• Орон нутгаас 31,9 тэрбум төгрөгийн худалдан авалт хийжээ

        Эрдэнэт үйлдвэр ХХК нь сүүлийн дөрвөн жилийн хугацаанд Орхон аймгийн үйлдвэрлэгч компаниудтай 31,9 тэрбум төгрөгийн худалдан авалт хийжээ. Баяжмалын шуудай, ган бөөрөнцөг, ажлын хувцас, түүхий резин, лед гэрэл, электродын үйлдвэрүүдийн бүтээгдэхүүн дийлэнх хувийг эзэлж байна. 2016 онд 5,1 тэрбум, 2017 онд 7,7 тэрбум, 2018 онд 12 тэрбум төгрөгийн нэмүү өртөг шингэсэн бүтээгдэхүүнийг орон нутгийн үйлдвэрлэгчдээс худалдан авчээ. Орхон аймгийн аж ахуйн нэгжүүдтэй 2018 онд 42,5 тэрбум төгрөгийн 244 гэрээ байгуулсан нь өмнөх онтой харьцуулахад 2,2 дахин нэмэгдсэн байна.   У.Цэрэнбат Фото: Б.Баттөгс Дэлгэрэнгүй...
  • Геологийн нөөцийг 60 гаруй жил ашиглана

         Эрдэнэт үйлдвэр ХХК нь анх Монгол, Чехословакийн геологчдын хайгуулын ажлын үр дүнгээс эхлэн өнөөг хүртэл уурхайн ашиглалтын насжилтыг нэмэгдүүлэхээр геологи хайгуулын ажлыг дэлхийн жишигт нийцүүлэн өнөөг  хүртэл гүйцэтгэж байна. Ордын нөөц өсгөх хайгуул, судалгааны ажлыг олон жил үе шаттайгаар хэрэгжүүлж ирсэн. 2017, 2018 онд геологи хайгуулын ажлын үр дүнг нэмэгдүүлснээр хүдрийн баялгийг өсгөж,  ашиглалтын нөөцийг 40 жил, геологийн нөөцийг  60 гаруй жил ашиглах боломжтой боллоо. У.Цэрэн Фото: Б.Баттөгс Дэлгэрэнгүй...
  • Улсын төсвийн орлого нэмэгджээ

        Эрдэнэтийн уурхайчид улсын төсвийн тал хувийг бүрдүүлж, эх орны эдийн засгийн хүнд үед улсаа нуруундаа үүрч явсан түүхтэй. Өнгөрсөн 40 жилийн хугацаанд 854,8 сая тонн хүдэр боловсруулжээ. Сүүлийн гурван жилийн тайлан мэдээнээс харахад улсын болон орон нутгийн төсөвт уурхайчдын төлсөн татварын дүн өссөн байна. Тухайлбал 2016 онд 183,7 тэрбум, 2017 онд 578,6 тэрбум, 2018 онд 654,8 тэрбум төгрөгийн орлого төсөвт төвлөрүүлжээ. Харин үйлдвэрлэлийн түүхэнд зэсийн металл авалт энэ онуудад хамгийн өндөр хувьд хүрсэн байна. У.Цэрэнбат Фото: Б.Баттөгс Дэлгэрэнгүй...
  • Нийгмийн хариуцлагын зардлыг нэмэгдүүлэв

         Эрдэнэт үйлдвэр ХХК нь уул уурхайн хүнд үйлдвэрийн хувьд ажилтнууддаа 24 нэр төрлийн хөнгөлөлт, дэмжлэг, буцалтгүй тусламж үзүүлж, нийгмийн хамгааллын бодлогыг хэрэгжүүлэн ажиллаж байна. Ажилчдын цалинг 2017 онд 10%-аар, ажлын үр дүнгийн урамшууллыг 20 %-аар, 2018 онд цалинг дахин 15% хүртэл нэмэгдүүллээ. Үүний хүрээнд сүүлийн гурван жилд 129,2 тэрбум төгрөг зарцуулжээ. Нийгмийн хариуцлагын хүрээнд компани 2017 онд 60,5 тэрбум төгрөг зарцуулсан бол 2018 онд 24,4 тэрбумаар нэмэгдүүлж 84,9 тэрбум төгрөгт  хүргэсэн байна. У.Цэрэнбат Фото: Б.Баттөгс Дэлгэрэнгүй...
  • Хуульчид 32,8 тэрбум төгрөгийн ашигтай шийдвэр гаргуулжээ

         Эрдэнэт үйлдвэрийн Хууль, эрх зүйн газрын хуульчид өнгөрсөн онд олон улсын арбитрын гурав, дотоодын арбитрын нэг, иргэний 54, захиргааны дөрөв, эрүүгийн 16, зөрчлийн хоёр гээд нийт 80 хэрэгт компанийн эрх ашгийг төлөөлөн ажиллажээ. Тэд иргэний 54 хэрэгт ажилласнаас 38 хэргийг шүүхээр эцэслэн шийдвэрлүүлж, компанид 30,3 тэрбум төгрөгийн ашигтай шийдвэр гаргуулсан байна. Мөн эрүүгийн 16, зөрчлийн 2 хэрэгт  ажилласнаас 12 хэрэг эцэслэн шийдвэрлэгдэж, 4,1 сая төгрөгийн хохирлыг барагдууллаа. Түүнээс гадна захиргааны дөрвөн хэргийн хоёр нь шүүхээр эцэслэн шийдвэрлэгдэж, нийт 2,5 тэрбум төгрөгийг компанид ашигтайгаар шийдвэрлүүлсэн амжилттай ажиллав. Тус газар 2018 онд 16 компани, дөрвөн иргэнээс нийт таван сая ам.доллар, 900 орчим сая  төгрөгийн авлага барагдуулсан байна.      Харуул хамгаалалтыг сайжруулах, гэмт хэргээс урьдчилан сэргийлэх чиглэлээр “Үйлдвэрийн бүс, объектод хүн, тээврийн хэрэгсэл нэвтрүүлэх журам”-ыг шинэчлэн боловсруулан батлуулж, компанийн бүх ажилтнуудад цахим үнэмлэх олгох ажлыг ХМТАЦ-тай хамтран зохион байгуулсан. Журмыг хэрэгжүүлэх зорилгоор “Зочин” үнэмлэхийг хэвлүүлж, Үйлчилгээ, аж ахуйн алба, Гэрээт цагдаагийн хэлтэст хүлээлгэн өгсөн ба гэрээт байгууллагуудын ажилтнуудыг цахим үнэмлэхээр хангах ажлыг зохион байгуулав. Мөн “Компанийн аюулгүй байдал” сарын аяныг зохион байгуулж, Гэрээт цагдаагийн хэлтэс, Дотоодын цэргийн 816 дугаар салбарын харуул, хамгаалалтын бүх  цэгүүдээр хамгаалалтыг сайжруулах олон ажил санаачлан хэрэгжүүлсэн нь үр дүнгээ өгч байна. Энэ онд хэрэгжүүлэх үйлдвэрийн ажилчдын автобусны шалган нэвтрүүлэх систем, харуул хамгаалалтын нэгдсэн систем, камерын хяналтын нэгдсэн төв байгуулах ажлын бэлтгэл хангагдаж байна. Дэлгэрэнгүй...
  • Эрдэнэт сувилалд оношилгооны шинэ төхөөрөмжүүд ирлээ

         Эрдэнэт сувилал цогцолборын Дүрс оношилгооны кабинетад  Япон улсад үйлдвэрлэсэн Shimadtsu-Flexavision FD маркийн дижитал рентген аппарат, FUJINON  маркийн улаан хоолой, ходоод, 12 хуруу гэдэс, бүдүүн, шулуун гэдэсний дурангийн аппарат, UUSS-H60  загварын хэт авиан оношилгооны  ЭХО аппарат хүлээн авлаа.      Дижитал рентген аппаратаар толгой, хүзүү, сээр бүсэлхий нугалмууд,  уушиг, зүрх, үе мөчний рентген зураг авах юм. Энэ аппаратын тусламжтайгаар  рентгенээр харах,  ходоод, улаан хоолой хэвлийн хөндийн эрхтэнүүдийн  тодосгогч бодистой рентген  шинжилгээ хийх боломжтой боллоо.        Эхо аппаратаар хэвлийн хөндий болон бага аарцгийн хөндийн  эрхтэнүүдийн хэт авиан шинжилгээ, зүрх судас, эмэгтэйчүүдийн оношилгоо хийхээс гадна  шинээр бамбай булчирхай, хөх, үе мөч, булчин шөрмөсийг   үзэж оношилно.      Мөн Лабораторит  цагт 200 шинжилгээ хийх хүчин чадалтай Герман улсын HumaStar-200 маркийн Биохимийн бүрэн автомат анализаторыг суурилуулсан байна.      Ингэснээр  шинжилгээний нэр төрөл олширч, чанар сайжрах төдийгүй шинжилгээний хариу автомат-аар гарах юм. Нүдний кабинетад KOWA VX10 маркийн нүдний дурангийн аппарат шинээр суурилагдсан байна. Уг аппарат нь нүдний уг дурандан оношилж, зургийг нь авдгаараа өмнөхөөсөө давуу талтай юм. Шинэ тоног төхөөрөмжүүдээс ЭХО аппарат ажиллаж эхэлсэн бөгөөд  бусдыг нь ажиллуулахад бэлтгэж, эмч мэргэжилтнүүдийг сурган дадлагажуулж байна. Ийнхүү Эрдэнэт сувилал  цогцолборт орчин үеийн дэвшилтэт технологи бүхий тоног төхөөрөмжүүд  ашигласнаар  ажиллагчдын эрүүл мэндийн оношилгоонд дэвшил гарна гэж эмч мэргэжилтнүүд үзэж байна. Я.ЭНХТУЯА Дэлгэрэнгүй...
  • Ус тунгалагшихад уужирдаг сэтгэл

         Энэ үгийг Эрчим хүчний цехийн Цэвэрлэх байгууламжийн хэсгийн дарга Авирмэдийн Баярсайхан нэгэнтээ хэлсэн. Жинхэнэ хөдөлмөрийн хүн л үүнийг сайн мэднэ.      Дөрвөн арваны тэртээ Увс аймгийн Завхан сумын хүү тухайн үед хэрийн хүн сонирхдоггүй усны мэргэжил эзэмшихээр Унгар улсыг зорьсон нь учиртай. Увс аймгийн Усны аж ахуй удирдах газрын дарга Авирмэдийн гурав дахь хүү ирээдүйд усны мэргэжил монголд эрэлттэй болохыг мэдэрч сонгох нь зүйн хэрэг. А.Баярсайхан гадаад багш нарын хатуу шаардлага, шүүлтийг дөмөгхөн давсаар инженерийн боловсролоор тэргүүлэгч улсын Политехникийн дээд сургуулийг усан хангамжийн ариутгах татуургын инженер мэргэжлээр төгссөн. Хорь гаруйхан настай, өндөр, цэмцгэр залуу тухайн үеийн Геологи, уул уурхайн үйлдвэрийн яамны томилолтоор Эрдэнэтэд анх иржээ. Тэрээр үйлдвэрийн харьяа Усан хангамж ариутгах татуургын цехийн шугамын засварчнаас ажил хөдөлмөрийн гараагаа эхэлсэн. Энэ үеэс л багаж хэрэгсэлтэй “нөхөрлөж”, гараасаа салгахгүй хайрлан хямгадаж ашигладаг багаж байнга гялалзаж, их үйлийг хамт бүтээдэг болохыг мэдэрчээ. Уйгагүй хөдөлмөр, хичээл зүтгэлийнхээ үр шимээр тэр удалгүй шугамын мастер, инженер болж,  1995 оноос Эрдэнэт үйлдвэрийн Эрчим хүчний цехийн Цэвэрлэх байгууламжийн хэсгийн даргаар даруй 23 дахь жилдээ ажиллаж байна. Энэ хугацаанд Хүрдэн болон Элсэн шүүрний, Гүн цэвэрлэгээний байгууламжийг  хүлээн авч, инженер техникийн ажилтнуудынхаа хамтаар тохиргоо үйлчилгээг  гардан хийж ажилд оруулснаар цэвэрлэгээний чанарыг 98 хувьд хүргэж чадсан юм. Монгол улсын хэмжээнд цор ганц бохир усны гүн цэвэрлэгээний байгууламж Эрдэнэт үйлдвэрт бий. Өнөөдөр энэ байгууламжаас байгаль экологид хор аюулгүй цэвэр ус гарч буй нь түүний удирдсан хамт олны хөдөлмөрийн үр шим. А.Баярсайхан цэвэрлэх байгууламжийнхаа өргөтгөл, тоног төхөөрөмжүүдийн шинэчлэлийн ажлыг санаачилж, тасралтгүй сайжруулалтыг биечлэн манлайлдаг удирдагч.      Хэдийгээр Эрдэнэт үйлдвэрийн Цэвэрлэх байгууламж боловч Зууны манлай үйлдвэр дагаж байгуулагдсан Эрдэнэт хотын бүх албан байгууллага, аж ахуйн нэгж, орон сууцны ахуйн бохир усыг эднийх цуглуулж, дөрвөн үе шаттай дамжлагаар стандартын хэмжээнд хүртэл нарийн цэвэрлэдэг онцлогтой. Эндээс гарсан усаар Хаягдлын аж ахуйн далангийн усны тэнцлийг тогтворжуулдаг. Хүний өөрийн бохир усыг цэвэршүүлдэг мөн ч буянтай улс гэж бодогдох. Манай Цэвэрлэх байгууламж хоногт 24000м3 бохир ус хүлээн авч цэвэрлэх хүчин чадалтай. Гэтэл 1990-ээд оны сүүлээр төслийн хүчин чадлаасаа 1,5 дахин их буюу 30 000 гаруй м3 ус хүлээн авч хэт ачаалалтай, аваарын горимд ажилладаг байжээ. Тухайн үеийн нөхцөл байдал, хүндрэл бэрхшээлийг хэсгийн даргынхаа мэргэжлийн өндөр ур чадвар, хамт олныг удирдан зохион байгуулах авьяас, анхаарал болгоомж, арга ажиллагаагаар давж гарсан гэж хамт олон нь бахархан ярих дуртай. Үндсэн тоноглол, ил задгай байгууламжуудыг зогсоож засвар үйлчилгээ хийх боломжгүй тэр үед технологийн горимыг секунт алдахгүй баримтлах чухал. Энэ бүх хүндрэл бэрхшээлийг А.Баярсайхан өөрийн хэсгийн хамт олонтойгоо зоригтой туулсныг компанийн удирдлагууд одоо ч үнэлдэг. Хэт ачааллын үед “Цаашид Эрдэнэт хот өргөжин тэлнэ, үйлдвэр, аж ахуйн газрууд улам олшрох учраас Цэвэрлэх байгууламжийг өргөтгөх зайлшгүй шаардлагатай...”-г ойлгуулж ярьдаг хуруу дарам цөөн хүний нэг нь тэр байлаа. Ийнхүү давхар цэвэрлэгээний дамжлага болох Гүн цэвэрлэгээний байгууламжийг урдаас төлөвлөсөн. Дараа нь Францын хөнгөлөлттэй зээлийн хөрөнгө оруулалтаар томоохон өргөтгөл эхлүүлсэн нь одоо дуусах шатандаа явна. Харин хэт ачааллын аваарын горим 2004 оноос дуусгавар болж, хэвийн ажиллагаанд шилжсэн юм. Учир нь орон сууц, албан байгууллагуудыг тоолууржуулах, усны алдагдлыг багасгах янз бүрийн арга хэмжээ авч хэрэгжүүлсний үр дүнд ачаалал буурсан. Одоо эднийх хоногт 18000 м3 бохир ус хүлээн авч цэвэрлэж байна. Тэрээр “Бохир усыг цэвэрлэх асуудал манай улсын хэмжээнд төдийгүй дэлхий нийтийн анхаарлыг татах болсон. Хөгжилтэй оронд бол хөгжлийн дээд түвшинд хүрсэн. Ундны усанд хэрэглэх хэмжээнд хүртэл цэвэрлэж байна. Манайх одоохондоо хөгжлийнхөө шатанд л явна. Харин ч том үйлдвэрийн харьяанд явсаны хүчинд үйл ажиллагаа нь жигд, техник технологийн шинэчлэл цаг хугацаандаа хийгддэг, мэргэжилтэй боловсон хүчингүүдээр хангагддаг, үүнийхээ хүчинд улсын хэмжээнд хэвийн яваа ганц цэвэрлэх байгууламж бол манайх...” гэж ярьсан. Үнэндээ хэвийн жигд ажиллагааг хангахад хамгийн их нөлөөлсөн, хүчин чармайлт, сэтгэл гаргаж яваа хүн нь өөрөө юм. Үргэлж найдвартай ажиллагаа, хурдтай хэмнэл нэхэж, шинийг эрэлхийлдэг хэсгийн дарга хамгийн сүүлд Сэлэнгэ амралтын баазын цэвэрлэх байгууламжийг Герман улсын “WBS” технологитой бүрэн автомат байгууламжаар  бүтэн шинэчилсэн. Шинэ техник, тоног төхөөрөмжийг суурилуулан ажиллуулж, үйл ажиллагааг нь жигдрүүлэх бол түүний мэргэшсэн ажил. Мөн саяхан Цэвэрлэх байгууламжийн лабораторийн 40 жил ашигласан тоноглол, хэрэгслүүдийг шинэчилснээр бохир усны цэвэрлэгээний шинжилгээг сүүлийн үеийн дэвшилтэт арга зүй, технологиор хийх болсноор үр дүн, чанар дээшилсэн. Ингээд зогсохгүй, лабораторидоо Улсын итгэмжлэл авах санаачилга гарган хөөцөлдсөөр бүтээжээ. Одоо Эрдэнэт үйлдвэрийн Эрчим хүчний цехийн Цэвэрлэх байгууламжийн лабораторийн шинжилгээний дүн Монгол улсын хэмжээнд бүрэн зөвшөөрөгдсөний дээр хүн амын ундны цэвэр усанд шинжилгээ хийх, улмаар бусад үйлдвэр, аж ахуйн нэгжүүдэд шинжилгээний төлбөртэй үйлчилгээ үзүүлэх боломж бүрдсэн нь сайн хэрэг.      А.Баярсайханд Эрдэнэтчүүд талархах учиртай. Байгаль орчны тэнцвэрт байдлыг хамгаалахад амьдралынхаа туршид асар их хувь нэмэр оруулсан эрхэм. Цэвэрлэгдэн гарч буй бохир усны стандартад хатуу хяналт тогтоож, ус тунгалаг байхын төлөө 33 жилийн амьдралаа бүтэн зориулсан мэргэшсэн инженер. Одоо ч Цэвэрлэх байгууламжийнхаа лагийг үнэргүйжүүлэхэд сэтгэл, оюунаа чилээн судалгаа туршилт явуулсаар, гарц гаргалгаа хайн бэдэрсээр явна. Эндээс гарах усны дусал бүхэн тунгалаг байж, эрэл зөв чигийг олох болтугай. М.ОДГЭРЭЛ Дэлгэрэнгүй...
  • Уртын дууны шуранхай, ум тарнийн увидастай

             Уртын дуу, сонгодог урлаг, суурь шинжлэх ухааны хөгжлийн орон зай, цаг хугацаанд эрх чөлөө, ардчилал, тэгш эрх оршдог билээ.      Уртын дууны гайхамшиг нь, усны харгиа боргио, уул хавцлын цоор цуурай, исгэрээнээс улбаалан байгаль орчноо аргадах бөөгийн шашны дуудлага, туульсаар өртөөлөн өндөр их уулсын хүрээлэлд үүссэн байх магадлалтай юм. Учир нь тэр их өндөр уулс саръдгийн сансрын салхины эрч, усны хүрхрээн хүчит чимээ анир улмаар цаг уурын эрс тэс уур амьсгалтай жилийн дөрвөн улирлын өөрчлөлтөд хүний сэтгэлийн эгшиг, цахилгаан соронзон долгион болон таталцах хүчээр өдөөгдөж болох учиртай билээ.            Үсэг үсгээр эвлэж үг үүсээд л үг хоорондоо соронзлогдон, шад бадгаар тэгш хэмлэгдэж ид шид шингэсэн дууны яруу найраг төрдөг. Улмаар ширэн цартай, сүүлэн хөвч, хоёр чавхдастай сэтгэл зүрхний хос ховдлыг булгилуулсан морин хуурын амьд эгшигтэй сүлэлдсэн уртын дууны шуранхай амилаад ирэхээр үнэхээр байгаль ертөнцийн уран эгшиглэнтэй, увидастай цэнхэр нүдэн, эмзэгхэн замбуулин хорвоо гэдэг энэ юм шүү дээ гэж төсөөлөгдөн сэтгэлийн таашаал, амгаланг эдлэх. Үнэхээр ч нүдний цөцгий мэт хайрлан, холтолж хэлтлэх нь бүү хэл, хиртээж буртаглаж боломгүй ариун дагшин ертөнц билээ.      Морины гүйх хар  хурданд  уртын дуугаар жигүүрлэн нисэхэд, хүний сэтгэлийн чагтага мултарч, газрын татах хүчнээс хязгааргүй орчлонд  жингүйдэн уусан алдарч, алсран тасраад л уужим сансар огторгуйд хөвөн, алс төгсгөлгүйн хөндлөнгөөс алаг нүдэн дэлхийгээ тольдон   зорчиж амьдрах  нь Монгол хүн болж төрсний  хосгүй хишиг,  хувь заяа юм даа.      Ер нь үлгэр домогт гардаг гуурст хурдан хүлгээрээ монголчууд аль эрт сансарт зорчин нисэж, хөрст цэнхэрхэн дэлхийгээ гаднаас нь ид  шидтэй билгийн нүдээрээ тольдон харж таньчихсан хүмүүс гэлтэй.      Америкийн Калифорнийн их сургуулийн хэсэг эрдэмтэд 1995 онд   аливаа үсэг, үг авианд энергийн эрчим хүч байдаг эсэхийг судлахаар тусгай  дуу дохио авианы маш өндөр нарийн  мэдрэмжтэй багаж зохион бүтээж олон ястны хэлээр хэдэн мянга, түмэн үгийг хэлэхэд  багаж мэдрээгүй гэдэг. Харин Грекийн эртний томъёонууд хэлэхэд дөнгөж мэдрэн үл ялиг  хөдөлж эхэлжээ. Улмаар Буддын сургаалийн  “УМ” тарнийг дуудахад багажны зүү хөдөлж 36 градусыг заасан байна. Үүнээс үүдээд эрдэмтэд энэ хазайлтын өнцгийн хэмжээг эрчим хүчинд шилжүүлж тооцоход сансрын хөлгийг тойрог замд оруулахуйц асар их энерги болохыг баталсан тухай Европын нөлөө бүхий “Асеа” сэтгүүлд бичжээ. 1911 онд сэргээн тунхаглагдсан Монгол улсын төрийн далбааны төгсгөлийн гурван улаан хэлний зулайд Ум, дунд нь Аа, өлмийд нь Хум үсэг заларч  байсан нь ердийн тохиолдол биш дэвшин мандахын агуу бэлгэдэл, сүр хүч байжээ. Ээжүүд үр хүүхэд биднийгээ арцаар ариулахдаа “Умаахан, умаахан, умаахан” гэдэг уншлагын учрыг хожуу хойно л ойлгож байна.      Үүнээс үүдэн шашин номын зүрхэн болон шидэт тарни гэдэг бол ид шидийн эрчим хүчтэй болох нь нэгэнт илэрхий болсон юм. Харин уртын дууны Аяа зээ хө, Ха, Хэ цохилтуудын тэсрэлтийн их хүч бол Ум тарнийхтай дүйцэхүйц эрчимтэй байж болох үндэстэй  юм.      Энергийн эрчмээр илэрхийлэгдсэн уртын дуу, морин хуурын эгшиг, дуучны хоолойн уянга дэлхийн ямарч үндэстэнд орчуулгагүй гэрэлт сэтгэл зүрхэнд нь солонго татан гэгэлзүүлэн дэгэлзүүлдэг онцлогтой.      Уламжлалт морин хуур арьс шир, адууны сүүлээр урлагдсан болохоор  хөгжмийн амьтай зэмсэг болохоор монгол хүний зүрх сэтгэл, адууны үүрсэлт, тэмээний буйлаа шингэсэн нүүдэлчний мэдрэмжтэй байхаас аргагүй юм. Яагаад гэвэл хос чавхдасаас багцлагдан тогтдог боловч хоёр  зуу гаруй хялгаснаас бүрэлддэг гэдэг билээ.      Уртын дуу гэдэг нь үнэн хэрэгтээ гайхамшигт нарийн мэдрэмжтэй  хүмүүсийн чин зүрх сэтгэлээр орон зайд, цаг хугацаагаар ирлэгдэн бодит  амьдралын зовлон жаргалаас л төрж төгөлдөрждөг болохоор  сүнслэг бөгөөд авшигтай юм билээ.      Наран сартай сүлэлдэх үдшийн гэгэлгэн бүрийгээр, өдөртөө сульдсан агаарыг уртын дуугаар уярааж, хаяа дарсан айлуудаас, хангинуулж дөлөөд өнгөрөхөд, хадамд ирсэн шинэхэн бэр санааширч үлддэг л нүүдэлчний нэгэн бодит  амьдралын  зураг.        Дорнын монгол уртын дуу болон Өрнийн сонгодог урлагийн орон зай, цаг хугацааны ертөнцөд л эрх чөлөө, тусгаар тогтнол, жинхэнэ ардчилал оршдог болохоор хүн болгон тэмүүлдэг ч, тэр болгон нь хүрч чаддаггүй хязгааргүй ертөнц билээ. Уртын дууны шуранхай, Ум тарнийн увидас энергийн тодорхой болон тодорхой бус хэлбэрт шилжин хувьсаж, мөнхөд орших эрчмийн үлэмжийн хязгааргүй чанар бөгөөд нарны алтан цацрагтай зүйрлэхүйц ертөнцийн багцалсан лугшилт юм.    Ж.БААТАРХҮҮ Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
Хөгжлийн түүчээ
Лхагва, 28 2-р сар 2018 00:00

Ажлын үнэмлэхээ мартав!

“Эрдэнэт үйлдвэр” ХХК-ний Гэрээт цагдаагийн тасаг ажилчдын хариуцлагыг нэмэгдүүлэх, гэмт хэрэг зөрчлөөс урьдчилан сэргийлэх зорилготой аяны хүрээнд маргаашнаас эхлэн ажилчин нэг бүрийн ажлын шинэ үнэмлэхийг шалгаж, үйлдвэрлэлийн бүсэд нэвтрүүлж байхаар боллоо. Үйлдвэрлэлийн машинд зорчиж яваа ажилчин ч үнэмлэхээ биедээ явах шаардлагатай юм.

У.Цэрэнбат

Фото: Б.Баттөгс

     Хоёрдугаар сарын эхний 21 өдрийн байдлаар зэсийн үнэ 6755-7159 ам доллар тонны хооронд хэлбэлзэж,  дунджаар 7028 ам доллар тонн байгааг мэргэжилтнүүд мэдээлэв.  Хоёрдугаар сар гарсаар зэсийн үнийн хэлбэлзэлд ам долларын ханшийн өөрчлөлт голлон нөлөөлж байна.
     Сүүлийн өдрүүдэд ам долларын ханш суларсан учир зэсийн үнэ дахин 7000 ам долларыг давж өссөн талаар Metal Bulletin-ий судлаач Dalton Barker мэдээллээ. Тэрээр Хятад болон АНУ-ын эдийн засгийн мэдээлэл нааштай байсан нь ч үнэ өсөхөд нөлөөлсөн талаар мэдээлэлдээ дурьдлаа. 2017 онд дунджаар 8.206 ам доллар фунт буюу 18091 ам доллар тонн байсан молибдены оксидийн үнэ 2018 он гарсаар дунджаар 10.5 ам доллар фунт болон 23148 ам доллар тонн байна.

 

Үйлдвэрийн ажилчдын өвөл цагийн соёл хүмүүжлийн ажлын хүрээнд цех хэлтсүүд Спорт ордноос гаргасан хуваарийн дагуу “Цасны баяр” зохион байгуулж байна. Дулааны цахилгаан станцын “Цасны баяр” өнгөрөгч амралтын өдөр болов.

Тэд энэ удаа ажилтнуудын бие бялдрыг чийрэгжүүлэх, тэдний чөлөөт цагийг зөв боловсон өнгөрүүлэх, эрүүл агаарт гарч, эвсэг нөхөрсөг хамт олныг бүрдүүлэх зорилго дэвшүүлж,  цасны баяраа “Замд гарья” сэдвийн дор хийлээ. Тус өдөрлөгт  Дулааны цахилгаан станцын 100 гаруй ажилчид оролцож, олс таталт, цасны хөл бөмбөг,  амтат шорлог зэрэг спортын төрлөөр уралдан  авхаалж самбаагаа сорив.

Олс таталтын тэмцээнд Турбины хэсэг тэргүүлж, Засварын хэсэг, Цахилгааны хэсгийн хамт олон удаалсан байна.  Харин хөл бөмбөгийн төрөлд Турбины хэсгийн хамт олон дахин аваргалжээ. Ширээ засалтын тэргүүн байрыг  Засварын хэсэг эзэлсэн бол, Зуухны хэсэг удаах байр,  Түлш усны хэсэг гутгаар байранд тус тус шалгарав. Шинэ онд тус станцын захиргаа ажилчдынхаа эрүүл мэнд, бие бялдрын чийрэгжилтэд анхаарлаа хандуулж, урлаг спортын олон талт уралдааныг үе шаттай  зохион байгуулахаар төлөвлөсөн байна.

Монголын Эмэгтэйчүүдийн Холбооны гишүүн 70 гаруй салбар нэгж, байгууллагуудын дундаас Эрдэнэт үйлдвэр ХХК-ийн дэргэдэх Эмэгтэйчүүдийн холбоо 2017 оны ажил үйлсээрээ манлайлж, тэргүүн байрэзэлсэн байна.  Монголын Эмэгтэйчүүдийн Холбооны Ерөнхий зөвлөлийн хурал Улаанбаатар хотноо хуралдаж, ийнхүү тус салбар холбооны ажлыг үнэлжээ.

Өнгөрсөн онд Эрдэнэт үйлдвэрийн Эмэгтэйчүүдийн холбоо уурхайчин эмэгтэйчүүдийн аж төрөх арга ухааныг дээшлүүлэх болон бусад олон төрлийн сургалтыг зохион байгуулж, хүүхдийн асрамжийн Энэрэл төвд хэрэгжүүлсэн “Урам” хөтөлбөрийнхөө хүрээнд 1500 ном бүхий Номын сан байгуулж өгчээ.  Мөн Цэцэн бэр, Уран бүсгүйчүүд, Өглөөний клуб, Энэ хүүхнүүд үү зэрэг уламжлалт хөтөлбөр, уралдаан тэмцээнийхээ  цар хүрээг өргөжүүлж ажилласан нь  бусад салбар зөвлөлүүдээ манлайлахад чухал нөлөө үзүүлжээ. Мөн Эрдэнэт үйлдвэрийн ажилчдын зорчдог автобусанд  “Ягаан суудал” хөтөлбөрийг хэрэгжүүлж, эмэгтэй ажилчид болон хөл хүнд  бүсгүйчүүддээ суудал тавьж өгөх, жендерийн мэдрэмжтэй байдлыг сурталчлах ажлыг эхлүүлсэн нь  үйлдвэрийн 2000 гаруй эмэгтэй ажилчдад хүрч, бодит үр дүнгээ өгсөн байна.

Эмэгтэйчүүдийн холбооны үйл ажиллагаанд идэвх зүтгэлтэй оролцож, цехийн эмэгтэйчүүдийнхээ чөлөөт цагийг үр өгөөжтэй өнгөрөөхөд санаачилган гарган ажиллаж буй  Тээвэр ложистикийн алба,  Геологи хайгуулын анги, Төслийн менежментийн хэлтсийн Эмэгтэйчүүдийн зөвлөлийн дарга нарыг  Монголын эмэгтэйчүүдийн холбооны “Хүндэт тэмдэг”-ээр шагнажээ.Энэ бүх амжилт, ололт нь тус  холбооны Удирдах зөвлөлийн гишүүд, анхан шатны зөвлөлийн дарга нар, гишүүд дэмжигч болон уурхайчин эмэгтэйчүүдийн идэвх оролцоо, хамтын хөдөлмөрийн өгөөж гэж холбооны тэргүүн З.Жаргалмаа онцлов. 

Эрдэнэт үйлдвэрийн 40 жилийн ой энэ онд тохиож буйтай холбогдуулан   тус Эмэгтэйчүүдийн холбооноос “Уурхайчин эмэгтэйчүүдийн үндэсний чуулган”-ыг  ирэх 4 дүгээр сард зохион байгуулахаар төлөвлөсөн байна. Үндэсний чуулга уулзалтыг  өндөр түвшинд зохион байгуулахаар бэлтгэл ажлаа эхэлснийг холбооны тэргүүлэгчид ярилаа.

 

 

Эрдэнэт үйлдвэрийн 40 жилийн ойн хүрээнд уул уурхайн үйлдвэрлэлийн хөдөлмөрийн аюулгүй байдлыг хангахад тулгарч буй асуудлыг шийдвэрлэх, хөдөлмөрийн аюулгүй байдал, эрүүл ахуйн соёлыг түгээн дэлгэрүүлэх, сайн туршлагыг харилцан солилцох зорилготой “ХАБЭА ба Хамтын оролцоо-2018” форум ирэх гуравдугаар сарын  26,27-ны өдрүүдэд болно. Тус форумыг Оюу толгой компанитай хамтран зохион байгуулах юм.

Хамтарсан форумыг зохион байгуулах ажлын хэсгийг Эрдэнэт үйлдвэрийн Үйл ажиллагаа хариуцсан дэд захирал бөгөөд Ерөнхий инженерийн үүрэг гүйцэтгэгч Д.Эрдэнэцогт ахлах бөгөөд Дэд даргаар Хөгжлийн бодлогын газрын дарга Д.Нэмэхбаяр, нарийн бичгийн даргаар ХАБЭАБОХХ-ийн дарга Д.Цагаан-Эрдэнэ нар ажиллаж байна.  Форумд уул уурхайн салбар төдийгүй бусад салбарын аж үйлдвэрийн томоохон компани, төлөөллүүд оролцож, хөдөлмөрийн аюулгүй байдлын өнөөгийн үйл ажиллагаа,  тулгамдсан асуудлын талаар хэлэлцэх юм.

Мянга мянган илгээлтийн эзэн залуусын гараар сүндэрлэсэн Эрдэнэтийн их бүтээн байгуулалт энэ онд 40 нас хүрч буй. Энэхүү түүхт ойг угтан Эрдэнэт үйлдвэр, Монголын Хөгжмийн Зохиолчдын Холбоотой хамтран “Дуунд мөнхөрсөн Эрдэнэт” шилдэг дууны уралдааныг зохион байгуулахаар болжээ.

Эрдэнэсийн өлгий Эрдэнэт овоо уул, газар усны тухай хийгээд Монгол орны эдийн засаг, нийгмийн хөгжилд Эрдэнэтийн баялаг бүтээгчдийн оруулж буй хувь нэмэр, уурхайчдын ажил үйлсийн бахархлыг дууны уран бүтээлээр дамжуулан олон нийтэд сурталчлан түгээхэд уралдааны зорилго оршиж байна. Уралдаанд  гоцлол, хослол, гурвал, дөрвөл, цөөхүүл, найрал дууны төрлөөр нэг уран бүтээлч хэд хэдэн бүтээлээр оролцож, “Шилдэг дуу” гэсэн ганцхан номинацид өрсөлдөнө.

“Дуунд мөнхөрсөн Эрдэнэт” уралдааны дуунууд нь аль ч насны хүн дуулахуйц мэргэжлийн болон нийтийн, поп хэлбэрийн байж болох юм. Уралдаанд оролцох уран бүтээлийг ирэх дөрөвдүгээр сарын 15-ныг хүртэл бүртгэх аж.

     Эрдэнэт үйлдвэрийн дэргэд Эмэгтэйчүүдийн зөвлөл, Залуучуудын холбоо зэрэг төрийн бус байгууллагууд үйл ажиллагаа явуулдаг.  Ерөнхий захирал Х.Бадамсүрэн тус байгууллагуудын төлөөлөлтэй уулзаж, санал бодлыг нь сонсон цаашид хамтран ажиллах талаар ярилцлаа. Эрдэнэт үйлдвэрийн нийт ажиллагсдын 54 хувь нь 18-40 насны залуус байдаг бол 32 хувийг нь эмэгтэйчүүд эзэлж байна. Иймд тус үйлдвэрийн хөгжил дэвшилд тэдний оролцоо, хувь нэмэр чухал үүрэгтэй. Уулзалтын зорилгыг  төрийн бус байгууллагуудынхаа удирдах ажилтнуудаар төлөөлүүлэн тэдний ард байгаа олон арван эмэгтэйчүүд, залуучуудаа сонсож, санал хүсэлтийг нь үйл ажиллагаандаа тусган хэрэгжүүлэх боломжийг нээж байгаа гэж Ерөнхий захирал онцлов.
     Эрдэнэт үйлдвэрийн Залуучуудын холбооноос 2018-2023 он хүртэлх Залуучуудын хөгжлийг дэмжих хөтөлбөр боловсруулан хэрэгжүүлж байна. Залуучуудынхаа нийгмийн амьдралд оролцох идэвх оролцоог нэмэгдүүлэх, амьдрах ухаан, ажил мэргэжлийн ур чадварыг дээшлүүлэх, эерэг хандлага, хариуцлагатай байж, бие даах зан үйлд суралцуулах зэрэг олон боломжийг нээж өгөх уг хөтөлбөртөө дэвшүүлжээ. Харин энэхүү хөтөлбөрийг бодитой хэрэгжүүлэхэд үйлдвэрийн үйл ажиллагааны бодлогод тодорхой зорилт тусгаж өгөхийг хүслээ. Мөн ажилчин залуучуудын нийгмийн асуудлууд, тухайлбал хүүхдийн цэцэрлэгийн хүртээмж, үйлчилгээ, орон сууцны хангамж, өндөр боловсролтой, чадварлаг залуучуудаа дэмжих зэрэг олон сэдвээр санал бодлоо хэлэв. Энэ талаар  үйлдвэрийн захиргааны зүгээс бүхий л боломжит хэлбэрээр үйл ажиллагааны бодлого хөтөлбөртөө тусган хамтран шийднэ гэдгийг удирдлагууд онцоллоо.
     Үйлдвэрийн дэргэдэх Эмэгтэйчүүдийн зөвлөл нь уурхайчин эмэгтэйчүүдийн хөгжил, манлайлал, гэр бүлийн сайн сайхны төлөө, тэдний нийгмийн асуудал, сургалт, нийгмийн хариуцлага гэсэн чиглэлээр үйл ажиллагаа явуулж байна. Хүнд үйлдвэрт ажиллаж буй эмэгтэйчүүдийнхээ чөлөөт цагийг  үр өгөөжтэй өнгөрөөх зорилгоор “Одонтой ээжүүд”, Манлай гэр бүл”, “Цэцэн бэр”, Манлайллын ур чадвар зэрэг олон хөтөлбөр хэрэгжүүлж эхэлсэн нь эдүгээ тогтмолжиж, үр дүнгээ өгчээ. Энэ онд Эрдэнэт үйлдвэрийн түүхт 40 жилийн ой тохиож байгаатай холбогдуулан ирэх дөрөвдүгээр сард Уурхайчин эмэгтэйчүүдийн холбооны үндэсний чуулганыг зохион байгуулахаар төлөвлөж буйг зөвлөлийн тэргүүн З.Жаргалмаа танилцуулав. Мөн тус зөвлөлөөс зохион байгуулах олон талт үйл ажиллагааны төсөв зардал, уулзалт ажлын өрөө, ягаан суудлын хэрэгжилт, эерэг мэдээ түгээх зэрэг олон асуудлыг шийдэж, хамтран ажиллах хүсэлтээ илэрхийлэв.
     Залуучууд, эмэгтэйчүүд бол тус үйлдвэрийн ажиллах хүчний том хэсэг. Тиймээс тэдэнд  дэмжлэг, урам зориг өгөхийн тулд эдгээр төрийн бус байгууллагуудтайгаа нягт хамтран ажиллаж, нийгмийн асуудлуудыг бүрэн шийдэх судалгаа, гарц замыг олж бодлогын хүрээнд хэрэгжүүлж ажиллахаа удирдлагууд онцоллоо. Ажилчдынхаа дуу хоолой болж, тэдний эрх ашиг, хөгжил төлөвшилд ихээхэн хувь нэмэр оруулж буй Эмэгтэйчүүдийн зөвлөл, Залуучуудын холбооны удирдлага, тэргүүлэгч гишүүдэд Ерөнхий захирал Х.Бадамсүрэн талархал илэрхийлж, цаашдын ажилд нь амжилт хүссэн юм.

 

     Эрдэнэт үйлдвэр ХХК-ийн Ерөнхий захирал Х.Бадамсүрэн болон түүний удирдлагын багийхан “нөхөрсөг” хэмээх шар нохой жилийн ажлаа ахмад настнууд, эмэгтэйчүүд, залуучуудын төлөөлөлтэй хийх уулзалтаар эхэллээ. Дөчин жилийн ойтойгоо золгож буй Эрдэнэт үйлдвэрийн  тулгын чулууг тавилцсан ахмадуудаа хүлээн авч, тэдний санал бодлыг сонссон нь уг цуврал уулзалтын түрүүч байв.
     Уулзалтанд үйлдвэрийн Ахмадын хорооны Нэгдсэн зөвлөлийн  гуч гаруй  гишүүд оролцож, компанид харьяатай олон зуун ахмадынхаа дуу хоолойг удирдлагуудад хүргэлээ. Ахмадын хорооны Нэгдсэн зөвлөлд үйлдвэрийн цех нэгж бүрийг төлөөлсөн ахлагч нар нэгддэг аж.
     “Түүхт ойн өмнө ахмадуудынхаа үгийг сонсож, санал санаачилгыг нь бодлого хөтөлбөртөө тусган хэрэгжүүлнэ. Эрдэнэт үйлдвэрийн 40 жилийн ойг зохион байгуулах ажлын хэсэг байгуулагдсан.  Бид ойн хүрээнд үе үеийн ахмдуудынхаа үүх түүх, амжилт бүтээлийг бахархлын товчоон болгон үлдээхийн тулд та бүхнийгээ хүлээн авч уулзаж байна. Ирэх 5 дугаар сард 1000 ахмадын уламжлалт чуулга уулзалтыг зохион байгуулна” хэмээн Ерөнхий захирал уулзалтын зорилгыг тодотгов.  
     Уулзалтын үеэр Ахмадын хорооны дарга Д.Байгал өнгөрсөн онд хийсэн ажлын товч тайланг танилцуулж, шинэ оны төлөвлөгөө болон удирдлагуудад тавих саналаа багцлан дэвшүүллээ. Ахмадуудаа эрүүл аж төрөх хэв маягт хэвшүүлэх, буруу зуршил болон хөдөлгөөний хомсдолоос хамгаалах, урлаг спортоор дэмжих гээд олон талт хөтөлбөрийг тус хорооноос зохион байгуулж байна. Үйлдвэрийн зүгээс үзүүлдэг  олон дэмжлэгт  ахмадууд талархаж буйгаа илэрхийлж, цаашид ахмадаа сонсож, хамтран ажиллах хүрээ илүү өргөжинө гэдгийг уулзалтын үеэр онцоллоо.    

 

 

Ш.Отгонбилэгийн нэрэмжит Технологийн сургуулийн оюутнууд өвлийн амралтаа үр бүтээлтэй өнгөрүүлэх зорилгоор сайн үйлсийн аяныг зохион байгуулжээ. Аяны хүрээнд Б.Баярмаа даргатай Цахилгаан систем автоматжуулалтын 2 дугаар ангийнхан Баян-Өндөр  сумын  Рашаант багийн өндөр настан Мижиддорж гуайд хүндэтгэл үзүүлж, тусламжийн зүйл  гардууллаа.

Өндөр настан Мижиддорж гуай Наран цогцолбор сургуульд 17 жил сантехникчээр ажиллаж байгаад  тэтгэвэрт гарчээ. Тэрээр  оюутнуудын сайн үйлсийн  тусламжид баярлаж, сайн сайхныг ерөөхийн зэрэгцээ хичээл номондоо шамдан суралцах нь улс орныхоо хөгжил дэвшилд оруулж буй том хувь нэмэр гэдгийг сургамжилжиж байв.  Сэтгэлийн дэм багаддаггүй. Оюутнууд маань амралтаараа зүгээр суулгүйгээр сайн санаачилга гарган нэгдсэнд баяртай байна хэмээн анги удирдсан багш Д.Дунгаамаа энэ үеэр ярилаа.