×

Анхааруулга

JUser: :_load: Unable to load user with ID: 927

Өдрөөр ангилагдсан мэдээлэл: 10-р сар 2017


ШУТИС-ийн харьяа, Эрдэнэт үйлдвэр ХХК-ийн дэргэдэх Ш.Отгонбилэгийн нэрэмжит Технологийн сургууль нь 2017-2018 оны хичээлийн жилд Бакалаврын Эчнээ сургалтад дараах мэргэжлээр элсэлт авч байна. Үүнд:
  
   1.  Авто инженер
   2.  Механик инженер
   3.  Ашигт малтмалын баяжуулалтын технологи
   4.  Уул уурхайн ашиглалтын технологи
   5.  Цахилгааны инженер

Элсэгчдэд тавигдах шаардлага:

   •   Гадаадын их дээд сургууль болон дотоодын магадлан итгэмжлэгдсэн их, дээд сургуулийг мэргэжлийн диплом (С диплом) болон түүнээс дээш зэрэгтэй төгссөн байх

Бүрдүүлэх материал:

   •   Иргэний үнэмлэх
   •   Сургууль төгссөн дипломын эх хувь
   •   Ажлын газрын тодорхойлолт
   •   2% цээж зураг (3x4)

Бүртгэл 10 дугаар сарын 27-ны өдрийг дуустал Технологийн сургуулийн Сургалтын албаны 110 тоот өрөөнд хийгдэж байна.

Холбоо барих утас: 01352-73318, 99352856, 99888166, 95347388
 

 

 
Бүлэг Боловсрол
Мягмар, 24 10-р сар 2017 00:00

“Бүтээмжийн” ДЭЛГЭРМАА

    

       “Бүтээмжийн” Дэлгэрмаа гэх холбоо үг “Эрдэнэт” үйлдвэрт ажилладаг хэнд ч болов ижил дасал болсон төдийгүй түүний эхлүүлсэн ажил, амжилтыг илэрхийлнэ. Хүн ажил, мэргэжлээрээ овоглуулна гэдэг хөдөлмөр, хичээл зүтгэлийн үрээр, цаг хугацааны эрхээр ирдэг алдар юм.
     Одоогоос 30 гаруй жилийн өмнө Завхан аймгийн Хянан шалгах хорооны ажилтан Лууваанчигийнд охин мэндэлсэн нь хоёр хүүтэй айлд баяр гийсэн үйл явдал байв. Л.Дэлгэрмаа охин дүү дагуулснаар эднийх азын дөрвөн шагай адил дөрвөн хүүхэдтэй болжээ. Тэрээр сурагч ахуйдаа хичээлдээ жигд сайн, нийгмийн идэвхтэй, “номын сайн нөхөр” явсны дээр урлаг, спортод гойд биш ч өөрийн хувиа хүнд өгдөггүй байж.    
 Л.Дэлгэрмаа ШУТИС-д Үйлдвэрлэл ба маркетингийн менежмент хосолсон мэргэжлээр суралцахаар элссэн нь ирээдүйтэй сонголт байлаа. Оюутан цагийн он жилүүдэд тэрээр үйлдвэрлэл, маркетинг, менежментийн цаана хүнтэй харилцах чадвар, бүтээмж дээшлүүлэхийн охь мэдлэг, чин сэтгэл, хариуцлага, хүсэл тэмүүлэл эцэс төгсгөлгүй эрэл хайгуул оршин байдгийг мэдэрч сургуулиа тун амжилттай төгссөн. Тиймдээ ч олон оюутны дундаас шалгарч, сургуульдаа эрдэм шинжилгээний ажилтан-багшаар үлджээ.

     2004 оноос “Эрдэнэт” үйлдвэр ШУТИС-ийн Компьютер техник менежментийн их сургуультай хамтран Баяжуулах үйлдвэрт бүтээмжийн хэмжилт шинжилгээний төсөл хэрэгжүүлсэн юм. Энэ төсөл дээр тус сургуулийн Үйлдвэрлэл ба маркетингийн удирдлагын багаас таван багш томилогдон ажилласны нэг нь Л.Дэлгэрмаа. Тэрээр үе үехэн “Эрдэнэт”-д ирж судалгаа хийгээд буцна. Тухайн үед Баяжуулах үйлдвэрийн бүтээмжийн үйл ажиллагааг дээшлүүлэхийн тулд ажиллах хүчинд  тулгуурлан тасралтгүй сайжруулалтын аргыг бүтээмж чанарын дугуйлангаар дамжуулан хэрэгжүүлэх хөтөлбөрийг төслийн багийн зүгээс санал болгосон юм. Ажил албан ёсоор эхлэх болоход компаниас КТМС-д мэргэжлийн үүднээс туслалцаа үзүүлэх нэг хүн зайлшгүй хэрэгтэй байна гэсэн хүсэлт тавьжээ. Л.Дэлгэрмаагийн хувьд үйлдвэрлэлийн хичээл заахад практик хэрэгтэй учраас сургуулийн зүгээс томилоход нь нэг их цааргалаагүй ч удна гэж төсөөлөөгүй. “Эрдэнэт” үйлдвэрт гурван жил туршлага хуримтлуулаад буцна гэсэн бодолтой ирж. “Тэгээд яагаад буцаагүй юм бэ? Нэгэн сайхан залууд хоргодов уу, эхэлсэн ажлынхаа эцсийн үр дүнг үзэхийг зорив уу?” гэсэн миний асуултад тэр “Аль аль нь” гээд даруухан инээд алдсан. Ажилд орох тушаал нь төөргөөр нэг өдөр гарсан шавилхан биетэй, томоотой залуутай анхны өдрөөс тохой нийлүүлэн ширээ таллан суусан нь амьдралыг насан туршдаа хамт туулах ерөөлтэй байж. Тэд удалгүй хуримлаж, бие биеийнхээ ажил мэргэжлийг дэмжиж үйлс бүтээл нь өөдрөг явах сайхан хос Эрдэнэсийн хотод өрх тусгаарласан.



     Хүмүүсийн олон жил тогтсон хандлага, хэв маяг, арга барилыг өөрчилж бүтээмж дээшлүүлэх ажил эхэндээ амаргүй байсан нь ойлгомжтой. Илүү ажил мэтээр хүлээж авах хандлага амь бөхтэй оршино. Онолыг амьдралд хэрэгжүүлэхэд асар их саадтай өдөр бүр тулна. Зарим үед номонд бичигдээгүй нөхцөл байдал ч үүснэ. Цаг ямагт шинийг эрэлхийлэх, өөр өөр аргаар ажиллагчдыг идэвхжүүлэх, өөрийгөө хөгжүүлэхэд анхаарна. Аандаа хүмүүсийн ажил хөнгөвчлөгдөөд ирэхийн цагт эсэргүүцэл намжиж, харин ч санаачилж бүтээснээсээ хэн хэн нь эрч хүч, сэтгэлийн таашаал авдаг болов. Ажиллагчдын бүтээлч хандлага, шинийг санаачлах эрмэлзлэл нэмэгдэж байхад учрах бартаа саад түр зуурынх гэж өөрийгөө тайвшруулан урагшилдаг байснаа тэр дурссан. Өнөөдөр “Эрдэнэт” үйлдвэрт бүтээмжийн үйл ажиллагаа 10 гаруй жил хөгжиж байна. Бусад цех, хэлтсүүдэд түгэн дэлгэрч, бүтээмжийн үйл ажиллагааны механизм тогтсон нь баяжуулагчдын бүтээлч хандлагын үр шим гэж Л.Дэлгэрмаа үнэлсэн. Хариуцсан ажлаа өөрийн чадах хэмжээнд тултал хийхийг хичээдэг зан нь түүнийг байнга шинийг эрэлхийлэх аянд мордуулдаг. Ном, сонин, сэтгүүл уншсан ч ажил, амьдралд хэрэгжүүлмээр жижиг гэлтгүй санаа хайх “мэргэжлийн өвчин”-д автана. Саяхан гэртээ сэтгүүл үзэж байгаад Дэлхийн 100 манлайлагч эмэгтэйн жагсаалт хэвлэгдсэнийг олжээ. Тэрбумтанууд, нийгмийн ажилтнууд гэх мэтээр ялган байрлуулсан байж. Эндээс сайн саналын системийн 100 манлайлагчийн зурагт хуудасны санааг олоод баярлах жишээтэй. Манайхан Л.Дэлгэрмаагаар хэд хэдэн удаа бүтээмжийн хичээл заалгасан юм. Түүний хүмүүстэй харилцах байдал, хичээлийн бэлтгэл, цаг барилт, жишээ сонголт, оновчтой цэгцтэй яриа, түвэгтэй асуудлыг энгийнээр тайлбарлах ур зэрэг нь эрхгүй сонирхол татна. Харин тэр “Надад дайчин бардам, гал цогтой чанар дутагдалтай” гэж өөрийгөө шүүмжилсэн. Л.Дэлгэрмаа өнөөдөр том зорилго, их ажлын төлөө олон хүнтэй харьцан ажиллаж байна. Хүнтэй харьцах амаргүй. Нягтлан бодогч бол тоогоо компьютерт зөв хийчихвэл хариу нь асуудалгүй гараад ирнэ. Техниктэй харьцдаг бол зөвхөн өөрөөс бүх зүйл шалтгаална. Хүнтэй ажиллахад 10 хүнд юм хэлэхэд 10 өөрөөр хүлээн авч, таашгүй хариу үзүүлнэ. Тэр болгонд зохицох арга техник, ур чадвар хэрэгтэй. Л.Дэлгэрмаа “Би дэлхийн шилдэг аж ахуйн нэгжид ажилладгийн хувьд олон улсын түвшинд үнэлэгдэх чадвартай байх ёстой гэсэн шаардлагыг өөртөө тавьдаг” гэж хэлсэн. Тиймээс өөрийгөө хөгжүүлэх боломж бүрийг эрэлхийлнэ. 2010 онд Баяжуулах үйлдвэр дээр “Мастерын хөгжил” хөтөлбөр хэрэгжиж хамтдаа хөгжих сонирхолтой ажиллагчид “Залуус” багийг байгуулахад тэр идэвхтэй гишүүнээр элссэн. Тэд цайны цагаараа, ажлын дараа илтгэх чадвараа хөгжүүлж, шинэ мэдээлэл солилцож, англи хэл үзэж судалдаг байв. Энэ уламжлал одоо ч алдагдаагүй. Тэд газар үзэж нүд тайлах зорилгоор сар бүрийн цалингаасаа 100 мянган төгрөгийг нэгдсэн хадгаламжид хуримтлуулдаг. Залуус хуримтлалын мөнгөөрөө Тайланд, Бали руу аялжээ. “Залуус”-ынхан үргэлж шинийг эрэлхийлнэ. Нэгэн хавар их хэмжээний төмс тарьжээ. Ургацаа гараараа хурааж, ил гаргасан төмсөө шөнө хөлдөөхгүйн тулд харанхуйд гэрэл тусган, өвдгөө цоортол мөлхөн байж шуудайлжээ. Уйлах энүүхэнд санагдсаныг тэр нуугаагүй. Залуус нилээд олон шуудай төмс хурааж, шинэ жилээр гаргаж зарахаар зооринд хадгалсан боловч юу ч үгүй хөлдчихөж. Арга буюу гахайн хоол болгосон гэдэг. Гэхдээ тэдэнд алдагдал хүлээснээс илүү төмс ямар их хөдөлмөрийн үнэ цэнээр хэрэглэгчдэд хүрдгийг мэдэрсэн нь чухал байв. Тэдний эгнээнээс монголын анхны ЛЕД гэрэл үйлдвэрлэгчид төрсөн. Хамт хөгжиж, биесээ дэмжиж, хурцлахын өгөөж энэ.
     Ажилд ороод л тогтсон цалинд сэтгэл нь ханаж хөгжих чармайлтгүй идэвхгүй амьдардаг залуучуудын байдал Л.Дэлгэрмаагийн сэтгэлийн эмзэглүүлнэ. Өнөөдрийн өрсөлдөөнт нийгэмд илүү хөгжиж, амжилт өөд тэмүүлсэн хэн бүхэнд боломж нээлттэй гэдгийг тэр ухааруулахыг хүснэ.  “Бүтээмжийн” Дэлгэрмаа өнөөдөр дэлхийн хэмжээний онол сургалтыг ололт дэвшлээр чанаржуулан ахиулж, санаа сэдэл өдөөх, шинийг бүтээх “эрдэнэ” түгээж явна.  


Сэтгүүлч М.ОДГЭРЭЛ
 

Эрдэнэт үйлдвэр ХХК-ийн хүдрийн ил уурхайд Австралийн Тайтлайн ресорсиз монголиа ХХК-ийнхан хайгуулын өрөмдлөгийн ажлыг хийж эхэлсэн байна. Энэ онд Геологи хайгуулын анги  дутуу судлагдсан хэсгүүдэд 30000 тууш.метрийн өрөмдлөгийн ажил хийхээр төлөвлөжээ. Төлөвлөгөөт өрөмдлөгийн ажил дуусах дөхөж байгаа бөгөөд 5000 тууш.метр цооногийг хянан баталгаажуулах, гадаад хяналт хийх зорилгоор ийнхүү туслан гүйцэтгэгч олон улсын туршлага бүхий компанитай хамтран ажиллаж байна. Олон улсын жишигт хайгуул, судалгаа, шинжилгээний ажилд гадаад хяналт хийлгэх нь эерэг үр дүнтэй байдаг.Манай компани мөн дээжний сорьцийг тодорхойлуулахад чанарын хяналт, чанарын баталгааг өндөр байлгахад анхаарч олон улсын итгэмжлэл нэр хүнд бүхий лабораториудтай хамтран ажилладаг. Бидний цаашдын зорилго геологи, уул уурхайн орчин үеийн дэвшилтэт технологи, арга аргачлалыг үйл ажиллагаандаа нэвтрүүлэх, Монгол улсад мэргэжсэн боловсон хүчний чанар, чадамж, туршлагыг дээшлүүлэх бордлогыг баримтлаж байна.

Гадаад хяналтын өрөмдлөгийн зорилго, ач холбогдлын талаар Геологи хайгуулын ангийн дарга М.Дамдинсүрэн тайлбарлахдаа: “ Аливаа ордын нөөцийн ангилалд  тухайн орны буюу олон улсын стандарт гэж байдаг. Манай орны хувьд баттай, бодитой, боломжтой таамаг нөөц гэж ангилдаг. Хуучнаар A,B,C1, C2 гэж ангилдаг байв.Тэгэхээр манай ордын нөөцийг олон улсын стандартад дүйцүүлэн шилжүүлэхийн тулд хяналт байдлаар гадны байгууллагаар хянан баталгаа хийлгэх ажил эхэлж байгаа юм. Бид уг Австралийн компаниас суралцах, туршлага солилцох асуудлуудаа тохиролцон хамтран ажиллах ба цаашид шинэ арга аргачлал, технологи болох олон чиглэлд салааж өрөмдөх, чиглэлтэй өрөмдөх зэрэг чухал дэвшилтэт технологиудыг үйл ажиллагаандаа нэвтрүүлнэ” гэв.

     Эрдэнэт үйлдвэрийн Хөдөлмөрийн аюулгүй байдал эрүүл ахуй, байгаль орчныг хамгаалах хэлтсээс “Удирдагчийн 70 хувийн нөлөөлөл” аяныг зохион байгуулж байна. Тухайн хамт олондоо манлайлагч буюу бусдад эерэгээр нөлөөлж чаддаг удирдагчдын идэвх санаачилгыг дээшлүүлэх зорилгоор энэхүү аяныг өрнүүлж байгаа аж. Өөрөөр хэлбэл, ажлын байранд хүн бүр манлайлагч байх боломжийг бүрдүүлэх, манлайлагчийг төлөвшүүлэх зорилтыг дэвшүүлжээ.
     “Удирдагчийн 70 хувийн нөлөөлөл” аян үйлдвэрийн бүтцийн нэгжүүдийн мастер, шугаман инженер техникийн ажилтнууд, дунд шатны удирдлагуудын дунд өрнөнө.  ХАБЭА-н ажлын байрны удирдлагын манлайллыг сайжруулах боломж нь удирдагчийн зан үйлийн 70 хувиас хэрхэн хамаарч байгаа болон ХАБЭА-н үйл ажиллагаанд ажилтнуудын бүтээлч оролцоо, удирдлагын манлайллыг идэвхжүүлсэн үр дүнг үндэслэн аяны шагналтнуудыг тодруулах аж.  “Удирдагчийн 70 хувийн нөлөөлөл” аян ирэх сарын 15-ны өдөр дүнгээ гаргана.

     Хаягдлын  аж ахуйн  шүүрлийн усны сувгийн зүүн, баруун хэсгийг цэвэрлэх ажил эхэллээ. Энэхүү төслийг “Мон-Энерго” компани өнгөрсөн жилээс хэрэгжүүлж эхэлсэн. Ингэхдээ сувгийн төв хэсэг буюу гуравны нэгийг бүрэн цэвэрлэсэн  байна. Шүүрлийн усны суваг нь Хаягдлын далангаас шүүрч буй усыг цуглуулж авах, үйлдвэрлэлд эргүүлэн ашиглах зориулалттай юм. Энэхүү сувгийг  цэвэрлэх  төсөл 2018 онд дуусах аж. Уг ажлын  цахилгаан, дулааны хангамжийг “Эрдэнэт” үйлдвэр  хариуцаж  байна.
     “Мон-Энерго”  компанийн  Ерөнхий захирал Г.Пүрэвсүрэн Цэвэрлэгээнд  сүүлийн үеийн дэвшилтэт технологи ашиглаж байна. Усан доорх бүх процесс, гаргасан лагийн хэмжээ хэрхэн өөрчлөгдөж буй, технологийн горимтой тохирч байгаа  эсэхийг  камерийн системээр хянаж байна. Шүүрүүлэх сувгийг хооронд нь холбосон 11 метрийн гүн дэх 59 метр турба бөглөрсөн нь бидний ажилд хүндрэл учруулж байна.  Ус сэлгэх зориулалттай цементэн турба нь 1500 мм-ийн голчтой буюу дотор нь бараг хүн явах өндөртэй. Энэ турбаг цэвэрлэх ажлыг усан дор ажиллах тусгай технологи ашиглан  ирэх жил гүйцэтгэнэ” гэж ярилаа. Шүүрлийн усны сувгийг цэвэрлэснээр хаягдлын далангийн бат бэх байдал сайжрах юм. Мөн Хангалын гол руу ус алдахгүй болсноор энэ хавийн бохирдол багасах аж. Нөгөөтэйгүүр энэ сувгийг бүрэн цэвэрлэснээр жилд таван сая шоо метр   ус хэмнэж, Сэлэнгэ мөрнөөс татах ийм хэмжээний усыг эргүүлэн ашигласнаар манай үйлдвэрийн эдийн засагт чамгүй үр ашиг гарна. Мөн байгалийн цэвэр усыг ариг гамтай хэрэглэж саарал усыг үйлдвэрлэлд ашигласнаар байгаль орчинд ээлтэй ажил болох юм. “Мон-Энерго”  компанийн  инженерүүд шүүрлийн сувгийг цэвэрлэхэд зориулан гүүрэн кран бүхий иж бүрэн сийрүүлэн сорох  төхөөрөмж зохион бүтээжээ.  Төсөл дууссаны дараа уг төхөөрөмжөө технологийн горимын дагуу, оюуны өмчийн патентын хамт “Эрдэнэт” үйлдвэрт шилжүүлэн өгөх юм.

 


Я.ЭНХ

     Монгол-Оросын найрамдал хамтын ажиллагааны өдрүүдийн хүрээнд Баяжуулах үйлдвэрт энэ долоо хоногт “Талархлын захидал” аян өрнөж байна. Энэ талаар тус цехийн бүтээмжийн менежер Л.Уранцэцэгээс тодрууллаа.

     -Монгол, Орос ажиллагсдын хамтын хөдөлмөрийн үр шимээр “Эрдэнэт” үйлдвэр, энэ хот сүндэрлэснийг бид мартах учиргүй. Тиймээс манай хамт олон жил бүрийн Ялалтын баяр, Монгол-Оросын найрамдал хамтын ажиллагааны өдрүүдэд олон талт ажил санаачилан зохион байгуулдаг уламжлалтай. Энэ сарын эхээр Сэлэнгэ мөрөн дээр загасчлалын тэмцээн явуулсан. Өнөөдөр монгол, орос ажилтнууд бие биедээ чин сэтгэлийн талархал илэрхийлэх аяныг Технологийн сургуулийн Орос хэлний төвтэй хамтран эхлүүлж байна. Үүнд орос мэргэжилтнүүдээс гадна залуу ажиллагсдыг татан оролцуулахыг зорьж байгаа. Орос мэргэжилтнүүдийн үнэлж баршгүй гавьяа, нөхөрсөг тусч сэтгэлд талархаж явдгаа захидлаар дамжуулан илэхийлэх боломжийг ажиллагсдад олгож байгаагаараа онцлог юм. Энэхүү аян маань 10-р сарын 31 хүртэл үргэлжилнэ. Аяны төгсгөлд хамгийн санаачилгатай оролцсон хамт олон, сэтгэл хөдөлгөм захидлыг шалгаруулж урамшуулна.     Өнөөдөр эхний захидлыг Механикийн албаны зохион бүтээгч инженер Маликов.Е.В хамт олноосоо гардаж сэтгэл догдлон уншлаа. Мөн Нунтаглан баяжуулах хэсгийн механик Вислогузов Н.М, Бутлан тээвэрлэх хэсгийн засварчин Мельник хоёрт чин сэтгэлийн талархлын захидлыг монгол үндэсний цамцтай хамт гардууллаа. Удахгүй “Эрдэнэт” телевизтэй хамтран “Малчны хотонд” нэвтрүүлэг бэлтгэж үзэгчдийн хүртээл болгох, орос мэргэжилтнүүдийг Амарбаясгалан хийдэд аялуулах гээд төлөвлөсөн ажлууд эхнээсээ хэрэгжээд явж байна.   

    -Бүтээмжийн чиглэлээр ямар ажлууд хийгдэж байна?
   -Бид бүтээмж инновацийн үйл ажиллагааг сайжруулах чиглэлээр бүтээмжийн ахисан түвшний арга хэрэгслүүдийг хэрэглэх зорилт тавин ажиллаж байна. Бүтээмжийн зөвлөлөөс өнгөрөгч онд хэрэгжүүлсэн 6 сигма, Бенчмаркинг төслүүд сайжруулалтын шатандаа явж байна. Бенчмаркинг төслийн хүрээнд бид Баяжуулах үйлдвэрийн инженер техникийн ажилтнуудын манлайллын түвшинд тандалт судалгаа хийж нийтлэг давуу болон сул талуудыг тодорхойлсон. Мөн “Ногоон бүтээмж”-ийн арга хэрэгслүүдийг хэрэглээнд оруулах ажил эхэлсэн. Бид инженер техникийн ажилтнуудынхаа ур чадварыг сайжруулж  манлайллыг дээшлүүлэх зорилт тавьсан. Энэ хүрээнд зарим удирдах ажилтны туршлагаас суралцах, тодорхой чиглэлүүдээр мэдлэгээ дээшлүүлэх, биечлэн үлгэрлэн манлайлах ажлыг зохион байгуулна. Мөн Бүтээмжийн зөвлөлөөс ойрын үед ХАБЭА-н хэлтэстэй хамтран “Манлайллын хөтөлбөр” хэрэгжүүлэхээр бэлтгэж байна.
     -Баярлалаа.

М.ОДГЭРЭЛ

      Герман-Монголын бизнесийн зөвлөлийн ТУЗ-ийн дарга Герхард Вакенхүт  тэргүүтэй төлөөлөгчид саяхан “Эрдэнэт” үйлдвэрт зочлов. Тэд үйлдвэрийн үйл ажиллагаатай танилцаж, удирдлагуудтай уулзалт хийв.  Бизнесийн зөвлөлийн төлөөлөгчид  Германы  өндөр технологи, шинэ мэдлэгийг “Эрдэнэт”  үйлдвэрт  нэвтрүүлэн нутагшуулах чиглэлээр  илтгэл толилууллаа.  Тэд   Германы өндөр технологи ашиглаж,  Засвар механикийн заводын бааз суурь, мэргэжилтнийг түшиглэн  Монгол улсын машин үйлдвэрлэлийн кластер хөгжүүлэх боломжийг танилцуулав.  
     “Үйлдвэр байгуулагдаад 40 жил боллоо. Байгалийн баялаг хязгаартай, хэзээ нэгэн цагт үйлдвэр хаагдахад Эрдэнэт хотын 100 мянган иргэн хэрхэн амьдрах вэ гэдэг асуудалд  анхаарлаа хандуулж байна. Иймээс Герман болон  барууны орнуудын технологи  ноу-хауг  Монголд нутагшуулж, “Эрдэнэт” үйлдвэрийн Хаалт хөгжлийн менежментийн хүрээнд ирээдүйд Эрдэнэт хотод машин үйлдвэрлэлийн том төв бий болоосой гэж хүсч байна” гэж Герман-Монголын бизнесийн зөвлөлийн гишүүн Л.Цоодол онцлов.  Өнөөдөр   аж ахуйн нэгж, олон нийтийн байгууллагын хооронд яригдаж буй асуудлыг  цаашид  хоёр улсын Засгийн газар хоорондын анхааралд  чиглүүлэхийг хичээнэ.  Ирэх жил болох Монгол- Германы Засгийн газар хоорондын Эдийн засгийн комиссын хуралдааныг  Эрдэнэт хотод зохион байгуулж,  улс төр, эдийн засаг, компани хоорондын харилцааг сэргээхийн чухлыг төлөөлөгчид онцлов.


Я.ТУЯА

 

Эрдэнэт үйлдвэр ХХК-ийн

Олон нийттэй харилцах албаны цахим хуудас

           

 

 

Зургийн цомог