• Орон нутгаас 31,9 тэрбум төгрөгийн худалдан авалт хийжээ

        Эрдэнэт үйлдвэр ХХК нь сүүлийн дөрвөн жилийн хугацаанд Орхон аймгийн үйлдвэрлэгч компаниудтай 31,9 тэрбум төгрөгийн худалдан авалт хийжээ. Баяжмалын шуудай, ган бөөрөнцөг, ажлын хувцас, түүхий резин, лед гэрэл, электродын үйлдвэрүүдийн бүтээгдэхүүн дийлэнх хувийг эзэлж байна. 2016 онд 5,1 тэрбум, 2017 онд 7,7 тэрбум, 2018 онд 12 тэрбум төгрөгийн нэмүү өртөг шингэсэн бүтээгдэхүүнийг орон нутгийн үйлдвэрлэгчдээс худалдан авчээ. Орхон аймгийн аж ахуйн нэгжүүдтэй 2018 онд 42,5 тэрбум төгрөгийн 244 гэрээ байгуулсан нь өмнөх онтой харьцуулахад 2,2 дахин нэмэгдсэн байна.   У.Цэрэнбат Фото: Б.Баттөгс Дэлгэрэнгүй...
  • Геологийн нөөцийг 60 гаруй жил ашиглана

         Эрдэнэт үйлдвэр ХХК нь анх Монгол, Чехословакийн геологчдын хайгуулын ажлын үр дүнгээс эхлэн өнөөг хүртэл уурхайн ашиглалтын насжилтыг нэмэгдүүлэхээр геологи хайгуулын ажлыг дэлхийн жишигт нийцүүлэн өнөөг  хүртэл гүйцэтгэж байна. Ордын нөөц өсгөх хайгуул, судалгааны ажлыг олон жил үе шаттайгаар хэрэгжүүлж ирсэн. 2017, 2018 онд геологи хайгуулын ажлын үр дүнг нэмэгдүүлснээр хүдрийн баялгийг өсгөж,  ашиглалтын нөөцийг 40 жил, геологийн нөөцийг  60 гаруй жил ашиглах боломжтой боллоо. У.Цэрэн Фото: Б.Баттөгс Дэлгэрэнгүй...
  • Улсын төсвийн орлого нэмэгджээ

        Эрдэнэтийн уурхайчид улсын төсвийн тал хувийг бүрдүүлж, эх орны эдийн засгийн хүнд үед улсаа нуруундаа үүрч явсан түүхтэй. Өнгөрсөн 40 жилийн хугацаанд 854,8 сая тонн хүдэр боловсруулжээ. Сүүлийн гурван жилийн тайлан мэдээнээс харахад улсын болон орон нутгийн төсөвт уурхайчдын төлсөн татварын дүн өссөн байна. Тухайлбал 2016 онд 183,7 тэрбум, 2017 онд 578,6 тэрбум, 2018 онд 654,8 тэрбум төгрөгийн орлого төсөвт төвлөрүүлжээ. Харин үйлдвэрлэлийн түүхэнд зэсийн металл авалт энэ онуудад хамгийн өндөр хувьд хүрсэн байна. У.Цэрэнбат Фото: Б.Баттөгс Дэлгэрэнгүй...
  • Нийгмийн хариуцлагын зардлыг нэмэгдүүлэв

         Эрдэнэт үйлдвэр ХХК нь уул уурхайн хүнд үйлдвэрийн хувьд ажилтнууддаа 24 нэр төрлийн хөнгөлөлт, дэмжлэг, буцалтгүй тусламж үзүүлж, нийгмийн хамгааллын бодлогыг хэрэгжүүлэн ажиллаж байна. Ажилчдын цалинг 2017 онд 10%-аар, ажлын үр дүнгийн урамшууллыг 20 %-аар, 2018 онд цалинг дахин 15% хүртэл нэмэгдүүллээ. Үүний хүрээнд сүүлийн гурван жилд 129,2 тэрбум төгрөг зарцуулжээ. Нийгмийн хариуцлагын хүрээнд компани 2017 онд 60,5 тэрбум төгрөг зарцуулсан бол 2018 онд 24,4 тэрбумаар нэмэгдүүлж 84,9 тэрбум төгрөгт  хүргэсэн байна. У.Цэрэнбат Фото: Б.Баттөгс Дэлгэрэнгүй...
  • Хуульчид 32,8 тэрбум төгрөгийн ашигтай шийдвэр гаргуулжээ

         Эрдэнэт үйлдвэрийн Хууль, эрх зүйн газрын хуульчид өнгөрсөн онд олон улсын арбитрын гурав, дотоодын арбитрын нэг, иргэний 54, захиргааны дөрөв, эрүүгийн 16, зөрчлийн хоёр гээд нийт 80 хэрэгт компанийн эрх ашгийг төлөөлөн ажиллажээ. Тэд иргэний 54 хэрэгт ажилласнаас 38 хэргийг шүүхээр эцэслэн шийдвэрлүүлж, компанид 30,3 тэрбум төгрөгийн ашигтай шийдвэр гаргуулсан байна. Мөн эрүүгийн 16, зөрчлийн 2 хэрэгт  ажилласнаас 12 хэрэг эцэслэн шийдвэрлэгдэж, 4,1 сая төгрөгийн хохирлыг барагдууллаа. Түүнээс гадна захиргааны дөрвөн хэргийн хоёр нь шүүхээр эцэслэн шийдвэрлэгдэж, нийт 2,5 тэрбум төгрөгийг компанид ашигтайгаар шийдвэрлүүлсэн амжилттай ажиллав. Тус газар 2018 онд 16 компани, дөрвөн иргэнээс нийт таван сая ам.доллар, 900 орчим сая  төгрөгийн авлага барагдуулсан байна.      Харуул хамгаалалтыг сайжруулах, гэмт хэргээс урьдчилан сэргийлэх чиглэлээр “Үйлдвэрийн бүс, объектод хүн, тээврийн хэрэгсэл нэвтрүүлэх журам”-ыг шинэчлэн боловсруулан батлуулж, компанийн бүх ажилтнуудад цахим үнэмлэх олгох ажлыг ХМТАЦ-тай хамтран зохион байгуулсан. Журмыг хэрэгжүүлэх зорилгоор “Зочин” үнэмлэхийг хэвлүүлж, Үйлчилгээ, аж ахуйн алба, Гэрээт цагдаагийн хэлтэст хүлээлгэн өгсөн ба гэрээт байгууллагуудын ажилтнуудыг цахим үнэмлэхээр хангах ажлыг зохион байгуулав. Мөн “Компанийн аюулгүй байдал” сарын аяныг зохион байгуулж, Гэрээт цагдаагийн хэлтэс, Дотоодын цэргийн 816 дугаар салбарын харуул, хамгаалалтын бүх  цэгүүдээр хамгаалалтыг сайжруулах олон ажил санаачлан хэрэгжүүлсэн нь үр дүнгээ өгч байна. Энэ онд хэрэгжүүлэх үйлдвэрийн ажилчдын автобусны шалган нэвтрүүлэх систем, харуул хамгаалалтын нэгдсэн систем, камерын хяналтын нэгдсэн төв байгуулах ажлын бэлтгэл хангагдаж байна. Дэлгэрэнгүй...
  • Эрдэнэт сувилалд оношилгооны шинэ төхөөрөмжүүд ирлээ

         Эрдэнэт сувилал цогцолборын Дүрс оношилгооны кабинетад  Япон улсад үйлдвэрлэсэн Shimadtsu-Flexavision FD маркийн дижитал рентген аппарат, FUJINON  маркийн улаан хоолой, ходоод, 12 хуруу гэдэс, бүдүүн, шулуун гэдэсний дурангийн аппарат, UUSS-H60  загварын хэт авиан оношилгооны  ЭХО аппарат хүлээн авлаа.      Дижитал рентген аппаратаар толгой, хүзүү, сээр бүсэлхий нугалмууд,  уушиг, зүрх, үе мөчний рентген зураг авах юм. Энэ аппаратын тусламжтайгаар  рентгенээр харах,  ходоод, улаан хоолой хэвлийн хөндийн эрхтэнүүдийн  тодосгогч бодистой рентген  шинжилгээ хийх боломжтой боллоо.        Эхо аппаратаар хэвлийн хөндий болон бага аарцгийн хөндийн  эрхтэнүүдийн хэт авиан шинжилгээ, зүрх судас, эмэгтэйчүүдийн оношилгоо хийхээс гадна  шинээр бамбай булчирхай, хөх, үе мөч, булчин шөрмөсийг   үзэж оношилно.      Мөн Лабораторит  цагт 200 шинжилгээ хийх хүчин чадалтай Герман улсын HumaStar-200 маркийн Биохимийн бүрэн автомат анализаторыг суурилуулсан байна.      Ингэснээр  шинжилгээний нэр төрөл олширч, чанар сайжрах төдийгүй шинжилгээний хариу автомат-аар гарах юм. Нүдний кабинетад KOWA VX10 маркийн нүдний дурангийн аппарат шинээр суурилагдсан байна. Уг аппарат нь нүдний уг дурандан оношилж, зургийг нь авдгаараа өмнөхөөсөө давуу талтай юм. Шинэ тоног төхөөрөмжүүдээс ЭХО аппарат ажиллаж эхэлсэн бөгөөд  бусдыг нь ажиллуулахад бэлтгэж, эмч мэргэжилтнүүдийг сурган дадлагажуулж байна. Ийнхүү Эрдэнэт сувилал  цогцолборт орчин үеийн дэвшилтэт технологи бүхий тоног төхөөрөмжүүд  ашигласнаар  ажиллагчдын эрүүл мэндийн оношилгоонд дэвшил гарна гэж эмч мэргэжилтнүүд үзэж байна. Я.ЭНХТУЯА Дэлгэрэнгүй...
  • Ус тунгалагшихад уужирдаг сэтгэл

         Энэ үгийг Эрчим хүчний цехийн Цэвэрлэх байгууламжийн хэсгийн дарга Авирмэдийн Баярсайхан нэгэнтээ хэлсэн. Жинхэнэ хөдөлмөрийн хүн л үүнийг сайн мэднэ.      Дөрвөн арваны тэртээ Увс аймгийн Завхан сумын хүү тухайн үед хэрийн хүн сонирхдоггүй усны мэргэжил эзэмшихээр Унгар улсыг зорьсон нь учиртай. Увс аймгийн Усны аж ахуй удирдах газрын дарга Авирмэдийн гурав дахь хүү ирээдүйд усны мэргэжил монголд эрэлттэй болохыг мэдэрч сонгох нь зүйн хэрэг. А.Баярсайхан гадаад багш нарын хатуу шаардлага, шүүлтийг дөмөгхөн давсаар инженерийн боловсролоор тэргүүлэгч улсын Политехникийн дээд сургуулийг усан хангамжийн ариутгах татуургын инженер мэргэжлээр төгссөн. Хорь гаруйхан настай, өндөр, цэмцгэр залуу тухайн үеийн Геологи, уул уурхайн үйлдвэрийн яамны томилолтоор Эрдэнэтэд анх иржээ. Тэрээр үйлдвэрийн харьяа Усан хангамж ариутгах татуургын цехийн шугамын засварчнаас ажил хөдөлмөрийн гараагаа эхэлсэн. Энэ үеэс л багаж хэрэгсэлтэй “нөхөрлөж”, гараасаа салгахгүй хайрлан хямгадаж ашигладаг багаж байнга гялалзаж, их үйлийг хамт бүтээдэг болохыг мэдэрчээ. Уйгагүй хөдөлмөр, хичээл зүтгэлийнхээ үр шимээр тэр удалгүй шугамын мастер, инженер болж,  1995 оноос Эрдэнэт үйлдвэрийн Эрчим хүчний цехийн Цэвэрлэх байгууламжийн хэсгийн даргаар даруй 23 дахь жилдээ ажиллаж байна. Энэ хугацаанд Хүрдэн болон Элсэн шүүрний, Гүн цэвэрлэгээний байгууламжийг  хүлээн авч, инженер техникийн ажилтнуудынхаа хамтаар тохиргоо үйлчилгээг  гардан хийж ажилд оруулснаар цэвэрлэгээний чанарыг 98 хувьд хүргэж чадсан юм. Монгол улсын хэмжээнд цор ганц бохир усны гүн цэвэрлэгээний байгууламж Эрдэнэт үйлдвэрт бий. Өнөөдөр энэ байгууламжаас байгаль экологид хор аюулгүй цэвэр ус гарч буй нь түүний удирдсан хамт олны хөдөлмөрийн үр шим. А.Баярсайхан цэвэрлэх байгууламжийнхаа өргөтгөл, тоног төхөөрөмжүүдийн шинэчлэлийн ажлыг санаачилж, тасралтгүй сайжруулалтыг биечлэн манлайлдаг удирдагч.      Хэдийгээр Эрдэнэт үйлдвэрийн Цэвэрлэх байгууламж боловч Зууны манлай үйлдвэр дагаж байгуулагдсан Эрдэнэт хотын бүх албан байгууллага, аж ахуйн нэгж, орон сууцны ахуйн бохир усыг эднийх цуглуулж, дөрвөн үе шаттай дамжлагаар стандартын хэмжээнд хүртэл нарийн цэвэрлэдэг онцлогтой. Эндээс гарсан усаар Хаягдлын аж ахуйн далангийн усны тэнцлийг тогтворжуулдаг. Хүний өөрийн бохир усыг цэвэршүүлдэг мөн ч буянтай улс гэж бодогдох. Манай Цэвэрлэх байгууламж хоногт 24000м3 бохир ус хүлээн авч цэвэрлэх хүчин чадалтай. Гэтэл 1990-ээд оны сүүлээр төслийн хүчин чадлаасаа 1,5 дахин их буюу 30 000 гаруй м3 ус хүлээн авч хэт ачаалалтай, аваарын горимд ажилладаг байжээ. Тухайн үеийн нөхцөл байдал, хүндрэл бэрхшээлийг хэсгийн даргынхаа мэргэжлийн өндөр ур чадвар, хамт олныг удирдан зохион байгуулах авьяас, анхаарал болгоомж, арга ажиллагаагаар давж гарсан гэж хамт олон нь бахархан ярих дуртай. Үндсэн тоноглол, ил задгай байгууламжуудыг зогсоож засвар үйлчилгээ хийх боломжгүй тэр үед технологийн горимыг секунт алдахгүй баримтлах чухал. Энэ бүх хүндрэл бэрхшээлийг А.Баярсайхан өөрийн хэсгийн хамт олонтойгоо зоригтой туулсныг компанийн удирдлагууд одоо ч үнэлдэг. Хэт ачааллын үед “Цаашид Эрдэнэт хот өргөжин тэлнэ, үйлдвэр, аж ахуйн газрууд улам олшрох учраас Цэвэрлэх байгууламжийг өргөтгөх зайлшгүй шаардлагатай...”-г ойлгуулж ярьдаг хуруу дарам цөөн хүний нэг нь тэр байлаа. Ийнхүү давхар цэвэрлэгээний дамжлага болох Гүн цэвэрлэгээний байгууламжийг урдаас төлөвлөсөн. Дараа нь Францын хөнгөлөлттэй зээлийн хөрөнгө оруулалтаар томоохон өргөтгөл эхлүүлсэн нь одоо дуусах шатандаа явна. Харин хэт ачааллын аваарын горим 2004 оноос дуусгавар болж, хэвийн ажиллагаанд шилжсэн юм. Учир нь орон сууц, албан байгууллагуудыг тоолууржуулах, усны алдагдлыг багасгах янз бүрийн арга хэмжээ авч хэрэгжүүлсний үр дүнд ачаалал буурсан. Одоо эднийх хоногт 18000 м3 бохир ус хүлээн авч цэвэрлэж байна. Тэрээр “Бохир усыг цэвэрлэх асуудал манай улсын хэмжээнд төдийгүй дэлхий нийтийн анхаарлыг татах болсон. Хөгжилтэй оронд бол хөгжлийн дээд түвшинд хүрсэн. Ундны усанд хэрэглэх хэмжээнд хүртэл цэвэрлэж байна. Манайх одоохондоо хөгжлийнхөө шатанд л явна. Харин ч том үйлдвэрийн харьяанд явсаны хүчинд үйл ажиллагаа нь жигд, техник технологийн шинэчлэл цаг хугацаандаа хийгддэг, мэргэжилтэй боловсон хүчингүүдээр хангагддаг, үүнийхээ хүчинд улсын хэмжээнд хэвийн яваа ганц цэвэрлэх байгууламж бол манайх...” гэж ярьсан. Үнэндээ хэвийн жигд ажиллагааг хангахад хамгийн их нөлөөлсөн, хүчин чармайлт, сэтгэл гаргаж яваа хүн нь өөрөө юм. Үргэлж найдвартай ажиллагаа, хурдтай хэмнэл нэхэж, шинийг эрэлхийлдэг хэсгийн дарга хамгийн сүүлд Сэлэнгэ амралтын баазын цэвэрлэх байгууламжийг Герман улсын “WBS” технологитой бүрэн автомат байгууламжаар  бүтэн шинэчилсэн. Шинэ техник, тоног төхөөрөмжийг суурилуулан ажиллуулж, үйл ажиллагааг нь жигдрүүлэх бол түүний мэргэшсэн ажил. Мөн саяхан Цэвэрлэх байгууламжийн лабораторийн 40 жил ашигласан тоноглол, хэрэгслүүдийг шинэчилснээр бохир усны цэвэрлэгээний шинжилгээг сүүлийн үеийн дэвшилтэт арга зүй, технологиор хийх болсноор үр дүн, чанар дээшилсэн. Ингээд зогсохгүй, лабораторидоо Улсын итгэмжлэл авах санаачилга гарган хөөцөлдсөөр бүтээжээ. Одоо Эрдэнэт үйлдвэрийн Эрчим хүчний цехийн Цэвэрлэх байгууламжийн лабораторийн шинжилгээний дүн Монгол улсын хэмжээнд бүрэн зөвшөөрөгдсөний дээр хүн амын ундны цэвэр усанд шинжилгээ хийх, улмаар бусад үйлдвэр, аж ахуйн нэгжүүдэд шинжилгээний төлбөртэй үйлчилгээ үзүүлэх боломж бүрдсэн нь сайн хэрэг.      А.Баярсайханд Эрдэнэтчүүд талархах учиртай. Байгаль орчны тэнцвэрт байдлыг хамгаалахад амьдралынхаа туршид асар их хувь нэмэр оруулсан эрхэм. Цэвэрлэгдэн гарч буй бохир усны стандартад хатуу хяналт тогтоож, ус тунгалаг байхын төлөө 33 жилийн амьдралаа бүтэн зориулсан мэргэшсэн инженер. Одоо ч Цэвэрлэх байгууламжийнхаа лагийг үнэргүйжүүлэхэд сэтгэл, оюунаа чилээн судалгаа туршилт явуулсаар, гарц гаргалгаа хайн бэдэрсээр явна. Эндээс гарах усны дусал бүхэн тунгалаг байж, эрэл зөв чигийг олох болтугай. М.ОДГЭРЭЛ Дэлгэрэнгүй...
  • Уртын дууны шуранхай, ум тарнийн увидастай

             Уртын дуу, сонгодог урлаг, суурь шинжлэх ухааны хөгжлийн орон зай, цаг хугацаанд эрх чөлөө, ардчилал, тэгш эрх оршдог билээ.      Уртын дууны гайхамшиг нь, усны харгиа боргио, уул хавцлын цоор цуурай, исгэрээнээс улбаалан байгаль орчноо аргадах бөөгийн шашны дуудлага, туульсаар өртөөлөн өндөр их уулсын хүрээлэлд үүссэн байх магадлалтай юм. Учир нь тэр их өндөр уулс саръдгийн сансрын салхины эрч, усны хүрхрээн хүчит чимээ анир улмаар цаг уурын эрс тэс уур амьсгалтай жилийн дөрвөн улирлын өөрчлөлтөд хүний сэтгэлийн эгшиг, цахилгаан соронзон долгион болон таталцах хүчээр өдөөгдөж болох учиртай билээ.            Үсэг үсгээр эвлэж үг үүсээд л үг хоорондоо соронзлогдон, шад бадгаар тэгш хэмлэгдэж ид шид шингэсэн дууны яруу найраг төрдөг. Улмаар ширэн цартай, сүүлэн хөвч, хоёр чавхдастай сэтгэл зүрхний хос ховдлыг булгилуулсан морин хуурын амьд эгшигтэй сүлэлдсэн уртын дууны шуранхай амилаад ирэхээр үнэхээр байгаль ертөнцийн уран эгшиглэнтэй, увидастай цэнхэр нүдэн, эмзэгхэн замбуулин хорвоо гэдэг энэ юм шүү дээ гэж төсөөлөгдөн сэтгэлийн таашаал, амгаланг эдлэх. Үнэхээр ч нүдний цөцгий мэт хайрлан, холтолж хэлтлэх нь бүү хэл, хиртээж буртаглаж боломгүй ариун дагшин ертөнц билээ.      Морины гүйх хар  хурданд  уртын дуугаар жигүүрлэн нисэхэд, хүний сэтгэлийн чагтага мултарч, газрын татах хүчнээс хязгааргүй орчлонд  жингүйдэн уусан алдарч, алсран тасраад л уужим сансар огторгуйд хөвөн, алс төгсгөлгүйн хөндлөнгөөс алаг нүдэн дэлхийгээ тольдон   зорчиж амьдрах  нь Монгол хүн болж төрсний  хосгүй хишиг,  хувь заяа юм даа.      Ер нь үлгэр домогт гардаг гуурст хурдан хүлгээрээ монголчууд аль эрт сансарт зорчин нисэж, хөрст цэнхэрхэн дэлхийгээ гаднаас нь ид  шидтэй билгийн нүдээрээ тольдон харж таньчихсан хүмүүс гэлтэй.      Америкийн Калифорнийн их сургуулийн хэсэг эрдэмтэд 1995 онд   аливаа үсэг, үг авианд энергийн эрчим хүч байдаг эсэхийг судлахаар тусгай  дуу дохио авианы маш өндөр нарийн  мэдрэмжтэй багаж зохион бүтээж олон ястны хэлээр хэдэн мянга, түмэн үгийг хэлэхэд  багаж мэдрээгүй гэдэг. Харин Грекийн эртний томъёонууд хэлэхэд дөнгөж мэдрэн үл ялиг  хөдөлж эхэлжээ. Улмаар Буддын сургаалийн  “УМ” тарнийг дуудахад багажны зүү хөдөлж 36 градусыг заасан байна. Үүнээс үүдээд эрдэмтэд энэ хазайлтын өнцгийн хэмжээг эрчим хүчинд шилжүүлж тооцоход сансрын хөлгийг тойрог замд оруулахуйц асар их энерги болохыг баталсан тухай Европын нөлөө бүхий “Асеа” сэтгүүлд бичжээ. 1911 онд сэргээн тунхаглагдсан Монгол улсын төрийн далбааны төгсгөлийн гурван улаан хэлний зулайд Ум, дунд нь Аа, өлмийд нь Хум үсэг заларч  байсан нь ердийн тохиолдол биш дэвшин мандахын агуу бэлгэдэл, сүр хүч байжээ. Ээжүүд үр хүүхэд биднийгээ арцаар ариулахдаа “Умаахан, умаахан, умаахан” гэдэг уншлагын учрыг хожуу хойно л ойлгож байна.      Үүнээс үүдэн шашин номын зүрхэн болон шидэт тарни гэдэг бол ид шидийн эрчим хүчтэй болох нь нэгэнт илэрхий болсон юм. Харин уртын дууны Аяа зээ хө, Ха, Хэ цохилтуудын тэсрэлтийн их хүч бол Ум тарнийхтай дүйцэхүйц эрчимтэй байж болох үндэстэй  юм.      Энергийн эрчмээр илэрхийлэгдсэн уртын дуу, морин хуурын эгшиг, дуучны хоолойн уянга дэлхийн ямарч үндэстэнд орчуулгагүй гэрэлт сэтгэл зүрхэнд нь солонго татан гэгэлзүүлэн дэгэлзүүлдэг онцлогтой.      Уламжлалт морин хуур арьс шир, адууны сүүлээр урлагдсан болохоор  хөгжмийн амьтай зэмсэг болохоор монгол хүний зүрх сэтгэл, адууны үүрсэлт, тэмээний буйлаа шингэсэн нүүдэлчний мэдрэмжтэй байхаас аргагүй юм. Яагаад гэвэл хос чавхдасаас багцлагдан тогтдог боловч хоёр  зуу гаруй хялгаснаас бүрэлддэг гэдэг билээ.      Уртын дуу гэдэг нь үнэн хэрэгтээ гайхамшигт нарийн мэдрэмжтэй  хүмүүсийн чин зүрх сэтгэлээр орон зайд, цаг хугацаагаар ирлэгдэн бодит  амьдралын зовлон жаргалаас л төрж төгөлдөрждөг болохоор  сүнслэг бөгөөд авшигтай юм билээ.      Наран сартай сүлэлдэх үдшийн гэгэлгэн бүрийгээр, өдөртөө сульдсан агаарыг уртын дуугаар уярааж, хаяа дарсан айлуудаас, хангинуулж дөлөөд өнгөрөхөд, хадамд ирсэн шинэхэн бэр санааширч үлддэг л нүүдэлчний нэгэн бодит  амьдралын  зураг.        Дорнын монгол уртын дуу болон Өрнийн сонгодог урлагийн орон зай, цаг хугацааны ертөнцөд л эрх чөлөө, тусгаар тогтнол, жинхэнэ ардчилал оршдог болохоор хүн болгон тэмүүлдэг ч, тэр болгон нь хүрч чаддаггүй хязгааргүй ертөнц билээ. Уртын дууны шуранхай, Ум тарнийн увидас энергийн тодорхой болон тодорхой бус хэлбэрт шилжин хувьсаж, мөнхөд орших эрчмийн үлэмжийн хязгааргүй чанар бөгөөд нарны алтан цацрагтай зүйрлэхүйц ертөнцийн багцалсан лугшилт юм.    Ж.БААТАРХҮҮ Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
Хөгжлийн түүчээ
Баасан, 29 12-р сар 2017 00:00

Ж.Ундрах Алтан азтан боллоо

     Эрдэнэт үйлдвэрийн Шилдэг ажилтны сүлд модны наадмын үйл ажиллагаан дээр Алтан азтан буюу 2 өрөө байрны эзнийг бүртгэлийн дугаараар нь сугалж тодруулдаг уламжлалтай. Энэхүү уламжлал ёсоор Ерөнхий захирал Х.Бадамсүрэн  үйлдвэрийн бүх ажиллагчдын бүртгэлийн дугаараас сугалснаар Эрдэнэт үйлдвэр ХХК-ийн Авто тээврийн байгууллагын Механикийн албаны хүнд даацын машинч Ж.Ундрах энэ жилийн Алтан азтан боллоо. Алтан азтан Ундрахын аав Р.Жанчивдорж Эрдэнэт үйлдвэрийн анхдагч. Тэрээр 1974 оны намар Эрдэнэтийг барьж байгуулахаар илгээлт өвөртлөн ирсэн эхний ээлжийн бүрэлдэхүүнд багтаж байжээ. Белазын жолоочоос хэсгийн дарга хүртэл албыг хашиж, Аж үйлдвэрийн гавьяат ажилтан цол хүртсэн түүний үр хойчид Эрдэнэтийн овоо ийнхүү буян хишгээ хайрлалаа.
 
 
 
 
 
      Мөн захирлуудын нэрэмжит сугалаанд 2018 онд ОХУ-д болох Дэлхийн хөл бөмбөгийн аварга шалгаруулах тэмцээн үзэх эрхийн бичгийг Эдийн засгийн хэлтсийн орлогч дарга Д.Галбаатар, Үйлчилгээ аж ахуйн албаны ажилтан Т.Ариунцэцэг, 2018 онд БНСУ-д болох "ПЁНЧАН-2018" өвлийн олимп үзэх эрхийн бичгийг Хөгжлийн бодлогын газрын орлогч дарга Л.Эрдэнэбат, Хөдөлмөрийн аюулгүй байдал, эрүүл ахуй, байгаль орчныг хамгаалах хэлтсийн инженер Б.Төгөлдөр, Япон улсад аялах эрхийн бичгийг Авто тээврийн байгууллагын ажилтан Батхуяг, Баяжуулах үйлдвэрийн Урвалжийн хэсгийн урвалж уусгагч С.Мөнхтулга нар хожиж супер азтанууд боллоо.
 
 
 
 
 
 
 
     Харин Засвар монтажийн цехийн хүний нөөцийн менежер Б.Туяажаргал, Засвар механикийн заводын ажилтан Баярмаа, Болдбаяр нар Iphone 8 гар утас, Тээвэр ложистикийн албаны ажилтан Э.Уранчимэг, Засвар монтажийн цехийн Угсралт тохируулгын хэсгийн мастер Б.Баасандалай, Эрчим хүчний цехийн механикч Б.Мөнхбаяр нар Cannondale брэндийн унадаг дугуй хожиж азтан болсон юм.
 
 
 
 
 
 
 
 
 
 
 
 
 
 
 
 
     Зууны манлай бүтээн байгуулалт Эрдэнэт үйлдвэрийн бүтээлч хамт олон өнгөрч буй 2017 оны ажлаа дүгнэж, “Оны шилдэг”- үүдээ тодрууллаа. Тус үйлдвэрийнхэн үйлдвэрлэлийн болон эдийн засгийн бүх үзүүлэлтийг төлөвлөгөөнөөс давуулан биелүүлсэн амжилтаар шинэ оноо угтаж байна. 
 
 
 
  “Шилдгийн шилдэг ажилтан"-аар Ил уурхайн Тоног төхөөрөмжийн засварчин Пүрэвдагвын Эрдэнэ, "Шилдэг ажилчин"-аар Авто тээврийн байгууллагын Засварын хэсгийн машинч Дэмбэрэлнямбуугийн Нэргүй, Засвар механикийн заводын хэвчин, бригадын ахлагч Балжиннямын Баатархүү, Дулаан цахилгааны төвийн цахилгааны засварчин Жамъяндоржийн Батаа нар тус тус тодров.

 
 


 
  Баяжуулах үйлдвэрийн гидравликийн инженер Ганзамын Ренчинсамбуу, Засвар механикийн заводын хэсгийн дарга Бямбын Наранбаатар, Төслийн менежментийн хэлтсийн тэргүүлэх инженер Амарсанаагийн Соджаргал нар “Шилдэг шинийг санаачлагч” боллоо.
 
 

 
     "Оны шилдэг мэргэжилтэн"-ээр Ил уурхайн эрчим зүйч ФОМЕНКО А.П, Засвар механикийн заводын зохион бүтээгч, инженер Цэрэнхандын Чулуун-Эрдэнэ, Засвар монтажийн цехийн Угсралт тохируулгын хэсгийн ахлах мастер Жамсрангийн Мэндхүү нар шалгарч, Тээвэр ложистикийн албаны дарга Самдангийн Мөнхтэгш “Шилдэг удирдах ажилтан" өргөмжлөл хүртлээ.  
 
 
 
 
 
    "Тюряков А.Ф.-ийн нэрэмжит шагналтан”-аар Баяжуулах үйлдвэрийн механикч Мартынов В.В, Засвар механикийн заводын албаны дарга Доржийн Мөнхсайхан, Их барилгын хэлтсийн барилгын инженер Доржийн Баярмаа нар тодров.  Хариуцсан ажил хөдөлмөртөө эзэн нь байж, хамт олноо хошуучлан амжилт  гаргасан шилдгүүддээ баяр хүргэж, 2018 оны ажил үйлст нь өндөр амжилт хүсэн ерөөе.  
 
 
 

 
 
     Өнгөрч буй онд Эрдэнэт үйлдвэрийн уурхайчин гэр бүлд гурван ихэр хүүхэд мэндэлж, бүл нэмсэн баярт үйл явдал тохиосон билээ.  Баяжуулах фабрикийн Нунтаглан баяжуулах хэсгийн насосны машинч Д.Нямгаравын гэргий  Бутлан тээвэрлэх хэсгийн конвейрийн машинч Э.Солонго гурав дахь төрөлтөөрөө  гурван ихэр хүүхэд төрүүлж, нийт гурван хүү, хоёр охины аав ээж болсонд баяр хүргэн, Эрдэнэт үйлдвэр ХХК-иас гурван өрөө байраар мялаасныг өмнө мэдээлсэн. 
     Тэгвэл шинэ оны босгон дээр нэгдүгээр хорооллын гурван өрөө байрыг  Эрдэнэт үйлдвэр ХХК-ийн зүгээс бүрэн засаж, тохижуулан, гурван ихрийн гэр бүлд албан ёсоор хүлээлгэн өглөө. Орон сууц хүлээлгэн өгөх үйл ажиллагаанд Эрдэнэт үйлдвэр ХХК-ийн  Эдийн засаг хариуцсан дэд захирал Ж.Эрдэнэбилэг, Орон сууцны цехийн дарга М.Болдбаатар нар оролцож, шинэ ихрүүд болон гэр бүлд нь эрүүл энх сайн сайхныг уурхайчин хамт олныхоо өмнөөс хүсэн ерөөв.
 

 

     Өнөөдөр Эрдэнэт үйлдвэр ХХК-ийн Ерөнхий захирлын Нийгмийн асуудал хариуцсан орлогчийн үүрэг гүйцэтгэгч Д.Дэлгэрбаяр, Захиргаа, хүний нөөцийн орлогч дарга О.Отгонбаяр нар Баян-Өндөр сумын Наран багт байрлах Хөгжлийн бэрхшээлтэй хүүхдийн хөдөлгөөн заслын төвд зочилж, төвийн хүүхдүүдэд шинэ жилийн баярын бэлэг гардууллаа. Хөгжлийн бэрхшээлтэй хүүхэдтэй эцэг эхийн холбооны  Орхон аймаг дахь салбарын дэргэдэх  Хүүхэд залуучуудын хөгжлийн төв нэртэй тус байгууллагад өнөөдрийн байдлаар 2-22 нас хүртэлх хүүхэд, залуучууд хөдөлгөөний согог заслын болон ерөнхий эрдмийн хөтөлбөрүүдэд хамрагдаж байна. Тус төвийн 2-6 насны хүүхдэд хөдөлгөөн заслын хөтөлбөрийг голчлон хэрэгжүүлж байгаа бол 8-аас дээш насныханд боловсрол, нийгмийн хөгжлийн сургалтыг явуулдаг байна. Энд нийт зургаан багшийн бүрэлдэхүүнтэй баг хөгжлийн бэрхшээлтэй хүүхдийн сургалт хүмүүжлийн ажлыг эрхэлдэг аж. 
     Эрдэнэт үйлдвэрийн Ерөнхий захирлын Нийгмийн асуудал хариуцсан орлогчийн үүрэг гүйцэтгэгч Д.Дэлгэрбаяр тус төвийн хүүхэд багачуудад хандан айлчлан ирж буй 2018 оны мэндийг дэвшүүлэхийн ялдамд “Эрдэнэт үйлдвэр бол нийгмийн хариуцлагаа өндөрт тавьж ирсэн компани. Тиймээс нийгмийн хөгжлийн чиглэлийн томоохон хэсгийг хөгжлийн бэрхшээлтэй хүүхдүүдэд хандуулахад зориулдаг”  хэмээн тодотгов. Энэ үеэр тус төвд хүмүүжиж байгаа авьяаслаг хүүхдүүд ая дуугаараа мэндчилж, уурхайчин ах эгч нартаа талархаж буйгаа илэрхийлсэн юм.
 

 

 

 

 

     Эрдэнэт үйлдвэрийн удирдлагууд үйлдвэрийн дэргэдэх  “Энэрэл” асрамжийн төвд сурч хүмүүжиж буй хүүхэд багачуудаа эргэлээ. Ирэх онд дөчин насны босго алхах Эрдэнэт үйлдвэр нийгмийн сайн сайхны төлөө олон зүйл бүтээсний нэг нь өнчин хүүхдийн “Энэрэл” асрамжийн төв юм. Үйлдвэрийн зүгээс тус төвд хүмүүжиж буй олон арван хүүхдийг дэмжин тусалж, ажил амьдралын замд хөтөлсөн нь хүмүүнлэгийн үйлсийг нэр төртэй хэрэгжүүлэгч компани гэдгийг тод илэрхийлдэг.  
     Шинэ оны босгон  үйлдвэрийн Ерөнхий захирал Х.Бадамсүрэн, Үйл ажиллагаа эрхэлсэн орлогч бөгөөд Ерөнхий инженерийн үүрэг гүйцэтгэгч Д.Эрдэнэцогт, Нийгмийн асуудал хариуцсан орлогчийн үүрэг гүйцэтгэгч Д.Дэлгэрбаяр болон албаны бусад хүмүүс  уламжлал  ёсоор “Энэрэл” төвд зочилж, хүүхэд багачууддаа шинэ жилийн бэлэг гардуулав. Мөн энэ үеэр тус төвийн үйл ажиллагаанд чухал шаардлагатай эд зүйлсийг хүлээлгэн өгч, Энэрэл төвийн хүүхдүүддээ шинэ оны мэндчилгээ дэвшүүллээ. 
  

 

     Мы с вами стоим на пороге Нового года, который по традиции всегда связывается с надеждами на самое лучшее и доброе. Хотелось бы отметить, что уходящий 2017 год был богат важными для России и Монголии событиями.  Это, прежде всего, 95-летие начала обучения монгольских кадров в советских и российских высших учебных заведениях. Мы с гордостью отмечаем, что за это время высшее образование в СССР и России получили более 60 тысяч монгольских специалистов.
    В 2017 году в г.Владивостоке состоялась встреча Президентов Российской Федерации В.В.Путина и Монголии Х.Баттулги, подтвердивших курс на дальнейшее развитие добрососедских связей между нашими странами.
    

   С большим успехом в Эрдэнэте прошел первый Международный инвестиционный форум с участием представителей 14 государств.   
      Газета «Оноогийн Эрдэнэт» в уходящем году получила признание в качестве лучшего регионального печатного издания Монголии.Мы благодарим КОО «Предприятие Эрдэнэт» за сохранение и развитие традиций дружбы между народами России и Монголии и желаем всегда занимать лидирующие позиции в мировых рейтингах.
        Новых вам успехов, свершений и достижения намеченных в юбилейном году планов!
    От имени коллектива Генерального консульства России в Эрдэнэте и от себя лично желаю всем жителям Орхонского аймака и города Эрдэнэт счастья, успехов, процветания и благополучия в Новом году!


С уважением и самыми добрыми пожеланиями,

Исполняющая обязанности
Генерального консула 
Е.Кара-Сал
 

 

 

Пүрэв, 28 12-р сар 2017 00:00

Мэндчилгээ

     

      Эрдэнэт үйлдвэр ХХК-ийн уурхайчин хамт олон, нийт ажилтан, Орхон аймгийн иргэд та бүхэндээ айлчлан ирж буй шинэ жилийн баярын мэнд дэвшүүлье.
     Улирч буй 2017 он бидний хувьд хөдөлмөрийн амжилт бүтээл арвин, олон чухал үйл явдал дүүрэн байлаа. Хүдэр олборлох, боловсруулах, баяжмал үйлдвэрлэх төлөвлөгөөг бүх үзүүлэлтээр нь давуулан гүйцэтгэж, улс, орон нутгийн өмнө хүлээсэн үүргээ амжилттай биелүүллээ. Үйлдвэрлэлийн технологийн тоног төхөөрөмж, техник хэрэгслийг үе шаттайгаар шинэчлэх, дэвшилтэт технологиор сольж сайжруулах ажил төлөвлөгөөний дагуу хийгдэж байна. Тухайлбал, уулын ажлын гол хөдөлгөгч хүч болох бульдозер, автогрейдер, автоачигч тус бүр нэг, 130 тоннын даацтай өөрөө буулгагч Белаз гурав, ус тээврийн Белаз хоёр, хүн тээврийн автобус зургааг худалдан авсан бөгөөд Баяжуулах үйлдвэрийн хоёр тээрмийг шинэчлэх гэрээ байгуулав. Дулааны цахилгаан станцыг 48 мВт-ын хүчин чадалтай турбингенератороор өргөтгөх ажил бүрэн дууссан бөгөөд Засвар механикийн заводод Liebherr-944 эксковаторын 18 м кубын багтаамжтай шанагыг үйлдвэрлэлээ.
     Нийт ажилтны цалинг 2017 оны тавдугаар сарын нэгнээс 10 хувиар нэмж, урамшууллын санг долоодугаар сарын нэгнээс үндсэн цалингийн сангийн 20 хүртэл хувиар нэмэгдүүлснээр нийт дүндээ нэг ажилтны сарын бодит орлогыг 120-450 мянган төгрөгөөр өсгөөд байна. Орон сууц худалдан авахад нь санхүүгийн дэмжлэг үзүүлэх, нийт ажилтан, ахмадууд, МШӨ-ий улмаас хөдөлмөрийн чадвар алдсан хүмүүсээ эрүүл мэндийн урьдчилан сэргийлэх үзлэгт хамруулж, хүний нөөцийг хөгжүүлэх бодлогын хүрээнд ажилтан нарыг төрөл бүрийн сургалтад хамруулах зэргээр компанийн ажилтан, уурхайчдынхаа эдийн засаг, нийгмийн асуудлыг шийдвэрлэхэд чиглэсэн олон ажлыг хэрэгжүүлж байна.
     Уул уурхайн салбарын 95 жилийн ойг тохиолдуулан Орхон аймагт Төвийн бүсийн чуулганыг амжилттай зохион байгуулж, авьяаслаг уран бүтээлчид маань хүндэтгэлийн нэгдсэн концертыг Улаанбаатар хотод толилууллаа.
    Эрдэнэт үйлдвэр нь ямагт шилдэг тэргүүний техник, технологийг үйлдвэрлэлд нэвтрүүлэн ажиллаж ирсэн. Шинэ зууны нийгэм-эдийн засаг, үйлдвэрлэл, бизнесийн хөгжлийн чиг хандлагад нийцүүлэн “Эрдэнэт үйлдвэр ХХК-ийг 2017-2031 онд хөгжүүлэх үндсэн чиглэл”-ийг шинжлэх ухааны ололт, практик үйл ажиллагааны туршлагадаа тулгуурлан боловсруулаад байна. Хөгжлийн үндсэн чиглэлээ тав, таван жилээр, үе шаттайгаар хэрэгжүүлэхээр төлөвлөж, орчин үеийн техник, технологийг нэвтрүүлэх зорилт тавьж, баримтлах таван бодлогоо тодорхойлсон.
     Энэ оны арванхоёрдугаар сарын 13-14-нд “Хамтын ажиллагаа ба хөрөнгө оруулалтын боломж” олон улсын бизнес форумыг Орхон аймаг, Эрдэнэт хотдоо амжилттай зохион байгууллаа. Энэхүү форумын үеэр уул уурхай, металлург, машин үйлдвэрлэл, зураг төсөл, инженерингийн зэрэг голлох чиглэлээр салбартаа тэргүүлэгч дэлхийн шилдэг 40-өөд компанийн төлөөллүүдтэй бодлогоо нээлттэй ярилцаж, тодорхой сэдэв, төслүүдээр үр бүтээлтэй санал солилцлоо.
     Айлчлан ирж буй 2018 онд “Эрдэнэт” үйлдвэрийн маань 40 жилийн ой тохионо. Энэхүү 40 жилийн түүхийн цаг үед бид хөгжлийн шинэ гараагаа эхлүүлж байна. Компанийн хөгжлийн үндсэн чиглэлд тусгагдсаны дагуу бид шинэ онд Ил уурхай, Баяжуулах үйлдвэр, Засвар механикийн заводын шинэчлэл, өргөтгөлийн төслүүдийг үе шаттайгаар эхлүүлэхээр төлөвлөж байна. 2018 онд манай хамт олон бизнес төлөвлөгөөгөө үзүүлэлт бүрээр нь биелүүлж, 36 сая тонн хүдэр олборлох зорилгодоо хүрэхийн төлөө хичээн ажиллах болно.
     Анхны баяжмалаа үйлдвэрлэн гаргасан түүхэн өдрөөс 40 дэх оноо угтаж буй энэ цаг мөчид Эрдэнэт үйлдвэр ХХК-ийн нийт ажилтан, үе үеийн уурхайчид, тэдний гэр бүл, хамтран ажилладаг түншүүд, Орхон аймгийн иргэд та бүхэндээ айсуй шинэ ондоо ажлын өндөр амжилт, эрүүл энх, аз жаргалаар дүүрэн байхын өлзийтэй ерөөлийг өргөн дэвшүүлье.
 
Эрдэнэт үйлдвэр ХХК-ийн Ерөнхий захирал, 
Монгол улсын Аж үйлдвэрийн гавьяат ажилтан, 
Техникийн шинжлэх ухааны доктор (Sc.D)
 
Х.БАДАМСҮРЭН
 
 
 
 
Эрчим хүчний том хэрэглэгчээс үйлдвэрлэгч рүү шилжив
      Эрдэнэт үйлдвэр ХХК-ийн Дулаан цахилгааны төвд 48 мВт-ын нийлбэр хүчин чадал бүхий дөрвөн турбингенераторыг суурилуулан өргөтгөх бүтээн байгуулалтын ажил 2017 онд бүрэн дуусч, ашиглалтад хүлээн авч байна. Ингэснээр тус үйлдвэр Монгол улсын эрчим хүчний том хэрэглэгчээс  үйлдвэрлэгч рүү шилжиж,  эрчим хүчний салбарт бодит хувь нэмэр оруулах боломж бүрдэв. Энэхүү төслийн эдийн засгийн үр ашгийг тооцож үзвэл компани цахилгаан эрчим хүчний зардлаа жилд 18,1 тэрбум төгрөгөөр хэмнэх боломж бүрдэж байгаа юм.
 
 
Эрдэнэт үйлдвэр ХХК-ийг 2017-2031 онд хөгжүүлэх Үндсэн чиглэлийг боловсрууллаа
 
    Үндсэн чиглэлд үйлдвэрлэлийн технологийн тоног төхөөрөмжүүдийг шинэчлэх, дэвшилтэт технологийг үе шаттайгаар нэвтрүүлэх, хүчин чадлыг өсгөх, ашигт ажиллагааг нэмэгдүүлэх, өрсөлдөх чадварыг дээшлүүлэх асуудлыг цогцоор нь шийдвэрлэх, мөн нэмүү өртөг шингэсэн, үнэлэмж өндөртэй бүтээгдэхүүн үйлдвэрлэх зорилт дэвшүүллээ. Эдгээр зорилтыг хэрэгжүүлэхийн тулд Дэвшилтэт технологийн, Техник шинэчлэлийн, Ирээдүйгээ харсан санхүү, эдийн засгийн, Хүний нөөц, нийгмийн хөгжлийн болон Байгаль орчны гэсэн таван бодлого тодорхойлж, харилцан уялдаатайгаар хэрэгжүүлж эхлэв. “Эрдэнэт” үйлдвэрийг хөгжүүлэх 15 жилийн үндсэн чиглэлд  Эрдэс баялгийн нөөц өсгөх төсөл, Ил уурхайд мөчлөгт урсгалт тээврийн технологи нэвтрүүлэх төсөл, Баяжуулах үйлдвэрийн өргөтгөл, шинэчлэлийн төсөл, Засвар механикийн заводыг шинэчлэх, өргөтгөх төсөл, Зэсийн баяжмал хайлуулах, боловсруулах үйлдвэрийн зэрэг томоохон төслүүдийг тусган хэрэгжүүлэхээр төлөвлөж байна.

 
Эрдэнэт хотноо олон улсын бизнес форум зохион байгууллаа

     Уул уурхай, хүнд үйлдвэрийн яам, Эрдэнэт үйлдвэр ХХК хамтран “Хамтын ажиллагаа ба хөрөнгө оруулалтын боломж” Олон улсын бизнес форумыг анх удаа зохион байгуулж, Эрдэнэтийн ирээдүйг тодорхойллоо. Бизнес форумд дөрвөн тивийн 15 орны 40 гаруй компанийн төлөөлөгч чуулж, олон улсын хөрөнгө оруулалт, уул уурхайн салбарын эрх зүйн орчин, эрдэс баялгийн нөөц, техник, технологийн шинэчлэлийн талаар санал солилцон, “Эрдэнэт” үйлдвэрийг хөгжүүлэх чиглэлээр хамтран ажиллахаа илэрхийлэв.
 

Уул уурхайн салбарын төвийн бүсийн чуулганыг Орхон аймагт зохион байгуулав
 
     Монгол улсад Уул уурхайн салбар үүсч хөгжсөний 95 жилийн ойг тэмдэглэн өнгөрүүлэх ажлын хүрээнд Уул уурхайн салбарын төвийн бүсийн чуулганыг “Эрдэнэт” үйлдвэр Орхон аймагт зохион байгуулав.Тус чуулганд төвийн бүсийн найман аймгийн нийт 400 гаруй зочид, төлөөлөгчид оролцож, хариуцлагатай уул уурхайг хөгжүүлэхэд төр, хувийн хэвшлийн байгууллагууд хүчээ нэгтгэн ажиллахыг чухалчиллаа.
 
 
 
Цалин, урамшууллыг нэмэгдүүлэв
 
     Эрдэнэт үйлдвэрийн Ерөнхий захирлын тушаалаар ажилчдын үндсэн цалинг тавдугаар сарын нэгнээс 10 хувиар, ажлын үр дүнгийн урамшууллын сангийн хэмжээг долдугаар сарын нэгнээс үндсэн цалингийн сангийн 20 хүртэл хувиар тус тус нэмэгдүүлэв. Энэ бодлого цаашид ч  үргэлжилнэ. “Эрдэнэт” үйлдвэрийнхээ хөгжил дэвшилд хоёргүй сэтгэлээр зүтгэж, ажлын өндөр бүтээмжтэй ажиллаж буй баялаг бүтээгчдээ ямагт урамшуулж ажиллана гэдгийг үйлдвэрийн удирдлагууд тодотгов.  Ингэснээр “Эрдэнэт” үйлдвэр ажиллагсдынхаа нийгмийн асуудлыг хөгжил дэвшлийнхээ эхэнд эрэмбэлж байгаагаа дахин баталгаажууллаа.
 

Экскаваторын шанага угсрах ажлыг Засвар механикийн завод өөрсдийн хүчээр гүйцэтгэв
     
     Засвар механикийн заводын Металл хийцийн хэсгийн хамт олон “Liebherr”-994 экскаваторын 18м кубын багтаамжтай шанагыг уурхайн уул геологийн нөхцөлд тохируулан шинээр зураг төсөл, технологийг боловсруулж үйлдвэрлэв. Экскаваторын тоног төхөөрөмж, сэлбэг хэрэгслийг дотооддоо  угсарч, засварласан нь  импорт орлох бүтээгдэхүүн үйлдвэрлэлийг дэмжих бодлогын хүрээнд хийгдэж буй эдийн засгийн өндөр үр ашигтай төсөл боллоо.
 


 
“ТОП-100”-г Эрдэнэт үйлдвэр ХХК 15 дахь удаагаа тэргүүллээ
 
     Монголын үндэсний Худалдаа аж  үйлдвэрийн танхимаас жил бүр тодруулдаг “ТОП-100” аж ахуйн нэгжийн жагсаалтыг  Эрдэнэт үйлдвэр ХХК энэ жил 15 дахь удаагаа тэргүүллээ. Монголын үндэсний Худалдаа аж  үйлдвэрийн танхим нь санхүү, эдийн засаг, бизнесийн салбарт манлайлж буй “ТОП-100” аж ахуйн нэгжийг эрэмбэлэхдээ татвар төлөлт, нийгмийн даатгал, хөрөнгө оруулалт, борлуулалтын орлогыг голлон үзсэний дүнд шалгаруулжээ.

 
Мастеруудын анхдугаар зөвлөгөөнийг зохион байгуулав
 
     Үйлдвэрлэлийн ажлын анхан шатны зохион байгуулагч мастеруудын тулгамдаж буй асуудлыг хэлэлцэн, тэдний хөдөлмөрийн  бүтээмж, манлайллын ур чадварыг дээшлүүлэх боломж арга замыг тодорхойлов. Үйлдвэрлэлийн тасралтгүй үйл ажиллагааг ханган, баялаг бүтээж байгаа уурхайчид, тэдний өдөр тутмын ажлын уялдаа холбоог зохицуулж, удирдлага болон ажилчны хоорондын гүүр нь болсон мастеруудын ажлыг үнэлж, “Тэргүүний мастер” өргөмжлөлийг 15 мастерт гардууллаа.
 
 

 
Үйлдвэрлэлийн түүхэнд анх удаа зэсийн металл авалтыг 89 хувьд хүргэв.

     Хэдийгээр боловсруулж буй хүдэр дэх металлын агуулга жилээс жилд буурч буй боловч эрдсүүдийн баяжигдах чанар, техник технологийн оновчлолыг хослуулснаар металл авалтыг нэмэгдүүллээ. Металл авалтыг төлөвлөснөөс илүү хувьд хүргэсэн нь зэс, молибдений үйлдвэрлэлийн  хэмжээг нэмэгдүүлэх боломж олголоо. Энэхүү үзүүлэлтийг уурхайчдын нөр их зүтгэл, өндөр зохион байгуулалтын үр дүн гэж мэргэжилтнүүд үнэлэв.
 
 

“Эрдэнэт” үйлдвэрээс гурван гавьяат, Дэлхийн аваргын хос медальтан төрлөө
 
     ХАБЭАБОХХ-ийн дарга Д.Цагаан-Эрдэнэ Монгол улсын гавьяат уурхайчин, Ерөнхий баяжуулагч, шинжлэх ухааны доктор Ж.Баатархүү Аж үйлдвэрийн гавьяат ажилтан, Ш.Отгонбилэгийн нэрэмжит Технологийн сургуулийн Суурь шинжлэх ухааны тэнхимийн багш С.Мэнджаргал Монгол улсын Гавьяат багш цол тус тус хүртлээ. Улс орныхоо нэрийг тив дэлхийд дуурсгасан спортынхны амжилтын буухиа үргэлжлэв. Хангарьд спорт клубын чөлөөт бөхийн тамирчин, Монгол улсын гавьяат тамирчин Эрдэнэбатын Бэхбаяр Франц улсын нийслэл Парис хотноо болсон чөлөөт бөхийн Дэлхийн аварга шалгаруулах тэмцээнээс хүрэл медаль хүртэж, дэлхийн аваргын хос медальтан боллоо.
 
 
Лхагва, 27 12-р сар 2017 00:00

Аз хурсан айлд зочилсон нь

     Эрдэнэт” үйлдвэрийн ажилтан бүр жил бүрийн өдийд Ерөнхий захирлынхаа нэрэмжит шинэ жилийн баярын цэнгүүнийг битүүхэн хүлээж догдолдог. Учир нь тэр үдэш компанийн 6000 гаруй ажиллагсдын дундаас бүртгэлийн дугаараар Алтан азтан тодорч, хоёр өрөө байрны түлхүүр газар дээр нь гарддаг уламжлалтай. 
     Өнгөрсөн жил Засвар монтажийн цехийн гагнуурчин Пүрэвсүрэнгийн Шижирболд Алтан азтанаар тодорч, монгол гэрээ элит орон сууцаар сольсон. Баярт үйл явдлын ойн дээр тэднийд зочилж амьдралын мартагдашгүй дурсамжаас нь хуваалцахыг зорилоо. Азтаных “Маргад” дээд сургуулийн хойно сүндэрлэх Эрдэнэтдээ дээгүүр зэрэглэлд тооцогдох өндөр байранд оржээ. Цагаан даашинзтай, гурван настай болов уу гэмээр “цасан охин” хаалга нээлээ. П.Шижирболд ээлжийн ажилдаа “мордохоор” зэхэж байв. Гэрийн эзэгтэй гал тогоондоо бууз сэвээд чөлөөгүй. Хүүгийн анги энэ өдөр шинэ жилээ тэмдэглэсэн юм уу гэлтэй үсээ толийтол самнаад цагаан цамцаар гоёж. Хойморт зассан гоёхон гацуурын гэрэл анивчаад, хүүхдийн инээд хөөр цалгиад, хоолны үнэр хамар цоргиод гэр бүлийн халуун дулаан амьсгал угтсан нь юутай таатай. 
 

     Гэрийн эзэгтэй цай аягалах зуур нутаг ус, уурхайчны амьдралд хөл тавьсан түүхийг нь сонирхов. Архангай аймгийн Эрдэнэбулган сумын уугуул П.Шижирболд долоон жилийн өмнө нагац нараа бараадан Эрдэнэсийн хотыг зорин иржээ. Тэр үед хүү нь дөрвөн сартай байсан гэдэг. Өмнө нь Тавантолгойн Дулааны цахилгаан станц, Оюутолгой компанид туслах гагнуурчнаар ажиллаж байсан тэрээр Технологийн сургуульд суралцаж хүнд үзүүлэх мэргэжлийн үнэмлэхтэй болох зорилго өвөрлөн анх ирсэн гэнэ. Сургуулиа төгсөөд тун удаагүй байтал “Эрдэнэт” үйлдвэрийн Засвар угсралтын цехэд гагнуурчин сонгон шалгаруулж ажилд авах зар түгжээ. Хүмүүсийн дунд “Сонгон шалгаруулна гэж худлаа. Орох хүн нь хэдийнэ тодорчихсон байгаа” гэх явган яриа амь бөхтэй оршиж хүсэл зоригийг нь унтрааж байсан ч материалаа бүрдүүлээд өгөхөд илүүдэх юун хэмээн бодож “Эрдэнэт” үйлдвэрийн Ерөнхий захиргааны байрыг зүглэн итгэлгүйхэн алхсан нь саяхан. Сонгон шалгаруулалтад 13 хүн өрсөлдөж, эхний шатны онолын шалгаруулалтаар долоон хүн үлдэхэд мань хүн тогтож. Гэхдээ л “Эзэн нь тодорхой доо...” гэх олны яриа ортой санагдсаар л байсныг нуугаагүй. Дараагийн шатанд мэргэжлийн ур чадвараа бодитоор үзүүлэн шалгуулжээ. Дүн тэр дороо гарч комисс П.Шижирболдын нэрийг дуудахад ёстой магнайгаа хагартал баярласнаа ярив. “Эрдэнэт” үйлдвэрт гурван сар ажиллаад нутгийнхаа довон дээр тоглож өссөн ханьтайгаа хуримаа хийсэн нь амьдралынх нь бас нэгэн сайхан дурсамж.      
 

 
     Тэрээр цаг руу үе үехэн хяламхийх нь ажил руугаа яарч, хагас цаг хууч хөөрөх “виз”-тэйг надад сануулна. Эднийх жилийн өмнө нагац эгчийнхээ хашаанд айлсан гэрт амьдардаг байв. Захын хашааг хэлэх үү, архи зардаг дэлгүүр ойрхныг хэлэх үү, П.Шижирболд шөнийн ээлжинд ажиллахдаа ар гэрийнхэндээ санаа ихэд зовдог байснаа ярив. Хүүхдүүд нялх болохоор эхнэр ажилгүй, ганц хүний цалин амьдралд хаана ч хүрэхгүй. Гэхдээ энэ сайхан үйлдвэр бараадсан юм чинь хэзээ нэгэн өдөр байртай болно доо гэсэн гэгээн мөрөөдөл тээж явсан. Өнөөдөр тэрээр Зууны манлай үйлдвэрт зургаан жил хэртэй ажиллаад л Алтан азтанаар тодорч “оронтой” болсон доо гээд тав тухтай, халуу дүүгсэн байрныхаа хойморт инээд цацруулж сууна. 
     2016 оны арванхоёрдугаар сарын 28-ыг бид эргэн дурслаа. П.Шижирболд ажлаасаа гэртээ ирээд “Өнөөдөр Ерөнхий захирлын шинэ жилтэй. “Эрдэнэт” телевизээр шууд дамжуулна. Байр хожчихвол ч...” гэх аястай юм ярихад эхнэр нь тоомжиргүй өнгөрөөж. Харин хүү Ш.Мөнгөншагай нь удалгүй хувцсаа бэлдээд “унаж”. Тэгснээ “Та нар азын шагналаа очиж авахдаа өмсөх хувцсаа бэлдээч. Тэгээд яг явах болохоор сандрах гэж байгаа юм” гэх нь тэр. Зөнч хүүгийнхээ хэлэхийг ч тоохгүй, ээж нь дүүг нь унтуулах гэж хэвтэснээ хамт дугхийчихэж. Харин торгон агшин ирэхэд хөтлөгч ажилтны бүртгэлийн дугаарыг 86... гэж өндөр дуугаар дуудахад л зүрх нь хүчтэй цохилж сууж чадахгүй догдолж эхэлсэн гэнэ. Дугаар тодорхой болж дэлгэц дүүрэн өөрийнх нь зураг гарахад эхнэр, нөхөр тэврэлдэн, хүүхдүүдээ барьж аван үнсэж тэр гэрт багтахгүй их баяр хөөр болсон тухай тэд одоо ч ярихдаа нүдэндээ нулимстай байна. 
     Утас нь ээлжгүй хангинаж, Ерөнхий захирлын унаа тэднийг авахаар ирж явааг дуулсан улс ёстой л юу өмсөж зүүхээ олохгүй сандарч, хүүгийнх нь хэлсэн орой руу нь орсон аж. Шинэ жилийн нүд гялбам тайзан дээр П.Шижирболдын гэр бүлийнхэн жаахан охиныхоо үсийг ч боож амжаагүй, дэндүү энгийн гарч, хоёр өрөө байрны түлхүүр гардахдаа үг хэлж чадахгүй шахам баярлан байгааг харсан Эрдэнэтчүүд тэр чигтээ алга ташин баяр хүргэсэн. 
 

 
     Алтан азтаны гэргий Б.Даваажав эрх зүйч мэргэжилтэй. Тэрээр хадам аав, ээждээ юу юунаас илүү баярладгаа ярьсан. “Манай хүн дөрвөн хүүтэй айлын хүүхэд. Аавын үг бол “хууль”. Элдэв муу зуршилгүй, ажилдаа үнэнч, олонтой эвсэг, үр хүүхдийнхээ төлөө чин сэтгэлтэй ханийгаа харахаар илүү хайрламаар санагддаг. Зөв явбал зөөлөн зөөлөн замбуулин гэдэг дээ. Миний хань сайн учраас бурхан биднийг шагнасан гэж бэлгэшээж боддог” гэв. Мөн “Эрдэнэт” үйлдвэрийнхээ удирдлага, уурхайчин хамт олондоо үргэлж баярлаж явах болно гэж хэлэхдээ хананд өлгөөтэй жаазтай дурсгалын түлхүүрээ удаан ширтсэн. 
     Өрхийн тэргүүн ажилдаа яарч, энэ гэрийн гүнж Ш.Урангоо цасан бүжгээр биднийг үдэв.
 
 
 
М.ОДГЭРЭЛ
Лхагва, 27 12-р сар 2017 00:00

Уурхайчдын тухай дуу “төржээ”

     Саяхан “Уурхайчин” соёлын ордонд болсон “Сонгодог шуранхай” тоглолт дээр Монгол улсын Соёлын тэргүүний ажилтан Н.Нямсүрэн, Д.Дагиймаа нар уурхайчдад зориулсан хоёр шинэ дуугаар үзэгчдэдээ гэнэтийн бэлэг барьсан. Монгол улсын Соёлын гавьяат зүтгэлтэн Д.Дашдондовын үг, “Морин хуур” наадмын тэргүүн шагналт, хөгжмийн зохиолч Ш.Өлзийбаярын аялгуу “Ухаарлын сүлдтэй уурхайчин”, Монгол улсын Соёлын тэргүүний ажилтан Н.Батжаргалын үг, Р.Эрдэнэцогтын ая “Уурхайчны гэргий” хэмээх уран бүтээл мэндэлжээ. “Ухаарлын сүлдтэй уурхайчин” нь мэргэжлийн хүрээнийхэн чансаагаа сорих “том” бүтээл болсон бол “Уурхайчны гэргий” нь нийтийн дууны хэлбэрээр бүтээгдсэн байна. Энэхүү дууг “Эрдэнэт” үйлдвэрийн Ил уурхайн Үйлдвэр техникийн товчооны дарга П.Түвшинжаргал, Авто тээврийн байгууллагын Үйлдвэр техникийн товчооны инженер Н.Ариунболд гэх уурхайчдын гэргий нар дуулсан нь онцлог юм. “Эрдэнэт” үйлдвэрийн уурхайчин гэр бүлүүдийг дүрсэнд багтаан клип хийлгэх хэтийн зорилго бий талаар дуучин ярьсан юм.
 
 
М.ОД