• Уурхайн төлөвлөлтийн цогц систем нэвтрүүлнэ

      Эрдэнэт үйлдвэрийн Геологи, маркшейдерийн хэлтэс, Ил уурхайн инженерүүд уурхайн оновчлол, төлөвлөлтийн үйл ажиллагаанд дэлхийн жишигт нийцсэн цогц систем нэвтрүүлэхээр ажиллаж байна. Өмнө нь, Эрдэнэт үйлдвэрийн уурхайн урт хугацааны төлөвлөлтийг Оросын мэргэжилтнүүд хийдэг байсан бол 2016 оноос Монгол инженерүүд уурхайн оновчлол, төлөвлөлт хийх болжээ. Тэд Австралийн “МАРТЕК” компанийн мэргэжилтнүүдтэй өдөр бүр онлайнаар холбогдож уг системийг эзэмших, уул уурхайн төлөвлөлтийн цогц программ хангамжийг үйлдвэрлэлд нэвтрүүлэхээр хамтран ажиллаж, мэдлэг туршлагаа солилцож байна. Энэхүү систем нь хоёр үндсэн хэсэгтэй бөгөөд нөөц, баялгийн үнэлгээ хийж уурхайн оновчлол, эцсийн дизайныг тооцоолох, олборлолтын урт хугацааны стратеги, дунд хугацааны тактик төлөвлөлтийн инженерийн зураг төслийг боловсруулах юм. Эдгээр системийг нэвтрүүлснээр ордын үр ашиг, өнөөгийн үнэ цэнэд суурилсан уурхайн оновчлол, хөрөнгө оруулалтыг тооцож  төлөвлөлтийг илүү өргөн хүрээнд, нарийвчлал сайтай хийхээс гадна дэлхийн зах зээлийн болон түүхий эдийн үнийн хэлбэлзэлд тохирсон бизнесийн үйл ажиллагааны стратеги боловсруулах, компанийн удирдлагыг хэрэгтэй мэдээллээр хангах юм. Шинэ систем нэвтрүүлэх ажлын хүрээнд зарим шаардлагатай багаж, тоног төхөөрөмжүүд, өндөр хүчин чадал бүхий дөрвөн компьютер ажиллагаанд оруулжээ. М.Одгэрэл Фото. Б.Баттөгс Дэлгэрэнгүй...
  • Өнөөдөр 04 дүгээр сарын 09

    Мэдүүштэй... 1.Өнөөдөр жилийн 99 дэх өдөр. Он дуусахад 266 хоног үлдлээ. 2.Эрдэнэт хотод агаарын хэм өдөртөө 0-11 градус дулаан, шөнөдөө 0-2 градус хүйтэн, багавтар үүлтэй, салхины хурд 1-5 м/сек байна. 3.Аргын тооллын 4 сарын 9. Бархасбадь гараг. Билгийн тооллын 16. Салхины эх одтой, хар морь өдөр. Өдрийн наран 6 цаг 14 минутад мандан, 19 цаг 33 минутад жаргана. Тухайн өдөр бар жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр найз нөхдийг түшиж элдэв үйлийг түргэн бүтээх, бүтээл туурвил эхлэх, бизнес эхлэх, цар ихтэй үйлийг эхлэх, бясалгал хийх, доодсыг асран өглөг, хандив өргөх, лусыг тахих, тангараг тавих, гэр байшингийн суурь тавихад сайн. Гэр бүрэх, хэрүүл тэмцэл хийх, сэтгэлд сэвтэй газар очиход муу. Өдрийн сайн цаг нь хулгана, үхэр, туулай, морь, бич, тахиа болой. Хол замд явах хүмүүс хойд зүгт мөрөө гаргавал зохистой. Үс шинээр үргээлгэх буюу засуулахад тохиромжгүй. 4.Дэлхийн зах зээл дээр нэг тонн зэс 4976 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2781, евро 3024, БНХАУ-ын юань 394, ОХУ-ын рубль 36, Японы иен 25 төгрөгтэй тэнцэж байна. Эрдэнэт үйлдвэрийн түүхэнд энэ сар... 1977 оны 4-р сар Эрдэнэт хотын орон сууцуудыг хэрэглээний халуун усаар төвлөрсөн шугамаас хангаж эхлэв. “Монгол-Зөвлөлтийн хамтарсан уул уурхайн баяжуулах “Эрдэнэт” үйлдвэрийн ашиглалтын үеийн бэлтгэлийг эрчимжүүлэх арга хэмжээний тухай” МАХН-ын Төв хорооны Улс төрийн товчооны 83 дугаар тогтоол гарчээ. 1978 оны 4-р сар Бүх Холбоотын Өнгөт төмөрлөгийн нэгдлийн дарга Л.А.Баулин тэргүүтэй төлөөлөгчид Эрдэнэт хотод зочилжээ.  1979 оны 4-р сар БНМАУ-ын уул уурхайн үйлдвэрүүдийн удирдах ажилтны зөвлөгөөн Эрдэнэт хотод болов. 1980 оны 4-р сар Эрдэнэт хотод “Экран-414” телевизийн дахин дамжуулах станц суурилагдаж, Зөвлөлтийн төв телевизийн “Орбита”-ын программыг шууд үзэх боломжтой болов. Улаанбаатар-Дашинчилэн, Булган-Эрдэнэтийн радио-релейн шугамыг Эрдэнэт хотод хүлээн авчээ. 1979 оны ажлаар “Эрдэнэт” үйлдвэрийн хамт олон бүх ард түмний социалист уралдаанд шалгарч, 4 байгууллагын шилжин явах туг, диплом, мөнгөн шагнал гардан авав. Дэлгэрэнгүй...
  • Баяжуулагчид албан өрөөндөө дасгал хийж хэвшив

    Хүн төрөлхтөнд тархаад буй шинэ төрлийн корона вирусын халдвараас урьдчилан сэргийлж дархлааг дэмжих, ажилтнуудынхаа бие бялдрыг чийрэгжүүлэх зорилгоор Баяжуулах үйлдвэрийн арга зүйчид, Эрүүл мэнд, чийрэгжүүлэлтийн төвийн зохион байгуулагчид цайны цагаар ажиллагчдаа дасгал хөдөлгөөнд хамруулж байсан. Харин сүүлд хоёроос дээш хүн цуглавал бөөгнөрөл гэж үзэж хориглох шийдвэр гарснаас хойш тэд үйлдвэрийн газрын Ерөнхий захиргааны нэгдүгээр байрны захиргааны ажилнуудын албан өрөөнд өртөөчлөн Тайсо дасгал хийлгэж хэвшжээ. Японы Тайсо нь хүний биеийн бүх хэсэгт үйлчлэн булчин ясыг бэхжүүлж, хөдөлгөөний хомсдолоос сэргийлэх, дархлаа сэргээх ач тустай энгийн дасгал юм. Эрүүл мэнд, чийрэгжүүлэлтийн төвийнхөн энэ үйл ажиллагаагаараа удирдлагын манлайллыг нэмэгдүүлнэ гэж үзэж байна. Өнгөрсөн жил Баяжуулах үйлвэрийн арга зүйчид хэсгүүдийн дунд Тайсо дасгалын уралдаан зарлаж, 140-өөд хүн оролцож өрсөлдсөн юм. М.Одгэрэл Дэлгэрэнгүй...
  • Цагаан тоос цаашилсаар...

    Цагаан тоосны дэгдэлтийн талбайгаас сурвалжиллаа. Эрдэнэт үйлдвэрийн Хаягдлын аж ахуйд үйлдвэрлэлийн хаягдал булингаас үүсдэг хуурай элс, салхинд дэгдсэнээс “цагаан тоос”-ны асуудал эхлэлтэй. Энд 2000 гаруй га талбайг Хаягдлын аж ахуй эзэлдэг. Үүний 1400 гаруй га нь хуурай талбай бол 900 орчим га талбайг цагаан тоосны идэвхтэй дэгдэлтийн бүс гэдэг. Хамаг сайхны эхлэл хавар цагтай зэрэгцэн айлчилдаг хавсарга салхины улирал “цагаан тоос”-ны жинхэнэ ташуур болох нь бий. Чухам энэ л цаг үед Эрдэнэт үйлдвэрийнхэн ч цагаан тоос дарах ажлаа эрчимжүүлж, Байгаль орчин, ногоон хөгжлийн хэлтэс, Цагаан тоос дарах ажлын алба, Авто тээврийн цех, Ган бөөрөнцгийн цехийн хамтарсан багийнхан ажлын цагаа уртасгаж, амралтын өдрүүдээ хугаслан ажилладаг юм. Өнөө жил ч цаг агаарын онцлогт уялдуулан цагаан тоос дарах ажлаа үргэлжлүүлж байна. Энэ удаа биднийг газарчилсан Байгаль орчин, ногоон хөгжлийн хэлтсийн Хяналт, мониторинг хариуцсан инженер Н.Наранчимэг ярихдаа “Өнөөдрийн байдлаар, Баяжуулах үйлдвэрийн Цагаан тоос дарах байнгын ажлын алба, Ган бөөрөнцгийн цехийн нийт 11 хүний бүрэлдэхүүн цагаан тоосны талбайд хүч нэмэгдүүлэн, өдөр бүр 20 цаг хүртэл ажиллаж байна. Цагаан тоос дарахдаа бид олон технологийн аргыг хослуулан ашигладаг. Хөрсөөр хучих, кальци хлоридын уусмалыг устай хольж зориулалтын техникээр шүрших, нөхөн сэргээлтийн ажилд ашиглаж байсан хуучин тороор хуурай талбайг хучих гэх зэрэг янз бүрийн хэлбэрээр дарж байна. Хаягдлын аж ахуйд Авто тээврийн цехийн 40 тонны даацтай гурван БелАЗ байнга ажилладаг. Эдгээр техникээр өдөрт 50 орчим удаа ус зөөвөрлөж, шүршигч төхөөрөмжөө цэнэглэн талбайг норгож байна. Бид өнгөрсөн хавраас поликулиант буюу холигч бодис ашиглан барьцалдуулах технологийн арга туршиж эхэлсэн нь үр дүнтэй болж, нийт талбайнхаа 80 хувийг нь дараад байгаа. Одоо үлдсэн 20 хувийг дарна. Энэ хэсэг нь талбайн булан тохой учраас хүнд даацын техникүүд элсэнд шигдэх, техникийн боломж хүрэлцэхгүй, технологийн онцлог зэргээс шалтгаалан  хүндрэлтэй байдал үүсгэдэг. Тиймээс энэ хэсгийн талбайд хүрч дарах ажлыг зохион байгуулж байна. Өмнө нь салхины хурд 4 метр секунд хүрэх төдийд л тоос дэгдэж эхэлдэг байсан бол одоо 12 метр секунд хүртэл хурдтай салхинд зөвхөн үлдсэн 20 хувийн талбайгаас цагаан тоос босож байгаа” гэсэн юм.    Цагаан тоос дарах ажилд Эрдэнэт үйлдвэр жил бүр 1 тэрбум орчим төгрөг төлөвлөж зарцуулдаг. Үүний ихэнх хэсэг нь техник, тоног төхөөрөмжийн зардал аж. Цагаан тоос дарахад зардал, мөнгөнөөс гадна байнгын ажиллагаа шаардлагатай. Учир шалтгаан нь үйлдвэрлэлийн тасралтгүй үйл ажиллагаа, хүдэр боловсруулалтын хэмжээ өссөнөөр булинга элсний хуримтлалын талбай тэлж байгаатай холбоотой. Тиймээс ч үйлдвэрийн удирдлага Хаягдлын аж ахуйн ирээдүй, онцолбол шинэ аж ахуй байгуулах тухайд ч санал бодлоо хэлэлцэж буй.  Нөгөөтээгүүр, цагаан тоосыг бүрэн дарж дуусгахад үйлдвэрлэлийн хаягдлын технологийг өөрчлөх учиртайг үйлдвэрийн мэргэжилтнүүд ярьдаг. Өөрөөр хэлбэл, хаягдал булингын шинж чанарт нөлөөлөх технологи буюу өтгөрүүлэх аргын судалгаа болон техник эдийн засгийн үндэслэлийг Хөгжлийн хэлтсийнхэн Канад улстай хамтран хийж байна. Оюутолгойн үйлдвэрлэлийн хаягдал булинга нь 70 хувийн хатуулагтай байдаг бол манай үйлдвэрийнх 20 хувь байдаг байна. Тиймээс дээрх судалгааг хийж нэвтрүүлснээр шингэн булингыг өтгөрүүлэх,  нарийн ширхэгтэй тоос болж дэгдэх эрсдэлийг багасгах боломжтой болох юм. Ингэж зөвхөн өнөөдрөөр бус маргаашийг хэрхэн төлөвлөх талаар инженерүүд  урьдчилан олон талаас нь судалж байгааг дурдах нь зүйтэй. Цагаан тоосны талбайд ажиллаж буй ажилчид тоос дарах аргын үр дүнг газар дээр нь харж буйгаа хэллээ. “Кальци хлоридын уусмал буюу давстай усаар шүрших арга үр дүнтэй. Барьцалдамтгай чанартай учир наранд удаан хатдаг юм байна. Шүрших зориулалттай машин 8 тонны даацтай, нэг удаа 200 метр орчим талбайг шүршиж хүрэлцдэг” гэж Ган бөөрөнцгийн цехийн Цувих шугамын оператор Л.Өлзий ярив. Харин хөрсөөр хучих аргаар дарж буй хаялтын цэгээс Цагаан тоос дарах ажлын албаны Байгаль орчны инженер Б.Моломжамц мэдээлэхдээ “Өдөрт хоёр белАЗ 45-50 удаагийн эргэлтээр шороо зөөж байна. Хөрсөөр хучсан талбайд дахин хаягдал булинга нэмэгдэхгүй тохиолдолд цагаан тоос дахин дэгдэхгүй. Тиймээс хөрсөөр хучих нь найдвартай аргын нэг” гэсэн юм.    Цагаан тоос хүний эрүүл мэндэд муугаар нөлөөлж байгаа гэх яриа мэр сэр гардаг. Мэдээж, үүнд тодорхой бөгөөд үнэн хариулт хэрэгтэй. Тиймээс Эрдэнэт үйлдвэр нийгмийн хариуцлагаа хэрэгжүүлэх, хүн болон байгаль орчинд үзүүлэх сөрөг нөлөөллийг багасгах,  урьдчилан сэргийлэх бодлогын хүрээнд 2006 оноос эхлэн эрүүл мэндийн үзлэг шинжилгээг үе шаттай зохион байгуулж ирсэн юм. Эрүүл мэндийн үзлэгт цагаан тоосны бүс гэж нэрлэдэг Орхон аймгийн Баянцагаан, Говил баг болон Жаргалант сумын зарим нутагт амьдардаг ард иргэдийг хамруулдаг. Уг үзлэгийг жил бүр Орхон аймгийн ЗДТГ, Эрүүл мэндийн газар, “Эрдэнэт” сувиллын цогцолбортой хамтран зохион байгуулж, нарийн мэргэжлийн эмч нарын баг болон бусад хөндлөнгийн хяналтын байгууллагуудыг оролцуулж байна. Өнгөрсөн онд л гэхэд цагаан тоосны бүс нутагт оршин суудаг 488 иргэнийг эрүүл мэндийн иж бүрэн үзлэг шинжилгээнд үнэ төлбөргүй хамруулж, нарийн мэргэжлийн эмч нар зөвлөмж зөвлөгөө өгсөн. Шинжилгээг аймгийн Эрүүл мэндийн газрын эмч мэргэжилтнүүд хийж, цагаан тоос хүний эрүүл мэндэд шууд сөрөг нөлөө үзүүлээгүй болохыг тогтоожээ. Иргэдийн эрүүл мэндэд сөрөг нөлөө үзүүлж буй эсэх талаар олон төрлийн судалгаа байдаг ч нарийн мэргэжлийн багийнхны үнэлгээ хийлгэхээр Эрүүл мэндийн яаманд хандаад буй. “Ковид-19” халдвараас шалтгаалан энэ ажил түр хугацаагаар хойшлоод байгааг Орхон аймгийн Эрүүл мэндийн газрын Орчны эрүүл мэнд, нөлөөллийн үнэлгээ хариуцсан мэргэжилтэн М.Болормаа ярилаа.     Эрдэнэт үйлдвэр цагаан тоосноос салах ажлыг эрчимжүүлж, уурхайчид онцгой анхаарч, ажлын албаныхан, байгаль орчныхон хүч, сэтгэлээ нэгтгэн  ажилласнаар цагаан тоос цаашилж байна. Гэхдээ нэг удаа дараад зогсох бус, уйгагүй тасралтгүй ажиллагаа, бас цаг хугацаа л “цагаан тоос”-нд хэрэгтэй.  М.Балжинням Фото Б.Баттөгс  Дэлгэрэнгүй...
  • Шилдэг шинийг санаачлагч

      Эрдэнэт үйлдвэрийн 2019 оны шилдэг шинийг санаачлагч, Автотээврийн цехийн Эрчим зүйн албаны тэргүүлэх эрчим зүйч А.Батдорж, түүний хамт олны ажил үйлсийн тухай өгүүлэх нь.   1990 онд Эрхүүгийн Политехникийн дээд сургуулийг Уулын цахилгааны инженер мэргэжлээр төгссөн тэрбээр  яамны томилолт өвөртлөн Эрдэнэтийг зорьжээ. Завхан нутгийн хүү, сургаар мэдэх болсон энэ хотод хөл тавьсан тэр нэгэн өдрөөс хойш өдгөө 30 хаврыг үджээ. Засвар механикийн заводын Цахилгаан тоног төхөөрөмжийн засварын хэсгээс хөдөлмөрийн гараагаа мастераар эхэлж, 1995 он хүртэл ажилласан. 1995 оноос өнөөг хүртэл Авто тээврийн цехэд энэ л албанд  зүтгэсээр. Одоо тэр Эрчим зүйн 62 хүнтэй хүчирхэг албыг тэргүүлэн ажиллаж буй. Энэ алба Авто тээврийн байгууллагыг уур, ус, дулаан, цахилгаанаар найдвартай хангах үндсэн үүрэгтэй. Тэдний харьяанд Шатахуун түгээх станц, Технологийн тээврийн, Төрөл бүрийн маркийн  автомашины, Тусгай зориулалтын автомашины засварын газруудын машин угаалга, гараажууд ч харьяалагдана. Машин угаах, шатахуун түгээх гээд л үйлдвэрийн хэмжээний  нэн чухал албыг тэд залгуулдаг. Эднийхэн 2019 онд ажил үйлс, ХАБЭА, бүтээмж инноваци, сахилга дэг журам гээд л бүхий л үзүүлэлтээрээ Авто тээврийн цехийн бүх хэсгээс тэргүүлсэн. А.Батдоржоор ахлуулсан энэ баг үндсэн үүргээ чанд биелүүлэхээр ажлаа хязгаарлахгүй.  “Ахлагч”-ийн толгойд  шинийг эрэлхийлэх, эрчим хүчний орчин үеийн дэвшилтэт технологи нэвтрүүлж, зардал  хэмнэх бодол байнга эргэлдэнэ. Үйлдвэрийн ажлын байранд лед гэрэл суурилуулах төслийг эднийх анх хэрэгжүүлсэн гэдэг. Цахилгаан эрчим хүч ихээхэн хэмнэсэн энэ туршлагыг Эрдэнэт үйлдвэр даяар нэвтрүүлсэн. Тэр, автомашиныг шингэрүүлсэн шатдаг хийгээр цэнэглэх станц байгуулах санаачилга гарган ашиглалтад оруулснаар суудлын 20 машины зөвхөн түлшний үнийн зөрүүгээс сард 5,1 сая төгрөг хэмнэжээ. Түүний санаачилсан “Автомат мэдрэгчтэй шүршүүр” төсөл үйлдвэрийн хэмжээнд шалгарч хэрэгжсэн. Түүнчлэн “Нарны толин гэрэлтүүлэг” зэрэг төсөл хэрэгжүүлснээр ус, цахилгаан эрчим хүчийг ихээхэн хэмнэжээ. Өнгөрсөн жил цехийн ажлын байрны дулааны системийн 30 хувийг нь шинэчилжээ. Тухайлбал, багахан гурван өрөө тус бүрийг 22 квт-ын хөдөлгүүртэй  вентилятороор халаадаг байсан бол 7,5 квт-ын орчин үеийн ганц вентилятороор  эдгээр өрөөг дулаанаар үлээх системд холбожээ. Энэ хэрээр зардал буурах юм. Мөн машиныг шлянкаар угаадгийг халж, тусгай зориулалтын компрессор ашигласнаар усны хэрэглээ үлэмж багасжээ. Эрчим хүч хэмнэж, эх дэлхийгээ аврах үйлсэд эдний хамт олон жинтэй хувь нэмэр оруулж буй нь тодорхой. А.Батдорж хамт олноо байн байн магтана. Манайхны ихэнх нь залуус. Ажилдаа өөриймсөг ханддаг, санаачилгатай, хөдөлмөрч нь дэндсэн л гэнэ. “Үндсэн ажлынхаа зэрэгцээ төсөл санаачлах, түүнийг хэрэгжүүлэхэд бүгд л эрвийх дэрвийхээрээ оролцдог. Ажлын орчноо тохь тухтай, цэвэр цэмцгэр байлгах нь манайханд хэвшсэн ажил” гэв.  Бид БелАЗ-ын гарааж дахь Эрчмийнхний ажлын байрыг сонирхлоо. Энд угаас гарааж бус “Аптек” гэмээр цэвэрхэн, урлаг, спортын танхим мэт цэлгэр. Хэзээ ч ороод очиход бүртийх төдий ч тоос шороо, тос маслыг эндээс олж харахгүй. Эднийхний санаачилж, байгуулсан Ус хөргөх зориулалттай усан сан цэмцийнэ. Том ёмкост ашиглан хийсэн энэ сангийн эргэн тойрны бүх зүйл эмх цэгцтэй, цайвар цэнхэр өнгөөр будсан бетонон шал шил толь мэт. Түүн дээр усны дусал ч алга.  Танай үйлчлэгч их ажилсаг, нямбай хүн бололтой гэхэд: “Манайд орон тооны үйлчлэгч үгүй. Ажлаа хийчхээд ажлын байрыг цэгцэлж, цэвэрлэх нь манайхны сурсан зан” гэв.  Багаж олгодог, бас чөлөөт цагаа өнгөрөөх багахан өрөөгөөр орлоо. Тэнд байх бүхий л зүйлийг тэд өөрсдөө бүтээжээ. Диван, сандал, ширээ, бас багажийн шкафыг хаягдал поошик ашиглан хийсэн байна. Багажийн шкаф дотроо эргэдэг тавиур өлгүүртэй. Энд багаж бүр өөрийн байртай, эмх цэгцтэй.  Хэн, хэзээ, хэдэн ширхэг ямар түлхүүр авсныг тэмдэглэх дэвтэр ч үүн дотор байх. Энэ шкаф их эрэлттэй, үзэсгэлэн худалдааны үеэр үүнийг захиалж авдаг хэрэглэгч олон гэнэ.          Энэ гараажид цахилгаан хуваарилах дэд станц байрладаг. Түүнд төмөр сараалжин хашаа хийж, тэмдэг, тэмдэглэгээ, зураг плакат байрлуулсан нь аюулгүй ажиллагааны шаардлагад нийцсэн, өнгөлөг гоёмсог болжээ. Цехийн хэмжээнд   таван дэд станц байдаг бөгөөд бүгдийг нь ийм болгосон гэсэн. Ажлын байраа танилцуулж явахдаа А.Батдорж ажил хуваарилах өрөөг хамт олныхоо хандиваар тохижуулж байгаагаа ярьсан. Тансаг сайхан өрөөтэй болно оо, бид. Тохижуулж дуусахаар нь ирж үзээрэй. Ажилчид маань наръядаа аваад ажилд гарахдаа сэтгэл тэнүүн сайхан байх болно. Энэ ч ажлын бүтээмжид сайнаар нөлөөлнө гэв.      Бүтээмжийн менежер Ж.ПҮРЭВСҮРЭН: “Манай тэргүүлэх эрчим зүйч А.Батдорж их санаачилгатай, бүтээлч хүн. Шинэ зүйл санаачлах үйлст хамт олноо үлгэрлэн дагуулж, залуусыг хөгжиж, шинээр сэтгэхэд сэдэлжүүлэн ажилладаг. Эдний ажлын байр үлгэр жишээ, санаачилсан бүхэн нь үр ашигтай байдаг. Ноднин хийн компрессорыг Ил уурхайтай ойролцоо суурилуулах санаачилга гаргаж хэрэгжүүлсэн нь зардал хэмнэсэн сайхан ажил болсон” гэсэн юм. Бид Ил уурхай дахь БелАЗ-ын зогсоол дээр байрлах компрессорыг үзлээ. БелАЗ-ын гарааж дээр өндөр хүчин чадалтай хийн компрессор суурилуулж, хуучныг нь энд байрлуулжээ. Ингэснээр БелАЗ-ын дугуй хийлэх зайг ойртуулж, хэмнэлт гаргах үндэс болсон байна.  БелАЗ-ын нэг дугуй дунджаар 64,9сая төгрөг байдаг. Түүний зургаан дугуйг жигд хийтэй ажиллуулснаар даац хэвийн, эд ангид эвдрэл бага байж, ажлын бүтээмж дээшилж, эдийн засагт хэмнэлт гардаг аж. Компрессорыг Ил уурхайд ойртуулснаар дугуйн хийг нэмэх, шалгах тоо жилийн хугацаанд 120-оор нэмэгджээ. Энэ нь жолооч нар дугуйндаа хяналт сайн тавьж байгааг харуулж буй аж. Дугуй хийлэхээр БелАЗ-ын гарааж руу очиход 4, км, харин эндээс 2 км.  Хүдэр тээвэрлэдэг 30 БелАЗ жилийн турш 8269 км сул явалт хэмнэсэн байна. Үүнийг мөнгөн дүнгээр авч үзвэл 102, сая төгрөгийн дизель түлш, тос тосолгооны материал, авто дугуйн элэгдлийн зардлын бодит хэмнэлт гарчээ. Энэ төсөл зардлаа хасаад 95,2сая төгрөгийн үр ашигтай болсон гэж эдийн засагчид тооцжээ. А.Батдорж энэ төслөө улам сайжруулан төгс болгох зорилттой байгаагаа ярьсан. Эдний албаныхан Ил уурхай дээр зөөврийн ШТС барьсан бөгөөд үүнийхээ дэргэд компрессор байрлуулах гэнэ. Ингэснээр жолооч шатахуунаа авах хооронд дугуйн хийгээ шалгах, нэмэх боломж бүрдсэнээр илүү ихийг хэмнэнэ гэж үзжээ.    Зэсийн үнэ дэлхийн зах зээл дээр унаж буй энэ үед та бүхэн ямар хэмнэлт гаргах вэ? гэсэн асуултад тэр: “Гадна температур дулаарч буйг ашиглан хүн ажилладаггүй хэсэг, тухайлбал, гараажуудынхаа дулааныг 4-р сарын нэгнээс хэсэгчлэн хааж эхэллээ. Ингэснээр дулааны зардлыг 30 орчим хувиар хэмнэх тооцоо гарч байгаа” гэв.  Эрдэнэт үйлдвэрийн Шилдэг шинийг санаачлагч А.Батдорж эрчим хүчний хэрэглээнд байнга хяналт тавьж, дүгнэлт хийж,  уур, ус, цахилгаан, дулааныг үр өгөөжтэй ашиглаж, хэмнэх боломжийг эрэлхийлэн, ажлын байрыг тав тухтай байлгахын  төлөө  оюунаа чилээж  явна.         Я.Энхтуяа Фото: Б.Баттөгс Дэлгэрэнгүй...
  • Өнөөдөр - 04 дүгээр сарын 08

    Мэдүүштэй... 1. Өнөөдөр жилийн 98 дахь өдөр. Он дуусахад 267 хоног үлдлээ. 2. Эрдэнэт хотод агаарын хэм өдөртөө 4-8 градус дулаан, шөнөдөө 0-2 градус хүйтэн, бага зэргийн хур тунадастай, салхины хурд 5-6 м/сек байна.     3. Аргын тооллын 4 сарын 8. Буд гариг. Билгийн тооллын 15. Тэргүүн дагуул одтой, цагаагчин могой өдөр. Өдрийн наран 6 цаг 16 минутад мандан, 19 цаг 32 минутад жаргана. Тухайн өдөр үхэр, тахиа жилтнээ аливаа үйлийг хийхэд эерэг сайн ба могой морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба сүм дуганыг сэргээх, газар лусын зан үйл хийх, өр барагдуулах, гэр бүрэхэд сайн. Ургаа мод таслах, газрын ам нээх, гөлөг тэжээхэд муу. Өдрийн сайн цаг нь үхэр, луу, морь, хонь, нохой, гахай болой. Хол замд явах хүмүүс баруун хойш мөрөө гаргавал зохистой. Үс шинээр үргээлгэх буюу засуулбал өлзийтэй сайн.     4. Дэлхийн зах зээл дээр нэг тонн зэс 5067 ам.долларын ханштай байна. (Эх сурвалж: www.lme.com) 5. Монгол банкны энэ өдрийн нэрлэсэн ханшаар АНУ-ын доллар 2781, евро 3024, БНХАУ-ын юань 394, ОХУ-ын рубль 36, Японы иен 25 төгрөгтэй тэнцэж байна. Эрдэнэт үйлдвэрийн түүхэнд энэ сар... 1975 оны 4-р сар Монгол-Зөвлөлтийн Засгийн газар хоорондын комиссын хуралдаанаар Эрдэнэтийн бүтээн байгуулалтад зориулан нэмэлт хөрөнгө гаргах тухай асуудлыг хэлэлцэж шийдвэрлэв. 1976 оны 4-р сар 22-нд: Эрдэнэт хотын АДХ-ын гүйцэтгэх захиргааны 08 дугаар тогтоолоор Эрдэнэт хотод хивсний үйлдвэр байгуулах талбайг 13 га-гаар тогтоож, үүнээс 12 га-г үйлдвэрлэлийн зориулалтаар, 1 га-г хаягдал шингэний хөөс агуулах талбайгаар ашиглуулахаар тогтжээ. 23-нд: Эрдэнэт үйлдвэрийн Тооцоолон бодох төв үйл ажиллагаагаа эхлэв. 26-нд: Эрдэнэт үйлдвэрийн төв корпусыг барих ажил эхлэв. 1978 оны 4-р сар Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтэс анх Хөдөлмөр хамгааллын хэлтэс нэртэйгээр зохион байгуулагдав. Дэлгэрэнгүй...
  • Цутгуурын цехийн өргөтгөл ирэх сарын нэгэн гэхэд бүрэн ашиглалтад орно

    Засвар механикийн заводын Цутгуурын цехийн өргөтгөлийг ирэх сарын нэгэн гэхэд бүрэн ашиглалтад оруулна гэжзаводын дарга Б.Баасансүрэн мэдээллээ. Одоогийн байдлаар механикийн чиглэлийн тоног төхөөрөмж суурилуулж дууссан. Байгууламжийн агаар, ус, хий дамжуулах төхөөрөмжийн угсралт 96 хувьтай байна. Германы мэргэжилтнүүд ирж үндсэн тохируулга хийх байсан ч, цаг үеийн нөхцөл байдлаас шалтгаалан амжаагүй. Ерөнхий захирлын 151-р тушаалаар томилогдсон ажлын хэсэг  ажиллаж, 3-р сарын 16-наас ХБНГУ-ын FAT компанитай онлайнаар холбогдон тоног төхөөрөмжүүдийг хэсэгчлэн  тохируулж байна. Мэргэжилтнүүд  энэ сарын27 гэхэд тоног төхөөрөмжийн тохируулгаа дуусаж, туршилт хийхээр төлөвлөн ажиллаж байна.Засвар механикийн завод, Баяжуулах үйлдвэр, Дулааны цахилгаан станц, Эрчим хүчний хэлтсийн мэргэжилтнүүдээс бүрдсэн ажлын хэсэг амжилттай ажиллаж байна. Ийнхүүцутгуурын үйлдвэрлэлийн хэвний технологид ХБНГУ-д үйлдвэрлэсэн “Хүйтнээр хатууруулах холимгоорхэв бэлтгэх” хагас автомат шугамын цогц систем нэвтрүүлэх техник технологийн шинэчлэл  дуусах шатандаа орлоо.                                                                                                                             Я.Энхтуяа Фото: Ш.Лхамсүрэн Дэлгэрэнгүй...
  • УЦУОШТ: Нарийн тоос маргааш сарних төлөвтэй байна

    Орхон, Булган, Дархан-Уул аймгийн нутаг дэвсгэрийг хамран агаарт дэгдсэн нарийн тоос агаарын урсгал хөдөлгөөнд орж, маргааш сарних төлөвтэй байгааг аймгийн Ус цаг уур, орчны шинжилгээний төвөөс мэдээлж байна. Манан мэт агаарт тогтсон нарийн тоос нь онц сонин үзэгдэл биш хэдий ч манай аймгийн хувьд анхны тохиолдол болжээ. Энэ сарын 5-наас эхлэн Сэлэнгэ, Төв, Дундговь аймгийн нутагт шороон шуурга шуурч, улмаар агаарт дэгдсэн шороо нь нарийн тоос болон хуралджээ. Ойрын өдрүүдэд салхины хүч бага байгаа нь нарийн тоосыг хөдөлгөөнгүй байдалд оруулсан бөгөөд маргааш салхины чиглэл нутгийн баруун хойноос байх төлөвтэй тул агаарт сарнина гэж тооцоолж байна. Нарийн тоос нь хүний биед ямар сөрөг нөлөө үзүүлэхийг эрүүл мэндийн байгууллага л тогтоох боломжтой тул иргэдийг амны хаалтаа зүүж, эрүүл мэнддээ анхаарахыг зөвлөлөө. Цаг агаарын урьдчилсан мэдээгээр энэ сарын 8-нд ялимгүй хур тунадастай, шөнөдөө 0-5 градус хүйтэн, өдөртөө 8-13 градус дулаан байна. Харин 12, 13-нд салхины хурд ихсэж, шороон шуурга шуурах төлөвтэй байгааг Ус, цаг уур, орчны шинжилгээний төвийн Цаг уур, орчны технологи, мэдээллийн үйлчилгээний хэлтсийн дарга Б.Цээнээ мэдээллээ.   И.Чинтогтох Фото: Б.Баттөгс Дэлгэрэнгүй...
  • Урьдчилан сэргийлэх ажил тогтмолжсон

    Дэлхийн 200 гаруй улс оронд тархаад буй “ковид-19” цар тахлаас урьдчилан сэргийлэх ажлын хүрээнд Эрдэнэт үйлдвэрт Шуурхай штаб байгуулагдаад 2 сар гаруй болж байна. Шуурхай штабынхан өглөө ажилдаа ирж буй ажилчдын биеийн халууныг хэмжих, хяналт тавих, хоолны цэгүүдийн эрүүл ахуй, ариутгал халдваргүйтгэлийн мэдээллийг цаг тухайд нь авч, нэгтгэн үйлдвэрийн Ерөнхий диспетчер болон Уул уурхайн яам, Улсын Онцгой комисст хүргэх чиг үүрэг хүлээдэг. Штабын бүрэлдэхүүнд Онцгой байдлын газар, “Эрдэнэт” сувиллын цогцолбор, ХАБЭА-н хэлтсийн ажилтан болон эмч нар ээлжийн горимоор ажиллаж байна. Өнгөрсөн хугацаанд Дэлхийн Эрүүл Мэндийн байгууллага, Улсын Онцгой комисс, Эрүүл мэндийн яамнаас өгч буй зөвлөмжийг хэвшүүлэхэд хяналт тавьснаар ажилчид амны хаалт зүүх, гар угаах ариутгах нь тогтмолжиж, хоолны цэгүүдийн үйлчилгээ, эмх цэгц сайжирсныг Шуурхайн штабынхан онцоллоо.         М.Балжинням   Дэлгэрэнгүй...
  • Д.ЭРДЭНЭБАТ: 1А хорооллын инженерийн шугам сүлжээ, дэд бүтцийн асуудлыг шийдсэн нь Эрдэнэтийн уурхайчдаас иргэддээ барьж буй бэлэг юм.

    “Эрдэнэт үйлдвэр” ТӨҮГ, нийгмийн хариуцлагыг хэрэгжүүлэгч жишиг үйлдвэрийн хувьд жилийн нийт зардлынхаа 7-8 хувийг ажилтнуудынхаа нийгмийн хөгжлийн бодлого8хөтөлбөрт зарцуулдаг. Энэ үзүүлэлт жилээс жилд ахиж, ажилтан руу чиглэсэн олон талын бодит ажил нэмэгдсээр байна. Сүүлийн үед нийгмийн чиглэлээр хэрэгжиж буй ажлуудын талаар Нийгмийн харилцааны хэлтсийн орлогч дарга Д.Эрдэнэбаттай ярилцлаа. -Цаг үеийн асуудлаас ярилцлагаа эхэлье. Манай үйлдвэрт Эрүүл мэндийн байнгын комисс байгуулагдсан. Та ажлын хэсгийн орлогчоор ажиллаж байгаа юм байна. Ямар зорилго, чиглэлтэй ажиллах вэ? -Үйлдвэрийн газрын  Эрүүл мэндийн байнгын ажлын хэсэг Ерөнхий захирлын нэгдүгээр орлогч бөгөөд Ерөнхий инженерийн шийдвэрээр шинэчлэн байгуулагдлаа. Зорилго нь ажилчдын эрүүл мэндийг хамгаалах, өвчин эмгэгээс урьдчилан сэргийлэх ажлыг эрчимжүүлэх, тэдгээрийн хэрэгжилтийг хангах үйл ажиллагааг зохион байгуулах, хяналт тавих  чиглэлээр байнгын үйл ажиллагаа явуулна. Эрүүл мэндийн чиглэлээр ажилладаг бүтцийн нэгжүүд бий. Тэдгээр нь өөрийн хариуцсан чиглэлээр үүргээ сайн гүйцэтгэдэг. Гэхдээ зарим нэг тохиолдолд тухайн ажил нь саатах, удаашрах тал гардаг учраас Эрүүл мэндийн байнгын комисс энэхүү асуудлыг шийдвэрлэхэд түлхэц өгөх, шийдвэрлүүлэх талаар анхаарч ажиллана. Комиссын бүрэлдэхүүн саяхан шинэчлэгдсэн. Эхний байдлаар ажлын хэсгийн журмын төслийг боловсрууллаа. Одоо бид Эрүүл мэндийг дэмжиххөтөлбөрөөхэлэлцэж бэлэн болгоно. Хөтөлбөр маань мөн л төслийн шатанд байгаа. Оны эхнээс бид комиссын ажлаа эхлэхээр төлөвлөж байсан ч “ковид-19” цар тахал  тархсаны улмаас цаг үеийн нөхцөл байдалтай уялдуулан ажиллаж байна. Ажлын хэсгийн журмын дагуу бүтцийн нэгжүүдийн холбогдох мэргэжилтнүүд уг бүрэлдэхүүнд ажиллана. Өөрөөр хэлбэл, эрүүл мэнд гэхээр зөвхөн эмч, эмнэлгийн ажилтнууд гэлтгүй нийгмийн, эрүүл ахуйн, хоол зүй, хөдөлмөр хамгаалал, хүний нөөцийн  чиглэлийн мэргэжилтнүүд багтаж байна. -Эрүүл мэндийн хөтөлбөрийг шинэчлэн батална гэлээ. Энэ хөтөлбөрийг ямар хугацаатай боловсруулж, хэрэгжүүлж байна вэ? 2020 оны Эрүүл мэндийн хөтөлбөр ямар онцлогтой байх вэ? -Хөтөлбөрийнхөө төслийг боловсруулаад байж байна. Миний хувьд, Эрдэнэт үйлдвэрт жирийн ажилчнаас эхлээд 29 дэх жилдээ ажиллаж байна. Ийм ч учраас  ажиллагсдын эрүүл мэнд, тэр тусмаа урьдчилан сэргийлэх чиглэлийн ажлууд илүү чухал гэж боддог. Тиймээс уурхайчдынхаа эрүүл мэндийг хамгаалах, урьдчилан сэргийлэх чиглэлээр хийх ажлууд түлхүү тусгагдана гэж харж байгаа. -Нийгмийн харилцааны хэлтсийн ойрын үед хийж буй томоохон ажлууд юу байна вэ? Нийгмийн цехүүдийг тойрсон асуудлыг хэрхэн шийдвэрлэж байна вэ? -Эрдэнэт үйлдвэр нь ТӨҮГ болж, бүтцийн өөрчлөлт хийсний хүрээнд Нийгмийн харилцааны хэлтэс шинээр байгуулагдсан. Өнөөдрийн байдлаар, манай хэлтсийн ажил олон чиглэлд үргэлжилж байна. Юуны өмнө бүтэц бүрэлдэхүүн, чиг үүргээ тодорхойлж, нийгмийн хариуцлагын чиглэлээр ажиллах хэлтсийн журмыг батлуулсан. Захиргаа, хүний нөөцийн бодлогын газартай зөвшилцсөний үндсэн дээр нийгмийн чиглэл болон Захиргаа, хүний нөөцийн бодлогын газрын чиг үүргийн журмыг салган, өөр өөрийн харьяалалд авч шинэчиллээ. Шинэчлэхдээ бид, Ерөнхий захирлын өгсөн чиглэлийн дагуу журмуудыг  нэгтгэж цэгцэлж байна. Тухайлбал, таван өөр журмаар зохицуулдаг байсан тусламж үйлчилгээг нэг журамтай болгох гэх мэт. Мөн цаг үетэйгээ холбогдож шинэ журам боловсруулах шаардлага гарч байна. Нөгөө нэг томоохон ажил гэвэл бид 2019 оны нийгмийн хариуцлагын тайланг бэлтгэж байна. Өнгөрсөн онд Эрдэнэт үйлдвэр нийгмийн хариуцлагын чиглэлд хэрхэн ажилласныг олон түмэнд таниулж, хүргэх цогц тайлан удахгүй гарна. Манай үйлдвэр орон нутагтай нягт хамтын ажиллагаатай. Саяхан, Орхон, Булган аймагтай хамтран ажиллах 2019 оны гэрээг дүгнэж, шинэ онд хэрэгжүүлэх төлөвлөгөөгөө баталж, гарын үсэг зурлаа. 2020 онд хамтын ажиллагааны хүрээнд манай үйлдвэр Орхон аймагт 2 тэрбум, Булган аймагт 700 сая гаруй төгрөгийн хөрөнгө оруулалт хийнэ. Энэ удаагийн гэрээнд Эрдэнэт үйлдвэр зөвхөн өгөх биш, орон нутаг харилцан ашигтай ажиллах тухай тусгаснаараа онцлог болсныг хэлэх нь зүйтэй байх. Сүүлийн 2 жилийн хугацаанд бидний өмнө тулгамдаж буй нэг асуудал бол Орос сургууль, цэцэрлэг, орос эмнэлгийн тусгай зөвшөөрлийн асуудал байсан. Энэ талаар манай хэлтэс байгуулагдсан цагаасаа хөөцөлдсөн. Монгол Улсын холбогдох хууль дүрмийн дагуу Орос сургууль,  орос цэцэрлэг ажиллах ямар ч үндэслэлгүй гэдгийг бүх мэргэжлийн байгууллагууд тогтоосон. Тиймээс орон нутагтай хамтраад уг сургуулийг Эрдэнэт үйлдвэрийн харьяа орос хэлний гүнзгийрүүлсэн сургалттай сургууль болгох нь зөв гэсэн шийдэлд хүрээд байна. Үүнийг хэрэгжүүлэх Орхон аймгийн ЗДТГ-тай хамтарсан ажлын хэсэг байгуулагдан ажиллаж байна. Мөн олон жил царцсан 1А хорооллын инженерийн шугам сүлжээ, дэд бүтцийг барьж байгуулах ажил байна. 1А хороолол маань баригдаж эхэлсэн боловч  инженерийн шугам сүлжээ, дэд бүтцийг барьж байгуулах хөрөнгө мөнгөгүйгээс, барилгын ажил зогсоод байсан юм. Монгол Улсын Ерөнхий сайд Орхон аймагт айлчлах үеэр Засаг дарга уг асуудлыг шийдүүлэхээр хандсан. Ерөнхий сайд Эрдэнэт үйлдвэр, Орхон аймгийг хамтран шийдэх үүрэг чиглэл өгсний дагуу Эрдэнэт үйлдвэрийн зүгээс төсөлд шаардлагатай байгаа 12.5 тэр бум төгрөгийн санхүүжилтийг шийдээд байна. Энэ бол Эрдэнэт үйлдвэрийн уурхайчдын зүгээс аймгийн иргэддээ барьж буй том бэлэг юм. Бурхан багшийн сэрэг дүрийн урд байрлах 1А хорооллын дэд бүтцийн ажлын хүрээнд цахилгааны под станцыг өргөтгөх, цэвэр бохир усны бүх шугам сүлжээнд холбох, үерийн усны далан барих, гол магистрал засмал зам тавих гээд иж бүрэн бүтээн байгуулалт хийгдэнэ. Зөвхөн ЦРП-2  дэд станцыг өргөтгөснөөр Эрдэнэт хотын цахилгаан хангамжийн чадал 2 дахин нэмэгдэнэ. Энэ асуудлыг Эрдэнэт үйлдвэр нийгмийн хариуцлагын хүрээнд бодлогоороо  шийдэж байна гэж ойлгож болно. -Нийгмийн чиглэлийн бүтээн байгуулалтын ажлын тухайд..? -Нийгмийн харилцааны хэлтсийн үндсэн хэсэг нь нийгмийн төсөл хөтөлбөрүүдийг хэрэгжүүлэхэд чиглэдэг. Эрдэнэт үйлдвэр нийгмийн чиглэлийн төсөл хөтөлбөрүүдэд 31.3 сая доллар зарцуулахаар төлөвлөсөн. Цаг үеийн байдлаас шалтгаалан зарим нэг ажлаа түр хугацаагаар зогсоож байна. Өөрөөр хэлбэл, коронавирусын тархалтын улмаас дэлхийн зах зээлд унаж буй зэсийн үнэ эргээд өссөн үед эдгээр ажлууд үргэлжлээд явна. Төлөвлөгөөнд тусгагдсан ажлуудаа бид эрэмбэлж, хамгийн чухлаас нь үргэлжлүүлэн хэрэгжүүлэхээр ажиллаж байна. Өнгөрсөн оны хөрөнгө оруулалт бүтээн байгуулалтын ажлын төлөвлөгөөнд тусгагдан, Баян-Өндөр уулын энгэрт баригдаж эхэлсэн, хуучнаар “Москва 300” буюу “Уурхайчин-1”орон сууцны хороолол 2020 оны 12 дугаар сард ашиглалтад орох ёстой. Одоогийн байдлаар уг хорооллын барилгын ажил хэвийн, хоёрдугаар давхрын цутгалт хийгдэж байна. Ирэх 6 дугаар сард цутгалтын ажил бүрэн хийгдэж, барилгын гадна тал дуусаж 12 сар гэхэд дотоод чимэглэл бэлэн болж ашиглалтад хүлээлгэн өгөхөөр  гүйцэтгэгч компани ажиллаж байна. Тус хорооллын гүйцэтгэгчээр “Хемон”, “Одкон” компаниуд ажиллаж байна. Мөн “Эрдэнэт” соёл, спортын цогцолбор энэ онд баригдана. Гүйцэтгэгчээр Эрдэнэт үйлдвэрийн Барилга засварын цех ажиллаж, 12 сард дуусгах төлөвлөгөөтэй. Дараагийн бүтээн байгуулалтын ажил нь “Сэлэнгэ” амралт, аялал жуулчлалын цогцолборын “Ногоон хөгжлийн төв”-ийн байгуулалт. “Уурхайчин-2” орон сууцны хорооллын барилгын ажил энэ онд эхлэх бол “Уурхайчин-3” хорооллыг барьж байгуулах гүйцэтгэгчийн асуудал удахгүй шийдэгдэнэ. -Ирэх 12 сард ашиглалтад орох “Уурхайчин-1” орон сууцны хороололд орох ажилтнуудын захиалга авсан. Өөрөөр хэлбэл, шинэ байрны захиалга дүүрсэн үү? -Үйлдвэрийн цех нэгжүүдээс санал авсан. “Уурхайчин-1” орон сууцны хороолол 300 айлынх. Тиймээс бид цехүүддээ квот тогтоож өгсөн. Бидний тавьж буй шалгуур бол тухайн ажилтан өмнө нь Эрдэнэт үйлдвэрээс байр болон байрны тусламж хөнгөлөлт аваагүй байх. Учир нь үйлдвэрээс олгодог 12 сая төгрөгийн байрны хөнгөлөлтийг урьдчилгаа төлбөрийн 30 хувьд нь оруулахаар зорьж байгаа. Өнөөдрийн байдлаар, 280 гаруй ажилтны материалыг авч, хамтран ажиллаж буй Богд банканд хүргүүлсэн. -Эцэст нь, орон сууцны хувьчлалын тухай тодруулъя. Төрийн өмчийн бодлого зохицуулалтын газраас чиглэл өгсөн байгаа. Энэ ажил хэзээ хэрэгжих вэ? -Монгол Улсын Төрийн өмчийн бодлого зохицуулалтын газраас “Эрдэнэт үйлдвэр” ТӨҮГ-ын орон сууцыг үе шаттайгаар хэсэгчлэн хувьчлах шийдвэр гаргасан. Энэ дагуу манай үйлдвэрт ажлын хэсэг байгуулагдан, үйлдвэрийн хэмжээнд байгаа нийт орон сууцны тоо, мэдээлэл, цех нэгжүүдийн санал зэрэг нэгдсэн судалгаа хийж байна. Орон сууц хувьчлалын ажлын хэсэгт үндсэн цехүүд болон санхүү эдийн засаг, аудит, хууль, нийгмийн харилцаа, Захиргаа, хүний нөөцийн бодлогын газар зэрэг бүхий л хэлтэс нэгжийн төлөөллүүд орсон. Мэдээж, Эрдэнэт үйлдвэрийн албаны зориулалтаар ашиглагдаж буй болон Орос мэргэжилтнүүдийн амьдардаг байрууд хувьчлалд хамрагдахгүй. М.Балжинням Фото: Б.Баттөгс Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Сурталчилгаа

Дэлхийн олон улсад тархаад буй коронавирус өвчний халдвараас урьдчилан сэргийлэх, хамгаалах талаар мэргэжлийн эмч нар зөвлөж байна. Энэ удаа “Эрдэнэт” сувиллын цогцолборын Уушиг, дархлаа судлаач эмч Т.Соёлмаагийн зөвлөгөөг хүргэе.

Коронавирусын халдварт өртөхгүй байж, дархлаа сэргээх, өөрийгөө хамгаалах нь иргэн бүрийн үүрэг. Тиймээс өдөр тутамдаа баримталж, хэвшүүлэх ахуйн ариун цэвэр сахих мэдлэг, санамжийг хүн бүр эзэмших ёстойг мэргэжлийн эмч онцоллоо.

Коронавирус нь амьсгалын замаар халдварладаг бусад өвчний адил ойрхон зайнаас ярилцах, найтаах зэрэгт агаар дуслын замаар тархаж, хүнээс хүнд дамждаг өвчин.  Тиймээс ч дэлхийн олон оронд тархаж, халдвартай хүний тоо нэмэгдэж байна. Манай улсад нэг тохиолдол бүртгэгдээд байгаа боловч тархалт, халдварыг зогсоож, урьдчилан сэргийлэхийн тулд нэн түрүүнд олон нийтийн газраар онц шаардлагагүй бол очихгүй байхыг зөвлөе. Хэрэв гадагшаа гарах тохиолдолд амны хаалтыг байнга зөв зүүнэ. Гараа тогтмол савандаж угаах шаардлагатай. Дархлаа сайн байх нь уг өвчний халдварыг эсэргүүцдэг тул илчлэг сайтай хоол хүнс хэрэглэх, сайн амарч байх нь чухал юм. Бага насны хүүхдүүдийн тоглоом болон хичээлийн хэрэглэл зэргийг байнга угааж, цэвэрлэх, гэрийн хаалганы бариул болон бусад металл гадаргуут эд зүйлсэд чийгтэй цэвэрлэгээ, ариутгалыг тогтмол хийх, өрөөний салхивчыг ойр ойрхон нээн цэвэр агаар оруулж байх шаардлагатай. Гадаа талбайд явж буй үедээ хаалга хана болон металл гадаргууд хүрэлцэх, гараа хүргэх зэргээс зайлсхийж, нэг удаагийн бээлий ашиглахыг сануулж байна. Санитол болон бусад гар ариутгах бодисыг биедээ авч явж, хэрэглэх нь вирусээс хамгаалах сайн арга болно. Агаар салхинд гарах, цэвэр агаар амьсгалах, ууланд алхах, дасгал хөдөлгөөн хийх нь юу юунаас илүү чухал. Хавар цаг ирж буй тул дархлаа дэмжих амин дэм, витамин, жимсний шүүс зэргийг түлхүү хэрэглэх, 15 минут тутамд бүлээн ус тогтмол ууж хэвшихийг анхааруулж байна. Эдгээр зөвлөгөөг өдөр тутам хэрэгжүүлж, мөрдөх нь коронавирусээс өөрийгөө хамгаалах хамгийн зөв арга юм.

М.Балжинням

Фото: Б.Баттөгс

 

Хувийн хамгаалах хэрэгсэл үйлдвэрлэх шинэ төрлийн зах зээлд сүүлийн нэг жил орчим амжилттай ажиллаж буй “БЭККО” ХХК-ийн захирал Б.Бэхбаярыг ээлжит дугаарын зочноор урьж ярилцлаа. Тэрээр дэлхий нийтэд тархсан “COVID-19” коронавирусын халдвараас урьдчилан сэргийлэх ажлын хүрээнд Монгол Улсын Эрүүл мэндийн яаманд 100 ширхэг комбинзон бэлэглэсэн тухай чихэнд чимэгтэй мэдээгээр биднийг угтсан юм. Нүдний шил, чихэвч, амны хаалт, каск зэрэг хувийн хамгаалах хэрэгслээр хүрээгээ тэлэх чин хүсэлтэй залуу бизнесмений яриаг та бүхэнтэй хуваалцъя.

-УЛСЫН ОНЦГОЙ КОМИССТ ТУСЛАМЖИЙН ГАРАА СУНГАСАН ТАНАЙ ХАМТ ОЛОНД БАЯРЛАЛАА?

-ДЭМБ-аас Монгол Улсад тусламж өгсөн мэдээг сонссон л доо. Түүнд хувийн хамгаалах хэрэгсэл комбинзон маш цөөхөн ирснийг дуулсан. Мөн ЭМЯ-нд хангамж дутагдалтай байгаа гэсэн мэдээлэл аваад 100 ширхэг комбинзон хандивлая гэж шийдсэн. Сэжигтэй тохиолдол бүр дээр очиж байгаа төрийн албан хаагчид ийм хамгаалах хэрэгслийг нэг удаа өмсөх зориулалттай байдаг учраас нэг талаас их үрэлгэн хувцас гэж хэлж болно. Нөгөөтээгүүр хамгаалалт нь ус чийг нэвтрэхгүй сайн талтай.

-МОНГОЛД ХУВИЙН ХАМГААЛАХ ХЭРЭГСЛИЙН ЗАХ ЗЭЭЛ БАЙГААГ ХЭДИЙД ОЛЖ ХАРАВ?

-Энэ бизнест хөл тавьсан түүх их сонирхолтой. Компаниа 2018 онд байгуулж байлаа. Оюутолгой компани дотоодын үйлдвэрлэгчдээс ханган нийлүүлэх хөтөлбөрийнхөө шугамаар 2018 оны 11 дүгээр сард комбинзон худалдан авах тендер зарласан юм. Бид төвийн бүсээс оролцохоор технологио судалж, үйлдвэрлэлд нэвтрүүлж, анхны загваруудаа гаргаж уг тендерт оролцсон ч харамсалтай нь орон нутгийн давуу эрхтэйгээр говийн хоёр компани шалгарсан. Энэ тендерийн ажиллагаа том туршлага үлдээсэн гэж болно.

Хувийн хамгаалах хэрэгслийн нэг болох комбинзоныг уурхай, хуурай болон шингэн химийн бодистой ажиллах, малын гоц халдварт өвчний үед, хөдөө аж ахуйн, тог нэвтрүүлдэггүй материалтай тул тухайн зориулалтаар өмсөх боломжтой. Эдгээр хэрэгцээг нь харгалзан Эрдэнэт үйлдвэр болон бусад уул уурхайн компанид, мал эмнэлгийн чиглэлээр ашиглах зах зээл Монголд байгааг олж харсан.  

-ЭНЭ ТӨРӨЛД ӨРСӨЛДӨГЧ ХЭР ОЛОН БЭ?

-Одоогоор говийн бүсэд 2, хангайн бүсэд манайх үйл ажиллагаа явуулж байна. Улаанбаатарт энэ чиглэлийн үйл ажиллагаа явуулдаг компани хараахан байхгүй.

-БОЛОВСОН ХҮЧНЭЭ ХЭРХЭН ШИЙДВЭРЛЭЖ ЭХНИЙ АЛХМАА ХИЙСЭН БОЛ?

-Бизнест хөл тавих нь миний амьдралдаа гаргасан маш зоригтой бөгөөд том шийдвэр байсан. Би ШУТИС-ийг төгсөөд Энэтхэг улсад 2 жил магистрт суралцсан. Эргэж Монголдоо ирээд Эрдэнэт үйлдвэрийн Дулааны цахилгаан станцад автоматжуулалтын инженерээр 5 жил ажилласан. Гэтэл нэг л өдөр амьдралдаа алхам хийх хэрэгтэйг ухаарч, ажлаасаа гарахаар шийдсэн. Энэ шийдвэр олон хүнд гайхаш төрүүлж байсан ч энэ зоригтой үйлдлийнхээ дараа гадаад худалдааны чиглэлээр ажилладаг хувийн компанид нэг жил ажиллахдаа хэрхэн гадаад худалдаа хийдэг, бизнес гэж юу болох талаар тодорхой ойлголт авсан. Улмаар хувийн компани байгуулахаар шийдэж, дахин нэг алхам урагшилсан. Тухайн үед Оюутолгойн тендерт ялж чадаагүй ч зах зээлээ мэдэрч хөдөлсөн гэж боддог.

Анх зочны өрөөндөө байрлуулсан 2 хуучин оёдлын машинаас эхлүүлсэн бизнесээ өнөөгийн зэрэгт хүрсэнд баярладаг. 2019 оны 6 дугаар сард эхнэрээ ажлаас нь гаргаад хоёулаа оёдол хийж эхэлсэн бол сарын дараа нэг оёдолчин авч гурвуулаа болж байлаа. Алхам алхмаар л урагшилсан. Өөрийн гэсэн ажлын байртай, 13 оёдолчин, 2 эсгүүрчин, нэг савлагчтай болж өргөжин тэллээ, хамт олноо бүрдүүллээ. Үйлдвэрлэлийн хүчин чадлаа бүрэн ашиглаж, 20 ажлын байртай ажиллана гэхэд 7 оёдолчин нэмж авах хэрэгцээ шаардлага бий. Манайх бүрэн хүчин чадлаараа ажиллахад өдөрт 300 ширхэг комбинзон үйлдвэрлэх боломжтой ч одоогоор 150 ширхгийг гаргаж байна.

-КОМБИНЗОНЫ НЭР ТӨРЛИЙН ТУХАЙД?

-Дэлхий дахинд үүсээд байгаа нөхцөл байдлын улмаас өвчний голомтот цэг дээр ажиллаж байгаа мэргэжлийн хүмүүст цэнхэр оруулгатай комбинзон өмсүүлж байна. Үндсэн түүхий эд материал нь тодорхой стандарттай, материалын нимгэн зузаанаас хамаарч хэд хэдэн төрөл бий. Бид ойрын үед дээрх цэнхэр канттай комбинзоныг үйлдвэрлэх технологийг судалж байна. Түүхий эдээ татаж аваад оёход 10 оёдлын машин, нэг наадаг машин шинээр авч, 12 ажлын байр гаргана. Одоогоор манай компани 5-6 төрлийн комбинзон үйлдвэрлэж байна. Коронавирустэй холбоотойгоор түүхий эдийн татан авалт хумигдаж, Хятадууд материалын үнийг нь 4-5 дахин нэмчихсэн. Сул зогсолт хийхээр гэрээтэй байгууллагадаа нийлүүлэлт хийх шаардлагатай тул зогсох эрх алга. Нэг татан авалтаар 3-4 сарын хэрэгцээгээ хангахуйц 10 мянган ширхэг хувцасны материал захиалж байна.

-УРД ХӨРШИД ҮЙЛДВЭРЛЭДЭГ КОМБИНЗОНООС ЯЛГААТАЙ ЗҮЙЛ БИЙ ЮУ?

-Загвараа Европ стандартын эсгүүр дээр монгол хүний биеийн онцлогт тохируулан гаргасан. Ингэхдээ хэвлий, чээж өргөн, бэлхүүс том, гар богино, хүзүү бөгтөр, толгой том зэрэг хэв шинжийг харгалзан үзсэн. Монгол хүн өмсөхөд мөрний залгаагүй, биед сууж өгөх талаасаа илүү эвтэйхэн болсон. Хөдөлмөрийн аюулгүй байдал, эрүүл ахуйн шаардлага хангах нь чухал.

-ХЯТАДААС БУСАД ОРНООС ТҮҮХИЙ ЭД, МАТЕРИАЛ ТАТАН АВАХ ТАЛААР СУДАЛЖ ҮЗСЭН ҮҮ?

-Үзсэн. Дэлхийн томоохон брэндүүд болох “Tyvek”, “Honeywell”, “ZM” нь комбинзон үйлдвэрлэдэг ч, өөрсдийнхөө бүтээгдэхүүнд зориулан материал гаргадаг. Урд хөршид 4-5 үйлдвэр ажиллаж байна.

-ХАРИЛЦАГЧ ТҮНШ БИЙ ЮУ?

-Өнгөрсөн оноос МАК-тай гэрээ байгуулан, жилдээ 30 мянган ширхэг комбинзон нийлүүлэхээр хамтран ажиллаж байна. Цаашид ЗОНЗ-ын Үндэсний төв, Мал эмнэлгийн үндэсний хүрээлэнтэй хамтран ажиллах боломжтой гэж хардаг. Тавантолгойн сайжруулсан нүүрсний уурхай тоосжилт ихтэй тул хувийн хамгаалах хэрэгсэл өмсөх хэрэгтэй юм шиг санагддаг. Ажлын хувцас тоосжилт ихтэй байснаар эдэлгээ даах чанар нь муудаж, элэгддэг.

-ОРОН НУТАГТ ҮЙЛ АЖИЛЛАГАА ЯВУУЛАХЫН ДАВУУ БОЛОН СУЛ ТАЛЫГ ХЭРХЭН ХАРЖ БАЙНА?

-Эрдэнэтэд олон төрлийн үйлдвэрлэл байдаг тул ажиллах хүчний олдоц сайтай гэж хэлнэ. Эрдэнэт үйлдвэрийн Оёдлын цехээс өндөр насны тэтгэвэртээ гарсан, ажлын чадвартай, туршлагатай оёдолчид олон бий. Мөн уул уурхай түшиглэсэн гэдэг утгаараа борлуулалтын давуу талтай. Улаанбаатар хот руу тээвэрлэлт хийхэд алс байдаг нь сул тал болоод байна.

-ОРОН НУТГИЙН ҮЙЛДВЭРЛЭГЧДИЙН УУЛЗАЛТЫН ҮЕЭР ЭРДЭНЭТ ҮЙЛДВЭРТЭЙ ХАМТРАН АЖИЛЛАХ САНАЛ ТАВЬЖ БАЙСАН. ЭНЭ АЖИЛ ЯМАР ШАТАНДАА ЯВНА ВЭ?

-Хангамжийн хэлтсийн даргатай уулзсан. Коронавирусын онцгой тохиолдолд бэлэн байгаа бүтээгдэхүүнийг шууд худалдан авалтаар хийх санал тавьсан. Тухайн үед манай нөөцөд байсан 400 ширхэг комбинзоныг бүгдийг авсан. Коронавирусын нөхцөл байдлын дараа манай компанитай хамтран ажиллах боломжтой гэдгээ илэрхийлсэн.

-КОМПАНИА ТОГТВОРТОЙ АЖИЛЛУУЛАХЫН ТУЛД ЮУНД АНХААРАХ ВЭ?

-Энэ төрлийн бүтээгдэхүүн импортоор их хэмжээгээр орж ирдэг тул үнийг уян хатан байлгаж, нэг түвшинд барих хэрэгтэй  гэж үзсэн. Мэдээж ингэхийн тулд зардлаа танаж, илүү зардал гаргахгүйг хичээж байна. Бусад зардлаа багасгасан ч чанарт нөлөөлөхгүй.

-ХЭТИЙН ТӨЛӨВЛӨГӨӨГӨӨ ХЭРХЭН ЗУРАГЛАВ?

-Жил бүр гаргасан төлөвлөгөөнийхөө дагуу ажиллаж байна. Өнгөрсөн онд тогтмол ажлын байр бий болгох, бүтээгдэхүүнээ дотоодын компаниудад таниулах зорилготой ажилласан бол энэ жилийн тухайд бүтээгдэхүүний тоо ширхэг, ажлын байраа нэмэгдүүлж, чанарт анхаарахыг чухалчилж байна. Харин 2021 онд баруун аймгуудад салбараа байгуулна. Мал эмнэлгийн Ерөнхий газар нэг удаагийн хамгаалах хэрэгсэл жилдээ 160 мянган ширхгийг худалдан авна гэж үзвэл салбараар дамжуулан зах зээлээ тэлэх, нөгөө талаас хэрэглэгчид илүү ойр ажиллах боломж бүрдэнэ. Тухайн бүтээгдэхүүнийг удаан хадгалах нь эрсдэлтэй тул богино хугацаанд чанартай бүтээгдэхүүн нийлүүлэх хэрэгцээ зайлшгүй байгаа гэж харж байна. Бид 21 аймагт салбар нээснээр орон нутгийн иргэдийг ажлын байраар хангана.   

-ШИНЭ ТӨРЛИЙН БҮТЭЭГДЭХҮҮН БОЛОХ ЧИХЭВЧ ХЭЗЭЭНЭЭС ХУДАЛДААНД ГАРАХ ВЭ?

-Чихэвчийг худалдаанд хараахан гаргаагүй. Одоогоор туршилтын загварууд гаргаад сайжруулалт хийж байна. Хоёр химийн бодис хольж гарган авдаг тус бүтээгдэхүүнийг Стандарт хэмжилзүйн газраас лабораторийн шинжилгээ хийж, MNS тохирлын гэрчилгээ олгосон. Шинэ бүтээгдэхүүнээ 5 дугаар сараас худалдаанд гаргахаар төлөвлөж байна. Дуу чимээтэй орчинд орохоос өмнө чихэвч зүүх нь хувь хүний эрүүл мэндэд ихээхэн ач холбогдолтой. Чихэвчийг бусдад дамжуулж болдоггүй тул тухайн ажилтан өөртөө л ашиглана. Оюутолгойд энэ төрлийн хамгаалах хэрэгсэл нэвтэрсэн. Эрдэнэт үйлдвэр ч нэвтрүүлнэ гэдэгт итгэлтэй байна.

-ҮЕИЙНХЭЭ ЗАЛУУЧУУДАД ХАНДАН ЮУ ХЭЛЭХ ВЭ?

-Одоогийн залуус их авхаалжтай, сэргэлэн болсон. Нэг жишээ хэлэхэд, ХБНГУ-д шинэ бүтээгдэхүүн гарсныг хараад тухайн компани руу залгахад, “Та Монгол Улсад байгаа манай албан ёсны байгууллагад хандана уу” гэсэн хариу ирсэн. Залуучууд ийм л хурдтай байна. Хааяа, Улаанбаатарын залуучуудаас хоцорчихлоо гэж өөрийгөө голох үе ч байна. Тэгэхээр, мэдээллийн технологийн асар их хурдыг ашиглан залуучууд маань том зорилготой байж, түүндээ хүрэхээр тасралтгүй тэмцэж, өөрийгөө хөгжүүлж, суралцаарай гэж хэлье.

И.Чинтогтох

Фото: Б.Баттөгс

Монгол Улсын Засгийн газрын 2020 оны нэгдүгээр сарын 26-ны өдрийн хуралдааны болон Улсын онцгой комиссын хоёрдугаар сарын 20-ны өдрийн шийдвэрүүд, БСШУС-ын сайдын гуравдугаар сарын хоёрны өдрийн “Чиглэл хүргүүлэх тухай” албан бичиг зэргийг үндэслэн “Эрдэнэт үйлдвэр” ТӨҮГ-ын дэргэдэх, Ш.Отгонбилэгийн нэрэмжит “Эрдэнэт цогцолбор” дээд сургуулийн захирлын “Цахим сургалтыг чанартай, хүртээмжтэй зохион байгуулах тухай тушаал тус сургуульд хэрэгжиж байна. 2019-2020 оны хичээлийн жилийн хаврын улирлын бүх түвшний сургалт, хичээлийн материалыг цахимаар байршуулан, оюутан сурагчдад боломжит бүх хэлбэрээр хүргэх чиглэлийг гуравдугаар сарын 02-оос 30 -ны өдрийг хүртэл баримтлан ажиллаж байна. Бүх түвшний хичээлийн хөтөлбөрийг цахим хэлбэрээр хүргэхэд гарч буй давуу тал болон хүндрэл бэрхшээлийн талаар тус сургуулийн Сургалт хариуцсан орлогч Н.Манчукаас тодруулахад, “Манай багш нар Google Classroom системийг ашиглан гэрээсээ сургалтын материалыг цахимаар байршуулан, оюутан, суралцагчдад хүргэж, хэрхэн судлах талаар заавар, зөвлөгөө тогтмол өгч ажиллаж байна. Цахим хичээлийн хуваарийн дагуу хэдэн цахим хичээл оруулсан, тухайн хичээлд хэдэн оюутан хандалт хийснийг хичээл зохицуулагчид программ дээр хянаж байна. Хичээлийг хөтөлбөрийн зорилго, зорилттой уялдуулан, хичээл чанартай явж байгаа эсэхэд тэнхимийн эрхлэгчид мэргэжлийн зүгээс хяналт тавьж байна. Бид 7 хоног тутам багш, оюутнуудаас цахим хичээлтэй холбоотой ойлгомжгүй зүйл, хүндрэл гарч буй эсэх талаар санал гомдол, хүсэлтийг нь Оюутны холбоо хариуцсан багш, тэнхимийн эрхлэгч нараар дамжуулан хүлээн авч, шийдвэрлэж байна.

Багш нар маань Classroom систем ашиглан лекц, семинарыг файл хэлбэрээр оруулахын зэрэгцээ 15 минутад багтаасан видео хэлбэрээр хичээлээ зааж, 24 цагийн турш оюутнуудтай цахимаар холбогдож, ажиллаж байна.  Ирэх 7 хоногт, Сургалтын албаны ажилтнуудаас гэрээсээ ажиллах боломжтой ажилтнуудыг онлайнаар ажиллуулна. Цахимаар хичээл явуулах нь олон боломж өгч байгааг хэлмээр байна. Хамгийн түрүүнд, багш нар цахим хичээл бэлдэж сурч байна, цахим хичээлийн мэдээллийн сан бүрдүүлэх боломж өгч байна. Бид, багш нарын цахим хичээлийн сан үүсгээд, бүх хичээлийн цахим бүрдүүлэлт хийж эхэлсэн. Мөн хичээлийн чанарт анхаарах, идэвхжүүлэх зорилгоор энэ улирлын турш шилдэг Цахим хичээлийн уралдааныг багш нарын дунд зарлаад байна. Ингэснээр, магистр, бакалавр, мэргэжлийн сургалт, лицей анги гээд бүх чиглэлээр хичээлийн хөтөлбөрөө бэлтгэх, сан бүрдүүлэх, шилдэг багш нараа шалгаруулах гээд олон давуу тал, боломж бий болж байна” гэж онцлов.

Цахим хичээлийн хөтөлбөрт тус сургуулийн 2019-2020 оны хичээлийн жилд суралцаж буй бакалаврын ангийн 477 оюутан, мэргэжлийн сургалтын нэг жилийн ангийн 25 суралцагч, лицейн 76 сурагч  хамрагдаж байгаа аж. Лицей ангид математик, физик, хими, англи хэлний гүнзгийрүүлсэн хичээлүүдээ нэмэлт цахим хэлбэрээр зааж байгаа юм байна.  Хичээл бүрийн ирц болон хичээл авсан бүртгэлийг  багш нар цаг тухайд нь гаргаж буй бол багш нарт хичээл зохицуулагч нар хяналт тавьж ажиллаж байгааг тус сургуулийн албаны хүн хэллээ.

М.Балжинням

Монголд COVID-19 вирусын халдвар бүртгэгдсэн энэ цаг үед Эрдэнэт үйлдвэр 6600 гаруй ажилчдынхаа төвлөрлийг сааруулах, халдвар тархахаас урьдчилан сэргийлэх олон талын арга хэмжээ авч хэрэгжүүлж байна. Тус үйлдвэрийн ХАБЭА-н хэлтэс Дэлхийн эрүүл мэндийн байгууллагаас өгсөн зөвлөмжийн дагуу ажилчдын хоолны ширээний зохион байгуулалтыг нэг чигийн урсгалд оруулан өөрчлөх ажлыг эхлүүллээ. Өнөөдрөөс Дулааны цахилгаан станц, Геологи, хайгуулын экспедици, Төрөл бүрийн авто машины гарааж зэрэг 100-150 ажилчид нэг дор хооллодог жижиг газруудын ширээний зохион байгуулалт нэг чигийн урсгалд буюу сурагчдын нэгэн адил шил шилээ харан сууж хооллох болов. Харин Эрдэнэт үйлдвэрийн Ерөнхий захиргааны нэгдүгээр байр, Засвар механикийн завод, Ил уурхай дахь 800-1200 хүний төвлөрсөн хүчин чадалтай хоолны газруудын ширээнд тусгаарлалт хийж вирусын халдвараас сэргийлэх арга хэмжээ авахаар төлөвлөжээ. Тусгаарлалтыг арчиж цэвэрлэн ариутгах боломжтой материалаар хийнэ гэж мэргэжлийн хүн ярилаа.

М.Одгэрэл

 

Мөнхийн хөрш БНХАУ-ын ард түмэнд зориулан илгээсэн Эрдэнэт үйлдвэрийн уурхайчдын чин сэтгэлийн хандив болох 88 сая 888 төгрөгийг үйлдвэрийн газрын Ерөнхий захирал Х.Бадамсүрэн өнөөдөр тус улсаас Монгол Улсад суугаа Элчин сайд Цай Веньруйд гардуулан өглөө.

Ерөнхий захирал Х.Бадамсүрэн хэлсэн үгэндээ, “COVID-19” шинэ коронавирусын халдварын тархалтын эсрэг тууштай тэмцэж, улс орныхоо төдийгүй бүс нутаг, дэлхий нийтийн эрүүл, аюулгүй байдлыг сахин хамгаалахад авч хэрэгжүүлж байгаа БНХАУ-ын төр засгийн бодлогыг дэмжиж буйгаа илэрхийлэн, амжилт хүслээ.

“Эрдэнэт үйлдвэр” ТӨҮГ-ын хамт олон аюулт өвчний халдвараас урьдчилан сэргийлэх ажилд зориулан Монгол Улсын Онцгой комисст 150 сая төгрөг, Орхон аймгийн Онцгой комисст 50 сая төгрөгийг цалингаасаа хандивлаад байгаа юм.

И.Чинтогтох

Аж ахуй, үйлчилгээний цехийн Тусгай цэвэрлэгээ, угаалгын хэсгийнхэн хүний эрүүл мэндэд хор нөлөө багатай, цэвэрлэх өндөр үзүүлэлттэй олон төрлийн бодис үйлчилгээндээ нэвтрүүлэн ажиллаж байна. Өмнө нь ажлын хувцасны хими цэвэрлэгээнд “Сольвент” бодис хэрэглэдэг байсан нь хүний эрүүл мэндэд хор нөлөөтэй “бензол” агуулсан байжээ. Харин 2020 оны захиалгаар бензолгүй, тос, бохир цэвэрлэх чадвар өндөр бодис сонгон хэрэглэж байгаа нь ажилчдын талархлыг хүлээж байна. Тус хэсэг Эрдэнэт үйлдвэрийн бүтцийн нэгжийн ажилчдын тусгай хувцас, хэрэглэл болон “Эрдэнэт” сувиллын цогцолборын цагаан  хэрэглэлийг угааж цэвэрлэх үйлчилгээ үзүүлдэг бөгөөд сардаа дунджаар усан угаалгаар гурван тонн, хими цэвэрлэгээгээр 4,5 тонн  хувцас, хэрэглэл цэвэрлэж индүүдэн, оёж засварладаг. Тэд хими цэвэрлэгээ, усан угаалга, уурын индүүдлэг, оёдол засварын 20 гаруй төрлийн машин техник ашиглаж байна.  

М.Одгэрэл

Фото: Б.Баттөгс

Чанар хяналтын хэлтсийн Түлшний лаборатори тоног төхөөрөмжийн шинэчлэл хийснээр шинжилгээний чанарт ахиц гарлаа. Тус лаборатори нь Дулааны цахилгаан станц, Засвар механикийн заводод нийлүүлэгдэж буй нүүрсний чанарт хяналт тавихаас гадна станцаас гарч буй үнс, тоосны нунтагт шинжилгээ хийдэг. Дулааны цахилгаан станц өргөтгөл хийсэнтэй холбогдуулан Түлшний лабораторийн ачаалал нэмэгдсэн тул нүүрсний илчлэг тодорхойлох багажийг шинэчилжээ. Өмнө ашиглаж байсан багаж нь нэг сорьцоос гурван төрлийн дээж авч, шатаах, хатаах зуухны тусламжтайгаар нүүрсний чанар тодорхойлдог байсан бол бүрэн автомат шинэ багаж нь нэг удаагийн сорьцоос гурван төрлийн хариуг зэрэг гаргадаг давуу талтай. Түүнээс гадна гар ажиллагааг багасгаж, шинжилгээг илүү нарийвчлалтай гаргаж, материалын зардал хэмнэж байна. Өнгөрсөн онд 3200 дээжид 16000 үзүүлэлтээр шинжилгээ хийсэн нь 2018 онтой харьцуулахад гурав дахин өсчээ. 

М.Одгэрэл

Фото: Б.Баттөгс

 

Мэдээний төрөл

Календарь

« 3-р сар 2020 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Зургийн цомог