• “Эрдэнэт цогцолбор” дээд сургуулийн хамт олон БНХАУ-ын иргэдэд хандив илгээжээ

        Эрдэнэт үйлдвэрийн дэргэдэх Ш.Отгонбилэгийн нэрэмжит Технологийн сургууль буюу одоогийн “Эрдэнэт цогцолбор” дээд сургуулийн хамт олон БНХАУ-ын ард иргэдэд сэтгэлийн хандив илгээсэн байна. Тус  сургууль нь БНХАУ-ын их дээд сургууль болон судалгаа шинжилгээний байгууллагуудтай хамтран ажиллаж, эрдэм шинжилгээ, судалгааны төслүүд хэрэгжүүлдэг. Хамтын нягт ажиллагаатай байгууллагын хувьдтусламж дэмжлэг шаардлагатай үед нь хандивын гараа сунгах нь зүйд нийцнэ гэж тус сургуулийнхан ярилаа.     БНХАУ-д шинэ төрлийн корона вирусийн халдварт өвчин дэлгэрч, халдвар авсан болон нас барсан хүний тоо нэмэгдэж байгааг олон улсын хэвлэл мэдээллийн хэрэгслүүд мэдээлж буй. Тус улсын нийгэм, эдийн засгийн хэвийн үйл ажиллагаанд сөргөөр нөлөөлж, ард түмэнд нь томоохон сорилт тулгараад буй энэ хүнд цаг үед “Эрдэнэт цогцолбор” дээд сургуулийн багш, ажилтнууд сэтгэлийн хандив цуглуулж, БНХАУ-ын элчин сайдын яаманд хүлээлгэн өгчээ.      Уг хандивын арга хэмжээг дэмжин, оролцсон сургуулийн нийт багш, ажилтнуудад тус улсын элчин сайдын яамныхан талархал илэрхийлсэн байна. М.Балжинням Фото: Б.Булганбаатар Дэлгэрэнгүй...
  • Эрдэнэт үйлдвэрийн нутаг дэвсгэрт халдваргүйтгэлийн ажил хийж эхэллээ

        Эрдэнэт үйлдвэрийн Аврах, гал унтраах 58 дугаар ангийн алба хаагчид Орхон аймгийн Онцгой байдлын газар, Мэргэжлийн хяналтын газар, Хүнс хөдөө аж ахуйн газрын төлөөлөлтэй хамтран үйлдвэрийн нутаг дэвсгэрт халдваргүйтгэлийн ажлыг өнөөдрөөс эхлүүллээ. Улсын онцгой комисс болон Шадар сайдын удирдамж, Онцгой байдлын Ерөнхий газрын даргын тушаал, аймгийн Онцгой комисс болон үйлдвэрийн Гамшгаас хамгаалах штабын шийдэрийн дагуу дээрх ажлыг нэгдсэн журмаар зохион байгуулж байна.     Аймгийн Онцгой байдлын газрын тусгай зориулалтын автомашинаар хийж байгаа халдваргүйтгэлийн ажлыг Захиргааны I байр болон хоол үйлдвэрлэл эрхлэгч үйлдвэрийн цех нэгжид зохион байгууллаа. Өнөөдрийн байдлаар Эрдэнэт үйлдвэрт эрүүл ахуйч эмч, онцгой байдлын ажилтны бүрэлдэхүүнтэй 24 цагийн шуурхай штаб ажиллаж, бүтцийн нэгжүүдийн холбогдох мэдээллийг богино хугацаанд шуурхай дамжуулан ажиллаж байна. Аврах, гал унтраах 58 дугаар ангийн бие бүрэлдэхүүн өглөөний ээлжийн ажилчдыг зөөвөрлөсөн 32 автобусанд ариутгал, халдваргүйтгэл хийжээ.     Аврах, гал унтраах 58 дугаар ангийн захирагч, хошууч А.Отгонбаяр Эрдэнэт хотын иргэд, үйлдвэрийн ажиллагсдыг хөдөө гадаа явахгүй, шинийн нэгний өглөө овоо тахилга дээр гарахгүй байхыг анхаарууллаа. И.Чинтогтох Фото: Б.Баттөгс Дэлгэрэнгүй...
  • Эрдэнэт үйлдвэрийн Оёдлын цех амны хаалт үйлдвэрлэж эхэллээ

           Covid-19коронавирус, бусад аюулт томуугийн вирусийн халдвар тархаж болзошгүй байдлыг харгалзан үзэж, Эрдэнэт үйлдвэрийн Ерөнхий захирлын А/78 дугаар тушаал үйлдвэрийн газарт хэрэгжиж эхэлсэн. Тушаалд “Нэг удаагийн амны хаалтыг дотоод нөөц бололцоонд тулгуурлан, зохих халдвар хамгааллын шаардлагыг ханган үйлдвэрлэж, үйлдвэрийн газрын ажилтнуудыг нэгдсэн журмаар тогтмол ханган ажиллах” тухай тусгасны дагуу Эрдэнэт үйлдвэрийн Оёдлын цех амны хаалт үйлдвэрлэж эхэллээ. Үйлдвэрлэлийн явцын талаарх мэдээллийг Оёдлын цехийн орлогч дарга Ж.Мөнх-Оргилоос тодрууллаа.     -Оёдлын цех амны хаалт үйлдвэрлэхээр болсон тухай таатай мэдээ сонслоо. Энэ талаар бидэнтэй хуваалцахгүй юу?     -Монгол Улсын Засгийн газрын 2020 оны 02 дугаар сарын 13-ны өдрийн тогтоолыг хэрэгжүүлж улс орон даяар өндөржүүлсэн бэлэн байдал зарласан. Үйлдвэрийн удирдлагуудын зүгээс баялаг бүтээгч уурхайчдынхаа аюулгүй байдлыг харгалзан үзэж, Оёдлын цехийн удирдлагуудтай зөвлөлдсөний үндсэн дээр 30 мянган амны хаалт үйлдвэрлэх чиглэл өгсөн. Өнөөдрийн байдлаар амны хаалтны эсгүүрээ гаргаж, оёх бэлтгэлээ хангаад байна.     -30 мянган амны хаалтыг хэдэн өдөрт үйлдвэрлэхээр төлөвлөж байна вэ?     -Манай эсгүүрчид 10 мянган амны хаалтны эсгүүрийг хоёр хоногт гаргасан. Бид сар шинийн баяраас өмнө тодорхой хувийг бэлтгэх, үлдсэнийг баярын дараа үйлдвэрлэхээр төлөвлөж байна. 30 мянган амны хаалт гэдэг бага тоо биш. Тиймээс ажлын хувцас, баяжмалын уут оёхын хажуугаар амны хаалтаа үйлдвэрлэж дуусгана гэсэн зорилт тавьсан. Эсгэх цехийн хамт олон бүрэн бүрэлдэхүүнээрээ ажиллахаас гадна зөөлөн оёдлын 40 гаруй ажилтан энэ ажилд оролцоно.       -Стандартад нийцсэн амны хаалт гэж ойлгож болох уу?     -Амны хаалтыг цэвэр даавуун материалаар үйлдвэрлэхийн зэрэгцээ 2-3 давхар байхаар тооцоолсон. Бидний зүгээс аймгийн Мэргэжлийн хяналтын газар болон Эрүүл мэндийн газарт даавуун материалаа шинжлүүлж, зохих зөвшөөрөл авсны дагуу үйлдвэрлэлээ эхлүүлсэн.       -Нэг ажилтанд хэдэн ширхэг амны хаалт олгох вэ?     -Ажилтан бүрт 5 ширхэг амны хаалт олгохоор тооцоолсон. Ирэх 7 хоногт эхний ээлжийн амны хаалтыг ажилчдын хувцасны агуулахаар дамжуулан олгоно. И.Чинтогтох Фото: Б.Баттөгс Дэлгэрэнгүй...
  • Эрдэнэт үйлдвэр гамшгаас хамгаалах өндөржүүлсэн бэлэн байдалд ажиллаж байна

          “Эрдэнэт үйлдвэр” ТӨҮГ-ын Ерөнхий захирлын 2020 оны 02 сарын 14-ний өдрийн А/78 дугаар тушаалаар үйлдвэрийн газрыг энэ сарын 13-ны өдрөөс 03 дугаар сарын 02-ны өдрийг хүртэлх хугацаанд гамшгаас хамгаалах өндөржүүлсэн бэлэн байдлын зэрэгт хэсэгчлэн шилжүүллээ. Энэхүү тушаал нь 14 заалттай бөгөөд үйлдвэрийн бүсэд энэ сарын 14-ний өдрөөс хэрэгжиж эхлээд байна. Тушаалтай холбогдуулан Эрдэнэт сувиллын цогцолбор, Сэлэнгэ амралт, аялал жуулчлалын цогцолборын сувилах, амраах үйл ажиллагааг түр хугацаанд зогсоож, нийгмийн цехүүдийн захиргааны болон харуул хамгаалалт, ариутгал цэвэрлэгээ хариуцсан ажилтнуудаас бусад хүнд цалинтай чөлөө олгох, нөхөн амраах, бусад цех, нэгжид түр шилжүүлэн ажиллуулах, шаардлагатай тохиолдолд ээлжийн амралтыг нь олгох зэргээр зохицуулалт хийж, нийт ажиллагсдын ажлын цаг ашиглалтад хяналт тавих, сахилга, хариуцлагыг чангатгах талаар арга хэмжээ авч ажиллахыг холбогдох удирдлагуудад даалгаад байна. Мөн энэ сарын 18-наас эхлэн Захиргааны I,IIбайранд гадны байгууллагуудын төлөөлөл, иргэдийг хувийн асуудлаар нэвтрүүлэхгүй байх, онцгой тохиолдолд гаргасан хүсэлтийг бичгээр хүлээн авч, холбогдох нэгж, ажилтанд хүргэн ажиллахаар боллоо. И.Чинтогтох Дэлгэрэнгүй...
  • Цэцэрлэг, сургуулийн үйл ажиллагаа эхлэх хугацааг 03 дугаар сарын 30-ныг хүртэл сунгах шийдвэр гарлаа

         Гамшгаас хамгаалах өндөржүүлсэн бэлэн байдлын зэрэгт хэсэгчилсэн байдлаар шилжүүлсэн шийдвэрийг 2020 оны 3 дугаар сарын 30 ны өдрийг хүртэл сунгах Засгийн газраас тогтоол гаргалаа. Ингэснээр цэцэрлэг, сургууль, их дээд сургууль, сургалтын төвүүдийн үйл ажиллагаа эхлэх хугацаа хойшилж байгаа төдийгүй олон нийтийг хамарсан үйл ажиллагааг 3 дугаар сарын 30-ныг хүртэл зохион байгуулж болохгүй гэдгийг Засгийн газрын Хэвлэл мэдээлэл, олон нийттэй харилцах албанаас мэдээллээ. Шинэ коронавирусийн халдвараас урьдчилан сэргийлэх зорилгоор тогтоосон цэцэрлэг, сургуулиудад тогтоосон хөл хориог сунгах эсэхийг Засгийн газрын өнөөдрийн ээлжит хуралдаанаар ийнхүү шийдвэрлэлээ. Өнгөрсөн Лхагва гарагт Улсын онцгой комиссын дарга Ө.Энхтүвшин шаардлагатай бол хөл хориог дахин сунгана гэдгийг мэдэгдэж байсан. Улсын онцгой байдлын комиссын 1 дүгээр сарын 24-ний өдрийн шийдвэрээр сургууль, цэцэрлэг өмчийн байдал үл харгалзан 3 дугаар сарын 2-ныг хүртэл хаах шийдвэр гаргасан. Түүнчлэн олон нийтийг хамарсан төрөл бүрийн арга хэмжээ зохион байгуулахгүй байхыг үүрэг болгосон. Ингээд зогсохгүй “Шинэ коронавирусийн халдварын эрсдэлийг бууруулах, засаг захиргаа нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг 2020 оны 2 дугаар сарын 13-ны өдрөөс гамшгаас хамгаалах өндөржүүлсэн бэлэн байдлын зэрэгт хэсэгчилсэн байдлаар шилжүүлэх тухай Засгийн газрын тогтоол” гарсан юм. Харин 2 дугаар сарын 14-нөөс эхлэн БНХАУ-тай хил залгаа боомтуудаар орох, гарах агаарын болон төмөр замын зорчих хөдөлгөөнийг зогсоогоод байгаа билээ. Э.Мөнх-Уянга Дэлгэрэнгүй...
  • “Нэг ажилтан-нэг шагай” аянд найман цех нэгджээ

         Эрдэнэт үйлдвэрийн дэргэдэх “Энэрэл” төвийн хүүхдүүдэд шагай бэлэглэх уриалга гаргасан “Нэг ажилтан-нэг шагай” аян амжилттай үргэлжилж байна. Нийгмийн харилцааны хэлтсээс санаачлан зохион байгуулсан тус аянд өнөөдрийн байдлаар Дотоод хяналтын хэлтэс, Зураг төслийн хүрээлэн, Спорт цогцолбор, Холбоо, мэдээллийн технологи автоматжуулалтын цех, Засвар механикийн завод, Барилга засварын цех, Техникийн хэлтэс, Ус хангамжийн цехийн хамт олон нэгдэж, 1126 шагай бэлэглэжээ.     “Энэрэл” төв хүүхэд багачуудыг бие хүн болон төлөвшихөд чиглэсэн олон төрлийн сургалт явуулсаар ирсэн. Эдгээр хувилбарт үйлчилгээний нэг хэсэгт монгол уламжлалын булан багтсан бөгөөд шагайн наадгайг хүүхдүүдэд зааж сургах үүднээс аяныг эхлүүлсэн байна. Шагайн наадгай нь бага насны хүүхдийн хуруу, тархи, харааны хөгжлийг дэмжихээс гадна оюун ухааныг тэлж, сэтгэн бодох чадварыг сайжруулдаг уламжлалт тоглоом юм. Аяны хүрээнд маргааш буюу энэ сарын 20-ны өдрийг дуустал Эрдэнэт үйлдвэрийн бүтцийн нэгжүүд шагай бэлэглэх боломжтой бөгөөд нийт цугласан шагайг ариутгалд оруулан, сар шинийн баярын өдрүүдэд тоглуулахаар болсноо “Энэрэл” төвийн аргазүйч Х.Баярмаа мэдээллээ.   И.Чинтогтох Дэлгэрэнгүй...
  • Д.ЗОРИГТХҮҮ: Үйлдвэрлэл, сургалт, судалгааны амьд холбоог хөгжүүлж чадварлаг инженер бэлтгэнэ

        Ш.Отгонбилэгийн нэрэмжит “Эрдэнэт цогцолбор” дээд сургуулийн захирал Д.Зоригтхүүтэй ярилцлаа.      -Өнгөрсөн онд хийж хэрэгжүүлсэн ажлынхаа талаар тоймлон ярина уу?       -Манай сургуулийг Боловсролын магадлан итгэмжлэлийн үндэсний зөвлөлөөс гурав дахь удаагаа магадлан итгэмжилсэн. Чанарын менежментийн тогтолцоог ISO 9001:2015 стандартын дагуу нэвтрүүлсэн байгууллагын гэрчилгээгээ магадлах аудитад орж дахин баталгаажуулсан. Гурван удаа бие дааж магадлан итгэмжлэгдсэн, чанарын менежментийн тогтолцоо нэвтрүүлсэн их, дээд сургууль хуруу дарам цөөхөн. Ер нь орон нутагт үйл ажиллагаа явуулж буй цорын ганц байгууллага бол манай сургууль. 2019 онд судалгаа, шинжилгээний төслүүдээс олох орлого мэдэгдэхүйц нэмэгдсэн. “Эрдэнэт үйлдвэр” ТӨҮГ-ын эрдэм шинжилгээ, туршилт судалгааны ажлын төлөвлөгөөнд орсон гурван ажил хийлээ. Хоёр ажил дуусах шатандаа явж байна. Оюу толгой ХХК-иас хоёр төсөл авч хэрэгжүүллээ. Азийн хөгжлийн банкны санхүүжилттэй гурван төсөл авч гүйцэтгэлээ. Мөн гадаадын санхүүжилттэй төсөл, хөтөлбөрт хамрагдахаар болсон байгаа. Үүнд, ХБНГУ-ын Засгийн газрын гурван жилийн хугацаатай 1,8 сая еврогийн төсөвтэй, хаягдлыг агаараас тандан судлах төсөл эхлээд явж байна. БНХАУ-ын Шинжлэх ухаан технологийн яам, Монгол Улсын Шинжлэх ухаан технологийн сан хамтран 1.5 сая юанийн санхүүжилттэй, гурван жилийн хугацаатай төсөл хэрэгжихээр болсон. Төслөөр баяжуулах процессын хаягдлаар галд тэсвэртэй, керамик барилгын материал үйлдвэрлэх боломжийг судлах юм. Германы хамтын ажиллагааны нийгэмлэг GIZ болон Шахтбау ногдхаусэн ХХК-ийн хамтарсан тусламжаар гагнуурын сургалтын төвийн тоног төхөөрөмж, сургалтын хөтөлбөр, сургагч багш нараа олон улсын жишигт нийцүүлнэ. Уг төслөөр 120 мян.еврогийн тоног төхөөрөмжийг Шахтбау ногдхаусэн ХХК нийлүүлж, 120 мян.еврогийн тусламжаар сургагч багш нарыг Монгол болон Герман улсад мэргэжил дээшлүүлэх сургалтад хамруулна. Цаашид гадаад, дотоодын байгууллагуудтай хамтын ажиллагааг өргөжүүлэхэд анхаарч ажиллана.       -Та чанарын менежментийн тогтолцоо нэвтрүүлсэн, магадлан итгэмжлэгдсэн сургууль гэдгээ тодотголоо. Бүр орон нутагт байгаа цорын ганц сургууль гэсэн. Энэ бүхэн танай сургуулийн хувьд яагаад чухал вэ?      -Монгол улс хүн ам цөөтэй учраас тоогоор юм уу, үнээр хэзээ ч дэлхийд өрсөлдөж чадахгүй. Бид зөвхөн чанараар өрсөлдөж тэргүүлж чадна. Чанарыг бий болгохын тул тогтолцоо маш чухал юм. Түүнийгээ хөндлөнгийн байгууллагаар магадлан итгэмжлүүлэх нь бас чухал. Хүн төрөлхтөн хөгжихөд тогтолцоо хамгийн чухал болохыг хоёр удаагийн туршилтаар баталчихсан байдаг. Эхнийх нь 1945 онд Германыг уртрагаар нь зүүн, баруун болгож хуваагаад хоёр өөр тогтолцоогоор хөгжүүлсэн. Хүн амын үүсэл гарал, хэл, соёл, хоол унд, амьдарч байгаа цаг уур гээд бүх юм адилхан байхад хөгжлийн асар зөрүү гарсан. Дараа нь 1953 онд Солонгосыг 38-р өргөргөөр өмнөд, хойд гэж хуваагаад хоёр өөр тогтолцоогоор хөгжүүлсэн. Одоо хөгжлийн түвшин нь тэнгэр газар шиг ялгаатай байгааг бид мэднэ. Энд өмнөд Солонгосчууд нь илүү хүчтэй, ухаантай, хөдөлмөрч биш шүү дээ. Зөвхөн тогтолцооны ялгаанаас хөгжлийн асар зөрүү гарсан. Тиймээс би манай сургууль чанарын менежментийн тогтолцоог олон улсын ISO 9001 стандартын дагуу нэвтрүүлсэн байгууллага гэдгийг тодотгож хэлээд байгаа юм. Манай сургуулийг сонгоорой гэж уриалж байгаа юм.       -Танай лицей сургуулийн ангид Кэмбрижийн хөтөлбөр хэрэгжих болсон. Энэ талаар...?        -Кэмбрижийн хөтөлбөр хэрэгжүүлэх бэлтгэл ажил хийгдэж байна. Өнгөрсөн оны наймдугаар сараас хичээл заах багш нараа сургалтад хамруулж эхэлсэн. Тус хөтөлбөрийг урьд нь хоёр сургуульд хэрэгжүүлсэн туршлагатай зөвлөх авсан. Францад докторын зэрэг хамгаалсан багш Gregory Boils англи хэл дээр математикийн хичээлийг манай сургуулийн багштай хамтран орж эхэлсэн. Кэмбрижийн хөтөлбөр 9-12-р ангид хэрэгжинэ. Уг хөтөлбөр хэрэгжсэнээр манай ахлах сургуулийг төгссөн хүүхдийн диплом дэлхийн 130 гаруй оронд хүлээн зөвшөөрөгдөнө. Өөрөөр хэлбэл тухайн хүүхэд олон улсын аль ч их, дээд сургуульд элсэж, тэтгэлэг авах боломж нээгдэнэ. Монголын ерөнхий боловсролын сургуулийн цөм хөтөлбөрийг давхар судлах тул дотоодын их, дээд сургуулиудад элсэн ороход хүндрэл үүсэхгүй. Ангиасаа хамааран 4-6 хичээлийг англи хэл дээр нэмэлтээр үзэх тул англи хэлний мэдлэг маш сайн болж төгсөнө. Кэмбрижийн хөтөлбөртэй ахлах сургуульд жил бүр наймдугаар анги төгссөн 20 сурагч элсүүлэхдээ англи хэл, математик, байгалийн ухааны хичээлээр элсэлтийн шалгалт авна.     -Технологийн сургуулийг “Эрдэнэт цогцолбор” дээд сургууль болгох БСШУС-ын сайдын тушаал гарсан. “Эрдэнэт цогцолбор” дээд сургууль болсны давуу тал юу вэ? -Засгийн газрын 2019 оны 6-р сарын 5-ны 224-р тогтоолоор Технологийн сургуулийн үйл ажиллагааг өргөтгөж “Эрдэнэт цогцолбор” дээд сургууль болгох шийдвэр гарсан. Уг тогтоолын дагуу 2020 оны 1-р сард БСШУС-ын сайдын тушаал гарсан байгаа. Цогцолбор болсноор ерөнхий боловсролын ахлах сургууль, мэргэжлийн, техникийн, дээд боловсрол гээд бүх шатны боловсролыг цогцоор нь олгодог болно. Энэ жилээс үйл ажиллагаа маань олон улсын Кэмбрижийн хөтөлбөртэй ахлах сургууль, техникийн боловсрол олгох Политехник коллежоор өргөжих юм. Цаашдаа бие дааж магисрийн зэрэг олгодог болж хөгжих учиртай. Ингэснээр боловсролын салбарт цогц сургалт явуулдаг байгууллага болон хөгжих боломж бүрдэнэ.       -Цаашдын зорилт юу вэ?      -“Эрдэнэт цогцолбор” дээд сургууль судалгаанд суурилсан сургууль болж хөгжих ёстой. Манай сургууль тоогоор бус чанараар өрсөлдөх шаардлагатай. Энэ нь судалгааны ажилд суурилж, өөрийн хөрсөнд таарах инновацийн шийдлүүдийг гарган үйлдвэрлэлд хэрэгжүүлдэг болохын төлөө ажиллана гэсэн үг. Ерөнхий захирал 2020 онд “Шинжлэх ухаанд суурилсан үйлдвэрлэлийг эрчимтэй хөгжүүлэх” зорилт дэвшүүлэн тавьсанд маш их баярлаж байгаа. Энэ зорилтын хүрээнд бид үйлдвэрлэл, эрдэм шинжилгээ, сургалт судалгааны уялдаа холбоог сайжруулахад өндөр ач холбогдол өгч үйлдвэрлэлийн цехүүдтэй хамтран ажиллахаар төлөвлөөд байна. 2020 оны 10-р сарын 1-нд манай сургуулийн 45 жилийн ой тохиож байгаа тул үйлдвэрлэл-эрдэм шинжилгээ-сургалтын үйл ажиллагааны амьд холбоог улам бэхжүүлэхэд анхаарч ажиллаж байна. Энэ амьд холбооны нэг жишээ нь Б.Хээрийнбаатар багшийн Азийн хөгжлийн банкны санхүүжилтээр хэрэгжүүлсэн төсөл юм. Уг төслөөр оюутны дотуур байрыг нарны сэргээгдэх цахилгаан эрчим хүчээр хангасан. Тэнд цахилгааны ангийн оюутнуудад бодитоор дадлага хийлгэх нарны 14 фото үүсгүүр байрлуулж сургалт явж байна. Мөн Орхон аймгийн нарны эрчим хүчний бодит боломжийн талаар судалгаа хийгдэж байна. Давхар жилд 1.6 сая төгрөгийн эрчим хүчний үйлдвэрлэл явж байна. Энэ бол шинжлэх ухаанд суурилсан үйлдвэрлэлийг хөгжүүлэхийг тод харуулсан бодит жишээ юм. Цаашид Үйлдвэрлэл-Сургалт-Судалгааны амьд холбоог улам сайн хөгжүүлж өндөр чадвартай инженер бэлтгэх таатай орчныг бүрдүүлэх шаардлагатай. Байгалийн нөөц бол хэзээ нэгэн цагт шавхагдана. Харин оюуны бүтээл, инженерийн шийдэл гаргах бол шавхагдашгүй нөөц юм. Иймээс байгалийн нөөц буй цагт боловсон хүчнийхээ чадвар чадамжийг сайжруулж, шавхагдашгүй нөөцийг бий болгох хэмжээнд хөгжүүлж бойжуулах ёстой.      -Цаг гарган ярилцсанд баярлалаа. Т.Батчулуун Фото: Б.Баттөгс Дэлгэрэнгүй...
  • Хүн цөөтэй ч, хүртээмж ихтэй хамт олны үйлс

         Өнгөрсөн онд “Дэвшилд тэмүүлэгч хамт олон” болзолт уралдаанд тэргүүлсэн Баяжуулах үйлдвэрийн Механик боловсруулалт ба Бигнүүрийн хэсгийн үйл ажиллагааг сурвалжиллаа. Бид эхлээд Механик боловсруулалтын бригадын ажлын байранд ирсэн юм. Суурь машинууд тасралтгүй тачигнах ч цэвэр цэмцгэр цэлгэр саруулхан заал угтана. Токарьчид ямар нэгэн зүйлийг хичээнгүйлэн зорж, засварчин токариар боловсрогдох эд ангийн бэлдэц төмөр хөрөөдөж сууна.   Токарьчны толгойд тоо эргэлддэг     Хэсгийн дарга Л.Ууганбаяр тэдний хажуухантай багавтар өрөөнд суух. Бид түүнтэй ярилцлаа. Машин үйлдвэрлэлийн технологич инженер мэргэжилтэй энэ залуу ажлын гараагаа 2007 онд  эндээс  засварчнаар эхэлж, Ерөнхий механикийн хэлтэст оношилгооны инженерээр дэвшиж,  өдгөө тав дахь жилдээ хэсгийн даргаар ажиллаж буй. Эднийхэн “Баяжуулах”-д ашиглагддаг бүхий л туузан дамжуулгын найдвартай ажиллагааг хангаж, засвар үйлчилгээ, холболт хийх, тээрмийн болон туузан дамжуулгын барбаныг резинээр хуяглах, хэсгүүдийн захиалгаар стандарт бус эд ангиуд үйлдвэрлэдэг. Мөн хамгаалах бүс, зөөврийн шат, хийн зүсэгч хэрэгслийг баталгаажуулах, засварчдын гар багажийг бэлтгэн нийлүүлэх үндсэн чиг үүрэгтэйг хэсгийн дарга ярилаа.        Тэрбээр цааш нь: “Бид болзолт уралдааны хүрээнд төлөвлөгөө гарган олон ажил хэрэгжүүлсэн.  Манайх 1600 мм өргөнтэй, туузан дамжуулгын холболтыг халуун бигнүүрийн аргаар хийх тоног төхөөрөмж худалдан авч, найдвартай ажиллагааг хангасан.  Нийт 1686 м туузан дамжуулгын тууз сольж, давхардсан тоогоор 250 гаруй конвейрын засвар үйлчилгээ хийсэн. Мөн 42 тонн төмрөөр 52900 орчим деталл эд анги үйлдвэрлэж нийлүүлсэн. Хий зүсэгч нийт 600 тоног төхөөрөмж, төдий тооны хамгаалалтын бүс, 100 гаруй зөөврийн шат, 22 гар лебот баталгаажууллаа.     ХАБ-ын үзүүлэлтээр Баяжуулах үйлдвэрийн жижиг, туслах хэсгүүдээс 1, 6, 10, 11-р сард тэргүүн байр эзэлсэн. Цехээс зохион байгуулсан уралдаан, тэмцээн, олон нийтийн үйл ажиллагаанд тогтмол амжилттай  оролцсон.  12 ажилчин мэргэжил дээшлүүлэх, зэрэг ахиулах сургалтад хамрагдсан. Бүтээмжийн чиглэлээр хагас жил тутамд төсөлт ажлууд хэрэгжүүлсэн. Нийт санал гаргалт 70-аас дээш хувьтай байлаа. Ажлын байранд урсгал засвар хийж, ажилчдад таатай орчин нөхцөл бүрдүүлсэн. Бид Эрдэнэт үйлдвэрийн Хөдөлмөрийн аварга Я.Жаргалсайхан, Н.Энхдүүрэн нарын үйлдвэртээ 30 гаруй жилийн хөдөлмөрөө шингээсэн шилдэг ажилчдаараа бахархдаг” гэсэн юм. Түүний ярианаас энэ хэсгийн ховор мэргэжлийн чадварлаг ажилчид Эрдэнэт үйлдвэрийнхээ үндсэн үйлдвэрлэлийн тасралтгүй ажиллагаанд хамгийн чухал оролцоотой төдийгүй, санаачилгатай бүтээлч хүмүүс болох нь ойлгогдлоо.      Механикч, зохион бүтээгч инженерүүдийн гаргасан зургийн дагуу стандарт бус металл хийц үйлдвэрлэдэг, нарийн мэдрэмж, уйгагүй ажиллагаа шаардсан мэргэжил бол токарьчных.  Тэдний нэг А.Отгонбаатартай уулзахад:      “Би Баяжуулах үйлдвэрт токарьчноор 23 жил ажиллаж байна. Бид тоног төхөөрөмжийн урсгал засварт шаардагдах эд ангиудыг өгөгдсөн зургийн дагуу зорж бэлэн болгодог. Одоо Төв корпусын тээрмийн машинд зориулсан шпилк зорж бэлдэж байна. Төмөр бэлдцээр нарийн эд анги, бэлэн бүтээгдэхүүн үйлдвэрлэдэг бидний ажил сайхан. Хэмнэлтийн бодлогын хүрээнд манайхан сүүлийн үед олон металл хийц, эд анги үйлдвэрлэж байгаа.  Гадаадаас захиалгаар өндөр үнээр авдаг эрэг, боолт, гайкаа өөрсдөө хийж, үйлдвэрийнхээ эдийн засагт тодорхой хувь нэмэр оруулж байгаагаараа би бахархдаг” гэв.      Токарийн машин дээрх гурвалжин шугам ямар учиртайг асуухад “Токарьчны толгойд тоо эргэлддэг, токариар хийж буй зүйлийн нарийвчлал микрометрээр хэмжигддэг” гэж хэсгийн дарга хэлсэн юм.   Бигнүүрчин-Ховор нандин мэргэжил     Бид дараа нь Бигнүүрийн бригадын ажлын байранд очлоо. Өндөр таазтай, гүүрэн кран бүхий энэ байранд тууз ороох төхөөрөмж жигдхэн хүнгэнэнэ. Төхөөрөмжийн тавцан дээрх туузыг холбоход бэлтгэж хуулах, цавуудах ажлыг зургаан ажилчин хийж зогсоно. Хэсгийн мастер Ж.Жамбалдоржтой уулзаж, бигнүүрийн бригадынхны ажил үйлсээс сонирхоход: “Бигнүүрийн бригад Баяжуулах үйлдвэрийн туузан дамжуулгуудын лентийг бэлдэж, засвар үйлчилгээг хариуцдаг. Өнөөдөр 2020 оны их зогсолтод бэлтгэж, 1А туузан дамжуулгын тууз холболтын томоохон ажил хийж байна. Туузыг халуун, хүйтэн бигнүүрийн аргаар бэлтгэдэг юм. Халуун бигнүүрийн аргыг резин даавуу туузан дээр хоёр жилийн өмнөөс хэрэглэж эхэлсэн.  Түүхий резинийг халуун прессээр чанаж, резинийг резинээр холбоод нэг биет болтол нь нийлүүлэн наадаг энэ арга нь засварын чанарт маш сайнаар нөлөөлж байна.  9, 17, 3, 2А туузан дамжуулгыг халуун бигнүүрийн аргаар бэлтгэсэн нь засвар хийгдэхгүйгээр сайн ажиллаж байгаа. Баяжуулах үйлдвэрийн хэмжээнд есөн бигнүүрчин бий. Эд бүгд ХБНГУ-ын Тип топ компанийн сургалтын төвд мэргэжил дээшлүүлсэн, туршлагатай, мэргэшсэн хүмүүс. Үйлдвэрт ажилладаг бүх конвейрын засвар үйлчилгээг хариуцан ажилладаг.   Тэднийг өөр ямар ч ажил мэргэжлийн хүмүүс орлон ажиллах боломжгүй” гэв.     Бигнүүрчид хэсгүүдийн ажлын байранд бас тууз засварладаг аж.  Энэ үеэр 10-р конвейр дээр гурван бигнүүрчин ажиллаж байв. Туузан дамжуулгын туузны томоохон холболтыг их зогсолт зэрэг урт хугацааны засварын үед хийдэг. Харин тусгай зориулалттай цавуугаар нааж засварладаг хүйтэн бигнүүрийг богино хугацааны засварт хийдэг гэнэ.   Бигнүүрчин, бригадын дарга Б.Буяннэмэхтэй уулзахад:      “Баяжуулах үйлдвэрт 15 жил ажиллаж байна. Германы Тип топын резин холбох үндсэн технологийг манайхан үйлдвэртээ нутагшуулсан юм. Туузан дамжуулгын резин засварлах энэ ховор нандин мэргэжилдээ би их дуртай. Бид шинээр ажилд орсон залуусаа шавь сургалтаараа өөрсдийгөө дагуулан сургадаг.  Багаар ажилладаг энэ ажлыг манайхан бүгдээрээ чадварлаг хийдэг. Бид засвараа төгс болгохын төлөө хичээж, зүтгэж явна. Манайхны ажил их хариуцлагатай, туузан дамжуулгын тууз гэмтэхэд л үйлдвэр зогсох аюултай. Иймээс бид засвараа жаахан дутуудчихав уу гэх сэтгэлд сэв, “хоч”-гүйгээр хийхийг мэрийдэг. Бид халуун бигнүүрийн аргаар туузыг залгаас нь мэдэгдэхгүй болтол нь холбож байна. Энэ нь процессын хувьд цаг хугацаа их шаарддаг. Сайтар төлөвлөж хийх хэрэгтэй. Засах, чанах гээд л бүх зүйл цаг хугацаатай.  Цагтаа амжих гэж бид шаргуу ажилладаг” гээд ажилдаа яарсаар явж одлоо.      Белазаас буух хүдрийг бутлах, нунтаглах процесст, шүүж хатаагаад вагонд ачихад ч туузан дамжуулгаар аваачдаг. Энэ бүх туузны бүрэн бүтэн, найдвартай ажиллагааг ханган ажилладаг хариуцлагатай үүргийг тэд гүйцэтгэдэг. Мөн Баяжуулах үйлдвэрийн үндсэн болон туслах тоног төхөөрөмжид шаардлагатай стандарт бус эд анги үйлдвэрлэж, Эрдэнэт үйлдвэрийнхээ гадагшлах мөнгөний урсгалыг сааруулж буй тэднээр бахархмаар. Эднийхэн инженер техникийн хоёр ажилтан, 24 ажилчинтай цомхон бүтэцтэй, хийх ажлын цар хүрээ хүртээмж ихтэй “том” хамт олон юм. Я.Энхтуяа Фото: Б.Баттөгс   Дэлгэрэнгүй...
  • Эрүүл мэнд шалгах эмнэлгийн суурин аппараттай боллоо

        Хүмүүс амьдралынхаа ихэнх цаг хугацааг ажлын байрандаа өнгөрүүлдэг. Энэ явцад биеийнхээ эрүүл мэндийн өөрчлөлтүүдийг эмчид үзүүлж, хянах боломж нөхцөл, эмнэлгийн тоног төхөөрөмж хомс байдаг. Иймээс Авто тээврийн цехийн Технологи тээврийн авто засварын хэсгийн “Сүлд” дугуйлангийн ахлагч Т.Цэрэнбат мастертай хамт олон санаачлан өөрсдийн биеийн эрүүл мэндийг шалгах эмнэлгийн суурин аппаратууд худалдан авчээ. Корона вирус болон томуу томуу төст өвчнөөс урьдчилан сэргийлэх зорилгоор эрүүл мэндийн булан нээж “Сүлд” дугуйлангийнхан ажлын байрандаа уг аппаратуудыг ашиглаж байна. Энд ажиллагчдын даралт шалгах аппарат, биеийн халуун үзэх буу, зүрхний цохилт буюу хүчил төрөгчийн хангамж тодорхойлох багаж, чихэвч, амны хаалт зэргийг нэг дор байршуулжээ. Эдгээр багаж тоног төхөөрөмжийг “Сүлд” дугуйлангийнхан нэг сая төгрөгөөр худалдан авсан байна. Т.Батчулуун Фото: Б.Баттөгс Дэлгэрэнгүй...
  • А.УНДРАХТАМИР: Эрдэнэтийн Овоо ордын үнэ цэнэ нэмэгдсэн нь эхний амжилт...

        Эрдэнэт үйлдвэрийн хөгжлийн үндсэн чиглэлийн хүрээнд эрдэс баялгийн нөөц өсгөх төсөл хэрэгжиж байна. Энэ төслийн үр дүн, ач холбогдлын талаар Геологи маркшейдерийн хэлтсийн дарга, Ерөнхий геологич А.Ундрахтамиртай ярилцлаа.     -Эрдэс баялгийн нөөц өсгөх төсөл ямар үндэслэлээр хэрэгжиж эхэлсэн бэ?      -Эрдэнэт үйлдвэр эрдсийн нөөц баялаг түшиглэн үйл ажиллагаа явуулдаг. Тиймээс хүдрийн нөөц баялгийн хэмжээ маш чухал. Хүдрийн нөөцийг зөв тодорхойлох, цаашид бүрэн дүүрэн олборлох ажиллагаа явуулахын тулд маш олон шатны хайгуул, судалгааны ажил амжилттай явагдаж байна. Эрдэнэт үйлдвэрт олон улсын байгууллагууд том төсөл хөтөлбөрт хөрөнгө оруулахын тулд зайлшгүй хүдрийн нөөцийг үндэслэл болгож олон улсын санхүүгийн харилцаа үүсдэг. Өөрөөр хэлбэл томоохон төслүүд амжилттай хэрэгжих үндэс нь хүдрийн нөөц баялаг юм. Тэгэхээр Геологи, маркшейдерийн хэлтэс, Геологи хайгуулын анги сүүлийн гурван жил энэ чиглэлд тасралтгүй ажиллаж байна.     -Төсөл ямар шатанд яваа вэ?     -Уурхайн нөөц баялгийг тодор-хойлох, олон улсын стандартад шилжүүлэх ажил төгсгөл шатандаа явна. Ирэх дөрөвдүгээр сард Олон улсын Жорк стандарт руу хөрвүүлсэн “нөөц”-ийг хийж дуусгана. Ингэснээр Эрдэнэт үйлдвэрийн уурхайн нөөц олон улсын ямар ч байгууллагаас хөрөнгө оруулалт татахад бэлэн баталгаа болох юм. Геологи хайгуулын ажлын хувьд уурхайн эргэн тойрны 60 орчим км-ын радиуст ойролцоогоор 300-аад мянган га талбайд геологи хайгуулын бүх шатны судалгаа хийж байна. Энэ ажил 80 хувьтай явж байгаа. 2021 он гэхэд эхний шатны цооногуудаа өрөмдөж, хүдрийн нөөцийг дахин тодотгох, Эрдэнэтийн орчимд гүний болон бусад дагалдах элемент, эрдэс баялгийн нөөцийг тогтоож, цаашид Эрдэнэт үйлдвэрийнхээ ашиглалтын хугацааг уртасгах боломжуудыг бүрдүүлэх үндсэн чиглэлтэй ажиллаж байна.      -Эрдэнэтийн эргэн тойронд 1960-1980 онд геологи хайгуулын ажлыг эрчимтэй хийсэн байдаг. Орчин үед давтан судлах болсон шалтгаан вэ?    -1970-80-аад оны техник технологи, арга аргачлал тухайн үеийн санхүүжилт, хөрөнгийн байдал өөр байсан. Технологийн хувьд одоогийнхтой харьцуулахад 10 дахин бага байх жишээтэй. Одоо бол өндөр технологи, арга аргачлал ашиглан, Эрдэнэт үйлдвэр өөрийн үйл ажиллагаанаасаа олсон орлогоороо ирээдүйд ашиглах нөөц баялгаа нэмэгдүүлэх ажлыг санхүүжүүлж байгаагаараа онцлогтой. Хүдрийн нөөц баялгийг шинээр илрүүлж болно. Мөн байгаа хүдрийн нөөц баялгаа дахин тодотгож, гүний түвшинд, илүү шинэ технологийн түвшинд өөрчлөлт ахиц гаргаж болно. 1970, ...80 оны үед хамгийн гүндээ 500-600 метр өрөмддөг байж. Одоо даруй 1500-2000 метр өрөмдөх боломжтой болсон.     -Эрдэнэтийн Овоо ордыг тойроод хичнээн илрэл байна?      -Ойролцоогоор тав, зургаан эрдсэн цэг илрэл байгаа. Мөн тодорхой шалгуур давсан Шандын орд бий. Бид энэ ордыг ч гэсэн гүйцээн судална. Мөн эрдэсжсэн цэгүүдийг орд болгох, хүдрийн биетийн гүнд нуугдсан далд хэсгүүдийг илрүүлэх зэрэг геологи хайгуулын ажлыг шат дараатай хийж явах нь Эрдэнэт үйлдвэрийн нөөц баялгийг нэмэгдүүлэхэд дөхөм болох юм. Одоогийн байдлаар ерөнхийд нь тооцоод үзэхэд 2016 оноос хойш Эрдэнэтийн Овоо ордын үнэ цэнэ даруй 10 дахин нэмэгдсэн эхний амжилтууд гарч байна. Манай геологичид хайгуул, судалгааны ажил ихээхэн өгөөж өгнө гэдэгт итгэл дүүрэн байгаа.       -Манайх геологи хайгуулын ажлыг дэлхийн жишигт нийцсэн аргачлалаар хийж чадаж байгаа юу?     -Тэгэлгүй яахав. Олон улсад хэрэглэдэг, хамгийн сайн туршигдсан, шинэлэг арга аргачлалууд хэрэглэж байгаа. Сансрын тандан судалгаанаас эхлээд агаарын геофизик хайгуул. Мөн газар болон талбайн хайгуул. Талбайн хайгуул дотор маш олон судлагдахуун бий. Ашигт малтмалын орд илэрлийг олоход дунджаар 20 гаруй төрлийн геологи хайгуулын судалгаа хийсний эцэст тухайн ордыг оновчилж дүгнэлт гаргана. Эрдэс баялгийн нөөц өсгөх төслийн хүрээнд ойролцоогоор 500-аад мэргэжилтэн, 20 гаруй аж ахуй нэгж, Монголын туршлагатай, топ мэргэжилтнүүд зөвлөж бас гар бие оролцон хамтарч ажилласан. Мөн гадаадын зургаан орны шинжээчид бидний ажилд олон улсын түвшинд гүйцэтгэхэд хяналт тавих, зөвлөгөө өгөх зэргээр дэмжлэг үзүүлж хамтран ажиллаж байна.      -Геологи хайгуулын анги маань экспедици болсон. Ингэснээр үйл ажиллагааны  цар хүрээ хэрхэн өргөжих вэ?     -Геологи хайгуулын анги үйлдвэрийн нэгэнт тогтоогдсон нөөц баялагт зонхилж үйл ажиллагаа явуулж байсан. Одоо Геологи хайгуулын экспедици болсноор олон чиглэлд ажиллана. Одоогоор Эрдэнэт үйлдвэр зэс молибдены чиглэлээр ажиллаж байгаа. Цаашид металл бус ашигт малтмалын нөөц нүүрс, төмөр, алт, мөнгө гэх мэт ямар ашигт малтмалыг стратегитаа уяж авч үзэх вэ гэдэг дээр бодлогоо тодорхойлно. Мөн зөвхөн Эрдэнэтийн Овоо орд, Эрдэнэт орчимдоо ажиллах уу, өөр бусад орд илэрлүүдийг хамарч үйл ажиллагаагаа тэлж корпорацийн түвшинд ажиллах уу гэх ерөнхий чиг хандлагыг Геологи хайгуулын экспедици гаргах ёстой. Эрдэнэт үйлдвэрийн цаашдын хөгжил, зорилго чиглэлд Геологи хайгуулын экспедици чухал үүрэг гүйцэтгэнэ.       -Эрдэс баялгийн нөөц нэмэгдүүлэх ажлыг монгол мэргэжилтнүүд гардан гүйцэтгэж байгаа нь бас нэгэн онцлог. Төслийн эцсийн үр дүн хэзээ гарах вэ?      -Геологи хайгуулын чиглэлээр ийм өргөн цар хүрээтэй том хэмжээний ажил Эрдэнэт үйлдвэрт өмнө нь явагдаж байгаагүй. Энэ их хүн хүч, техник технологи ашиглан Монгол мэргэжилтнүүд геологи хайгуулын ажлыг бие даан гүйцэтгэж байгаа нь үнэхээр онцлог. Өмнө нь орос мэргэжилтнүүдийг дагах, тэдний шийдвэрийг харах байдлаар ажиллаж ирсэн. Ирэх жилээс үр дүнгүүд гарна. Эхний үр дүн нь ирэх дөрөвдүгээр сард Жорк стандарт руу шилжинэ. Олон улсад Эрдэнэт үйлдвэр баталгаатай болж байна гэсэн үг. Өмнө нь Шандын ордын хайгуулыг маш дутуу хийсэн. Бид гүйцээж байна. Тухайн үед техник эдийн засгийн алдаатай үндэслэл гаргасан байдаг. 40 км-ээс наашаа хүдрээ тээвэрлэж энд боловсруулах нь эдийн засгийн хувьд ашиггүй гарсан. Бид газар дээр нь цомхон зохион байгуулалттай, эдийн засгийн үр ашигтай үйлдвэр барих үндэслэл гаргаж байна. Зэсийн зах зээлийн үнэ, үйлдвэрийн өөрийн өртөг, хүчин чадал гурвын харьцааг зөв хадгалснаар Эрдэнэт үйлдвэр олон жил ашигтай ажиллах боломжтой. Үүнийг зохистой харьцаагаар цааш авч явахын тулд бүх талын судалгаа мөн хариуцлага хэрэгтэй.      -Баярлалаа.  М.Одгэрэл Фото: Б.Баттөгс Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Сурталчилгаа

     Эрдэнэт үйлдвэр нийгмийн хариуцлагынхаа хүрээнд хийж хэрэгжүүлдэголон ажлаас хүүхэд багачуудад чиглэсэн ажлуудыг орхигдуулалгүй өнөөдрийг хүрсэн. Тиймээс ч Соёл, урлагийн цогцолбор, Спорт цогцолбор, “Энэрэл” төв, “Найрамдлын-Эрдэнэс” зуслан, Орос 19 дүгээр сургууль, Орос 3 дугаар цэцэрлэг, Технологийн сургууль гэсэн бүтцийн нэгжийн тогтвортой үйл ажиллагааг хангах зорилгоор хөрөнгө оруулалт хийсээр байна. Үйлдвэртэйгээ нас чацуу эдгээр байгууллага хамрах хүрээ, ач холбогдлын хувьд өргөжин тэлсээр эдүгээ Орхон аймгийг төлөөлөх үүрэг хариуцлага бүхий нэгжүүд болжээ.

     Хүүхдийг багаас нь урлагт дур сонирхолтой болгож, авьяасыг нь нээн хөгжүүлэх зорилгоор Соёл, урлагийн цогцолбор жилдээ 9 дугуйланд 300 орчим хүүхэд элсүүлж, мэргэжлийн багшлах боловсон хүчнээр ханган ажиллаж байна. Спорт цогцолборын тухайд 18 дугуйланд давхардсан тоогоор жилдээ 12 мянган хүүхэд суралцаж, шилдэг тамирчдаа аймаг, бүс, олон улсын чанартай уралдаан тэмцээнд амжилттай бэлтгэн, ур чадварыг нь ахиулсаар иржээ. Урлагийн байгууллага энэ хичээлийн жилд хийл хөгжим, спортынхон 2-5 настнуудад зориулсан бассейны сургалтаар шинэ элсэлтээ авч эхэлжээ.

      “Найрамдлын-Эрдэнэс” зуслан жилдээ 3100 хүүхэд хүлээн авахаар төлөвлөсөн ч энэ зун найман ээлжинд 4000 хүүхэд хүлээн авчээ. Эдгээрээс 128 хүүхдийг үнэ төлбөргүй амрааж, хүүхдийг сурч боловсрох, үеийнхэнтэйгээ нөхөрлөх, хөгжих боломж бололцоогоор хангасан байна. Байгалийн үзэсгэлэнт газар, цэнгэг агаартай бүсэд байрлах тус зуслангийн сургалтын хөтөлбөр, аргазүйтэй танилцан, туршлага солилцохоор Олон Улсын “Артек” зуслангийн удирдлагууд зочилж, хамтын ажиллагааныхаа талаар ярилцаад буцсан.

 

     Түүнчлэн Эрдэнэт үйлдвэр “Энэрэл” хүүхдийн асрамжийн төвдөө 2-18 насны 51 хүүхдийг халамжлан хүмүүжүүлж, тэднийг суралцах, амьдрах аятай таатай нөхцөл боломжоор ханган ажиллаж байна. Хүүхдүүд хичээлийн жилийн турш эрдэм номдоо шамдан, зуны улиралд хөдөлмөр зуслангийн үйл ажиллагаандаа оролцон, амьдрах арга ухаанд суралцдаг онцлогтой. 2019 оны хөрөнгө оруулалтаар “Энэрэл”-ийн хүүхдүүдэд зориулсан спорт заал, бага эмнэлэг ашиглалтад оржээ.

     Уул уурхайн салбарын боловсон хүчнийг 45 дахь жилдээ бэлтгэж байгаа Технологийн сургуулийн шилдгүүд Эрдэнэт үйлдвэрт ажиллах эрхийн батламжаа гарддаг бол олон арван төгсөгчид Монгол орныхоо өнцөг булан бүрт мэргэжлийн ур чадвараа дайчлан ажиллаж байна. Бакалавр, магистр, нэг жилийн мэргэжлийн анхан шат, гурван сарын түр сургалт болон ахлах сургуулийн сурагчдад зориулсан төрөлжсөн хөтөлбөрөөр хичээллэдэг тус сургуульд 2019-2020 оны хичээлийн жилд 7 хөтөлбөрөөр 600 гаруй хүүхэд суралцана. Эрдэнэт үйлдвэр энэ онд оюутан сурагчдынхаа суралцах орчныг тохижуулан, орчин үеийн номын сан байгуулах ажилд томоохон хөрөнгө оруулалт хийгээд байна.

     Бага насны хүүхдийн хэлний түвшин, чадварыг ахиулах, унаган орос хэлтэй иргэдийг бий болгох, Эрдэнэт үйлдвэрт ажиллаж байгаа ОХУ-ын иргэдийн хүүхдүүдийг эх хэлээ танин мэдэхэд туслах зорилгоор орос сургууль, цэцэрлэгийг ажиллуулж байна. Жилдээ 450 орчим хүүхэд хүлээн авдаг орос сургуулийн хөдөлмөрийн ангийг юниматын төхөөрөмжөөр тохижуулж, 230 хүүхдэд боловсрол олгож байгаа орос цэцэрлэгтээ сэтгэхүй хөгжүүлэх лего тоглоомоор хөрөнгө оруулалт хийжээ.

     Эдгээрээс гадна эх орондоо инженерийн боловсролыг хөгжүүлэх зорилгоор Орхон аймгийн Ерөнхий боловсролын 8 сургуульд аюулгүйн ажиллагааг хангасан, олон үйлдэлт, бага оврын технологийн сургалтын тоног төхөөрөмж бүхий ЮНИМАТ иж бүрэн танхимыг тохижуулан, 16 сургуульд робот автоматжуулалтын иж бүрдэл бэлэглэж, 38 цэцэрлэгийн 9000 орчим хүүхэд багачуудыг бүтээлч сэтгэхүй хөгжүүлэх тоглоомоор хангаад байна. Австри улсын шилдэг инженерүүдийн зохион бүтээсэн ЮНИМАТ төхөөрөмж нь хүүхэд бүрийг шинийг санаачлагч, бүтээлч сэтгэлгээтэй, бодит чадвартай иргэн болгох төлөвшүүлэх юм.

    Багш, ажилчдын цалин хөлс, барилга байгууламжийн тохижилт, засвар үйлчилгээ, үйл ажиллагааны зардал, сургалт семинар, хэрэглэгдэхүүн, гадаадад мэргэжил дээшлүүлэх томилолт гээд хүүхэд багачуудын өмнө хүлээх Эрдэнэт үйлдвэрийн хариуцлага нэн их. Нийгмийн хариуцлага гэдэг ойлголтыг үгээр бус үйлдлээр, оюуны хөгжилд хийсэн хөрөнгө оруулалтаар харуулж байгаа Эрдэнэт үйлдвэр Монголын уул уурхайн салбарт үлгэрлэн, шинэлэг ажил бүхнээрээ түүчээлэн байна.

И.Чинтогтох

 

     Эрдэнэт үйлдвэрийн Захиргаа, Үйлдвэрчний эвлэлийн холбооны хооронд байгуулсан хамтын гэрээний 2.4 дэх заалтын дагуу, үйлдвэрт тасралтгүй 20 ба түүнээс дээш жил ажиллаж байгаад өндөр насны тэтгэвэр тогтоолгох эрх нь үүссэн ажилтны хүсэлтийг үндэслэн мэргэжлийг нь залгамжлуулах зорилгоор төрсөн нэг хүүхдийг мэргэжил, эрүүл мэндээр тэнцсэн тохиолдолд хөдөлмөрийн гэрээ байгуулж ажиллуулдаг. Энэ нь нэг талаасаа удам дагасан уурхайчдыг төрүүлэх сайн талтай ч ажил эрхлэгчдийн зарим нь ажилдаа сонирхолгүй, хайнга ханддаг, дадлага туршлагагүй зэрэг асуудлууд тулгардаг.

     Уг заалтын дагуу ажилд шинээр орсон ажилтнуудыг шаардлагатай бол дахин дадлагажуулах, мэдлэг чадвар, хандлага, ёс суртахууныг сайжруулах тал дээр сурган хөгжүүлэх үйл ажиллагааг үе шаттай зохион байгуулж байна. Тодруулбал бүтцийн нэгжийн удирдлагаас “хангалтгүй” үнэлгээ авсан 13 цехийн 173  ажилтныг “Хувь хүний хөгжил-Харилцаа хандлага” сургалтад хамруулжээ. Уг сургалтын зардал болох гучин зургаан сая төгрөгийг Үйлдвэрчний эвлэлийн холбооноос гаргажээ.

 

“Эрдэнэт үйлдвэр” ТӨҮГ Улсын онцгой объект болохын хувьд хэн дуртай нь орж, гарах боломжгүй. Тиймдээ ч үйлдвэрийн бүсэд нэвтэрч байгаа хүн бүр зөвшөөрөл авч, техник хэрэгсэлд үзлэг шалгалт хийдэг тогтсон дэг журамтай. Энэ удаад Хуулийн хэлтсийн хуульч Г.Лхагважаваас ажлын цахим үнэмлэхийн зохистой хэрэглээний талаар тодрууллаа.

-Эрдэнэт үйлдвэрийн ажилчид ажлын цахим үнэмлэхээ хэрэглэж хэвших тал дээр хэр хангалттай байна вэ?

     -Цахим үнэмлэхийн төхөөрөмжийг жил гаруйн өмнөөс үйлдвэрийн бүс, объектод хүчин төгөлдөр ашиглаж эхэлсэн. Энэ нь 2018 онд Эрдэнэт үйлдвэрийн Ерөнхий захирлын баталсан “Цахим үнэмлэх олгох, ашиглах журам”, “Үйлдвэрийн бүсэд хүн тээврийн хэрэгсэл нэвтрүүлэх журам”-аар зохицуулагдаж байна.   

-Үнэмлэх ашиглахтай холбоотой зөрчил, дутагдал гарч байна уу?

     -Үйлдвэрийн газрын ажилчид өөрийн цахим үнэмлэхийг бусдад шилжүүлэх, үнэмлэхээрээ өөр хүн нэвтрүүлэх зэрэг хэд хэдэн зөрчил гарсан. Эдгээр нь Хөдөлмөрийн дотоод журам болон дээр дурдсан хоёр журмыг зөрчсөн үйлдэл болж байгаа юм. Одоогоор зөрчил гаргасан 10 хүнд сануулах, сахилгын шийтгэл аваад байна. Энэ төрлийн зөрчил нэмэгдэж болзошгүй гэдэг үүднээс урьдчилан сэргийлэх, түүнийг таслан зогсоох ажлуудыг Хуулийн хэлтсээс зохион байгуулж, ажилчдын хуулийн мэдлэгийг дээшлүүлэх шаардлагатай гэж үзсэн.

-Аль төрлийн зөрчлийг илүүтэй гаргаж  байна вэ?

     -Ажлын үнэмлэхийг бусдад дамжуулснаар өөр хүн нэвтрэх, үнэмлэхээ мартаж ирээд бусдын үнэмлэхээр давхардаж орох зөрчил түгээмэл гарсан. Одоогоор Захиргааны 1, 2 дугаар байр, авто шалган нэвтрүүлэх 1, 2 дугаар пост дээр Гэрээт цагдаагийн алба хаагчид болон Аж ахуй, үйлчилгээний цехийн ээлжийн ажилчид хяналт тавьж байна. Компьютерээр хэн орж, гарч байгааг хянах боломжтой байдаг тул зөрчил нь илүүтэй мэдэгдээд байгаа юм. Өөрийн үнэмлэхэд эзэн болж, үйлдвэрийн мөрдөх журмуудыг дагахгүй байснаар сахилгын шийтгэл авах нь тухайн хүнд ихээхэн хор хохиролтой.

-Тухайн ажилчинд ямар хохирол гардаг талаар илүү дэлгэрэнгүй тайлбарлахгүй юу? Ажилчид энэ талын мэдээллийг авах нь зөв байх?

     -Сахилгын шийтгэл нь нэг жилийн хугацаанд үргэлжилж, шагнал урамшуулал авах, албан тушаал ахих боломж нь хязгаарлагддаг. Алсдаа гарах сөрөг үр дагавар, нөлөөг нь бодолцож, ажилдаа орох, гарах үедээ өөрийн үнэмлэхийг уншуулж байх нь чухлыг ойлгож аваасай.

-Зөрчил нь илэрсэн 10 хүний тухайд ямар шийтгэл авсан бэ?

     -Одоогоор сануулах сахилгын шийтгэл авсан. Үйлдлээ давтан гаргавал цалин бууруулах, цаашлаад ажлаас халах хүртэл арга хэмжээ авна. Хууль журмыг мөрдөх гэж гаргадгаас биш зөрчих гэж гаргадаггүй. Үйлдвэрийн газрын үнэмлэх нь тухайн хүнийг “Энэ байгууллагад ажилладаг”-ийг гэрчлэх үндсэн баримт бичиг учраас үйлдэлдээ анхаарч, бусдад шилжүүлэхээс өмнө үр дагаврыг нь санаж байх нь чухал.   

-Нэг үнэмлэхээр хоёр хүн нэвтэрсэн тохиолдолд хэнд нь хариуцлага тооцох вэ?

     -Үнэмлэхийг өгсөн хүнд нь бусдад ашиглуулсан, ашигласан хүнд нь өөрийн эд зүйлийг ашиглаагүй гэдэг үндэслэлээр хэн хэнд нь хариуцлага тооцно.

-Үнэмлэхээ барьцаанд тавьсан бол яах вэ?

     -Холбогдох журмуудаар хориглосон заалт бий. Цахим үнэмлэх ашиглах, хяналт тавих тухай журмын 3.6-д “Үнэмлэхийг бусдад өгч ашиглуулах, шилжүүлэх, барьцаанд өгөхийг хориглоно” гэж заасан. Хэрэв барьцаанд өгсөн үйлдэл нь нотлогдвол мөн сахилгын шийтгэл онооно.

-Журмыг шинэчилснээр илүү хатуу чанга болгож байгаа гэж ойлгож болох уу?

     -Үйлдвэрийн газрын ажилчдыг чангалах бус чанаржуулах, зөрчлөөс урьдчилан сэргийлж, гаргуулахгүй байх тал дээр журмыг шинэчлэх ажлыг зохион байгуулж байна. Ойрын хугацаанд шинэчлэгдсэн журмыг дуусгаж, танилцуулга мэдээллийг цех, нэгжийн удирдлагуудтай хамтран хэрэгжүүлнэ.

И.Чинтогтох

Фото: Ш.Лхамсүрэн

Эрдэнэт үйлдвэрийн бүтцийн нэгжүүд намар болон өвөлжилтийн бэлтгэл ханган ажиллаж байна.

     ДЦС онцгой объект тул өвөлжилтийн бэлтгэлд онцгой анхаарах шаардлагатайг станцын удирдлага онцоллоо. Дүн өвлийн хүйтний үед ДЦС гал алдах эрсдэлээс урьдчилан сэргийлэх үүднээс өвлийн бэлтгэл ажлыг өндөр түвшинд хангаж ажиллах ёстой  байдаг. Энэ жил станцынхан өвөлжилтийн бэлтгэл ажлын хүрээнд дөрвөн агуулга бүхий 34 ажил төлөвлөн ажиллаж байгаа бөгөөд өнөөдрийн байдлаар төлөвлөгөөний гүйцэтгэл 70%-тай  байна. 

     ДЦС-ын хамт олон Баяжуулах үйлдвэрийн болон өөрийн төлөвлөгөөт “Их зогсолт”-ын үеэр намар, өвлийн бэлтгэл ажлын төлөвлөгөөнд тусгагдсан хэд хэдэн томоохон ажлыг амжилттай гүйцэтгэжээ. Үлдэж буй ажлаа ирэх 10 дугаар сарын нэгний дотор дуусгахаар төлөвлөн ажиллаж байна. Тухайлбал, 3 дугаар зуухны иж бүрэн их засвар, 4 дүгээр зуухны агаар халаагчуудыг иж бүрэн солих ажлуудыг тендерээр шалгарсан гаднын байгууллага батлагдсан графикийн дагуу гэрээгээр гүйцэтгэж байгаа юм. Эдгээр ажлууд бүрэн дуусаж ашиглалтад хүлээн авсны дараа намар, өвлийн бэлтгэл ажлын төлөвлөгөө бүрэн биелнэ. Ингэснээр өвлийг өнтэй давах гол баталгаа хангагдана гэж станцын Ерөнхий инженер ярилаа.

Мөн өвлийн бэлтгэлийн хамгийн чухал ажлуудын нэг нь түлш, мазут нөөцлөх ажил юм. Энэ ажил төлөвлөгөөний дагуу хэвийн үргэлжилж, одоогийн байдлаар станц 47 мянган тонн нүүрсний нөөцтэй ажиллаж байгааг тэрээр хэлэв.

     Түлш бэлтгэх ажлын хүрээнд станцынхан галт тэргээр ирж буусан түлшийг үйлдвэрлэлийн технологид дамжуулах зориулалт бүхий хамуурын төхөөрөмжийн гүйцэтгэх механизм, түүний цахилгаан удирдлагыг иж бүрэн шинэчилжээ. Уг шинэчлэл нь хөрөнгө оруулалтын ажлын хүрээнд хийгдэж, Герман улсын “Sew eurodrive” компанийн мотор редукторыг худалдан авч, угсарч суурилуулан ашиглалтад амжилттай оруулсан байна. Ингэснээр хамуурын тоног төхөөрөмжийн технологийн тасралтгүй, найдвартай ажиллагаа дээшилж, урьд гарч байсан гэмтэл, осол саатлууд арилах боломжтой болжээ. Мөн  хамуурын төхөөрөмжийн өөрийн хэрэглээний цахилгаан эрчим хүчний зарцуулалт 30% орчим буурч байгаа нь ДЦС-ын дотоод хэрэгцээний цахилгаан эрчим хүчний өөрийн өртгийг багасган,  улмаар эдийн засгийн хэмнэлтэд эерэг нөлөө үзүүлэх юм.   

     Уг ажлыг ДЦС-ын Түлш дамжуулах хэсгийн болон цахилгаан техникийн хэсгийн инженер техникийн ажилтнууд чанарын өндөр түвшинд хийж гүйцэтгэжээ.

М.Балжинням

     Эрдэнэт үйлдвэрийн ДЦС-ын ажилтнууд станцынхаа дотоод хэрэгцээний цахилгаан хангамжийн схемийг шилжүүлэн холбож ашиглалтад оруулах ажлыг ХАБЭА-ийн болон технологийн зөрчил, аваар сааталгүй амжилттай гүйцэтгэсэн байна. Уг ажил тус станцын  2019 оны  өртөг зардал бууруулах ажлын төлөвлөгөөнд тусгагдсан бөгөөд тоног төхөөрөмжийг худалдан авч зураг төслийн дагуу угсран суурилуулах, тохируулах ажлыг энэ оны 4 дүгээр сараас эхэлжээ. Тэгвэл, эцсийн шилжүүлэн холбож, ашиглалтад оруулах ажлыг станцын цахилгаан техникийн хэсэг, зуух, турбины хэсгийн шуурхай үйлчилгээ-засварын бригад хамт олон, мөн  Цахилгааны цех, Засвар угсралтын цехийн шуурхай үйлчилгээ-засварын бригадын нийт 50 гаруй хүний бүрэлдэхүүнтэй баг өнгөрсөн 8 сарын 30-наас 31-нд шилжих шөнө 12 цагийн турш гүйцэтгэж бүрэн дуусгасан байна.

     Цахилгаан хангамжийн схемийг шилжүүлснээр ДЦС-ын үйлдвэрлэлийн технологийн тогтвортой ажиллагаа, осол авааргүй найдвартай ажиллах горим ажиллагаанд эерэг нөлөө үзүүлэх бөгөөд мөн цахилгаан эрчим хүчний өөрийн өртөг, зардал буурах, үүнтэй уялдан станцын  техник, эдийн засгийн  үзүүлэлтүүд дээшлэх ач холбогдолтойг албаны эх сурвалж онцоллоо. Тухайлбал, хуучин схемээр станцын дотоод хэрэгцээний цахилгаан эрчим хүчний хэрэглээг Төвийн Эрчим хүчний нэгдсэн системээс 35 киловольтын /кВ/ агаарын шугамаар цагт 1 кВт/цаг цахилгаан эрчим хүчийг ойролцоогоор 214 төгрөгөөр худалдан авдаг байсныг өөрийн 12 мегаваттын /МВт/ турбин-генераторуудаас гарч байгаа 1кВт/ц цахилгаан эрчим хүчний өөрийн өртөг шингэсэн үнээр буюу ойролцоогоор 125 төгрөгөөр дотоод хэрэгцээгээ хангах нөхцөл бүрдэж байгаа нь ДЦС төдийгүй Эрдэнэт үйлдвэрт өгөх үр ашиг, өгөөж нэмэгдэх боломжтой болжээ.  

     Уг ажлыг гүйцэтгэх явцад станцын шуурхай үйлчилгээ-засварын ажилтнууд  хэд хэдэн хариуцлагатай сэлгэн залгалтуудыг батлагдсан хөтөлбөрийн дагуу гүйцэтгэсэн байна. Сэлгэн залгалт болон холболтын ажилд  мэргэжлийн өндөр ур чадвар гарган, амжилттай хамтран ажилласан ДЦС-ын Цахилгаан техникийн хэсгийн  шуурхай ажиллагаа-засварын ИТА, ажилтнууд  болон Цахилгааны цехийн релей хамгаалалтын хэсэг, Шугам сүлжээ дэд станцын хэсэг, Засвар угсралтын цехийн цахилгааны угсралтын бригадын ИТА, ажилтнуудад талархаж буйгаа ДЦС-ын Ерөнхий инженер Д.Дарханбаяр илэрхийллээ.

М.Балжинням

Мэдээний төрөл

Календарь

« 9-р сар 2019 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Зургийн цомог