дагуу үйлдвэрээс тендер зарлан, орчин үеийн шилдэг техникээр  хангаж, томоохон хөрөнгө оруулалт хийсэнд бид баяртай байгаа.

  - Танайх ачаалал ихтэй ажилладаг. Танд шантрах үе байдаг уу?
 
- Бидний ажлын ачаалал өндөр. Манай дуу шум, гэрэлтүүлгийн хэсэг  жилд 1050-1060 удаагийн үйл ажиллагаан дээр ажилладаг. Өдөрт багадаа 3-4 ажил орж ирдэг. Би ажилдаа их дуртай. Тийм болохоор шантрах, залхах тухай ойлголт үгүй.  Намайг ажилд орох үед  манай техник их муу, бид 36 цаг зогсолтгүй ажиллах үе ч  байсан.  Тухайн үед манайхан  уянгын драмын жүжиг, хөгжимт драм, фольк дуурь зэргийг тайзнаа тавьж, уран бүтээлээрээ телевизийн бичлэг хийх зэрэг маш их ажилтай байсан.
 
  - Таны амьдралдаа баримталдаг зарчим юу вэ?
 
- Ажилдаа  чин сэтгэлээсээ хандаж, дурлаж хийдэг. Зөвхөн алба ажил ч биш. Гэртээ багахан тавиур хийх байлаа ч, түүнийгээ илүү гоё болгохсон гэж хичээдэг. Зарим хүн хийж буй зүйлээ тээршээж, үзэн ядсан байдалтай байдаг. Ингэх хэрэггүй л дээ. Ажлаа дурлаж  хийвээс амжилт ойрхон санагддаг.

   - Та техниктэй бас уран бүтээлчидтэй харьцдагаараа бусад инженерээс ялгаатай санагдлаа?
 
- Тиймээ. Дууны инженер хүн техникээ сайн мэддэг байх ёстой. Техникийн хөгжил маш хурдсаж байгаа. Тэгэхлээр хоцрогдох эрхгүй. Байнга судалж суралцаж явах ёстой. Гадаадын том том концерт үздэг. Ингэхдээ ямар тоглолт дээр ямар техник ашиглаж байгааг сонирхоно. Техник, тайз, дэлгэц, гаднын ямар эффект явж байна. Утаа, салют зэргийг хэрхэн ашиглаж байна гээд л судалдаг. Ажлын хамтрагч уран бүтээлч болгоноо судалж, ойлгохыг хичээдэг. Уран бүтээлчид сэтгэлийн хөөрөл ихтэй, хурц илэрхийлэлтэй ч хормын төдийд л инээж баясаад л  явчихдаг өвөрмөц зан ааштай, цайлган  улс. Эдэнтэй ажиллах сайхан шүү.  Уран бүтээлчдийнхээ гайхалтай бүтээлээр бахархаж омогших үе зөндөө.

   - Та яриан дундаа ээжийгээ нилээд дурьдлаа. Таны бахархал, үлгэр дуурайлал болсон хүн тань байх гэж таалаа?
  
- Тийм ээ. Ээж шигээ хөдөлмөрч, бас хамт олондоо нэр хүндтэй нэгэн болохсон гэж хичээдэг. Ээж маань АТБ-ийн Авто клон-5-д мастераар ажиллаж байгаад гавьяаны амралтдаа гарсан Г.Пагмажав гэж хүн бий.

   - Өө. Тэгвэл таны ээжийг манай үйлдвэрийн олон хүн таних байх. Ээж тань үйлдвэрийн ажилтнуудын дунд зохиогддог ХАБЭА-н тэмцээний мэдлэг шалгах бүх асуултад торолгүй хариулж, үзэгчдийг гайхшируулдаг байсан. Тиймээс ч “Компьютер толгойт Пагма” гэж тухайн үеийнхэн хошигнон нэрлэх болсон. Та гэр бүлийнхнээ манай уншигчдад танилцуулна уу?
   
- Ээж минь тун их ажилч, хичээнгүй, идэвхтэй бас эртэч хүн. Тэтгэвэртээ 2010 онд гарсныхаа дараа л гэхэд олон зүйлд суралцсан. Хийн дасгалаар хичээллэн, багш болсон,  даралтат хөгжим, морин хуур тоглож сурсан. Бүр Японд болсон  морин хуурын тоглолтод оролцсон. Цехийнхээ Ахмадын хорооны даргаар бараг 8 жил ажилласан. Ээж минь ах нар, эгч бидний хүсэл сонирхлыг хүндэтгэн, дэмждэг. Гурван ах маань  хуур урлаач. Дунд ах Морин хуур урлаачдын тэргүүн. Эгч маань багш хүн байсан. Би эхнэр, хүүтэй. Удахгүй манайх бүл нэмэх гэж байгаа /инээв.сурв/.  Ханийг маань Э.Солонго гэдэг. Манай хүн компьютерийн инженер мэргэжилтэй, надтай хамт техникчээр ажилладаг. Хүү маань таван настай. Ирэх намар сургуулийн сурагч болно. 

  - Эрдэнэт үйлдвэрийн Хөдөлмөрийн аварга хэмээх эрхэм алдрыг хүртэх үед танд юу бодогдсон бэ?
 
- Намайг үйлдвэрийн аварга болоход хамгийн их нөлөөлсөн хамт олондоо баярласан. Өдий зэрэгтэй өсгөж, хүмүүжүүлсэн ээжээрээ бахархсан. Амьдралын минь түшиг тулгуур болсон ханьдаа баярласан. Ээжийнхээ үнэнч хөдөлмөрөө шингээсэн Эрдэнэт үйлдвэрт үе залгамжлан  хувь заяагаа холбож яваадаа туйлаас их баярладаг. Би хүнд үгүй гэж хэлж чаддаггүй ээ.

   Ажлын ачааллаасаа болоод амжихгүй үе гарах ч  “За” гэсэн л бол түүнийгээ биелүүлэхсэн гэж хичээдэг, гээд тэрбээр нүүр дүүрэн мишээх. Зөв энергитэй, зөөлөн сэтгэлтэй, ажлын төлөө төрсөн залуухан аваргадаа амжилтын дээдийг хүсье ээ. 

Я.Энхтуяа

   Эрдэнэт үйлдвэртэй ажил амьдралаа холбосон тэр л цагаас өөрийгөө эмэгтэй хүн гэдгийг мэдэрсэн гэж ярих энэ бүсгүйтэй хэдэн хором ярилцаж суухад энэ үгний учгийг тайлсан юм.
   Сүрэнжавын Түмэннаст арван хүүхэдтэй айлын найм дахь нь болж хорвоод хүн байхын утга учрыг бусдад түгээх нандин, эрхэм чанарыг өвлөсөн, үйлдвэрийн эгэл жирийн ажилчин. Дорнод аймгийн Эрээний тэрэгний үйлдвэр буюу Эрээн  хороонд төрж эршүүд зантай ч эрх танхил айлын охин жүжигчин болохыг ихээр мөрөөдөж эгэлгүй амьдралыг хөглөжээ. 1988 онд арван жилийн сургуулиа төгсөж,  эршүүд зандаа дийлдэн геологич болохоор шийдэн Түлш эрчим хүч геологийн Техник мэргэжлийн сургуульд орж, гагнуурчин мэргэжлээр гурван жил сурчээ. Багануурын нэгдсэн уурхайн засварт жил гаран ажиллаад 1993 онд сургуулийн андаа даган Эрдэнэт гэдэг их айлд зочилжээ. 2005 онд Эрдэнэт үйлдвэрт сонгон шалгаруулалтаар гагнуурчин болох хориод залуусаас хоёрт орсон тэр цагаас өнөөг хүртэл Зууны манлай үйлдвэрийн ажилчидтай мөр зэрэгцэн ажилласаар байна. Хортой, шартай дээр нь мэргэжилдээ дуртай болохоор амжилт ар араасаа хөвөрсөөр.
   Мэргэжилдээ дурлаж, хайртай байх нь  амьдралыг хөдөлгөгч гол хүч гэдгийг ухааран, мэргэжилдээ тун чиг хайртай бүсгүй. Тэрээр Эрдэнэт үйлдвэрийн Засвар механикийн заводын Засвар угсралтын хэсэгт гагнуурчнаар есөн жил ажиллаж, элэгдэж цоорсныг нөхөх биш, төмрийн нарийн оёдолд суралцахаар Металл хийцийн хэсэгт өөрийн хүсэлтээр орж ажиллажээ. Хөнгөн ажлаас илүү чаддаг зүйлээ хийх сайхан. Нарийн ур ухаан шаардсан, хийц ая данг нь тааруулах гээд л төмрийн үйлчин бүсгүйд хийх зүйл их байлаа.  Гагнасан бүтээлээ цэвэрлэж, ур ухаанаа уралдуулан, гагнаас бүр нь уран хийцтэй байх нь чухал учир, тог цахилгаанаа тааруулах, суудлаа тохируулах, амьсгаагаа хуваарилахаас эхлээд дэг жаяг бүр нь үнэ цэнэтэй ажил. 
   Зогсолтгүй эргэлдэх тээрмийн хүрдийн хүчийг сааруулах эрх үйлдвэрийн ажилчдад байхгүй. Засварын үед тоног төхөөрөмжийг гагнахдаа гаргууд байх нь үйлдвэрлэлийн тасралтгүй үйл ажиллагааг хангахад хамгийн их нөлөөлнө. Сард том, жижиг нийлсэн 20- иод бүтээл гаргадаг гэхээр сүүлийн хоёр жилийн байдлаар 500-аад бүтээл төмрөөр урлажээ. Бутлуурын араа, шүд элэгдэл ихтэй байдаг тул, олон ч удаа гагнуур хийнэ. Бутлуурын араа шүдний дийлэнх нь буюу 90 хувь нь дороо л элэгдэн төмрийн үйлчин бүсгүйн гар дээр ирнэ. Бодлоо... Яавал бутлуурын араа шүдийг илүү удаан ажиллуулах вэ гэж... Үүний эцэст хардогс, элдогс материалыг туршиж үзэн гагнаас хийхээр шийдэж тухайн араандаа тэмдэг тавин явуулжээ. Гэтэл өнөөдрийг хүртэл тэмдэгтэй бутлуурын араа түүний гар дээр ирсэнгүй.  Бутлуурын шүдний элэгдлийг багасгах, насжилтыг нь уртасгасан томоохон бүтээл болсон нь энэ. Энэ шийдлээс бутлуурын араа шүдний элэгдэл бүрэн буурсан гэж хэлж болно. Энэ бүтээлээрээ уралдаанд оролцож гуравдугаар байр эзэлжээ. Санхүүгийн хэмнэлт ихээр гарсан нь мэдээж.
   Загвар зохион бүтээгч байхгүйгээр оёдол гарах-гүйтэй адил гагнуурчид үгүй бол тоног төхөөрөмж үгүй юм. Олон жилийн нөр их туршлага, хичээнгүй хөдөлмөрийн үр шимээр өнөөдөр төмрөөр даашинз урлах дайны болжээ. Мэргэжилдээ мэргэшнэ гэдэг энэ л юм. Хүнийг хамт олон найз нөхөд нь төлөвшүүлэн хүмүүжүүлдэг болохоор нөхөрлөлөө дээдлэн хамгаас илүүд хүндэлнэ. Токарьчин, кранчин, оператор, гагнуурчин мэргэжилтэй эгч, дүү нийлсэн зургаан бүсгүйн нөхөрлөл олон жил үргэлжилжээ. Одоо ч хэвээр. Дутууг нь дүүргэж, алдаа оноог нь дэнслэн, ааш зангаа авсан бүсгүйчүүдийн нөхөрлөлөөс сурсан зүйл их гэдгийг төмрийн үйлчин бүсгүй мартахгүй. Энэ нөхөрлөлийг Эрдэнэт үйлдвэрт ажилд орсон үеэс л эхэлсэн болохоор өнөөх эршүүд зантай бүсгүйн “эмэгтэй” болсон түүх эхэлжээ. Ажилсаг, шартай, эршүүд зантай эгэл бүсгүй тэрээр ээж М.Цэвэгжав, аав Л.Сүрэнжаваас өвлөж авсан олон эрдмийн нэг нь төмрөөр сийлбэрлэн  “наадах” эрдэм гэдгийг баталжээ. Ээжийнхээ, хоёргүй сэтгэлээр нэг л зангаар ажиллаарай гэх эрхэм сургаалийг үйл хөдлөл бүрдээ мөрдлөг болгон гарын ураар хатуу төмрийг уяраасаар л байна. Их ажлын хажуугаар өрх гэрээ өөд нь татна, гал голомтоо дээдэлнэ. Нөхөр хүү хоёртойгоо амьдралыг цэцэглүүлэн өөрийн гараар урласан зуухаар өргөө гэрээ батжуулан галаа өрдөж сууна. Ганц хүүгээ өрх тусгаарлахад нь гал голомтоосоо таслан өөрийн урласан зуухаа өгнө өө, гээд ярьж суух энгүүхэн агаад эрхэмсэг “төмрийн оёдолчин” бүсгүйдээ ажил үйлийн дөл өөдөө байхыг хүсье.

А.Бямбамаа

   Байгалийн үзэмжээрээ сэтгэлд хоногшсон “Найрамдлын Эрдэнэс” зусланд энэ зуны амралтаа өнгөрүүлж байгаа охид, хөвгүүдийн инээд хөөр, дуу хуур цалгисан нэгэн өдрөөр аяллаа. Зуны улиралд байдаг л нэг өдөр мэт санагдавч зусланд амрагч хүүхдүүдийн хувьд амралтын сүүлийн өдөр нь гэдгээрээ онцлог байсан юм. Бүжгийн спортыг сурталчлан таниулж, бүжиглэх дур сонирхолтой хүүхдүүдийг нэгтгэсэн 7 дугаар ээлжинд 500 гаруй хүүхэд амарчээ. Эрдэнэт үйлдвэр нийгмийн хариуцлагынхаа хүрээнд ажилчид болон тэдний үр хүүхдэд зориулан тэртээ 1981 онд бүтээн байгуулсан “Сэлэнгэ” амралт, аялал жуулчлалын цогцолборын “Найрамдлын Эрдэнэс” зуслан эдүгээ хүчин чадал, хөтөлбөр, арга зүй, боловсон хүчин гээд олон талаараа Монголдоо тэргүүлэх зуслан болсныг хэлэхэд бахдалтай. Зуслангийн хилийн дээс давсан хэнийг ч найрсаг үйлчилгээ, зочломтгой зангаар угтах энэ орчинд гаршуулж тэжээсэн бугын илий, сарлаг, тэмээ, зэрлэг гахай, тарвага, цацагт хяруул, тахиа, галуу зэрэг олон төрлийн ан амьтад бий.

  

  

  

   Манай сурвалжлах багийнхныг очих үеэр спортын талбайд бүжгийн бэлтгэлээ хангаж байсан хүүхдүүд удалгүй сурч мэдсэн шинэхэн бүжгээрээ өрсөлдөж, шилдгүүдээ шалгаруулсан. Өнгийн хувцсаар жигдэрч, өрсөлдөөний талбарт хүч сорьсон хүүхдүүдийн дунд GS, Electro, Onyx Crew бүжгийн хамтлагийнхан үзүүлбэр үзүүлж, зуслангийн флашмоб зохион байгууллаа. Зуны зугаатай өдрүүдийг сэтгэлдээ нандигнах дурсамжаар хөглөн, нөхөрлөлийн хүрээгээ тэлж, ур чадвараа ахиулсан амрагч хүүхдүүд хаалтын үйл ажиллагаан дээр шилдэг бүлгүүд, шилдэг хүүхдүүдээ тодруулдаг уламжлалтай. 
   “Найрамдлын Эрдэнэс” зуслан энэ зун 8 ээлжээр 3000 хүүхэд хүлээн авахаар төлөвлөсөн ч одоогийн байдлаар Улаанбаатар хотоос 1800, Эрдэнэт хотоос 1500 орчим, бусад аймгаас 800-аад хүүхэд буюу нийт 4000 гаруй хүүхэд амраад байна. Англи хэл, чөлөөт бүжиг, сагсан бөмбөг, экологи, хөл бөмбөг сонирхогчдын “Мазаалай каф” төрөлжсөн хөтөлбөрийн зэрэгцээ монгол ахуйн мэдлэг олгохоор зорьсон нь өмнөх жилүүдээс онцлог байсныг зуслан хариуцсан мэргэжилтэн О.Дэлгэрмаа тайлбарлалаа. Амрагч хүүхдүүдийг эрүүл хоолоор хангахад анхаарсан зуслангийн хамт олон хүлэмжийн аж ахуйгаа хөгжүүлэн, өдөр бүр шинэхэн ургацын дээжээр хоол хүнсээ бэлтгэж байна. 

  

   Өнгөрсөн баасан гаригт холын аяны дөрөө мултлан буусан Эрхүү мужийн Тулун, Нижнеудинск хотын 9-17 насны 42 хүүхэд, 6 багшийнхаа хамтаар зуслантайгаа танилцаж, үйл ажиллагаандаа идэвхтэй оролцохоор бэлтгэлээ хангаж байлаа. Байгалийн гамшгаас үүдэн орон гэргүй болсон 5000 хүүхэд байсныг хотоос түр хугацаанд холдуулахаар шийдвэрлэн, ОХУ-ын зуслангууд болон бусад газарт явуулжээ. Тэдэнд сэтгэл санааны дэмжлэг үзүүлэхээр Монгол Улсын “Гадаадад төгсөгчдийн нэгдсэн зөвлөл” ТББ-аас хүсэлт тавьсны дагуу Эрдэнэт үйлдвэр угтан авсан нь энэ билээ. Сэтгэл санааны хүндхэн байдлаа даван туулж, үеийнхнээсээ урам зориг авахад нь “Найрамдлын Эрдэнэс” зуслан томоохон хүч болно гэдэгт итгэж байгаагаа багш нар нь хэлж байлаа. Хүүхдүүд энэ сарын 26-ны өдрийг хүртэл зусланд амарч, монгол ахуй соёлтой танилцан, малчин айлаар зочилж, морь унах зэрэг тусгай хөтөлбөрүүдэд оролцоно. Энэхүү амралтын хөтөлбөрт Эрдэнэт үйлдвэртэй танилцах аялал ч багтсан байна.

  

  

   Энэ үеэр хүүхдүүдийг ахалж яваа англи хэлний багш Ефимова Оксана Анатольевнагийн сэтгэгдлийг хуваалцахад, “Зусланд ирэхэд манай орны байгалийг санагдуулам дотно мэдрэмж төрсөн. Биднийг ирж явах замд тэмээ, бусад амьтад байсан. Хүүхдүүд маань анх удаа ирж байгаа ч зуслан үнэхээр их таалагдсан. Автобуснаас буугаад л, олон хүүхэдтэй юм байна гэж дуу алдаж, шинэ найзуудтайгаа мэндлээд амжсан. Явцын дунд илүү танилцаж, олон найз нөхөдтэй болох байх аа. Зуслангийнхаа хөтөлбөрт аль болох хүүхдүүдээ идэвхтэй хамруулна” хэмээсэн.

Хөгжилтэй мөчүүдээ эргэн дурсаад
Хүүхэд настай уралдаад ирлээ
Найрамдлын Эрдэнэс зуслангаа санаад
Найраг дуугаа дуулаад ирлээ
... хэмээсэн “Зусландаа ирлээ” дууны гэгээн мөртүүд ирэх зуныг хүртэл багачуудын сэтгэлд эгшиглэх нь лавтай.

   Ингээд “Үе тэнгийнхнээ зусландаа урья, манай зуслан үнэхээр гоё” гээд мишээл тодруулах хүүхдүүдийнхээ магтаалын үгээр энэ удаагийн сурвалжилгаа жаргааж байна.


Сурважилсан И.Чинтогтох
Фото: Ш.Лхамсүрэн

Мэдээний төрөл

Календарь

« 9-р сар 2019 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Зургийн цомог